चेलौ के काम 16
16
पौलुस और सीलास के संग तीमुथियुस
1पौलुस दिरबे सै लुस्तरा सैहर मै बी गओ, और बाकै बहाँ तीमुथियुस नाम को एक चेला मिलो। बाकी अईया यहूदी बिसवासी ही, पर बाको अब्बा यूनानी हो। 2लुस्तरा और इकुनिया के बिसवासी लोगौ मै तीमुथियुस की बड़ी इज्जत ही। 3पौलुस, तीमुथियुस कै अपने संग लेजानै की सोच रओ हो और बानै बाकै अपने संग ले लओ और पौलुस नै यहूदी लोगौ की बजै सै बाको खतना बी करो। कैसेकै बहाँ के यहूदी जौ जानै हे कै बाको अब्बा यूनानी है।
4सिगरे सैहरौं मै जाते भए बे उन सिगरे नियमौ कै बी लोगौ कै सिकाते गए जो ऐरूसलेम मै भेजे भए चेलौ नै और बिसवासिऔ की मंडली के मुखियौं नै बनाए हे। 5तबई सिगरे बिसवासिऔ की मंडली के लोग बिसवास मै पक्के होते गए और संखिया मै बढ़ते गए।
पौलुस को दरसन
6जब पबित्तर आत्मा नै पौलुस और बाके सातिऔं कै एसिया मुलक मै बचन को परचार कन्नै सै मनैह कर दई, तौ बे फिरगिया और गलातिया मै सै होते भए गए। 7और जब बे मूसिया जिला के धौंरे पौंचे तबई उन्नै बिथुनिया जघै मै जानै की सोची पर ईसु की आत्मा नै उनकै बहाँ जान ना दओ। 8तौ बे मूसिया जिला सै होते भए तरोआस सैहर मै पौंचे।
9रात मै जब पौलुस सो रओ हो तौ बानै सपने मै देखो कै एक मकिदुनिया जिला को आदमी जौ बिनती करकै कैरओ है कै, “तू मकिदुनिया जिला मै आ और हमरी सायता कर।” 10बाके जौ दरसन देखनै के बाद हमनै तबई मकिदुनिया जिला जानै की सोची कै, परमेसर नै हमकै बहाँ अच्छी खबर सुनानै के ताँई बुलाओ है।
लुदीया के मन मै बदलाब
11हम तरोआस सै पानी के जिहाज मै बैठे और सुमोतरा नाम के टापू मै पौंचे और दूसरे दिन नियापुलिस मै आए। 12और बहाँ सै हम फिलिप्पी मै पौंचे जो मकिदुनिया जिला को खास सैहर हो और जहाँ रोमी लोग रैहबै हैं बहाँ हम कुछ दिन रुके।
13आराम कन्नै बारे दिन हम सैहर के गेट के बाहार नद्दी के किनार जौ सोचकै गए कै बहाँ पिराथना कन्नै की जघै होगी। इसताँई हम बहाँ बैठकै उन बईयरौं सै बात करल लगे जो इखट्टी भई हीं। 14बहाँ थूआतीरा सैहर की लुदीया नाम की एक परमेसर की भक्तन ही बौ बैंगनी रंग के खास कीमती लत्ता बेचै ही और परभु नै बाको दिल खोल दओ और बौ पौलुस की बातौं कै धियान सै सुनल लगी। 15बानै अपने पूरे टब्बर के संग जल संस्कार लओ और तबई बानै हम सै बिनती करकै कैई, “अगर तुम मैंकै परभु की भक्तन मानौ हौ, तौ मेरे घर चलौ और बहाँ रुकिओ।” तब हमकै बानै अपने घर मै लेजानै के ताँई राजी कर लओ।
पौलुस और सीलास कै जेल मै डान्नो
16जब हम पिराथना कन्नै की जघै मै जा रए हे तौ तबई हमकै एक दासी मिली जिसमै ऐंसी दुसट आत्मा ही जो आनै बारे बखत के बारे मै बताबै ही और अपने मालिक के ताँई भौस्से पैसौ की कमाई को जरिया बन गई ही। 17बौ पौलुस और हमरे पीछे-पीछे चिल्लाते भए जौ कैते आवै ही कै, “जे आदमी परम पिता परमेसर के सेवक हैं और जो हमकै मुक्ति पानै की रस्ता की कथा सुनावै हैं।”
18बौ भौत दिनौ तक ऐंसोई करती रैहई, तबई पौलुस परेसान हो गओ और पिच्छे मुड़कै बा दुसट आत्मा सै कैई, “मैं तेकै ईसु मसी के नाम सै हुकम देवौ हौं कै, जामै सै तुरन्त लिकर जा।” तबई दुसट आत्मा लिकर गई।
