मत्ती 6
6
दान
1“चौकन्ने रेह्आ। तुहां माणुआं जो दस्सणे तांई अपणे धार्मिकता दे कम्मां जो मत करा, नीं तां अपणे सुअर्गीय पिता ते कुच्छ भी फल़ नीं पाई सकदे हन।
2“इसतांई जाह़लू तू दान करैं, तां अपणे गांह ढिंन्डोरा मत पिट, जिंआं पाखंडी, आराधनालयां कने गलियां च करदे हन, तांजे माणु तिन्हां दी तारीफ करन। मैं तुहां नैं सच्च ग्लांदा ऐ, कि सैह़ अपणा प्रतिफल़ पाई बैठेयो हन। 3अपर जाह़लू तू दान करैं, तां जेह्ड़ा तेरा सज्जा हत्थ करदा ऐ, सैह़ तेरे खब्बे हत्थेयो पता नीं लग्गैं। 4तांजे तेरा दान गुप्त रैंह्, कने ताह़लू तेरा पिता जेह्ड़ा गुप्त च दिक्खदा ऐ तिज्जो प्रतिफल़ दिंगा।
प्रार्थना
(लूका 11:2-4)
5“जाह़लू तू प्रार्थना करैं, तां पाखंडियां साइआं मत कर, क्जोकि लोकां जो दस्सणे तांई आराधनालयां च कने सड़कां दे मोड़ां पर खड़ोई नैं प्रार्थना करणा तिन्हां जो खरा लगदा ऐ। मैं तुहां नैं सच्च ग्लांदा ऐ, कि सैह़ अपणा प्रतिफल़ पाई बैठेयो हन। 6अपर जाह़लू तू प्रार्थना करैं, तां अपणे कमरे च जा। कने दरवाजे बंद करी नैं अपणे पिता नैं जेह्ड़ा गुप्त च ऐ प्रार्थना कर। ताह़लू तेरा पिता जेह्ड़ा गुप्त च दिक्खदा ऐ, तिज्जो प्रतिफल़ दिंगा। 7प्रार्थना करदे बग्त दूईआं जातिआं दे लोकां साइआं बक-बक मत करा, क्जोकि सैह़ समझदे हन कि तिन्हां दे जादा ग्लाणे ते तिन्हां दी सुणनी ऐ। 8इसतांई तुहां तिन्हां साइआं मत बणा, क्जोकि तुहां दा पिता तुहां दे मंगणे ते पैहल्ले ई जाणदा ऐ कि तुहां दियां क्या-क्या जरूरतां हन।
9“कने तुहां इस तरीके नैं प्रार्थना करा।
‘हे अहां दे पिता, तू जेह्ड़ा सुअर्गे च ऐ,
तेरा नां पवित्र मन्नेया जां।
10तेरा राज्ज औयें। तेरी इच्छा जिंआं सुअर्गे च पूरी हुंदी ऐ,
तिंआं ई धरतिया पर भी होयैं।
11अहां दी दिन भर दी रोटी अज्ज अहां जो दे।
12कने जिंआं अहां अपणे अपराधियां जो माफ कित्या ऐ,
तिंआं ई तूमी अहां दे अपराधां जो माफ कर।
13कने अहां जो परीक्षा च मत पा,
अपर दुष्ट सैताने ते बचा। (क्जोकि राज्ज, शक्ति कने महिमा सदा तेरे ई हन।’ आमीन।)
14“इसतांई जे तुहां माणुआं दे अपराध माफ करगे, तां तुहां दा सुअर्गीय पिता भी तुहां जो माफ करगा। 15कने जे तुहां माणुआं दे अपराधां जो माफ नीं करगे, तां तुहां दा पिता भी तुहां दे अपराधां जो माफ नीं करगा।
ब्रत
16“जाह़लू तुहां ब्रत करन, तां तुहां दे मुँऐ पर पाखंडियां साइआं उदासी ना होयैं, क्जोकि सैह़ अपणे मुँऐ जो बुरा बणाई रखदे हन, तांजे लोक तिन्हां जो ब्रत करणे आल़ा जाणन। मैं तुहां नैं सच्च ग्लांदा ऐ, कि सैह़ अपणा प्रतिफल़ पाई चुकेयो। 17अपर जाह़लू तू ब्रत करैं अपणे सिरे पर तेल मल़ कने मुँऐ धोई लै, 18तांजे लोक नीं पर तेरा पिता जेह्ड़ा गुप्त च ऐ, तिज्जो ब्रत करणे आल़ा जाणे। इसा हालता च तेरा पिता जेह्ड़ा गुप्त च दिक्खदा ऐ, तिज्जो प्रतिफल़ दिंगा।
सुअर्गीय धन दौलत
(लूका 12:33,34)
