ဢီႉသႃႇယႃႉ 49
49
ၶႃႈထႃႇဝရႃႉၽြႃးတင်းလၢႆ
1ၵုၼ်ၼႂ်းၼမ်ႉၶဝ်ဢိူၺ်း၊ ဢွၼ်ၵၼ်ငိၼ်းၵႂၢမ်းၵဝ်တႃႉ။ မဵဝ်းၵူၼ်းဢၼ်ယူႇၵႃႈတီႈဢၼ်ၵႆၼႃႇတင်းလၢႆၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။ ထႃႇဝရႃႉၽြႃး ႁွင်ႉဢဝ်ၵဝ်ၸဵမ်မိူဝ်ႈဢၼ်ၵဝ် ၸႃႉၵိူတ်ႇလဵင်ႉမႃး ၼၼ်ႉလႄႈ မၼ်းၸဝ်ႈမၢတ်ႈမၢႆၼႃႇမႃႉၸိုဝ်ႈသဵင်ၵဝ်ဝႆႉ ၸႃႉၸဵမ်မိူဝ်ႈၵႃႈၼႂ်းတွင်ႉမႄႈၵဝ်ၼၼ်ႉဢေႃႈ။- 2မၼ်းၸဝ်ႈႁႂ်ႈသူပ်းၵဝ် ပဵၼ်ၸိူဝ်ႉၼင်ႇလၢပ်ႇဢၼ်ၽၢႆၼၼ်ႉသေလႄႈ ဢဝ်ၵဝ်သိူင်ႇလပ်ႉဝႆႉ ၵႃႈၼႂ်းႁူမ်ႈၵွင်ႉငဝ်းမိုဝ်းမၼ်းၸဝ်ႈ ဢေႃႈ။ မၼ်းၸဝ်ႈႁႂ်ႈၵဝ်ပဵၼ်ပၢႆပိုၼ်ၵၢင်ႇ ဢၼ်လပ်ႉသူၺ်းမိုၼ်ႈလီၼၼ်ႉလႄႈ ဢဝ်ၵဝ်သိူင်ႇမႅပ်ႉဝႆႉ ၵႃႈၼႂ်းမူၵ်ႇပိုၼ်မၼ်းၸဝ်ႈ ဢေႃႈ။- 3မၼ်းၸဝ်ႈမီးဢမိင်ႉတီႈၵဝ်လႄႈဝႃႈ၊ ဢီႉသရေႇလႃႉဢိူၺ်း၊ မႂ်းပဵၼ်ၶႃႈၵဝ်ဢေႃႈ။ မုၼ်ၽုင်းၵဝ်တၵ်းထၢင်ႇသႃးၵွပ်ႈပိူဝ်ႈမႂ်းဢေႃႈ၊ ဝႃႈၼင်ႇၼႆယဝ်ႉ။- 4ၵဝ်ၵေႃႈလၢတ်ႈလႄႈဝႃႈ၊ ယင်းဢမ်ႇမီးဢၵျူဝ်းလႄႈ ၵဝ်လႆႈသၢင်ႈႁဵတ်းယဝ်ႉ။ ႁႅင်းၵဝ်လႆႈသဵင်ႈလၢႆလၢႆလွၵ်ႇလွၵ်ႇ ဢမ်ႇပွင်ႇလွင်ႈၵႃႈသင်ယဝ်ႉ။ ၵူၺ်းၵႃႈ ဢမူႉၵဝ်ၼႆႉမီးယူႇတီႈ ထႃႇဝရႃႉၽြႃးလႄႈ ၵႃႈၶၼ်ဢၼ်ၵဝ်လႆႈၶၢမ်ႇၵေႃႈ မီးယူႇၵႃႈၼႂ်းမိုဝ်း ၽြႃးပဵၼ်ၸဝ်ႈၵဝ်ဢေႃႈ၊ ဝႃႈၼင်ႇၼႆဢေႃႈ။- 5ထႃႇဝရႃႉၽြႃး ဢၼ်ႁဵတ်းၵဝ်ပဵၼ်မႃး ၸႃႉၸဵမ်မိူဝ်ႈၵႃႈၼႂ်းတွင်ႉမႄႈ ႁႂ်ႈလႆႈပဵၼ်ၶႃႈမၼ်းၸဝ်ႈ ပုၼ်ႈလွင်ႈၼင်ႇႁိုဝ်တၵ်းလႆႈဢဝ် မဵဝ်းယႃႇၵုပ်ႈ သမ်ႉၶိုၼ်းမႃးၸူးတီႈမၼ်းၸဝ်ႈ ႁႂ်ႈမဵဝ်းဢီႉသရေႇလႃႉ မီးတၢင်းဢၼ်ၸူႉၵၼ်တုမ်ၵၼ် တီႈမၼ်းၸဝ်ႈ ဢိၵ်ႇတင်း လွင်ႈၼင်ႇႁိုဝ် ၵဝ်တၵ်းမီးသရေႇသိုဝ်ႈၼႃႈတႂ်ႈတႃ ထႃႇဝရႃႉၽြႃးလႄႈ ၽြႃးပဵၼ်ၸဝ်ႈ ၵဝ်တၵ်းပဵၼ် ႁႅင်းတၼ်းၶူဝ်းၵဝ်ၼၼ်ႉ မီးဢမိင်ႉဝႆႉၸမ်ႉ၊- 6လွင်ႈတၢင်းဢၼ် မႂ်းပဵၼ်ၶႃႈၵဝ် ႁႂ်ႈလႆႈယုၵ်ႉယွင်ႈမဵဝ်းယႃႇၵုပ်ႈ ၵူႈမဵဝ်းလႄႈႁႂ်ႈမဵဝ်းဢီႉသရေႇလႃႉ ဢၼ်လွတ်ႈၽေးလွတ်ႈရၢၼ်ႇ လႆႈပဵၼ်ၸိူဝ်ႉၼင်ႇ ပၵ်းၵဝ်ႇပိူင်ၵဝ်ႇၼၼ်ႉၸိုင် ပဵၼ်လွင်ႈတၢင်းဢၼ်လဵၵ်ႉဢၼ်ဢွၼ်ႇဢေႃႈ။ လိူဝ်တွၼ်းသေလွင်ႈတၢင်းၼၼ်ႉ ဢမ်ႇၵႃး၊ ၵဝ်ၶၢၼ်းမႂ်းဝႆႉပုၼ်ႈဢၼ်တၵ်းပဵၼ် ဢၼ်လႅင်းတီႈၵူၼ်း တၢင်ႇၸိူဝ်ႉတၢင်ႇၶိူဝ်းတင်းလၢႆ ႁႂ်ႈမႂ်းလႆႈႁဵတ်းတၢင်းဢၼ် ၵႄႇသႄႇၶျွတ်ႈဢဝ် ၵဝ် တေႃႇထိုင်ႁွတ်ႈတီႈလႅၼ်သုတ်းလိၼ်မိူင်းယဝ်ႉ၊ ဝႃႈၼင်ႇၼႆဢေႃႈ။- 7ထႃႇဝရႃႉၽြႃး ၸဝ်ႈဢၼ်ထုတ်ႇဢဝ် မဵဝ်းဢီႉသရေႇလႃႉ၊ ၸဝ်ႈဢၼ် မူတ်းၸၢင်ႇမဵဝ်းၶဝ်ၼၼ်ႉ မီးဢမိင်ႉဝႆႉ တီႈၵေႃႉဢၼ် ၵူၼ်းတင်းလၢႆႁဵတ်းဢမ်ႇပေႃးၼင်ႇႁိုဝ်။ ဢၼ်ပဵၼ်တီႈဢၼ်မိူင်းတင်းမိူင်း လီႁင်ႈဢဵတ်ႇသဵတ်ႇ၊ ဢၼ်လႆႈၶၢမ်ႇႁဵတ်းၶႃႈ တီႈၶုၼ် တင်းလၢႆၼၼ်ႉၸမ်ႉ၊ ၵွပ်ႈပိူဝ်ႈ ထႃႇဝရႃႉၽြႃး ဢၼ်မီးသဵတ်ႈၸႃႇ၊ ၽြႃးဢၼ်မူတ်းၸၢင်ႇ မဵဝ်းဢီႉသရေႇလႃႉ ဢၼ်လိူၵ်ႈၵဵပ်းဢဝ်မႂ်း ၼၼ်ႉလႄႈ ၶုၼ်ႁေႃၶမ်း တင်းလၢႆတၵ်းႁၼ်လႄႈ ဢွၼ်ၵၼ်လုၵ်ႉဢေႃႈ။ ၶုၼ်တင်းလၢႆၵေႃႈတၵ်းႁၼ်လႄႈ ဢွၼ်ၵၼ် ၵူဝ်းၵႂၢႆႇဢေႃႈ။- 8ထႃႇဝရႃႉၽြႃး မီးဢမိင်ႉဝႆႉၸမ်ႉ၊ ၵဝ်ထွမ်ႇဢဝ်ၵႂၢမ်းမႂ်း ၼႂ်းၶိင်ႇၵႃႇလႃႉဢၼ်လီ ထုၵ်ႇၸႂ်ၵျိူၵ်ႈၸႂ် ၼၼ်ႉလႄႈ ၵဝ်ၸွႆႈထႅမ်မႂ်းယူႇ ၼႂ်းမိုဝ်ႉဝၼ်းတၢင်းဢၼ် ၵႄႇသႄႇၶျွတ်ႈဢဝ် ၼၼ်ႉယဝ်ႉ။ ၵဝ်တၵ်းပႂ်ႉလူပႂ်ႉတူၺ်းမႂ်းလႄႈ ၶၢၼ်းမႂ်းဝႆႉပုၼ်ႈဢၼ်တၵ်းႁဵတ်း ပတီႉၺိၺ်ႇတြႃး တီႈၵူၼ်းတင်းလၢႆ ႁႂ်ႈမႂ်းလႆႈပွင်ႁဵတ်းပွင်မႄးမိူင်းၸဝ်ႈယူႇ သေလႄႈ ႁႂ်ႈၶဝ်လႆႈၶၢမ်ႇဢဝ်ဢမူၺ်ႇ တီႈဢမူၺ်ႇဢၼ်သဵတ်ႇဢၼ်ယဵၼ် ၸိူဝ်းၼၼ်ႉ၊- 9ဢိၵ်ႇတင်း ႁႂ်ႈလႆႈလၢတ်ႈတီႈၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၶျုၵ်ႈဝႆႉၼၼ်ႉလႄႈဝႃႈ၊ ဢွၵ်ႇမႃးတႃႉ၊ ဝႃႈၼင်ႇၼႆလႄႈ လၢတ်ႈတီႈ ၶဝ်ၸိူဝ်းဢၼ် ယူႇၼႂ်းဢၼ်လပ်းသိင်ႇၼၼ်ႉလႄႈဝႃႈ၊ ဢဝ်ႁႂ်ႈတူဝ်သူပေႃႇမႃးတႃႉ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ၶဝ်ၼၼ်ႉ တၵ်းလႆႈၵိၼ်ၸွမ်းတႃႈၸွမ်းတၢင်းလႄႈ ထူပ်းတီႈၵိၼ်ၵႃႈၼိူဝ် တီႈဢၼ်သုင်ဢၼ်ႁႅင်ႈဢၼ်ႁွင် တင်းသဵင်ႈတင်းလူင်ဢေႃႈ။- 10ၶဝ်ၼၼ်ႉဢမ်ႇလႆႈဢိုပ်း တၢင်းၵိၼ်တၢင်းၶူပ်း။ ဢမ်ႇလႆႈယၢၵ်ႇၼမ်ႉယၢၵ်ႇၼၢႆး။ ဢမ်ႇလႆႈၶၢမ်ႇဢၼ်မႆႈဢၼ်ႁွၼ်ႉ။ ဢရွင်ႇသၢႆၵၢင်ဝၼ်း ဢမ်ႇလႆႈတိူဝ်ႉဢမ်ႇလႆႈထုၵ်ႇ။ လွင်ႈမၼ်းၸမ်ႉ ၸဝ်ႈဢၼ်ဢဵတ်းလူၶဝ်ၼၼ်ႉ တၵ်းဢဝ်ၶဝ်သူင်ႇၵႂႃႇလႄႈ ၼႄပၼ်သဵၼ်ႈတၢင်း ၵႃႈတီႈ ႁိမ်းၼမ်ႉဢွၵ်ႇႁူးတင်းလၢႆဢေႃႈ။- 11ၵဝ်တၵ်းႁႂ်ႈလွႆၵဝ် ၵႃႈမီးပဵၼ်သဵၼ်ႈတၢင်းဢၼ်တၵ်းၵႂႃႇလႄႈ တႅၼ်ႈလိၼ်ၵဝ်တင်းလၢႆၵေႃႈ တၵ်းလႆႈသုင်ဢေႃႈ။- 12တူၺ်းလူး၊ ၶဝ်ၸိူဝ်းၼႆႉ တၵ်းလုၵ်ႉသေၵႃႈတီႈဢၼ်ၵႆပုၼ်ႉမႃးဢေႃႈ။ တူၺ်းလူး၊ ၶဝ်ၸိူဝ်းၼၼ်ႉ တၵ်းလုၵ်ႉသေၵႃႈတီႈၼႃႈတၢင်းႁွင်ႇ ဢိၵ်ႇတင်းၵႃႈတီႈၼႃႈဝၼ်းတူၵ်းမႃးဢေႃႈ။ ၶဝ်ၸိူဝ်းၼၼ်ႉၵေႃႈ တၵ်းလုၵ်ႉသေၵႃႈတီႈမိူင်း သီႉၼိမ်ႇမႃးဢေႃႈ၊ ဝႃႈၼင်ႇၼႆဢေႃႈ။- 13ၽႃႉၵၢင်ႁၢဝ်ဢိူၺ်း၊ ႁဵတ်းၵႂၢမ်းတႃႉ။ လိၼ်မိူင်းဢိူၺ်း၊ မီးတၢင်းဢၼ်ၸူမ်းသိူဝ်းတႃႉ။ လွႆတင်းလၢႆၶဝ်ဢိူၺ်း၊ ဢွၼ်ၵၼ်ႁဵတ်းၵႂၢမ်းဢၼ်သႂၢင်ႇသိူဝ်းတႃႉ။ လွင်ႈမၼ်းၸမ်ႉ ထႃႇဝရႃႉၽြႃး ႁႂ်ႈၵူၼ်းမၼ်းၸဝ်ႈတင်းလၢႆ သၢၵ်ႈသႃႇလႄႈ တၵ်းဢဵတ်းလူၵူၼ်းမၼ်းၸဝ်ႈ ဢၼ်လႆႈၶၢမ်ႇတုၵ်ႉၶႃႉ တၢင်းၽၢၼ်ၸိူဝ်းၼၼ်ႉဢေႃႈ။- 14ၸီႉဢုၼ်ႇလၢတ်ႈလႄႈဝႃႈ၊ ထႃႇဝရႃႉၽြႃး ၸုၼ်ႉပႅတ်ႈၵဝ်ယဝ်ႉ။ ၸဝ်ႈၽြႃးလူင်လိုမ်းၵဝ်ယဝ်ႉ၊ ဝႃႈၼင်ႇၼႆဢေႃႈ။- 15မႄႈယိင်းတၵ်းလူင်လိုမ်း လုၵ်ႈဢွၼ်ႇၵိၼ်ၼူမ်းမၼ်းယူႇ တေႃႇထိုင်ႁွတ်ႈထၼ်ႈပေႃးဢမ်ႇဢဵတ်းလူ လုၵ်ႈလၢင်းဢၼ်မၼ်းၵိူတ်ႇလဵင်ႉမႃးၼၼ်ႉလႆႈႁိုဝ်။ ၸႂ်ႈယဝ်ႉ။ မၼ်းလူင်လိုမ်းလႆႈယူႇ ဢမၢၼ်ႇၶၼ်ပဵၼ်ဢေႃႈ။ ၵူၺ်းၵႃႈၵဝ်တၵ်းဢမ်ႇလူင်လိုမ်းမႂ်း။- 16တူၺ်းလူး၊ ၵဝ်ဢဝ်မႂ်းသမ်ႉသႂ်ႇဝႆႉ ၵႃႈၼႂ်းၽႃႇမိုဝ်းၵဝ်ယဝ်ႉယဝ်ႉ။ လမ်းဝဵင်းမႂ်းၼၼ်ႉ မီးယူႇၵႃႈတီႈၽၢႆႇၼႃႈၵဝ်တႃႇသေႇဢေႃႈ။- 17လုၵ်ႈလၢင်းမႂ်းၸိူဝ်းၼၼ်ႉ တၵ်းဢွၼ်ၵၼ်ႁဵတ်း ၶၼ်ၶၼ်ၽႂ်းၽႂ်းလႄႈ ၶဝ်ၸိူဝ်းဢၼ်ယႃႉပႅတ်ႈမႂ်း၊ ၶဝ်ၸိူဝ်းဢၼ်ႁိမ်ဢဝ် ႁူင်ႇဢဝ်မႂ်းၸိူဝ်းၼၼ်ႉ တၵ်းဢွၼ်ၵၼ်ဢွၵ်ႇသေ ၵႃႈတီႈမႂ်းၵႂႃႇဢေႃႈ။- 18ႁႅၼ်မၢၵ်ႇတႃမႂ်းၸူးၵူႈတီႈၵူႈလႅၼ်လႄႈတူၺ်းတႃႉ။ ၶဝ်တင်းသဵင်ႈတင်းလူင်ၸိူဝ်းၼႆႉ ၸူႉၵၼ်တုမ်ၵၼ်လႄႈ မႃးၵႃႈတီႈမႂ်း ဢေႃႈ။ ထႃႇဝရႃႉၽြႃး မီးဢမိင်ႉဝႆႉၸမ်ႉ၊ ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ၊ မႂ်းတၵ်းဢဝ်ၶဝ်ၼုင်ႈမႆ မိူၼ်ၸိူဝ်ႉၼင်ႇဢၼ် ဢဝ်ၶူဝ်းၼုင်ႈဢၼ်ႁၢင်ႈလီၼၼ်ႉၼုင်ႈမႆၼၼ်ႉလႄႈ ဢဝ်ၶဝ်ႁၢင်ႈၶိူင်ႈမိူၼ်ၸိူဝ်ႉၼင်ႇဢၼ် လုၵ်ႈယိင်းဢၼ်သွင်ႇမင်ႇၵလႃႇၼၼ်ႉ ႁဵတ်းၼၼ်ႉဢေႃႈ။- 19တီႈဢၼ်ႁၢမ်းၵႂႃႇမႂ်း၊ တီႈဢၼ်သဵတ်ႇၵူၼ်းယဵၼ်ၵူၼ်းမႂ်း၊ မိူင်းဢၼ်လူႉလႅဝ်မႂ်းၸိူဝ်းၼၼ်ႉၸမ်ႉ၊ မႂ်းတၵ်းမီးတၢင်းဢၼ်ၵိတ်ႇဢၼ်ၵႅပ်ႈ ၵွပ်ႈပိူဝ်ႈဢၼ်ၵေႃႉဢၼ်ယူႇ မီးၼမ်ၼႃႇၼၼ်ႉဢေႃႈ။ ၶဝ်ၸိူဝ်းဢၼ်ဢိုၼ်ၵိၼ်မႂ်းပႅတ်ႈၼၼ်ႉ ၵေႃႈတၵ်းမီးတီႈဢၼ်ၵႆ ဢေႃႈ။- 20လုၵ်ႈလၢင်းမႂ်း ဢၼ်ဢမ်ႇပႆႇမီးလုၵ်ႈမီးလၢင်းၼၼ်ႉ ၸိူဝ်းၼၼ်ႉ တၵ်းလၢတ်ႈထိုင်ႁူမႂ်းလႄႈဝႃႈ၊ တီႈယူႇတီႈသဝ်းပဵၼ်ဢၼ်ၵိတ်ႇဢၼ်ၵႅပ်ႈၶႃႈဢေႃႈ။ ၶႅၼ်းတေႃႈပၼ်တီႈဢၼ်တၵ်းယူႇတၵ်းသဝ်း သေၵမ်းၶႃႈ၊ ဝႃႈၼင်ႇၼႆလူးၵွၼ်ႇဢေႃႈ။- 21မိူဝ်ႈၼၼ်ႉ မႂ်းတၵ်းထၢင်ႇၼႂ်းၸႂ်မႂ်းလႄႈဝႃႈ၊ ၽူႈလႂ်ႁႂ်ႈၶဝ်ၼႆႉပဵၼ်မႃးတီႈၵဝ်။ ၵဝ်ပဵၼ်ၵေႃႉဢၼ်ၽၢၼ်လုၵ်ႈၽၢၼ်လၢင်း၊ ၵေႃႉဢၼ်လႆႈယူႇတူဝ်လဵဝ်ၶိင်းလဵဝ်ၵူၺ်း၊ ၵေႃႉဢၼ်လႆႈယူႇတၢင်ႇသိုင်ႇတၢင်ႇမိူင်း၊ ၵေႃႉဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈယူႇလႄႈ ၽူႈလႂ်ႁႂ်ႈၶဝ်ၼႆႉပဵၼ်မႃး။ တူၺ်းလူး၊ ၵဝ်ၼႆႉယူႇၵေႃႉလဵဝ်ၵူၺ်းလႄႈ ၶဝ်ၼႆႉလုၵ်ႉၵႃႈတီႈလႂ်မႃး၊ ဝႃႈၼင်ႇၼႆဢေႃႈ။- 22ၸဝ်ႈထႃႇဝရႃႉၽြႃး မီးဢမိင်ႉဝႆႉၸမ်ႉ၊ တူၺ်းလူး၊ ၵဝ်တၵ်းယုၵ်ႉမိုဝ်းၵဝ်ၸူး တီႈၵူၼ်းၵူႈသိုင်ႇၵူႈမိူင်းလႄႈ ပူၵ်းလၢမ်ႇၵဝ်တီႈၵူၼ်းၵူႈၸိူဝ်ႉၵူႈမဵဝ်းဢေႃႈ။ ၶဝ်ၼၼ်ႉ တၵ်းႁွပ်ႇဢဝ်ဢုမ်ႈဢဝ် လုၵ်ႈၸၢႆးမႂ်းတင်းလၢႆဝႆႉ ၵႃႈၼႂ်းဝၢင်ႈႁူဝ်ဢူၵ်းၶဝ်ယူႇ၊ ဢဝ်လုၵ်ႈယိင်းမႂ်း တင်းလၢႆ တၢင်ႇသႂ်ႇၵႃႈၼိူဝ်ႁူဝ်မႃႇၶဝ်ယူႇသေလႄႈ တၵ်းဢွၼ်ၵၼ်ဢဝ်မႃးဢေႃႈ။- 23ၶုၼ်ႁေႃၶမ်းတင်းလၢႆ တၵ်းပဵၼ်ပေႃႈလဵင်ႉပေႃႈထိင်းမႂ်း၊ ၼၢင်းႁေႃၶမ်းၶဝ်တင်းလၢႆ တၵ်းပဵၼ်မႄႈဢၼ်ၵဵပ်းမႂ်းလဵင်ႉဝႆႉဢေႃႈ။ၶဝ်ၼၼ်ႉတၵ်းဢွၼ်ၵၼ်ၵူမ်ႈႁူဝ် ၶုပ်ႉမူပ်ႇဢဝ်ၼႃႈၶဝ်ငူပ်ႉလိၼ် ၵႃႈတီႈၽၢႆႇၼႃႈမႂ်းလႄႈ လေးၵိၼ်မုၼ်ႈလိၼ် ၵႃႈတီႈတိၼ်မႂ်းဢေႃႈ။ မႂ်းတၵ်းလႆႈႁူႉလွင်ႈဢၼ်ၵဝ် ပဵၼ်ထႃႇဝရႃႉၽြႃး ဢိၵ်ႇတင်း လွင်ႈဢၼ် ၶဝ်ၸိူဝ်းဢၼ်မုင်ႈမွင်းၵဝ်ယူႇၼၼ်ႉ ဢမ်ႇလႆႈမီးတၢင်းဢၼ် ဢူၵ်းဢၼ်ဢၢႆၼၼ်ႉဢေႃႈ။- 24တၵ်းလႆႈဢဝ် ဢုၵ်ႉၸႃႇဢၼ်ႁိမ်ဢဝ်လႆႈၼၼ်ႉ ဢွၵ်ႇသေၵႃႈၼႂ်းမိုဝ်းၵေႃႉဢၼ် ႁႅင်းယႂ်ႇၼၼ်ႉႁိုဝ်။ တၵ်းလႆႈၼုၵ်ႈဢဝ်ၶဝ်ၸိူဝ်းဢၼ် ၵေႃႉဢၼ်တြႃးၼၼ်ႉ သိမ်းဢဝ်ၵႂႃႇၼၼ်ႉႁိုဝ်။- 25ထႃႇဝရႃႉၽြႃး မီးဢမိင်ႉဝႆႉၸမ်ႉ၊ ၶဝ်ၸိူဝ်းဢၼ် ၵေႃႉဢၼ်ႁႅင်းယႂ်ႇၼၼ်ႉ သိမ်းဢဝ်ၵႂႃႇၼၼ်ႉ တၵ်းလႆႈၶၢမ်ႇတၢင်းဢၼ် ဢဝ်လွတ်ႈဢမၢၼ်ႇၶၼ်ပဵၼ်လႄႈ ဢုၵ်ႉၸႃႇ ဢၼ်ၵေႃႉဢၼ်လီၵူဝ်လီႁႄၼႃႇၼၼ်ႉ ႁိမ်ဢဝ်လႆႈၼၼ်ႉ တၵ်းလႆႈၶၢမ်ႇတၢင်းဢၼ်ၼုၵ်ႈဢဝ်ဢွၵ်ႇ ဢေႃႈ။ ၵဝ်တၵ်းၽိတ်းၵၼ်တင်းၵေႃႉဢၼ် ၽိတ်းၵၼ်တင်းမႂ်းၼၼ်ႉလႄႈ ၵႄႇသႄႇၶျွတ်ႈဢဝ်လုၵ်ႈမႂ်းလၢင်းမႂ်းဢေႃႈ။- 26ၵဝ်တၵ်းဢဝ်ၼိူဝ်ႉၶဝ်ၸိူဝ်းဢၼ် ၼိၵ်ႈၸၢၵ်ႈငႅၼ်းသႄးမႂ်းၼၼ်ႉ ၶိုၼ်းလဵင်ႉပၼ်ၶဝ်လႄႈ ၶဝ်ၼၼ်ႉတၵ်းလႆႈမဝ်းလဝ်ႈ လူၺ်ႈလိူတ်ႈတူဝ်ၸဝ်ႈၵဝ်ႇ မိူၼ်ၸိူဝ်ႉၼင်ႇဢၼ်မဝ်းလဝ်ႈ လူၺ်ႈၼမ်ႉၸပိတ်ႈဢၼ်ဝၢၼ်ၼၼ်ႉဢေႃႈ။ ပိူဝ်ႈဢၼ်ပဵၼ်ၼင်ႇၼႆ လႄႈ ၵူၼ်းသတ်ႉတဝႃႇ တင်းသဵင်ႈတင်းလူင် တၵ်းလႆႈႁူႉလွင်ႈဢၼ်ၵဝ် ထႃႇဝရႃႉၽြႃးၼႆႉ ပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်မႂ်း၊ ၸဝ်ႈဢၼ်ထုတ်ႇဢဝ်မႂ်း၊ ၽြႃးဢၼ်တၼ်းၶူဝ်းယႂ်ႇ တီႈမဵဝ်းယႃႇၵုပ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။
Copyright © 2021 by OMF International, Shan Baptist Churches Fellowship