19जब बाके मालिकौं नै देखो कै, “हमरी कमाई की आस खतम हो गई है,” तौ तबई पौलुस और सीलास कै पकड़कै चौराए मै अधकारिऔं के धौंरे खैंच के ले गए। 20और उनसै कैललगे कै, “जे लोग यहूदी हैं, और जे हमरे सैहर मै गड़बड़ी कर रए हैं, 21और ऐंसे रीति-रिबाज सिका रए हैं जिनकै सुन्नो और माननो हम रोमी लोगौ के ताँई सई ना हैं।”
22तबई भीड़ के लोग उनको बिरोद करल लगे और अधकारिऔं नै उनके लत्ता फाड़कै लिकार दए और उनकै पीटनै को हुकम दओ, 23और उनकी भौत मार लगानै के बाद उनकै जेल मै डार दओ और दरोगा कै जौ हुकम मिलो कै इनके ऊपर कड़ी नजर रक्खौ। 24जब दरोगा कै जौ हुकम मिलो तौ बानै उनकै जेल के भीतर के कमरा मै रक्खो और उनके पाँऐ लकड़ी मै फसाकै कस दए।
पौलुस और सीलास को जेल सै छुटनो
25आधी रात के बखत पौलुस और सीलास पिराथना करते भए परमेसर के भजन गा रए हे और कैदी उनकी अबाज सुन रए हे। 26तबई एकदम सै बड़ो हालोचालो आओ और जेल की नीह तक हल गई और सिगरे फाटक और कैदी लोगौ की साँकर खुल गंई। 27तबई जेल को दरोगा जगो और उठो तौ बानै जेल के फाटक खुले भए देक्कै जौ सोची कै कैदी भाज गए हैं। तबई बानै अपनी तरवार लिकारकै खुद कै मारनै की सोची।
28तबई पौलुस नै जोर सै चिल्लाकै कैई कै, “खुद कै नुकसान ना पौंचा कैसेकै हम सबई हिंयई हैं।”
29तबई जेल के दरोगा नै मसाल मंगबाई और काँपते भए भीतर गओ और पौलुस और सीलास के पाँऐऔं मै गिरो।
जेल के दरोगा के दिल मै बदलाब
30तबई जेल के दरोगा नै उनकै बाहार लाकै उनसै पूँछी कै, “हे गुरूऔं, मुक्ति पानै के ताँई मैंकै का कन्नो चँईऐ?”
31उन्नै कैई कै, “परभु ईसु मै बिसवास कर तबई तेकै और तेरे टब्बर कै मुक्ति मिलैगी।” 32और उनौनै जेल के दरोगा कै और बाके घर के लोगौ कै परभु को बचन सुनाओ। 33तबई दरोगा नै रात मैई उसई बखत ले जाकै उनके घाब धोए और अपने सिगरे टब्बर के संग बानै जल संस्कार लओ। 34और फिर बौ पौलुस और सीलास कै अपने घर लिआओ और उनकै रोटी खवाई और सिगरे टब्बर नै परमेसर मै बिसवास कन्नै की खुसी मनाई।
35दूसरे दिन अधकारी लोगौ नै अपने सिपाईऔं धौंरे जौ सन्देसो भिजबाओ कै उनकै छोड़ दो।
36जे बात जेल के दरोगा नै पौलुस सै कैंई कै, “अधकारी लोगौ नै तुमकै छोड़नै को हुकम दओ है इसताँई अब तुम खुसी सै जाऔ।”
37तबई पौलुस नै बासै कैई कै, “हम रोमी हैं तब्बी उन्नै हमकै बगैर गलती के लोगौ के सामने मारो और जेल मै डारो, और अब हमकै चुपके सै काए छोड़ै हैं? ऐंसो ना होगो, पर जब तक बे खुद आकै हमकै बाहार ना ले जांगे तब तक हम जांगे ना।”
38सिपाईऔं नै जे बात अधकारी लोगौ सै कैंई कै बे रोमी लोग हैं। तौ तबई बे जौ सुनकै डर गए। 39और तबई अधकारी लोगौ नै आकै उनसै माफी माँगी और बाहार ले जाकै जौ बिनती करी कै जा सैहर सै चले जाऐ। 40और बे जेल से लिकरकै लुदीया के घर पौंचे, और बिसवासी भईयौ सै बात करकै उनकै हिम्मत दई और फिर बहाँ सै चले गए।
Šiuo metu pasirinkta:
चेलौ के काम 16: TKB
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
New Life Compute Institute [NLCI] - CC BY-NC-ND 4.0