मरकुस 7
7
रिती-रिवाजनै निभाबो
(मत्ती 15:1–9)
1फरिसी अर सास्तरानै सीखाबाळा जखा यरूसलेमऊँ आया हा अर बे ईसु कनै भेळा होया 2अर बे ईसु का चेलानै हात धोया बिना रोटी खाता देख्या। 3(फरिसी अर सगळा यहूदि आपका बूडा बडका की लीक पिट्या करता हा, अर बे बिना हात धोया रोटी कोनी खाता हा। 4अर बे बजार म जार आता जणा बी बिना न्हाई-धोई कर्या रोटी-टुक कोनी खाता। अर आ बातानै छोडर ओर बी बोळी बाता ही जिनै बे निभाता हा, जंय्यां लोटा, घड़ा अर तामा का भांढानै धोबो अर मांजबो ) 5इ बजेऊँ बे फरिसी अर सास्तरानै सीखाबाळा ईसुनै बुज्या, “थारा चेला बूडा बडका का रिती-रिवाज प क्युं कोनी चालै, अर सूल हात धोया बिनाई रोटी खावै ह?” 6ईसु बाऊँ बोल्यो, “यसाया परमेसर की खेबाळो थारा जंय्यां का दोगला मिनखा ताँई परमेसर कानिऊँ ठिकई बोल्यो हो। जंय्यां पबितर सास्तर म मंडर्यो ह:
‘अ लोग होठाऊँ तो मेरो मान करीं हीं पण आको हियो मेरूँ दूर ह। 7अ बेकामई मेरी भगती करीं हीं। अर मिनखा का बणाएड़ा आदेसानै मेरा कर सीखावीं हीं।’
8“थे परमेसर का हुकमानै टाळर मिनखा का रिती-रिवाजानै मानो हो। 9थे बोळा चतर हो जखा परमेसर का हुकमानै टाळर थाकाळा रिती-रिवाजानै मनवाबाळा हो। 10जंय्यां मूसा ओडायो ह,
‘थे थारी माँ अर बाप की ईज्जत करो, अर कोईबी मिनख आपकी माँ अर बाप को बुरो करै बिनै मार देणो चाए।’
11“पण थे मिनखानै अंय्यां सीखार्या हो क जद थारा माँ-बाप थारै कनैऊँ कोई चिज माँगै जणा थे बानै बोलो हो क बा तो कोर्बान#7:11जिको मतबल परमेसरनै चढाईड़ी चिज ह अर इनै बो बरत बी सकै ह। ह। (जिको मतबल परमेसरनै चढाईड़ी ह) अंय्यां बोलर थे थारा माँ-बापा की सेवा करबाऊँ बरी होज्यास्यो। 12अर थे अंय्यां सीखार मिनखानै बाका माँ-बापा की सेवा कोनी करबा द्यो 13अर थे अंय्यां का रिती-रिवाजाऊँ जखा थारा बणाएड़ा हीं आनै निभाबा ताँई परमेसर का बचननै टाळ द्यो हो। अर अंय्यां-अंय्यां का ओर बी घणासारा काम ह जखा थे करो हो।”
मिनखनै सूगलो करबाळी बाता
(मत्ती 15:10–20)
14ईसु ओज्यु भीड़नै बुलायो अर बो बोल्यो, “थे सगळा मेरी सुणो अर समजो। 15अंय्यां की कोईबी चिज कोनी ह जखी मिनखनै बारनैऊँ बिकै मांय जार बिनै सूगलो करै।” 16(पण जखी चिजा मिनखा क मांयनैऊँ निकळै ह बे बिनै सूगलो करै ह। जिकै कान ह बो बानै खोलल्यो।)#7:16पुराणी पोथी म आ बात कोनी। 17अर ईसु भीड़नै बठैई छोडर घर क मांयनै गयो अर बिका चेला बिनै इ मिसाल क बार म बुजबा लाग्या। 18ईसु बाऊँ बोल्यो, “के थारै बी कोनी पलै पड़ी? के थे कोनी जाणो क जखी चिज बारनैऊँ मिनख क मांयनै जावै ह बा बिनै सूगलो कोनी करै। 