ဢီႉသႃႇယႃႉ 34
34
တၢင်းဢၼ်ၸီႇယၢင်ႇတီႈၵူၼ်းၵူႈၸိူဝ်ႉၵူႈမဵဝ်း
1ၵူၼ်းၵူႈၸိူဝ်ႉၵူႈမဵဝ်းတင်းလၢႆၶဝ်ဢိူၺ်း၊ ဢွၼ်ၵၼ်သုတ်ႉၸပ်းသုတ်ႉၸူးႁႂ်ႈသူလႆႈငိၼ်းတႃႉ။ မဵဝ်းၵူၼ်းတင်းလၢႆၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။ ႁႂ်ႈလိၼ်မိူင်းဢိၵ်ႇတင်း လွင်ႈတၢင်းၵႃႈဢၼ်ပႃးတီႈမၼ်း လေႃးၵထၢတ်ႈ ဢိၵ်ႇတင်းၶိူင်ႈပိူင် ၵႃႈဢၼ်ပဵၼ်မႃးတီႈမၼ်း တင်းသဵင်ႈတင်းလူင် ငိၼ်းသေၵမ်းလူၺ်ႈ။- 2တၢင်းၸႂ်မႆႈ ထႃႇဝရႃႉၽြႃးႁွတ်ႈထိုင် တီႈၵူၼ်းၵူႈၸိူဝ်ႉၵူႈမဵဝ်းလႄႈ တေႃးသႃႉတၢင်းၶႆႈၸႃႉမၼ်းၸဝ်ႈ ဢၼ်ႁႅင်းယႂ်ႇၼႃႇၼၼ်ႉ တူၵ်းႁွတ်ႈၵႃႈၼိူဝ်မူႇၽုင် မုၵ်ႉၸိူဝ်းၵူၼ်းၶဝ် တင်းသဵင်ႈတင်းလူင်ဢေႃႈ။ မၼ်းၸဝ်ႈယႃႉၽဵဝ်ႈၶဝ်ပႅတ်ႈ မူတ်းမူတ်းသဵင်ႈသဵင်ႈလႄႈ ဢဝ်ၶဝ်ဢၢပ်ႈပၼ် ၵႃႈတီႈတၢင်းဢၼ်ဢဝ်တၢႆဢေႃႈ။- 3ၶဝ်ၸိူဝ်းဢၼ်လႆႈၶၢမ်ႇတၢင်းတၢႆၼႂ်းၶဝ်ၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်ဢွၵ်ႇပႅတ်ႈ ၵႃႈၼွၵ်ႈလႄႈ တူဝ်တၢႆၶဝ်ၸိူဝ်းၼၼ်ႉ တၵ်းမဵၼ်တူႇလႄႈ လွႆတင်းလၢႆ တၵ်းပဵၼ်ၼမ်ႉၵႂႃႇၵွပ်ႈပိူဝ်ႈလိူတ်ႈၶဝ်ၼၼ်ႉဢေႃႈ။- 4ၶိူင်ႈပိူင်ၵၢင်ႁၢဝ် ၵူႈၸိူဝ်ႉၵူႈပိူင်ၼၼ်ႉ တၵ်းယွမ်းႁၢႆၵႂႃႇလႄႈ ၽႃႉၵၢင်ႁၢဝ်ၼၼ်ႉ တၵ်းမီးတၢင်းဢၼ်ႁမ်းယူႇၸိူဝ်ႉၼင်ႇ ၽိုၼ်လိၵ်ႈႁမ်းလိၵ်ႈဢေႃႈ။ ၶိူင်ႈပိူင်ၵူႈၸိူဝ်ႉၵူႈပိူင်ၸိူဝ်းၼၼ်ႉ တၵ်းႁူင်ႈတူၵ်းမိူၼ်ၸိူဝ်ႉၼင်ႇမႂ်ဢၼ်လူၼ်ႇႁူင်ႈတူၵ်းသေၵႃႈတီႈတူၼ်ႈၶိူဝ်း မၢၵ်ႇၸပိတ်ႈၼၼ်ႉ ဢိၵ်ႇတင်း ၸိူဝ်ႉၼင်ႇမၢၵ်ႇဢၼ်ႁူင်ႈတူၵ်းသေၵႃႈတီႈတူၼ်ႈမၢၵ်ႇလိူဝ်ႇသၢင်းၽေႃးၼၼ်ႉဢေႃႈ။- 5လွင်ႈမၼ်းၸမ်ႉ လၢပ်ႇၵဝ်လႅဝ်းၵဝ်ၼႆႉ ၵိၼ်ဢိမ်ႇၵိၼ်တဵမ် ၵႃႈၼိူဝ်ၵၢင်ႁၢဝ်ယဝ်ႉလႄႈ သမ်ႉတၵ်းတူၵ်းႁွတ်ႈၵႃႈၼိူဝ်မိူင်းဢေႇတုမ်ႇ ဢိၵ်ႇတင်းၵူၼ်းဢၼ်ၵဝ်ၵိၼ်ႇဝႃႈၸိူဝ်းၼၼ်ႉထႅင်ႈ ႁႂ်ႈလႆႈပၼ်တၢမ်ႇဢေႃႈ။- 6လၢပ်ႇထႃႇဝရႃႉၽြႃးၼၼ်ႉ ဢိမ်ႇတဵမ်ဝႆႉတင်းလိူတ်ႈယဝ်ႉ။ ပီးမၼ်းဝႆႉတင်းၵွၼ်ႈၶႆၵွၼ်ႈမၼ်းယဝ်ႉ။ ပီးမၼ်းဝႆႉတင်းလိူတ်ႈသူဝ်းဢွၼ်ႇ ဢိၵ်ႇတင်းပႄႉတင်းလၢႆ တင်းၵွၼ်ႈၶႆၵွၼ်ႈမၼ်း မၢၵ်ႇလၼ်းသူဝ်းပေႃႈတင်းလၢႆယဝ်ႉ။ လွင်ႈမၼ်းၸမ်ႉ ထႃႇဝရႃႉၽြႃး ၶၢမ်ႇပွႆးယိတ်ႈ ၵႃႈတီႈ ဝဵင်းပေႃႇၸရႃႉ ဢိၵ်ႇတင်းပွႆးတၢင်းဢၼ်ဢဝ်တၢႆ ဢၼ်ယႂ်ႇၼႃႇၵႃႈတီႈမိူင်းဢေႇတုမ်ႇဢေႃႈ။- 7ၸူင်ဢိၵ်ႇတင်းဝူဝ်းဢုၵ်ႉသၽႃႉ တင်းဝူဝ်းငၢၼ်တင်းလၢႆ တၵ်းလူမ်ႉတူၵ်းလူၺ်ႈၵၼ်တင်းၶဝ်ၼၼ်ႉလႄႈ လိၼ်တီႈဢၼ်ၶဝ်ယူႇၼၼ်ႉ တၵ်းမဝ်းလဝ်ႈလူၺ်ႈလိူတ်ႈၶဝ်လႄႈ မုၼ်ႈလိၼ်တီႈဢၼ်ၶဝ်ယူႇၼၼ်ႉၵေႃႈ တၵ်းပီးမၼ်းလူၺ်ႈၵွၼ်ႈၶႆၵွၼ်ႈမၼ်းဢေႃႈ။- 8ဝၼ်းဢၼ် ထႃႇဝရႃႉၽြႃးပၼ်တၢမ်ႇ၊ ပီႊမိူင်းဢၼ်မၼ်းၸဝ်ႈပႂ်ႉဢမူႉဝဵင်းၸီႉဢုၼ်ႇလႄႈ ပၼ်ဢပႅတ်ႈၼၼ်ႉ ႁွတ်ႈထိုင်ယဝ်ႉ။- 9ၼမ်ႉႁွင်ႈၼမ်ႉၵႄးမၼ်းၼၼ်ႉ တၵ်းပဵၼ်ယၢင်ပႅၵ်ႇၵႂႃႇ၊ မုၼ်ႈလိၼ်မၼ်းၵေႃႈ တၵ်းပဵၼ်ၵၢၼ်ႉၵႂႃႇ၊ မိူင်းတင်းမိူင်းတၵ်းပဵၼ်ယၢင် ဢၼ်ၽႆးမႆႈၼၼ်ႉၵႂႃႇဢေႃႈ။- 10ၶိုၼ်းၶိုၼ်းဝၼ်းဝၼ်း ၽႆးၼၼ်ႉဢမ်ႇလႆႈထၢတ်ႇလႆႈယဵၼ်လႄႈ ၵႂၼ်းၽႆးတၵ်းၶိုၼ်ႈယူႇသေႇသေႇဢေႃႈ။ မိူင်းၼၼ်ႉ တၵ်းသဵတ်ႇယဵၼ်ၵႂႃႇၵူႈၸူဝ်ႈၵူႈပၢၼ် သိုပ်ႇသိုပ်ႇတၢမ်းတၢမ်းလႄႈၽူႈလႂ်သေၵေႃႉသေၵူၼ်း ဢမ်ႇလႆႈလတ်းၵႂႃႇတႆႇၵႂႃႇ ၵႃႈၼႂ်းမၼ်းယူႇ ၵူႈၶိင်ႇၵူႈမိူဝ်ႈ တႃႇသေႇဢမ်ႇထၢတ်ႇ။- 11ၼူၵ်ႉဝမ်ႇပူဝ်ႇ ဢိၵ်ႇတင်းမဵၼ်ႈတင်းလၢႆ တၵ်းၶၢမ်ႇဢဝ်ဢမူၺ်ႇ မိူင်းၼၼ်ႉလႄႈ တီးတုတ်ႈဢိၵ်ႇတင်းၵႃလူင် တင်းလၢႆတၵ်းယူႇၵႃႈၼႂ်းမၼ်းဢေႃႈ။ မၼ်းၸဝ်ႈတၵ်းဢဝ်ၸိူၵ်ႈမႆမီႈ တၢင်းဢၼ် ယႃႉပႅတ်ႈဢိၵ်ႇတင်းၶိူင်ႈဢၼ်ႁွႆးမႆမီႈ တၢင်းဢၼ်သုမ်းၸွမ်းၼၼ်ႉ ၶဵင်ႈသႂ်ႇၵႃႈၼိူဝ်မၼ်းဢေႃႈ။- 12ဢမ်ႇလႆႈမီးမူးမၢတ်ႈၽွင်းမိူင်း ဢၼ်လႆႈယုၵ်ႉယွင်ႈဝႆႉ ၵႃႈၼႂ်းဢရႃႇၶုၼ်ၼၼ်ႉ ၵႃႈတီႈၼၼ်ႈ။ ၶိူဝ်းၶုၼ်တၵ်းလႆႈၶၢတ်ႇၵႂႃႇဢေႃႈ။- 13တူၼ်ႈၼၢမ်တင်းလၢႆ တၵ်းဢွၵ်ႇၵႃႈတီႈႁေႃၶမ်းမၼ်းၸိူဝ်းၼၼ်ႉလႄႈ တူၼ်ႈၼၢမ်ဢိၵ်ႇတင်းတူၼ်ႈၼၢမ်လိၼ်တင်းလၢႆ တၵ်းဢွၵ်ႇၵႃႈတီႈတိူၵ်ႈတီႈတိုၵ်းသိုၵ်းမၼ်းၸိူဝ်းၼၼ်ႉဢေႃႈ။ တၵ်းလႆႈပဵၼ်တီႈဢၼ်မႃလိၼ်သွၼ်ႈပိုင်ႈ၊ တီႈဢၼ်ၼူၵ်ႉ ၵလႃးဢုၵ်ႉယူႇဢေႃႈ။- 14တူဝ်ထိူၼ်ႇႁၢႆႉတင်းလၢႆ တၵ်းႁူပ်ႉထူပ်းၵၼ်တင်းမႃထိူၼ်ႇတင်းလၢႆ ၵႃႈတီႈၼၼ်ႈလႄႈ၊ တူဝ်ဢၼ်ၶူၼ်ၽူင်းၶူၼ်ယၢဝ်းၸိူဝ်းၼၼ်ႉ တူဝ်ၼိုင်ႈတၵ်းႁွင်ႉၸူးတီႈတူဝ်ၼိုင်ႈ ဢေႃႈ။ ၼူၵ်ႉၵၢင်ၶိုၼ်းတၵ်းလိုဝ်ႈၵႃႈတီႈၼၼ်ႈလႄႈ ထူပ်းတီႈဢၼ်မၼ်းတၵ်းသွၼ်ႈပိုင်ႈဢေႃႈ။- 15ငူးဢၼ်ၸၢင်ႈဝႅၼ်ၼၼ်ႉ တၵ်းႁဵတ်းႁင်းၵႃႈတီႈၼၼ်ႈလႄႈ ၶႆႇသေယဝ်ႉ၊ ၶႆႇမၼ်းၼၼ်ႉတၵ်းတႅၵ်ႇဢွၵ်ႇလႄႈ မၼ်းတၵ်းၸူႉသိမ်းဢဝ် ငူးဢွၼ်ႇတင်းလၢႆဝႆႉၵႃႈတီႈတႂ်ႈငဝ်းႁူမ်ႈ တူဝ်မၼ်းယူႇဢေႃႈ။ ယဵဝ်ႈၸွၵ်ႇတင်းလၢႆ တူဝ်ၽူႈတူဝ်မႄႈ ပဵၼ်ၵူပ်ႉပဵၼ်ၵူႈၵၼ်ယူႇ သေလႄႈ တၵ်းၸူႉၵၼ်တုမ်ၵၼ် ၵႃႈတီႈၼၼ်ႈဢေႃႈ။- 16သူဢွၼ်ၵၼ်လူတူၺ်း ၵႃႈၼႂ်းၵျၢမ်းလိၵ်ႈ ထႃႇဝရႃႉၽြႃး လႄႈၽတ်းတႃႉ။ တူဝ်ၸိူဝ်းၼၼ်ႉဢမ်ႇလႆႈသုတ်ႈၵႂႃႇယွမ်းၵႂႃႇသေတူဝ် လႄႈ တူဝ်မႄႈဢမ်ႇလႆႈလူဝ်ႇထႅင်ႈ ၵေႃႉသေႈမၼ်းသေတူဝ်။ ဢမိင်ႉဢၼ်ဢွၵ်ႇသူပ်းၵဝ်မီးယဝ်ႉလႄႈ ဝီႉၺိၺ်ႇမၼ်းၸဝ်ႈ ႁႂ်ႈၶဝ်ၸူႉၵၼ်တုမ်ၵၼ်ဢေႃႈ။- 17မၼ်းၸဝ်ႈ ႁဵတ်းတၢင်းဢၼ်တူၵ်းၸႃႇၵွၵ်ႈပုၼ်ႈၶဝ်ယူႇ၊ ဢဝ်တင်းမိုဝ်းမၼ်းၸဝ်ႈ ၶဵင်ႈၸိူၵ်ႈမႆမီႈယူႇသေလႄႈ ၽႄတီႈယူႇမႅင်ႇပၼ်တီႈၶဝ်ဢေႃႈ။ ၶဝ်ၼၼ်ႉ တၵ်းလႆႈ ၶၢမ်ႇဢဝ်ဢမူၺ်ႇမိူင်းၼၼ်ႉယူႇတႃႇသေႇဢမ်ႇထၢတ်ႇလႄႈ ယူႇၵႃႈၼႂ်းမၼ်းယူႇၵူႈၸူဝ်ႈၵူႈပၢၼ် သိုပ်ႇသိုပ်ႇတၢမ်းတၢမ်းဢေႃႈ။
Copyright © 2021 by OMF International, Shan Baptist Churches Fellowship