मत्ती 13
13
ब्लु ब्लुत्पे अर्त
(मर्कुस् ४:१-१२; लुका ८:४-१०; १०:२३-२४)
1हुजु दीन्रीनो येसु हुजु दीम् ग्यम्से डोङ्ज्यीम् ग्येइ यरी स्येःज्यीम् स्य्हुज्यी। 2ओसेम् थेङ्की कोरोरो य्हक्को म्हीमा र्हुब तज्यी। होत्तज्यीम् थेङ् दोङ्ग गीरी क्रेत्जेत्ज्यी, ओसेम् म्हीमाम् ग्येइ यरीनो रप्टीज्यी। 3थेङ्चे म्हीमात य्हक्को तम्मा अर्तरी चोले सुङ्ज्यी, “म्ही गी ब्लु ब्लुत्परी य्हर्ज्यी। 4ब्लु ब्लुत्मम् गदे ब्लु ग्यम्री दोःज्यी, ओसेम् ङ्यम्ङ्यमा खज्यीम् हुजु ब्लुत चलाज्यी। 5गदे ब्लुम् सेप्र चेक्कीनो मुबे ङ्हच्छ्यङ् युङ्ब जोइ सरी दोःज्यी। सेप्र चेक्कीनो मुबल तज्यीम् फीःबम् ग्योन्नो फीःज्यी। 6तर टा नुप्नले ङ्यीअखम्बल तज्यीम् दीनी फ्याब बीसेम् खर्य्हर्ज्यी। 7गदे ब्लुम् पुजुइ टा मुबे सरी दोःज्यी, ओसेम् पुजुमा नोज्यीम् हुजु फीःबे ब्लुत उप्लाज्यी। 8ल्हो-ल्हो ब्लुम् ज्यबे स नारी दोःज्यी। ओसेम् फीःज्यीम् छर्ज्यीम् कोइचे सय गुन, कोइचे साठी गुन, कोइचे तीस् गुन य्हक्को अन्न रोःज्यी। 9खल्ल थ्येःबे न्हबीङ् मुब, थेचे थ्येःखइ।”
10हुजु लीप्चे डबमा येसुइज खज्यीम्, “थेङ्चे तले म्हीमात अर्तमारी लोप्जेत्प?” बी ङ्योत्ज्यी। 11थेङ्चे डबमात सुङ्ज्यी, “स्वर्ग य्हुल्की न्हङ्की तम्मा स्येःबे लो एङ्यीमात पीन्बल मुब, तर ल्हो-ल्होमात पीन्बल अरे। 12तलेपङ्सम् खल्तेङ् मुब, हुजुत झेन् य्हक्को पीन्स्ये मुब, ओसेम् थेतेङ् ल्हाब सम्मनो तस्ये मुब। तर खल्तेङ् अरे, हुजुल चेक् मुबलेएनो ब्येन्स्ये मुब। 13होत्तज्यीम् ङचे थेङ्यीमात लोप्पे बेलोरी अर्त ग्यम्से लोप्प, तलेपङ्सम् थेङ्यीमाचे च्याबम् च्याब, तर म्रङ्अखम्, ङ्येन्बम् ङ्येन्ब, तर थ्येःज्यीम् गोअखम्। 14यसैया अगम्बक्तचे पङ्बे तम् चोले टोप् तखज्यी-
‘थेङ्यीमाचे थ्येःबम् थ्येःब, तर गोअखम्,
च्याबम् च्याब, तर अम्रङ्।
15 तलेपङ्सम् थेङ्यीमाकी लो अछ्यर्बल मुब,
ओसेम् थेङ्यीमाकी न्हबीङ् न्हादीङ् तबल मुब,
थेङ्यीमाकी मीः च्युम् तबल मुब।
होले अतबल य्हीन्सम्, थेङ्यीमाकी मीचे म्रङ्स्ये मुबल, न्हबीङ्चे थ्येःस्ये मुबल, लोचे गोस्ये मुबल,
थेङ्यीमाकी सेम् ङपट्टी दोःस्ये मुबल,
ओसेम् ङ थेङ्यीमात फेन्न लस्ये मुबल।’ #
यसैया ६:९-१०
16 “तर एङ्यीमाम् मोलम् यङ्बलमा य्हीन्ब। एङ्यीमाकी मीःचे म्रङ्ब ओसेम् न्हबीङ्चे थ्येःब। 17ङ एङ्यीमात देमेन्नो पङ्ब, एङ्यीमाचे म्रङ्बतेङ् थ्येःबे तम्मा य्हक्कोनो अगम्बक्तमातेङ् धर्मी म्हीमाचे ङ्येन्बे सेम् लबल मुबल। तर थेङ्यीमाचे ङ्येन् अम्यङ्, ओसेम् म्रङ्एनो अम्यङ्।
येसुचे ब्लु ब्लुत्पे तम्की अर्थ सुङ्बल
(मर्कुस् ४:१३-२०; लुका ८:११-१५)
18 “ब्लु ब्लुत्पे अर्तइ अर्थ ङ्येनो। 19कोइ म्हीमाचेमी स्वर्ग य्हुल्की बारेरी ङ्येन्बम् ङ्येन्ब, तर गोअखम्। ओसेम् सैतान् खज्यीम् थेङ्यीमाकी सेम्री ब्लुत्पे पर्मेस्वर्की फ्रोइ ब्येन्बोर्ब। थेङ्यीमामी ग्यम्री दोःबे ब्लुमा र्हङ्ब य्हीन्ब। 20सेप्र चेक्कीनो मुबे ङ्हच्छ्यङ् युङ्बजोरी दोःबे ब्लुमा र्हङ्बमी पर्मेस्वर्की फ्रोइ थ्येःब साच्चेनो तङ्ज्यीम् सेम्री थेन्बे म्हीमा य्हीन्ब। 21तर थेङ्यीमाकी बीस्वास्री टा अङ्यीबल तज्यीम् य्हम्बगीकीनो टीब। ओसेम् पर्मेस्वर्की फ्रोइ ङ्येन्बल तज्यीम् दुख खब साच्चेनो थेङ्यीमाचे थेङ्की फ्रोइत बीस्वास् स्य्हेङ्ब पीत्लाब। 22डेत्मी पुजुइ टा मुबे सरी दोःबे ब्लु र्हङ्ब तब, थेङ्यीमाचे पर्मेस्वर्की फ्रोइ ङ्येन्ब, तर चु जम्बुलीङ्की स्हेःमाकी लागीरी छेर्बतेङ् बरु तबे सेम्चे लज्यीम् पर्मेस्वर्की फ्रोइत उप्प ओसेम् हुजुचे रोरो अरो। 23तर डेत्मी स नारी दोःबे ब्लु र्हङ्ब तब। थेङ्यीमाचे पर्मेस्वर्की फ्रोइ ङ्येन्ज्यीम् गोब, ओसेम् सय गुन, साठी गुन, तीस गुन अन्न रोःब।”
सामइ अर्त
24येसुचे देबेनो ल्हो-ल्हो अर्त गी सुङ्जेत्ज्यी, “स्वर्गइ य्हुल् चु र्हङ्ब य्हीन्ब, म्ही गीचे र्हङ्की म्रङ्री ज्यबे ब्लु ब्लुत्ज्यी। 25तर तीरेत् म्हुन जम्मनो न्हुःबे बेलोरी थेइ सत्तुर् खज्यीम् व्ह म्रङ्री सामइ ब्लु ब्लुत्थेन्ज्यीम् य्हर्ज्यी। 26व्ह नम् डोङ्बे बेलोरी सामएनो बक्च्य नोबल म्रङ्ज्यी।
27 “ओसेम् म्रङ्की न्याबोइ योक्पोमा खज्यीम् थेत पङ्ज्यी ‘न्याबो, थेङ्चे म्रङ्री ज्यबे ब्लु ब्लुत्जेत्पल अय्हीनो स्यीम्? म्रङ्री साम खनचे खज्यी?’ 28न्यबोचे पङ्ज्यी, ‘खलपङ्लेनो सत्तुर्चे चोले स्य्हेङ्बल य्हीन्ब।’ ओसेम् योक्पोमाचे पङ्ज्यी, ‘साममा स्योत्लाबरी ङ्यीमा ङ्यीथोब?’
