मत्ती 21
21
यरूसलेम म ईसु की जे-जैकार
(मरकुस 11:1–11; लूका 19:28–40; यहून्ना 12:12–19)
1जद ईसु अर बाकाळा चेला यरूसलेम क सांकड़ै जेतून डूँगरी की ढळान प बेतफगे अर बेतनिया क कनै आया। जणा ईसु आपका चेला मऊँ दो जणानै 2अंय्यां बोलर भेज्यो, “सामला गाँव म जाओ। थानै बि गाँव म एक गधेड़ी अर बिको बच्यो बांदेड़ो मिलसी बानै खोलर मेरै कनै ल्याओ। 3अर थानै कोई बुजै थे ओ काँई करो हो? जणा बिनै बोलज्यो, परबुनै इकी जुर्त ह जणा बो थारै सागै बानै भेज देसी।” 4ओ इ ताँई होयो ह, क्युं क परमेसर की खेबाळा का बचन पूरा हो:
5सिओन की छोरीऊँ खेओ क
बिको राजा बिकन आर्यो ह;
बो खुदनै छोटो कर्यो ह,
हाँ बो गधेड़ी का बच्या प बेठ्यो ह।
6बिकै पाछै बे चेला गया अर जंय्यां ईसु बानै ओडायो हो बंय्यांई कर्यो। 7अर बे बि गधेड़ी अर बिका बच्यानै ले आया अर बापै बेठबा ताँई बाकै उपर गाबा गेर्या जणा ईसु गधेड़ी का बच्या प बेठगो। 8बोळा मिनख गेला म आपका गाबा बिछा दिआ। अर कई दरख्ताऊँ डाळ्यां तोड़-तो'ड़र गेला म बिछा दिनी। 9अर जखा मिनख बाकै आगै-पिछै चालर्या हा बे जोर-जोरऊँ खेर्या हा;
“दाऊद का बेटा की जे हो!
परबु क नामऊँ आबाळो धने ह।
ईस्बर नगरी म रेह्बाळा की जे हो।”
10अर जद बे यरूसलेम म बड़्या जणा सगळी नगरी म खळबळी माचगी। अर लोग बुजबा लाग्या, “ओ कूण ह?” 11अर लोगई जुबाब देर्या हा, “ओ गलिल का नासरत को परमेसर की खेबाळो ईसु ह।”
ईसु मनदर म
(मरकुस 11:15–19; लूका 19:45–48; यहून्ना 2:13–22)
12ईसु मनदर म गयो अर बठै जत्ताबी बेचबाळा अर खरीदबाळा हा, बानै बठैऊँ बारनै काडबा लाग्यो। बो रिपीआ को लेणदेण करबाळा का पाटियानै बगा दिओ अर कबूतर बेचबाळा का तक्तानै उंदो कर दिओ। 13इकै पाछै बो बानै बोल्यो, “पबितर सास्तर म मंडर्यो ह:
“‘मेरो मनदर अरदास करबा को घर खुवासी।
पण थे इनै डाकूआ की खोळ बणा दि।’”
14मनदर म क्युंक आँदा, लुला-लंगड़ा हा बे ईसु कनै आया अर बो बानै निरोगो कर्यो। 15जद परधान याजक अर यहूदि धरमसास्तरी बा ताजूब का कामानै देख्या। जणा बे टाबरानै मनदर म जोर-जोरऊँ आ खेता सुण्या क, “दाऊद का बेटा की जे हो! ओ धने ह।” आ सुणर बे झाळ्या म भरगा। 16अर ईसुऊँ बुजबा लाग्या, “तनै सुणै ह के बे काँई खेर्या हीं?” ईसु बाऊँ बोल्यो, “हाँ सुणू हूँ। थे सास्तर म ओ कोनी बाच्यो, बो टाबर टिकराऊँ अर दुद पिता नान्याऊँ आपकी मेमा कराई ह।” 17अर ईसु बानै बठैई छोडर बेतनिया चलेगो अर रातनै बठैई रिह्यो।
ईसु अंजीर का दरख्तनै दूरसिस दिओ
(मरकुस 11:12–14,20,24)
18भागपाट्याई जद ईसु यरूसलेम नगरी म जार्यो हो जणा बिनै भूख लागी। 19गेला म एक अंजीर को दरखत देखर ईसु बिकन गयो, पण बि दरखत म पत्तानै छोडर क्युंई कोनी लाध्यो। जणा बो बि दरख्तऊँ बोल्यो, “तेरै कदैई फळ कोनी लागै!” अर बो दरखत जदकी जदई सूकगो। 20अर चेला आ देखर ताजूब करताई ईसुनै बुज्या, “ओ अंजीर को दरखत हात की हात कंय्यां सूकगो?” 21#मत्त 17:20; 1 कुरन्थी 13:2जणा ईसु बानै बोल्यो, “म थानै सची खेऊँ हूँ, ज थे बिस्वास करो अर भेम नइ करो। जणा जखो म कर्यो हूँ बोई नइ पण ज थे इ डूँगरऊँ खेस्यो क समदर क मांयनै जा पड़ जणा बंय्यांई होज्यासी। 22बिस्वासऊँ अरदास म जोक्यु बी माँगस्यो, बो थानै मिलसी।”
ईसु का अधिकार प सुवाल
(मरकुस 11:27–33; लूका 20:1–8)
23जद ईसु मनदर म सीख देर्यो हो जणा परधान याजक अर यहूदि नेता ईसु कनै आर बुज्या, “थे अ बाता की अधिकारऊँ करो हो? अर थानै ओ अधिकार कूण दिओ?” 24ईसु बाऊँ बोल्यो, “म थानै एक सुवाल बुजूँ हूँ, ज थे मनै बिको जुबाब देद्यो। जणा म बी थानै बता देस्युँ क म की अधिकार करूं हूँ। 25यहून्नानै पाणी को बतिस्मो देबा को अधिकार कठैऊँ मिल्यो? परमेसरऊँ नहिस मिनखाऊँ?” अर बे आपसरी म बतळाता होया खेबा लाग्या, “ज आपा खेवां क परमेसरऊँ जणा बो आपानै खेसी बिको बिस्वास क्युं कोनी कर्या? 26अर ज आपा खेस्यां मिनखाऊँ जणा मिनखा को डर ह, क्युं क मिनख बिनै परमेसर की खेबाळो मानी हीं।” 27जणा बे ईसुनै बोल्या, “म्हानै कोनी बेरो।” इपै ईसु बी बाऊँ बोल्यो, “जणा म बी कोनी बताऊँ क म अ बाता की अधिकारऊँ करूं हूँ!
दो बेटा की निती-कथा
28“थे काँई सोचो हो? एक मिनख क दो छोरा हा। बो बडोड़ा छोरा क कनै गयो अर बिनै ओडायो, ‘अँगूरा का बाग म जा अर काम कर।’ 29पण बो बोल्यो, ‘मेरो मन कोनी।’ बिकै पाछै बी बो चलेगो। 30अर बो बाप दुसरा छोरा कनै गयो अर बिनै बी बंय्यांई ओडायो। अर बो छोरो बोल्यो, ‘हाँ जास्युं।’ पण कोनी गयो। 31बताओ आ दोन्या म कूणसो ह, जखो बाप चाओ हो बो कर्यो?” बे बोल्या, “बडोड़ियो छोरो कर्यो।” जणा ईसु बाऊँ बोल्यो, “म थानै सची खेऊँ हूँ, चुंगी लेबाळा अर बेस्या परमेसर का राज म थारूँ पेल्या ज्यासी। 32#लूक 3:12; 7:29,30अंय्यां म इ ताँई खेर्यो हूँ क्युं क यहून्ना बतिस्मो देबाळो थानै धारमिक्ता को गेलो दिखाबा ताँई आयो पण थे बिको बिस्वास कोनी कर्या। पण चुंगी लेबाळा अर बेस्या बिको बिस्वास कर्या। पण थे बानै देखर बी थारा हियानै कोनी बदल्या अर नइ बिपै बिस्वास कर्या।
अँगूरा का बाग का ठेकेदारा की निती-कथा
(मरकुस 12:1–12; लूका 20:9–19)
33“एक मिसाल ओर सुणो: एक जमीदार हो। बो अँगूरा को बाग लगायो अर बिकै च्यारूमेर बाड़ बांदी। अर अँगूरा को रस काडबा ताँई खाडो खोदर एक घरट लगायो अर रूखाळी ताँई एक मचाण बणाई। अर अँगूरा का बागनै किराया प देर दूर दिसावर चलेगो। 34अर जद अँगूर लागबा की रुत आई जणा बो मालिक ठेकेदारा कनै आपका दासानै अधिकार क सागै भेज्यो क बे अँगूरा को हिस्सो लेर आवै। 35पण बे ठेकेदार बा दासानै पकड़र कयानै तो पिट्या, कया क भाठा मार्या अर कयानै ज्यानऊँ मार गेर्या। 36अर बो मालिक ओज्यु बा दासाऊँ बेत्ती दासानै अधिकार क सागै बाकन भेज्यो पण बे ठेकेदार बाकै सागै बी बोई बरताव कर्यो। 37आखीर म बो आपका बेटानै बाकन आ सोचर भेज्यो क बे इको तो मान करसी। 38पण जद बे ठेकेदार बिका बेटानै देख्या जणा आपसरी म खेबा लाग्या, ‘ओ तो बिको वारिस ह, आओ इनै मारद्यां अर इकी जायजादनै हड़पल्यां।’ 39अर बे बिनै पकड़र बिकै धका मार'र अँगूरा का बागऊँ बारनै लेग्या अर मार गेर्या। 40जणा इब थे बताओ जद बो अँगूरा का बाग को मालिक आसी जणा बा ठेकेदारा क सागै काँई करसी?” 41जणा बे ईसुऊँ बोल्या, “बे कुटिचर हा इ ताँई बो बानै बेरहमीऊँ मारसी अर अँगूरा को बाग दुसरानै ठेका प दे देसी जखा बिनै अँगूरा की रुत म बिकी पाँती दे।” 42ईसु बाऊँ बोल्यो, “थे सास्तर को ओ बचन कोनी बाच्या के:
“‘जि भाठानै चेजारा ख्याई जोगो कोनी समज्यो, बोई कूणा को भाठो निकळ्यो?
अर ओ परबु कर्यो ह जखो आपणी आँख्या क सामै अचम्मो ह।’
43“इ ताँई म थारूँ खेऊँ हूँ, परमेसर को राज थारूँ खोस लिओ ज्यासी अर बा मिनखानै दे दिओ ज्यासी जखा बिकै खया गेल बरताव करै ह। 44अर जखो बी इ ढाड प पड़सी, बो टुकड़ा-टुकड़ा होज्यासी अर आ ढाड जिपै पड़सी बिनै पिस गेरसी।” 45परधान याजक अर बडका आ मिसालानै सुण्या जणा बे समजगा क ओ आपणा बारामई बोलर्यो ह। 46जणा बे ईसुनै पकड़बा की कोसिस करी। पण मिनखाऊँ डरग्या क्युं क मिनख ईसुनै परमेसर की खेबाळो मानता हा।
Šiuo metu pasirinkta:
मत्ती 21: एस डब्लु वी
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
(c) 2010-2017, New Life Computer Institute. All rights reserved