ဢီႉသႃႇယႃႉ 48
48
ထႃႇဝရႃႉၽြႃးၵျၢမ်ႇပွင်လွင်ႈဝၼ်းမိူဝ်းၼႃႈ
1သူၸိူဝ်းဢၼ် ပဵၼ်မဵဝ်းယႃႇၵုပ်ႈ ဢၼ်လႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ဢီႉသရေႇလႃႉ ဢၼ်လႆဢွၵ်ႇမႃးၵႃႈၼႂ်းၼမ်ႉဢွၵ်ႇႁူး ယူႉတႃႉ၊ ဢၼ်ဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး သေလႄႈ ၵိၼ်ႇဝႃႈ၊ ဢၼ်ယင်းဢမ်ႇမီးသဵတ်ႈၸႃႇ၊ ယင်းဢမ်ႇမႅၼ်ႈၵၼ်တင်းတြႃးတၢင်းဢၼ်သိုဝ်ႈတေႃႇလႄႈ ယွင်ႈယေႃးၽြႃးပဵၼ်ၸဝ်ႈ မဵဝ်းဢီႉသရေႇလႃႉ၊- 2ဢၼ်ႁွင်ႉႁဵၵ်ႈတူဝ်ၸဝ်ႈၵဝ်ႇ ၸွမ်းလူၺ်ႈဝဵင်းၸဝ်ႈဢၼ်မူတ်းၸၢင်ႇ၊ ဢၼ်သွၼ်ႈပိုင်ႈ ၽြႃးပဵၼ်ၸဝ်ႈ မဵဝ်းဢီႉသရေႇလႃႉဢၼ်မီးၼႃႇမႃႉၸိုဝ်ႈသဵင်လႄႈဝႃႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး၊ ဝႃႈၼင်ႇၼႆၼၼ်ႉၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။- 3ၵဝ်ဢဝ်လွင်ႈတၢင်းဢၼ် ယၢမ်ႈပဵၼ်မႃးယဝ်ႉၸိူဝ်းၼၼ်ႉ မွၵ်ႇလၢတ်ႈတီႈသူ ၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉယဝ်ႉ။ လွင်ႈတၢင်း ၸိူဝ်းၼၼ်ႉ ဢွၵ်ႇသေၵႃႈတီႈသူပ်းၵဝ်လႄႈ ၵဝ်ႁႂ်ႈငိၼ်းယဝ်ႉ။ ၵွပ်ႈပိူဝ်ႈဢၼ်ၵဝ်ၶီႉၶႃႉ ႁဵတ်းလွင်ႈတၢင်းၸိူဝ်းၼၼ်ႉလႄႈ လွင်ႈတၢင်း ၸိူဝ်းၼၼ်ႉ ပဵၼ်မႃးဢေႃႈ။- 4ၵွပ်ႈပိူဝ်ႈ ဢၼ်ၵဝ်ႁူႉလွင်ႈဢၼ် မႂ်းမီးၸႂ်သၽေႃးဢၼ်ၵႅၼ်ႇၶႅင်၊ ၶေႃးတႅင်ႈလဵၵ်း၊ ၼႃႈၽၢၵ်ႇတွင်းလိူင်လႄႈ၊- 5ၵဝ်မွၵ်ႇလၢတ်ႈပၼ်တီႈမႂ်း ၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉယဝ်ႉ။ ၵဝ်ၽုၺ်ႇဢွၵ်ႇၼႄပျႃးၸႃႉၸဵမ်မိူဝ်ႈ ၸူဝ်ႈဢၼ်ဢမ်ႇပႆႇပဵၼ် ၼၼ်ႉယဝ်ႉ။ ပိူဝ်ႈၼႆလႄႈ မႂ်းဢမ်ႇမီးဢၶႂၢင်ႉ ဢၼ်လႆႈလၢတ်ႈလႄႈဝႃႈ၊ ရုၵ်ႈထူႉၵဝ်ႁဵတ်းလွင်ႈတၢင်းၸိူဝ်းၼၼ်ႉယဝ်ႉ။ ရုၵ်ႈထူႉဢၼ်ၵဝ် တွင်ႈႁဵတ်းၶၵ်းႁဵတ်း၊ ရုၵ်ႈထူႉဢၼ်ၵဝ်သွၼ်းႁဵတ်းလေႃႇႁဵတ်းၼၼ်ႉ ၸီႇယၢင်ႇလွင်ႈတၢင်း ၸိူဝ်းၼၼ်ႉယဝ်ႉ၊ ဝႃႈၼင်ႇၼႆၼၼ်ႉ။- 6မႂ်းလႆႈငိၼ်းယဝ်ႉ။ လူတူၺ်းလွင်ႈတၢင်း ၵူႈၸိူဝ်ႉၵူႈပိူင်ၼႆႉတႃႉ။ သူယင်းဢမ်ႇမွၵ်ႇထိုင်လၢတ်ႈထိုင် တီႈပိူၼ်ႈလႄႈ တၵ်းဢွၼ်ၵၼ် ယူႇႁိုဝ်။ ၸႃႉၸဵမ်မိူဝ်ႈလဵဝ်ၼႆႉလႄႈ ၵဝ်ၽုၺ်ႇဢွၵ်ႇၼႄပျႃးလွင်ႈတၢင်းဢၼ်မႂ်ႇ၊ လွင်ႈတၢင်းဢၼ်သိူင်ႇဝႆႉလပ်ႉဝႆႉ၊ လွင်ႈတၢင်းဢၼ်မႂ်း ဢမ်ႇပႆႇႁူႉၸိူဝ်းၼၼ်ႉဢေႃႈ။- 7လွင်ႈတၢင်းၸိူဝ်းၼၼ်ႉ လႆႈၶၢမ်ႇတၢင်းဢၼ် ၽၢၼ်ႇသၢင်းႁဵတ်းပဵၼ်မိူဝ်ႈလဵဝ်ၼႆႉဢေႃႈ။ လႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်းပဵၼ်မိူဝ်ႈၵွၼ်ႇဢွၼ်ၼႆႉၼၼ်ႉဢမ်ႇၸႂ်ႈ။ တေႃႇထိုင်ႁွတ်ႈမိူဝ်ႈလဵဝ်ၼႆႉလႄႈ မႂ်းဢမ်ႇပႆႇယၢမ်ႈတွၼ်ႉငိၼ်း။ ပိူဝ်ႈၼႆလႄႈ မႂ်းဢမ်ႇမီးဢၶႂၢင်ႉဢၼ်လႆႈလၢတ်ႈလႄႈဝႃႈ၊ ၵဝ်ႁူႉဝႆႉထႃႈယဝ်ႉ၊ ဝႃႈၼင်ႇၼႆၼၼ်ႉ။- 8မႂ်းဢမ်ႇတွၼ်ႉငိၼ်း ဢမ်ႇတွၼ်ႉႁူႉ။ ႁူမႂ်းဢမ်ႇတွၼ်ႉၽုၺ်ႇတွၼ်ႉပိုတ်ႇ ၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉ။ လွင်ႈမၼ်းၸမ်ႉ ၵဝ်ႁူႉလွင်ႈဢၼ်မႂ်း သဵတ်ႈၸႃႇတၵ်းလူႉလႄႈ လႆႈၶၢမ်ႇတၢင်းဢၼ်ႁွင်ႉႁဵၵ်ႈလႄႈဝႃႈ ၵေႃႉဢၼ်ပုင်ႇၵၢၼ်ႇ၊ ဝႃႈၼင်ႇၼႆၼၼ်ႉ ၸႃႉၸဵမ်မိူဝ်ႈဢၼ် ၸႃႉၵိူတ်ႇလဵင်ႉမႃးၼၼ်ႉဢေႃႈ။- 9ၵူၺ်းၵႃႈ ၵဝ်တၵ်းၶျုၵ်ႈတၢင်းၸႂ်မႆႈၶႆႈၸႃႉၵဝ် ဝႆႉပုၼ်ႈၼႃႇမႃႉၸိုဝ်ႈသဵင်ၵဝ်၊ ယိူၼ်ႉၶၢမ်ႇဢမူႉမႂ်းပုၼ်ႈၵုင်ႇသရေႇၵဝ် ႁႂ်ႈၵဝ်ဢမ်ႇလႆႈပႄႇၽဵဝ်ႈ မႂ်းပႅတ်ႈမူတ်းမူတ်းဢေႃႈ။- 10တူၺ်းလူး၊ ၵဝ်ၸႅတ်ႈၶႃႇမႂ်းမႃးယဝ်ႉ။ ၼႂ်းဝႃႈၼၼ်သေၵေႃႈ ၸိူဝ်ႉၼင်ႇဢၼ် ၸႅတ်ႈငိုၼ်းၶႃႇငိုၼ်းၼၼ်ႉဢမ်ႇၸႂ်ႈ။ ၵဝ်ၸၢမ်းတူၺ်းမႂ်း ၵႃႈၼႂ်းမိူင်းတုၵ်ႉၶႃႉမႃးယဝ်ႉ။- 11ပုၼ်ႈတူဝ်ၸဝ်ႈၵဝ်ႇၸိုင်၊ ၵဝ်တၵ်းႁဵတ်းလူးၵွၼ်ႇဢေႃႈ။ ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ၼႃႇမႃႉၸိုဝ်ႈသဵင်ၵဝ် တၵ်းလႆႈၶၢမ်ႇတၢင်းဢၼ် ၶျႃးတူၵ်းတီႈတႅမ်ႇၼင်ႇႁိုဝ်။ ၵဝ်တၵ်းဢမ်ႇဢဝ်မုၼ်ၵုင်ႇသရေႇၵဝ်ပၼ်တီႈပိူၼ်ႈ။
ၶုၼ်ၵူႉရူႉဢၼ်ထႃႇဝရႃႉၽြႃးလိူၵ်ႈဢဝ်
12 ယႃႇၵုပ်ႈဢိူၺ်း၊ ဢီႉသရေႇလႃႉဢၼ်ၵဝ်ႁွင်ႉဢိူၺ်း၊ ထွမ်ႇငိၼ်းၵႂၢမ်းၵဝ်တႃႉ။ ၵဝ်ပဵၼ်မၼ်းၸဝ်ႈဢေႃႈ။ ၵဝ်ပဵၼ်ၵေႃႉဢၼ်ဢွၼ်တၢင်းသုတ်း၊ ၵေႃႉဢၼ်လိုၼ်းလင်သုတ်းဢေႃႈ။- 13မိုဝ်းၵဝ်ၼႆႉ တႄႇႁဵတ်းငဝ်ႈႁၢၵ်ႈလိၼ်မိူင်းယဝ်ႉ။ မိုဝ်းၶွၼ်ၶႂႃၵဝ်ၼႆႉ ၶဵင်ႈမုင်းၽႃႉၵၢင်ႁၢဝ်ယဝ်ႉ။ ၵဝ်ႁွင်ႉဢဝ်ၶဝ်လႄႈ ၶဝ်ၼၼ်ႉ ပေႃႇပဵၼ်မႃးၽွမ်ႉမိူဝ်ႈလဵဝ်ၵၼ်ဢေႃႈ။- 14သူၵႃႈဢၼ်မီးၶဝ်ဢိူၺ်း၊ ၸူႉၵၼ်တုမ်ၵၼ်လႄႈထွမ်ႇငိၼ်းတႃႉ။ ၼႂ်းၶဝ်ၼၼ်ႉၽူႈလႂ်မွၵ်ႇလၢတ်ႈလွင်ႈတၢင်းၸိူဝ်းၼႆႉယဝ်ႉ။ထႃႇဝရႃႉၽြႃး ႁၵ်ႉၵေႃႉၼၼ်ႉလႄႈ မၼ်းၼၼ်ႉတၵ်းႁႂ်ႈဢလူဝ်ႇမၼ်းၸဝ်ႈ ပျေႉၸုမ်ႇၵႃႈတီႈဝဵင်းပႃႇပူႉလုၼ်ႇဢေႃႈ။ မိုဝ်းမၼ်းၼၼ်ႉၵေႃႈ တၵ်းႁွတ်ႈထိုင်ၵႃႈၼိူဝ်ၵူၼ်းၶႃႇလတေးတင်းလၢႆဢေႃႈ။- 15ၵဝ်ၼႆႉယဝ်ႉ၊ ၵဝ်ၼႆႉယဝ်ႉ မီးဢမိင်ႉယဝ်ႉယဝ်ႉ။ ၵဝ်ႁွင်ႉဢဝ်မၼ်းၼၼ်ႉ ဢမၢၼ်ႇၶၼ်ပဵၼ်ယဝ်ႉ။ ၵဝ်ဢဝ်မၼ်းမႃးယဝ်ႉ။ မၼ်းႁႂ်ႈတၢင်းဢၼ်မၼ်းၵႂႃႇၼၼ်ႉ မီးမင်ႇၵလႃႇဢေႃႈ။- 16သုတ်ႉၸပ်းသုတ်ႉၸူးတီႈၵဝ်လႄႈ ထွမ်ႇငိၼ်းၵႂၢမ်းၼႆႉတႃႉ။ ၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉလႄႈ ၵဝ်ဢမ်ႇတဵတ်ႇတဵတ်ႇမွၵ်ႇလၢတ်ႈၸႃႉၸဵမ်မိူဝ်ႈဢၼ် လွင်ႈတၢင်းၼၼ်ႉၸႃႉပဵၼ်မႃးၼၼ်ႉလႄႈ ၵဝ်မီးယူႇဢေႃႈ။ မိူဝ်ႈလဵဝ်ၼႆႉ ၸဝ်ႈ ထႃႇဝရႃႉၽြႃး ဢိၵ်ႇတင်းဝီႉၺိၺ်ႇ မၼ်းၸဝ်ႈၼၼ်ႉ ပွႆႇၸႂ်ႉၵဝ်ဢေႃႈ။
ထႃႇဝရႃႉၽြႃးၵျၢမ်ႇပွင်ဝႆႉပုၼ်ႈၵူၼ်းမၼ်းၸဝ်ႈ
17ထႃႇဝရႃႉၽြႃး ၸဝ်ႈဢၼ်ထုတ်ႇဢဝ်မႂ်း၊ ၽြႃးဢၼ်မူတ်းၸၢင်ႇ မဵဝ်းဢီႉသရေႇလႃႉ မီးဢမိင်ႉဝႆႉၸမ်ႉ၊ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်း ဢၼ်သင်ႇသွၼ်ပၼ် လွင်ႈတၢင်းဢၼ်ပွင်ဢၵျူဝ်းမႂ်းလႄႈ ဢဝ်မႂ်းသူင်ႇၵႃႈၼႂ်းသဵၼ်ႈတၢင်းဢၼ်မႂ်းထုၵ်ႇၵႂႃႇ ၼၼ်ႉဢေႃႈ။- 18သင်မႂ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈၵဝ် တင်းလၢႆၸိုင်၊ ၵတ်းယဵၼ်ၶျၢမ်းသႃႇမႂ်း တၵ်းပဵၼ်ၸိူဝ်ႉၼင်ႇၼမ်ႉႁွင်ႈၼမ်ႉၵႄးလႄႈ ပႃႇရမီႇတၢင်းဢၼ်သိုဝ်ႈတေႃႇမႂ်း တၵ်းပဵၼ်ၸိူဝ်ႉၼင်ႇ လႅင်းၼမ်ႉပိူပ်ႈၼမ်ႉသမ်ႇမုၵ်ႉတြႃႇၼၼ်ႉယဝ်ႉ။- 19မဵဝ်းၸိူဝ်ႉၶိူဝ်းမႂ်း တၵ်းပဵၼ်ၸိူဝ်ႉၼင်ႇ မဵတ်ႉႁိၼ်မဵတ်ႉသၢႆးလႄႈ လုၵ်ႈလၢင်းဢၼ်ဢွၵ်ႇမႃးၵႃႈၼႂ်းတွင်ႉမႂ်းၸိူဝ်းၼၼ်ႉ တၵ်းပဵၼ်ၸိူဝ်ႉၼင်ႇ မၢၵ်ႇႁိၼ်ႁႄႈၼမ်ႉ သမ်ႇမုၵ်ႉတြႃႇၼၼ်ႉယဝ်ႉ။ ၼႃႇမႃႉၸိုဝ်ႈသဵင်မၼ်းၼၼ်ႉ ဢမ်ႇလႆႈထၢတ်ႇ၊ ဢမ်ႇလႆႈလူႉလႆႈလႅဝ် သေၵႃႈတီႈၽၢႆႇၼႃႈၵဝ်ယဝ်ႉ။- 20သူဢွၼ်ၵၼ်ဢွၵ်ႇသေၵႃႈၼႂ်းဝဵင်းပႃႇပူႉလုၼ်ႇတႃႉ။ ဢွၼ်ၵၼ်ဢွၵ်ႇပၢႆႈသေၵႃႈတီႈၵူၼ်းၶႃႇလတေးတင်းလၢႆတႃႉ။ ဢွၼ်ၵၼ်ပႃးတင်းသဵင်ႁဵတ်းၵႂၢမ်းဢၼ် ၸူမ်းသိူဝ်းၼႃႇလူင်လၢင်လႄႈ ဢွၵ်ႇသူပ်းဝႃႈလွင်ႈၼၼ်ႉယူႇ၊ မွၵ်ႇလၢတ်ႈယူႇသေလႄႈ ၵိဝ်သဵင်တေႃႇထိုင်ႁွတ်ႈ တီႈႁိမ်းလိၼ်သုတ်းပုၼ်ႉတႃႉ။ ဢွၼ်ၵၼ်လၢတ်ႈလႄႈဝႃႈ၊ ထႃႇဝရႃႉၽြႃး ထုတ်ႇဢဝ်ၶႃႈမၼ်းၸဝ်ႈ ယႃႇၵုပ်ႈၼၼ်ႉ ယဝ်ႉယဝ်ႉ၊ ဝႃႈၼင်ႇၼႆတႃႉ။- 21ၶဝ်ၼၼ်ႉ ဢမ်ႇလႆႈဢိုပ်းၼမ်ႉယၢၵ်ႇၼမ်ႉ ၼႂ်းမိူဝ်ႈဢၼ်မၼ်းၸဝ်ႈဢဝ်ၶဝ်သူင်ႇၵႂႃႇ ၵႃႈၼႂ်းသဵၼ်ႈတၢင်းထိူၼ်ႇၼၼ်ႉလႄႈ မၼ်းၸဝ်ႈ ႁႂ်ႈၼမ်ႉဢွၵ်ႇသေ ၵႃႈၼႂ်းမၢၵ်ႇႁိၼ်လႆမႃးပုၼ်ႈၶဝ်ဢေႃႈ။ မၼ်းၸဝ်ႈၽႃႇမၢၵ်ႇႁိၼ်တႅၵ်ႇလႄႈ ၼမ်ႉၽုတ်းဢွၵ်ႇမႃးဢေႃႈ။- 22ၵတ်းယဵၼ်ၶျၢမ်းသႃႇဢမ်ႇမီးတီႈၶဝ်ၸိူဝ်းဢၼ်ဢမ်ႇတြႃးၼၼ်ႉ လႃးလႃး၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။
Copyright © 2021 by OMF International, Shan Baptist Churches Fellowship