मत्ती 27
27
ईसुनै पीळातुस क सामै हाजिर कर्यो
(मरकुस 15:1; लूका 23:1,2; यहून्ना 18:28–32)
1दिन उगताई परधान याजक अर यहूदि नेता एक मत होया क ईसुनै कंय्यांसिक मोत की सजा दिवाई जावै। 2अर बे ईसु का हातानै बांदके रोमी राजपाल पीळातुस कनै लेग्या। अर बिकै हाता म बिनै सूप दिआ।
यहूदा खुद क फासी लगाई
(काम 1:18,19)
3 #
काम 1:18,19 ईसुनै धोकाऊँ पकड़बाळो यहूदा जद आ सुण्यो क ईसुनै दोसी गिण्यो गयो ह। जणा बो पछतायो अर परधान याजक अर यहूदि नेता कनै चाँदी हाळा तीस सीक्का लेर ओटो गयो। 4अर खयो, “म निरदोस मिनखनै धोकाऊँ पकड़ार पाप कर्यो हूँ।” अंय्यां सुणर बे बोल्या, “म्हानै इऊँ काँई लेणो ओ तो तेरो मामलो ह।” 5अंय्यां सुणर यहूदा बा चाँदी का सीक्कानै मनदर क मांयनै फेकर चलेगो अर जार खुद क फासी लगाली। 6जणा परधान याजक बा सीक्कानै उठार खया, “आ सीक्काऊँ एक मिनखनै मारबा ताँई मोल लेयड़ो ह। अर आपणो बिधी-बिधान आनै मनदर की दान पेटी म धरबा की इजाजत कोनी देवै।” 7इ ताँई बे आपसरी म फेसलो कर आ सीक्काऊँ एक खुमार को खेत मोल लिआ जिऊँ यरूसलेम म आबाळा पराया मिनखा क मरबा क पाछै बानै गाड सकै। 8इ ताँई बो खेत आज ताँई “लोय को खेत” खुवावै ह। 9अर अंय्यां परमेसर का खेबाळा यरमिआ को मांडेड़ो बो आंक बी पूरो होयो;
“बे चाँदी का तीस सीक्का लिआ,
आ बा रकम ह जखी बि खातर इजरायल का मिनख देबा ताँई त्यार होया।
10अर जंय्यां परबु मनै हुकम दिओ हो
बे बंय्यांई बि रकमऊँ खुमार को खेत मोल लिआ।”
पीळातुस ईसुऊँ सुवाल बुज्यो
(मरकुस 15:2–5; लूका 23:3–5; यहून्ना 18:33–38)
11ईसुनै बे राजपाल पीळातुस क सामै लेग्या अर बो बिऊँ बुज्यो, “के तू यहूदिआ को राजा ह?” ईसु बोल्यो, “हाँ म हूँ जंय्यां थे बोल्या हो।” 12अर जद परधान याजक अर यहूदि नेता बिपै बोळी बाता को दोस लगावा हा बि टेम ईसु क्युंई कोनी बोल्यो। 13जणा पीळातुस बोल्यो, “तू सुणै हनै अ तेर प कत्ता दोस लगार्या हीं?” 14पण ईसु पीळातुसनै क्युंई जुबाब कोनी दिओ। आ देखर बिनै बिपै ताजूब होयो।
ईसुनै मोत की सजा
(मरकुस 15:6–15; लूका 23:13–25; यहून्ना 18:39—19:16)
15फसै का त्युंहार प पीळातुस रीत गेल एक केदिनै जिनै लोग चाता बिनै बा ताँई छोड देतो हो। 16बि टेम बरअबा#27:16 कई हातऊँ मांडेड़ी पोथ्या म इको नाम ईसु बरअबा नाम मांड्यो गयो ह नाम को एक केदि बठै हो जिनै सगळा जाणता हा। 17अर बठै भीड़ भेळी होगी जणा पीळातुस बाऊँ बुज्यो, “थे काँई चाओ हो क म थारै ताँई किनै छोडूँ बरअबानै नहिस ईसुनै जिनै थारै मऊँ क्युंक मसी बतावै ह?” 18बो ओ सुवाल इ ताँई बुज्यो, क्युं क बो जाणतो हो यहूदि अधिकारी जळता-बळता ईसुनै पकड़ाया ह। 19अर जद पीळातुस न्यायहाळा सिंघासन प बेठ्यो हो जणा बिकी लूगाई बिकन एक संदेसो भेज्यो। जिमै मंडर्यो हो क, “सुआरैसिक म सूपना म इ मिनख की बजेऊँ बोळो दुख पाई हूँ। जणा इ धरमी मिनख क सागै क्युंई बुरो मना करज्यो।” 20पण परधान याजक अर यहूदि नेता जनतानै उकसाया क म्हारै ताँई बरअबानै छोड दे अर ईसुनै मार। 