२ थेसलोनिकी 2
2
मुख्य दुष्ट भर्मी
1ङौ डाजेभाइको र डैबहिनीको, कानुङ प्रभु येशू ख्रीष्ट फेरि राल्हे डेच बारेयाङ अनि होसकोकी डुप्की कान काठोवाङ भेला छान्ने डेच बारेयाङ नाखुरीककी डेले, 2की कुसेर अगमवाणी वा प्रचार वा कुसेर चिठीये प्रभु राम्हभ्यामने डेम सेटाका डेनाङ, होसे कुरा कान लकीङ राछ औला डेम आर्मीटार नाखुरीक माआतडीस्की न त नाखुरीकुङ मीमन न बिचलित छान्ख्यो। 3तर नाखुरीककी सुयेर अनि कुसेर किसिमै झुक्कडीकी माडीन्ख्यो। हीजैडेनाङ पहिला परमेश्वरौ विरोधाङ बाड्को विद्रोह माछान्ठरसम्म र नाश छान्की पर्च व्यवस्था भङ्ग जाट्च भर्मी माह्राठरसम्म प्रभुओ दिन माह्राले। 4होचे लाहाकी न बाड्को खासार भर्मीकै परमेश्वर डेम आर्मीट्च पट्ट न कुराकोलाक र पूजा जाट्च पट्ट न ठोकौ विरोध जाट्ले। होचे याङ्चसम्म जाट्ले की परमेश्वरौ मन्दिराङ पर्यार लहे लाहाकी न परमेश्वर डेले। 5ही नाखुरीकै माआर्मीट्ने, ङा नाखुरीकखाटा काठोवाङ लेनाङ ङै इसे पट्ट न कुराको च नाखुरीककी डेमन्या, होइन र? 6होसे दुष्ट भर्मी मेन समय राछ न्हुइङ डाङ्ले। चाहाँ न याङ्च कुरा छान्की क्योट्की माह्याखीयो लागि होसकी रोकडीम डामने। इसे कुरा च नाखुरीककी थाहा न ले। 7होसे व्यवस्था भङ्ग जाट्च भर्मीयो शक्तिये अघि लकीङ न काम जाट्न न ले। तर होसकी रोकडीम डाच शक्ति माहटडीस्ठर होच्यो दुष्ट काम बाहिर माडाङ्ले। 8होटै होसे व्यवस्था भङ्ग जाट्च भर्मी डाङ्ले। प्रभु येशू रान्हाङ होसकुङ ज्योतियो शक्तिये होसकुङ मेङ्गेरुङ सासै होसकी नाश जाट्ले।
9होसे दुष्ट भर्मीये शैतानौ शक्ति लार राल्हे र पट्ट खालुङ झूटो चिन्हको र अचम्मौ कामको जाट्ले। 10होचे नाश छान्च जति पट्टकी होच्यो दुष्ट काम लकीङ छलीले हीजैडेनाङ होखुरीकै मुक्ति याछ सत्यकी माया जाट्की र होस अनुसार जीवाकी मीमन माजाटा। 11होटबाटै होखुरीकै झूटो कुराकी न विश्वास जाट्ख्यो डेयार परमेश्वरै होखुरीक मीटाक काट छल जाट्च शक्ति बीर्न्हकाले। 12होखुरीकै सत्यकी विश्वास माजाटार अन्याय जाट्कीयाङ न माह्राङ्छकै सजाय डुप्ख्यो डेयार न परमेश्वरै याङ्च जाट्च हो।
मुक्तियो लागि भाक्चको
13प्रभुये माया जाट्च डाजेभाइको र डैबहिनीको, नाखुरीकुङ लागि कानै सधैँ धन्यवाद याखी न पर्ले, हीजैडेनाङ सुरुलकीङ न पवित्र आत्मौ पवित्र खास्च काम लकीङ र सत्यता मीटाक विश्वास लकीङ जीवाकी परमेश्वरै नाखुरीककी चुन्डीया। 14इच्यौ न लागि कानै सेटाक्च सेछ समाचार लकीङ कानुङ प्रभु येशू ख्रीष्टौ महिमा डुप्की डेयार होसकै नाखुरीककी आर्घाच हो। 15होटबाटै डाजेभाइको र डैबहिनीको, स्थिर छानार ङुनी र कानै डेच अथवा रीक्च सत्य शिक्षाकी मन्डीनी। 16कानुङ प्रभु येशू ख्रीष्ट र परमेश्वर बोये कानकी माया जाटा र होसकुङ अनुग्रहै सेन र अन्त्य माछान्च उत्साह र सेछ आशा याहा। 17होसकै पट्ट न सेछ काम कुराङ साहस र शक्ति नाखुरीककी याख्यो।
© 2025 by Mother Tongue Translators Society and Wycliffe Bible Translators, Inc.