19बे चिजा हिया म कोनी जावै पण पेट क मांयनै जावै अर निकळ ज्यावै ह।” अर बो अंय्यां बोलर खाबाळी सगळी चिजानै सुद बतायो। 20पाछै ईसु बोल्यो, “मिनख हियाऊँ जखो बिचारै ह बो बिनै सूगलो करै ह। 21मिनख क हियाऊँ बुरा-बुरा बिचार, कुकरम, चोरी, हत्या, 22व्यबिचार#7:22ब्या करै पाछै बिराणी लूगाई अर मोट्यार क सागै सूगलो काम करनो व्यबिचार ह।, लोभ, कमिणोपुणो, दोगलोपुणो, ठगणो, बेहूदोपुणो, बळोकड़ोपूणो, कोईकी बुराई करबो, गुमान अर गोबुपुणो (मोथोपुणो) बारनै निकळ ह। 23अ सगळी बुरी-बुरी बाता मिनख क मांयनैऊँ निकळर बिनै सूगलो करै ह।”
सूरफनिकी जात की लूगाई को बिस्वास
(मत्ती 15:21–28)
24ईसु बि झघानै छोडर सूर नाम की नगरी म एक घर क मांयनै गयो। अर बो चावै हो क बिकै आबा को बेरो कोईनैई नइ पड़ै, पण बो कोनी छापळ सक्यो। 25ईसु क बारां म सुणर एक लूगाई जिकी छोरी म सूगली ओपरी बलाय ही बठै बेगीसी आर ईसु का पगा म पड़गी। 26आ लूगाई यूनानी ही अर इको जलम सिरीया क फनिकी परदेस म होयो हो, आनै यहूदि अछूत मानता हा। बा लूगाई ईसुऊँ अरदास करती बोली मेरी छोरी मऊँ ओपरी बलाय काड दे। 27ईसु बी लूगाईऊँ बोल्यो, “पेल्या टाबरानै धापबादे, टाबरा की रोट्यानै गंडक्ड़ा क आगै बगाबो चोखो कोनी।” 28बा लूगाई ईसुऊँ बोली, “परबु थाकाळी बी सची ह पण टाबर की रोटी का बिखरेड़ा माखणा गंडक्ड़ाई तो खावीं हीं।” 29ईसु बिकी बातनै सुणर बिऊँ बोल्यो, “तेरी इ बात की बजेऊँ थाकाळी छोरी क मांयनैऊँ ओपरी बलाय भागगी ह, इब तू राजी-खुसी जा।” 30अर बा लूगाई घरा जार आपहाळी छोरीनै देखी क, बिमैऊँ ओपरी बलाय भागगी अर बा खाट म आडी होरी ही।
बोळा अर काबा को निरोगो होबो
31ईसु सूर नाम की नगरीऊँ बिदा होर, सैदाऊँ दस नगरी होतो होयो गलिल दरिआव क कनै पुग्यो। 32जणा लोग एक बोळानै जखो काबो बी हो ईसु कनै ल्याया। अर ईसुऊँ अरदास कर बोल्या, “ईसु थे थारो हात इपै धरद्यो।” 33ईसु बी बोळानै भीड़ऊँ नाकै लेगो अर आपकी आँगळ्या बिकै काना म घाल्यो अर थूकर बिकी जीब क हात अड़ायो। 34अर ईसु ईस्बर नगरी कानि देखर दयाऊँ भर'र सांस खिंची अर बिऊँ बोल्यो, “इप्फथा!” इको मतबल ह, खुलज्या। 35अंय्यां बोलताई बिका कान खुलगा अर जीब की आटी बी खुलगी अर बो चोखा ढंगऊँ बोलबा लाग्यो। 36अर ईसु बानै चेतार ओडायो क, “थे इ बात क बारां म कोईनैई मना खिज्यो।” पण बो बानै जत्तो नइ बताबा ताँई बोल्यो हो, बे बिऊँ बी घणी बी बातनै फिलाई। 37लोग ताजूब कर बोलबा लाग्या, “ईसु भलो-भलोई करै, अठै ताँई क बो बोळानै सुणबा अर गुँगानै बोलबा की सक्ति देवै ह।”
Šiuo metu pasirinkta:
मरकुस 7: एस डब्लु वी
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
(c) 2010-2017, New Life Computer Institute. All rights reserved