२ थेसलोनिकी 3
3
प्रार्थनौ लागि बिन्ती
1अन्तिमाङ डाजेभाइको र डैबहिनीको, नाखुरीकुङ मीघ्याङ छान्नाङ लेखा न प्रभुओ सेछ समाचार छिटो बड्डीस्ख्यो, र इचे आदर डुप्ख्यो डेयार कानुङ लागि प्रार्थना जाट्न यान्ही। 2अनि कुडीक जना भर्मीकोखाटा विश्वास मालेचबाटै परमेश्वरै कानकी खराब भर्मीको लकीङ जोगडीख्यो डेम प्रार्थना जाट्न यान्ही। 3तर प्रभु च विश्वासीलो ले, होसकै न नाखुरीककी बलियो खास्ले र होसे शैतान लकीङ जोगडीयार डाले। 4कानै डेच लेखा न नाखुरीकै जाट्न न ले र जाट्ले डेयार कानै प्रभुवाङ न पूरा भरोसा डामने। 5परमेश्वरै नाखुरीकुङ हृदयकी जाट्च माया र ख्रीष्टौ सहडीच शक्ति बुझडीस्की प्रभुये न डोरीख्यो।
पट्टकै काम जाट्की न पर्ले
6ङौ डाजेभाइको र डैबहिनीको, कानुङ प्रभु येशू ख्रीष्टौ म्यार्मीनाङ कान नाखुरीककी आज्ञा याल्हे, अल्छी विश्वासीको र कानै याछ शिक्षा मामन्डीच विश्वासीको लकीङ लोस ङुनी। 7हीजैडेनाङ नाखुरीकखाटा लेनाङ कानै अल्छी जाटार माङुवा। कानै लेखा न नाखुरीकै र जाट्की पर्ले डेच कुरा च नाखुरीककी थाहा न ले। 8नाखुरीक सुकीर दु:ख माहीङ डेयार कानै नाबीक नाम्सीन मेहनत जाटार काम जाटा। पैसा माह्याम कानै सुखाटा र हीर माज्या। 9कानै नाखुरीक लकीङ सहायता डुप्च अधिकार मालेचये होइन, तर नाखुरीकुङ लागि नमूना छान्की कानै इट जाटा। 10नाखुरीकखाटा लेनाङ न कानै नाखुरीककी डेमन्या, “इडीक सुयेर काम माजाट्ले डेनाङ होचे माज्याख्यो।”
11हीजैडेनाङ कानै सेमने, की नाखुरीक मध्याङ कुडीक जना च अल्छीको लेटा। होखुरीक लाहा चहिँ हीर काम माजाट्ले, तर फोकै जाट्च कामाङ व्यर्थै मीहुट काले।
12अब याङ्च भर्मीकोलाक प्रभु येशू ख्रीष्टौ म्यार्मीनाङ कान आज्ञा र अर्ती याल्हे, की होखुरीकै माच्याक्ङ लहो काम जाट्ख्यो र लहो जीविका क्योट्ख्यो। 13तर डाजेभाइको र डैबहिनीको, नाखुरीक चहिँ भलाइ जाट्च कामाङ सेन र माम्हुङ्की। 14नाखुरीक मध्याङ सुयेर कानै इसे चिठीयाङ रीक्च कुरा इडीक मन्डीकी इन्कार जाट्ले डेनाङ, होसे भर्मीकी चीन्डीम डाकी र होसेखाटा हीर सङ्गत माजाट्की, र होसे मेल्हा न काराम सेकी पर्ले। 15तर होङ्चकोलाक र शत्रु लेखा माजाट्न लहो न विश्वासी डाजेभाइको र डैबहिनीकोलाक लेखा न जाटार चेतावनी यान्ही।
अन्तिम अभिवादन
16अब कानकी शान्ति याछ प्रभु लहे न सधैँ नाखुरीककी पट्ट न किसिमै शान्ति याख्यो। नाखुरीक पट्टकोखाटा प्रभु ङुख्यो।
17ङा पावलै, लहो न मीहुटै इसे अन्तिम अभिवादन रीकार याम्हकामन ले। ङै रीक्च पट्ट न चिठीयाङ याङ्च न सही जाट्च जाट्नने। ङा इटजाट्न न रीक्ले। #३:१७ ङा इटजाट्न न रीक्ले: होडीक बेलुङ समयाङ लहो चिठी रीक्ङ याछ अरु नै भर्मीको छान्नन्या अनि चिठीयो अन्तिमाङ चहिँ होसे चिठी रीक्की लैडीच भर्मीये प्रमाण याखीयो लागि डट लार हीर शब्दको रीक्ङन्या।
18कानुङ प्रभु येशू ख्रीष्टौ अनुग्रह नाखुरीक पट्टकोखाटा ङुख्यो।
© 2025 by Mother Tongue Translators Society and Wycliffe Bible Translators, Inc.