29 “तर न्याबोचे पङ्ज्यी, ‘होले थलउ, अय्हीन् पङ्सम् एङ्यीमाचे सामतेङ् बक्च्य न्होर्ज्यीम् व्हएनो ओर्लास्ये मुब। 30अन्न दुत्पे बेलो अतगदेसम्म ङ्य्हीतनो छर्पुङो। ओसेम् अन्न दुत्पे बेलोरी ङ नङ्बोमात, ङोन्ग्यम् साममा स्योत्ज्यीम् ख्रङ्बरी मुरा लउ, ओसेम् व्हमी दुत्ज्यीम् ङइ बर्री थेनो’ बी पङ्स्ये मुब।”
पासाइकी ब्लुतेङ् खमीरकी अर्त
(मर्कुस् ४:३०-३४; लुका १३:१८-२१)
31येसुचे देबेनो ल्हो-ल्हो अर्त गी सुङ्ज्यी, “स्वर्गइ य्हुल् पासइकी ब्लु फुम् र्हङ्ब य्हीन्ब। हुजु म्ही गीचे बोर्ज्यीम् म्रङ्री ब्लुत्ज्यी। 32ब्लुन्हङ्री गोदोब्न्हङ् ज्यीत तलेनो हुजु फीःब बीसेम् म्रङ्री मुबे ल्हो-ल्हो डब्-डुब्की दोङ्बोमा बीम ङ्हच्छ्यङ् तब। ओसेम् ङ्यम्ङ्यमा खज्यीम् हुजु दोङ्बोइ य्हर्ङमारी जङ्मा स्य्हेङ्ब।”
33येसुचे देबेनो ल्हो-ल्हो अर्त सुङ्ज्यी, “स्वर्गइ य्हुल् खमीर् र्हङ्ब य्हीन्ब। हुजु अमकोल गीचे चेक् कीन्ज्यीम् पती सोम् ब्रारी मोल्ब, ओसेम् हुजु जम्मनो ब्रा खमीर्चे फुब।”
34येसुचे य्हक्को म्हीमात जम्मनो तम्मा अर्तरी सुङ्जेत्प मुबल। थेङ्चे थेङ्यीमात अर्त असुङ्नले तेएनो लोप्अजेत्। 35ओसेम् पर्मेस्वर्चे अगम्बक्त ग्यम्से पङ्बे तम् टोप् तज्यी-
“ङ एङ्यीमातेङ् अर्तमारी तम् लस्ये मुब,
ओसेम् जम्बुलीङ् ठुङ्बे बेलो य्हङ्से छुम्बे तम्मा स्येत्स्ये मुब।”#भजन्सङ्ग्रह ७८:२
सामइ तम्की अर्त
36हुजु लीप्चे येसु य्हक्को म्हीमात ख्लेथेन्ज्यीम् दीम्न्हङ् वङ्जेत्ज्यी, ओसेम् डबमा थेङ्ज खज्यीम्, “ङ्यीमात व्ह म्रङ्की सामइ अर्तइ अर्थ सुङ्जेतो” बी पङ्ज्यी। 37येसुचे थेङ्यीमात सुङ्ज्यी, “ज्यबे ब्लु ब्लुत्पे म्हीम् म्हीइ ज य्हीन्ब। 38म्रङ्मी चु जम्बुलीङ् य्हीन्ब, ज्यबे ब्लुमामी स्वर्गइ य्हुल्की म्हीमा य्हीन्ब, ओसेम् साममी सैतान्की म्हीमा य्हीन्ब। 39सामइ ब्लु ब्लुत्पे सत्तुर्मी सैतान् य्हीन्ब, अन्न दुत्पे बेलोमी जम्बुलीङ्की ज्युःकी दीन् य्हीन्ब, ओसेम् अन्न दुत्पतेङ् थेन्बे लक् स्य्हेङ्बे नङ्बोमाम् स्वर्गदुत्मा य्हीन्ब। 40साममा मेरी ख्रङ्बरी र्हुब् लब र्हङ्ले जम्बुलीङ्की ज्युःकी दीन्री होलेनो तस्ये मुब। 41म्हीइ जचे थेइ स्वर्गदुत्मात पीत्स्ये मुब, ओसेम् थेङ्यीमाचे पाप् स्य्हेङ्बलमातेङ् ल्हो-ल्होत पाप् स्य्हेङ्न लपुङ्बलमात थेइ य्हुल् ग्यम्से र्हुब लस्ये मुब। 42ओसेम् थेङ्यीमात खेमेएनो अस्यीबे मे ल्हम्न्हङ् ख्लापीत्स्ये मुब। हुजुरी थेङ्यीमा स क्रीतीक्ज्यीम् क्रास्ये मुब। 43हुजु लीप्चे धर्मीमाम् अपइ य्हुल्री दीनी र्हङ्ले सर्स्ये मुब। खल्ल थ्येःबे न्हबीङ् मुब, थेचे थ्येःखइ।
छुम्बे सम्पत्तीतेङ् मोतीइ अर्त