19“अपणे तांई धरतिया पर धन दौलत मत कठ्ठेरा, जित्थु कीड़ा कने भुत्थी खराब करदी ऐ, कने जित्थु चोर टक लगाई नैं चोरी लैंदे हन। 20अपर खरे कम्म करी नैं अपणे तांई सुअर्गे च धन दौलत कठ्ठेरा, जित्थु ना तां कीड़ा कने ना भुत्थी खराब करदे हन, कने जित्थु ना चोर टक लगाई नैं चोरी सकदे हन। 21क्जोकि जित्थु तेरी धन दौलत ऐ तित्थु तेरा मन भी लगेया रैंह्गा।
सरीरे दी जोत्ती
(लूका 11:34-36)
22“सरीरे दी अखीं दीय्ये साइआं हन, इसतांई जे तेरियां अखीं खरियां होन, तां तेरा सारा सरीर भी परगड़ा हुंगा। 23अपर तेरियां अखीं बुरिआं होन। तां तेरा सारा सरीर भी नेहरा हुंगा। इसा बज़ाह ते सैह़ लौ जेह्ड़ी तिज्जो च ऐ, जे नेहरा होयैं तां सैह़ नेहरा कितणा बड्डा हुंगा।
परमात्मा कने धन दौलत
(लूका 16:13; 12:22-31)
24“कोई भी माणु इक्की बग्ते च दूँ मालकां दी सेवा नीं करी सकदा, होई नीं सकदा कि सैह़ इक्की नैं बैर कने दूये नैं प्यार रखगा, इक्की नैं बफादार रैंह्गा कने दूये दी निंदा करगा। कने तिंआं ई तुहां परमात्मे दी कने धन दौलता दी दून्नी दी सेवा नीं करी सकदे।
25“इसतांई मैं तुहां नैं ग्लांदा ऐ, कि अपणिया ज़िन्दगिया दे बारे च एह़ फिकर मत करा कि अहां क्या खाणा कने क्या पीणा, कने ना अपणे सरीरे तांई कि क्या लगाणा। क्या ज़िन्दगी खाणे ते, कने सरीर कपड़ेयां ते भी जादा कीमती नीं ऐ? 26अम्बरे दे पंछियां जो दिक्खा सैह़ ना बांदे हन, ना बडदे हन, कने ना तां पेड़ूयां च कठ्ठेरदे हन। भिरी भी तुहां दा सुअर्गीय पिता तिन्हां जो खुआंदा ऐ। क्या तुहां तिन्हां ते जादा कीमती नीं हन? 27तुहां च कुण ऐ, जेह्ड़ा फिकर करी नैं अपणिया उम्रा च इक्क घड़ी भी बधाई सकदा ऐ?
28“कने कपड़ेयां तांई क्जो फिकर करदे हन, छैल़ जंगली फूलां दे बूटेयां पर ध्यान करा कि सैह़ किंआं बडुंदे हन। सैह़ ना मेहनत करदे हन, ना तां अपणे तांई कपड़े बणांदे हन। 29तमी मैं तुहां नैं ग्लांदा ऐ, कि सुलेमान राजा भी अपणी पूरी राजपाठ आल़ी ज़िन्दगिया च इन्हां छैल़ जंगली फूलां साइआं नीं सज्जी सकेया। 30इसतांई जाह़लू परमात्मैं दरबड़े दे घाऐ जो इतणा छैल़ बणाया ऐ, जेह्ड़ा अज्ज ऐ, कने कल तिसियो अग्गी च फूकदे हन, भिरी भी सैह़ तिसदा इतणा जादा ध्यान रखदा ऐ, तां हे बेबसुआसियो, तुहां दा सैह़ इन्हां ते भी जादा ध्यान रखगा।
31“इसतांई तुहां फिकर करी नैं एह़ मत ग्लांदे कि अहां क्या खाणा, कने क्या पीणा, कने क्या लगाणा। 32क्जोकि होरनी जातिआं दे लोक इन्हां सारियां चीज्जां दी फिकर करदे रैंह्दे हन, अपर तुहां फिकर मत करा, क्जोकि तुहां दा सुअर्गीय पिता जाणदा ऐ, कि तुहां जो इन्हां सारिया चीज्जां दी जरूरत ऐ। 33इसतांई पैहल्ले तुहां परमात्मे दे राज्जे दी खोज करा, कने धार्मिकता दी ज़िन्दगी जीआ तां एह़ सारियां चीज्जां भी तुहां जो मिल्ली जागियां। 34कने कल्ले दी फिकर मत करा, क्जोकि कल्ले दा दिन अपणी फिकर अप्पु करी लैंगा; अज्जे तांई अज्जे दा ई दुख बड़ा भरी ऐ।”
Šiuo metu pasirinkta:
मत्ती 6: XNR
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
This work is licensed under Creative Commons Attribution-ShareAlike 4.0 License.