21जणा राजपाल पीळातुस बाऊँ बुज्यो, “थे आ दोन्या मऊँ कूणसानै छुटाबो चाओ हो?” बे बोल्या, “बरअबानै!” 22जणा पीळातुस बाऊँ बुज्यो, “म इ ईसु को जखो मसी खुवावै ह काँई करूं?” बे सगळा बोल्या, “इनै सुळी प चढा द्यो।” 23पीळातुस बुज्यो, “क्युं ओ लाय काँई बुरो कर्यो ह?” पण बे ओर बी जोरऊँ बोल्या, “इनै सुळी प चढावो।” 24पीळातुस आ देखर सोच्यो इब क्युंई कोनी हो सकै ज म भीड़ क खिलाप जास्युं तो दंगो हो सकै ह। इ ताँई बो पाणी लेर भीड़ क सामै हात धोर खयो, “इ मिनख की मोत म मेरो कोई लेणदेण कोनी आ थारी करनी ह।” 25जणा बे सगळा बोल्या, “इका जिमेबार म्हें अर म्हारा टाबर-टिकर हीं।” 26जणा पीळातुस बा ताँई बरअबानै तो दिओ छोड अर ईसु क बेत पड़वार सुळी प चढाबा को हुकम दे दिओ।
सिपाईड़ा ईसु की बेजती करी
(मरकुस 15:16–20; यहून्ना 19:2,3)
27सिपाईड़ा ईसुनै राजपाल पीळातुस क गड का आँगणा म लेग्या। अर बिकै च्यारूमेर सिपाईड़ा की सगळी पलटण भेळी होगी। 28बे बिका गाबा उतार बिनै उजळा लाल रंग को गाबो पिराया। 29जणा बे बिका सीर प काटाहाळी डाळ्यां को मुकट बणार धर दिओ। अर बिका दाया हात म कामड़ी#27:29 आ कामड़ी गन्ना स्यारकी होवै ह। पकड़ा दिनी अर बिकै आगै गोडा टे'कर हसताई खया, “यहूदिआ का राजा नमस्कार।” 30बे बिपै थूकर्या अर बा कामड़ी लेर बिकै सीर प मार्या। 31अर बे बिको मजाक उडार बिका बो गाबो तो लिआ काड, अर पाछा बिकाई गाबा पिरार, बिनै सुळी प चढाबा ताँई चाल पड़्या।
ईसुनै सुळी चढाबो
(मरकुस 15:21–32; लूका 23:26–43; यहून्ना 19:17–27)
32अर जद बे बारनै निकळर क्युंक दूर गया जणा बानै कुरेन को रेह्बाळो समोन नाम को एक मिनख मिल्यो। अर बिनै धमकार खया, “ईसु की सुळी उठार चाल।” 33अर जद बे गुलगुता जिको मतबल खोपड़ी की झघा ह पुग्या। 34जणा बे ईसुनै पित मिलेड़ी अँगूरी पिलाबा ताँई दिआ। पण ईसु बिनै चाख्यो जणा कोनी पीयो। 35इकै पाछै बे ईसुनै सुळी प चढा दिओ, अर ईसु का गाबा प परची गेर'र आपसरी म बाट लिआ। 36अर बे बठैई बेठगा अर पेरो देबा लागगा। 37बे बिको दोस पतर सुळी प चिपका दिओ जिपै मंडर्यो हो “ओ यहूदि मिनखा को राजा ईसु ह।” 38बि टेमई ईसु क सागै दो डाकू बी सुळी प चढाया गया हा एकनै तो ईसु क दाया नाकै अर दुसरानै बाया नाकै। 39आबाळा जाबाळा नाड़ हला-हलार ईसु की बुराई करा हा। 40#मत्त 26:61; यह 2:19अर खेर्या हा, “मनदरनै ढाबाळा अर तीन दिना म ओज्यु बणाबाळा खुदनै बचा, परमेसर का बेटा सुळीऊँ तळै उतर्या।” 41अंय्यांई बोलर परधान याजक, सास्तरानै सीखाबाळा अर यहूदि नेता क सागै मिलर बिको तमासो करर्या हा। अर खेर्या हा, 42“दुसरानै बचाबाळा पेल्या खुदनै तो बचा! ज तू यहूदिआ को राजा ह जणा सुळी पऊँ तळै उतर्या। जणा म्हें तेर प बिस्वास करस्यां। 43ओ बोळो परमेसर प बिस्वास कर्या करतो हो। ओ खेतो हो क म परमेसर को बेटो हूँ जणा ज परमेसर चावै तो इनै बचावै।” 44अर बे डाकू बी जखा बिकै सागै सुळी प चढाया गया हा बिको तमासो करर्या हा।
ईसु पिराण तज्यो