44 “स्वर्गइ य्हुल्मी सन्हङ् बुब्थेन्बे सम्पत्ती र्हङ्ब य्हीन्ब। म्ही गीचे हुजु यङ्ब ओसेम् देबेएनो गप्थेन्ब। ओसेम् थे तङ्ज्यीम् य्हर्ज्यीम् र्हङ्की मुब थम्चे सम्पत्तीमा चुङ्ब, ओसेम् हुजु म्रङ् ग्लुब।
45 “स्वर्गइ य्हुल् ज्यबे मोती म्हइबे छोङ्बो गी र्हङ्बएनो य्हीन्ब। 46थेचे य्हक्को सेइ फाथोबे मोती यङ्ब बीसेम् य्हर्ज्यीम् र्हङ्की मुब थम्चे सम्पत्तीमा चुङ्ब ओसेम् हुजु मोती ग्लुब।
तर्ङ उप्पे ग्यङ्की अर्त
47 “स्वर्गइ य्हुल् ग्येरी ल्हीःबे ग्यङ् र्हङ्बएनो य्हीन्ब। हुजुरी थोचेथोइ तर्ङमा स्यप्प। 48ग्यङ् तर्ङचे प्लीङ्ब बीसेम् म्हीमाचे यरी छेङ्बब ओसेम् थेङ्यीमा टीज्यीम् ज्यबे तर्ङ जतीत फेःज्यीम् तङ्लोरी थेन्ब ओसेम् अज्यबे तर्ङमा ख्लापीत्प। 49चु जम्बुलीङ्की ज्युःकी दीन्रीएनो होलेनो तस्ये मुब। स्वर्गदुत्मा खज्यीम् धर्मीमाकी गुङ्से दुस्ट म्हीमात फेःस्ये मुब। 50ओसेम् थेङ्यीमात खेमेएनो अस्यीबे मे ल्हम्न्हङ् ख्लापीत्स्ये मुब। हुजुरी थेङ्यीमा स क्रीतीक्ज्यीम् क्रास्ये मुब।”
51येसुचे डबमात, “एङ्यीमाचे चु जम्मनो तम्मा गोज्यी?” बी ङ्योत्जेत्ज्यी। ओसेम् थेङ्यीमाचे, “गोज्यी” बी पङ्ज्यी। 52हुजु लीप्चे थेङ्चे थेङ्यीमात सुङ्ज्यी, “होत्तज्यीम् स्वर्गइ य्हुल्की बारेरी स्येःबे जम्मनो धर्म लोप्पोन्मा दीम्की न्याबो र्हङ्ब तब। थेचे र्हङ्की बर्ग्यम्से छार् स्हेःमाएनो तेत्प ओसेम् दुक्प स्हेःमाएनो तेत्प।”
नासरत्री येसुत स्वीकार् अस्य्हेङ्बल
(मर्कुस् ६:१-६; लुका ४:१६-३०)
53चु अर्तमा सुङ्जेत्प बीसेम् येसुचे हुजु ग्ला ख्लेथेन्ज्यीम् 54थेङ् र्हङकी ज्यीद सहर् नासरत्री स्येःजेत्ज्यी। थेङ्चे हुजुरी म्हीमात यहुदीमा र्हुब् तबे दीम्री लोप्जेत्ज्यी। थेङ्चे लोप्जेत्पल थ्येःज्यीम् थेङ्यीमा तेःङेन् तज्यीम् पङ्ज्यी, “थेचे चोतेबे बुद्दीतेङ् तेःङेन्की लक् स्य्हेङ्बे सक्ती खनचे यङ्ज्यी? 55थे हुजु स्यीङ्कर्मीइ ज अय्हीनो स्यीम्? थेइ अमएनो मरीयम् अय्हीनो स्यीम्? याकुब्, योसेफ्, सीमोन्तेङ् यहुदा थेइ अलेमा अय्हीनो स्यीम्? 56ओसेम् थेइ अङमाएनो जम्मनो चुरी मुब अय्हीनो स्यीम्? खले थेचे चु जम्मनो स्य्हेङ्ब खम्ब?” 57ओसेम् थेङ्यीमाचे थेङ्त पतइअती। ओसेम् येसुचे थेङ्यीमात सुङ्जेत्ज्यी, “अगम्बक्तत ल्हो-ल्हो ग्लामा जम्मरीनो स्य्हेस स्य्हेङ्ब, तर र्हङ्की ग्लातेङ् म्हीमाचेकीनो स्य्हेस अस्य्हेङ्।” 58ओसेम् थेङ्यीमाकी बीस्वास् अरेबल तज्यीम् येसुचे हुजु ग्लारी तेःङेन्की लक्मा य्हक्को स्य्हेङ्अजेत्।
Šiuo metu pasirinkta:
मत्ती 13: WTDG
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2025 by Mother Tongue Translators Society, Nepal Bible Society
and Wycliffe Bible Translators, Inc.