(मरकुस 15:33–41; लूका 23:44–49; यहून्ना 19:28–30)
45दोपारा बारा बजेऊँ लेर तीन बजै ताँई सगळा देस म अँधेरो छायो रिह्यो। 46अर करीब तीन बजैसीक ईसु जोरकी उवाज म चिलाटी घाली, “इलोई, इलोई, लमा सबकतनी?” जिको मतबल ह, “हे मेरा परमेसर तू मनै क्युं तज दिओ?” 47अर जखा मिनख बठै खड़्या हा बे अंय्यां सुणर खेबा लाग्या, “ओ परमेसर की खेबाळा एलिआनै बुलातो दिखै ह।” 48जणा एक मिनख तावळोसो भागर चुखानै खाटी अँगूरी म भेर लाठी प टां'गर ल्यायो अर ईसुनै चुसबा ताँई दिओ। 49अर कई मिनख खया, “डटो आपा देखस्यां इनै एलिआ बचाबा आवै ह क कोनी।” 50अर ईसु जोरऊँ चिलाटी मार'र पिराण तज दिओ। 51अर बि टेमई मनदर को परदो उपरऊँ लेर निचै ताँई पा'टर दो भाग होगो। धरती हालगी अर ढाड बी तिड़कगी। 52अर अठै ताँई क क्युंक कबरा बी खुलगी अर परमेसर का बोळा मरेड़ा मिनख ओज्यु जीगा। 53बे कबराऊँ निकळर ईसु क जीबा क पाछै पबितर यरूसलेम म जार बोळानै दिख्या। 54रोमी सेना को सुबेदार अर ईसु क पेरोदेबाळा मिनख भूचाळ अर जखो बठै घट्यो हो बिनै देखर डरग्या। अर खया, “ओ सचमई परमेसर को बेटो हो।” 55#लूक 8:2,3बठै घणीसारी लूगाया बी ही बे ईसुनै परैऊँई खड़ी-खड़ी देखै ही बे बिकी सेवा करबा ताँई गलिलऊँ बिकै गेल आई ही। 56बा लूगाया म मरीयम मगदलिनी, याकूब अर युसूफ की माँ मरीयम अर याकूब अर यहून्ना की माँ ही।
ईसुनै कबर म धर्या
(मरकुस 15:42–47; लूका 23:50–56; यहून्ना 19:38–42)
57जद दिन आथगो जणा अरमतिया नगरऊँ युसूफ नाम को एक पिसाळो मिनख आयो। ओ ईसु को चेलो हो। 58ओ पीळातुस कनै गयो अर बाऊँ ईसु की लास माँगी। जणा पीळातुस हुकम दिओ इनै लास दे दि जाय। 59युसूफ लासनै लिओ अर बिनै एकदम साप गाबा म लपेट्यो, 60बिकी लासनै बि कबर म धर्यो जिनै बो ताजाई ढाडनै खोदर बणवायो हो अर कबर का मुंडानै बडासारका गोळ भाठाऊँ ढकर चलेगो। 61मरीयम मगदलिनी अर दुसरी मरीयम आर बि कबर क सामै बेठगी।
ईसु की कबर को पेरेदार
62सकरवार क आगलै दिन जखो यहूदि मिनखा को अरामहाळो दिन हो बि दिन परधान याजक अर फरिसी पीळातुस कनै गया। 63#मत्त 16:21; 17:23; 20:19; मर 8:31; 9:31; 10:33,34; लूक 9:22; 18:31–33अर खया, “म्हराज, म्हानै याद ह जद बो धोकेबाज जीताजी हो जणा खेतो हो क मेरी मोत क पाछै म तीसरै दिन ओज्यु जिंदो होज्यास्युं। 64इ ताँई थे हुकम द्यो क तीन दिना ताँई कबर की पेरेदारी करी जाय। क्युं क कदै अंय्यां नइ होज्या क बिका चेला बिकी लास चुरा लेज्यावै अर मिनखाऊँ खेबा लागीं क बो मरेड़ा मऊँ जीगो ह। अर ओ काम बिका पेलड़ा कामाऊँ बी बुरो होसी।” 65जणा पीळातुस खयो, “थे पेरो लगाबा ताँई सिपाईड़ा लेज्याओ अर जंय्यां थे चाओ हो बंय्यांई पेरो द्यो।” 66जणा बे जार कबर प लगाईड़ा भाठा प छाप लगा दिनी अर पेरो देबा ताँई सिपाईड़ानै बठैई बिठा दिआ जिऊँ बे बिकी निगा राख सकै।
Šiuo metu pasirinkta:
मत्ती 27: एस डब्लु वी
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
(c) 2010-2017, New Life Computer Institute. All rights reserved