गिनती 23
23
बिलाम की पैहली भविष्यवाणी
1फेर बिलाम नै बालाक तै कह्या, “उरै मेरै खात्तर सात वेदियाँ बणवा, अर इस्से जगहां पै सात बाछड़े अर सात मिंढे त्यार कर।” 2फेर बालाक नै बिलाम कै कहण कै मुताबिक करया; अर बालाक अर बिलाम नै मिलकै हर एक वेदी पै एक बाछड़ा अर एक मिंढा चढ़ाया। 3फेर बिलाम नै बालाक तै कह्या, “तू अपणे होमबलि कै धोरै खड्या रह, अर मै जाऊँ सूं; हो सकै सै के यहोवा मेरै तै फेटण नै आवै; अर जो कुछ वो मेरै पै जाहिर करैगा वोए मै तेरे ताहीं बताऊँगा।” फेर वो एक मुँण्ड़े पहाड़ पै गया। 4अर परमेसवर बिलाम तै मिल्या; अर बिलाम नै उसतै कह्या, “मन्नै सात वेदियाँ त्यार करी सैं, अर हर एक वेदी पै एक बाछड़ा अर एक मिंढा चढ़ाया सै।” 5यहोवा नै बिलाम कै मुँह म्ह एक बात डाली, अर कह्या, “बालाक कै धोरै बोहड़ ज्या, अर इस तरियां कहिये।” 6अर वो उसकै धोरै बोहड़कै आ ग्या, अर के देक्खै सै के वो सारे मोआबी हाकिमां समेत अपणे होमबलि कै धोरै खड्या सै। 7फेर बिलाम नै अपणी गहरी बात शरु करी, अर कहण लाग्या,
“बालाक नै मेरे ताहीं अराम तै,
यानिके मोआब के राजा नै मेरे ताहीं पूर्व के पहाड़ां तै बुलवा भेज्या:
‘आ, मेरै खात्तर याकूब नै श्राप दे, आ, इस्राएल नै धमकी दे!’
8पर जिन ताहीं परमेसवर नै न्ही श्राप दिया उननै मै क्यूँ श्राप दियुँ?
अर जिन ताहीं यहोवा नै धमकी न्ही दी उननै मै किस तरियां धमकी दियुँ?
9चट्टानां की चोट्टी पै तै वे मन्नै दिखाई देवैं सैं,
पहाड़ियाँ पै तै मै उन ताहीं देक्खूँ सूं;
वा इसी जात्ति सै जो एक्ली बसी रहवैगी,
अर गैरजात्तां तै अलग गिणी जावैगी!
10याकूब के धूळ के किणक्यां नै कौण गिण सकै सै,
या इस्राएल की चौथाई की गिणती कौण ले सकै सै?
सौभाग्य जै मेरी मौत धर्मियाँ की सी
अर मेरा अन्त भी उन्हे की तरियां हो!”
11फेर बालाक नै बिलाम तै कह्या, “तन्नै मेरै गैल के करया सै? मन्नै तेरे ताहीं अपणे बैरियाँ तै श्राप देण नै बुलवाया था, पर तन्नै उन ताहीं आशीष ए आशीष दी सै।” 12उसनै कह्या, “जो बात यहोवा नै मेरै तै सिखाई, के मन्नै उस्से ताहीं सावधानी तै बोलणा न्ही चाहिये?”
बिलाम की दुसरी भविष्यवाणी
13बालाक नै उसतै कह्या, “मेरे गैल दुसरी जगहां पै चाल, जित्त तै वे तेरे ताहीं दिखाई देवैंगे; तू उन सारया नै तो न्ही, सिर्फ बाहर आळयां नै देख सकैगा; ओड़ै तै उननै मेरै खात्तर श्राप दे।” 14फेर वो उसनै सोपीम नाम के मदानां म्ह पिसगा कै सिरे पै लेग्या, अर ओड़ै सात वेदी बणवाकै हर एक पै एक बाछड़ा अर एक मिंढा चढ़ाया। 15फेर बिलाम नै बालाक तै कह्या, “अपणे होमबलि कै धोरै उरैए खड्या रह, अर मै ओड़ै जाकै यहोवा तै भेंट करुँ।” 16अर यहोवा नै बिलाम तै भेंट करी, अर उसनै उसकै मुँह म्ह एक बात और डाली, अर कह्या, “बालाक कै धोरै बोहड़ ज्या, अर इस तरियां कहिये।” 17अर वो उसकै धोरै गया, अर के देक्खै सै के वो मोआबी हाकिमां समेत अपणी होमबलि कै धोरै खड्या सै। अर बालाक नै पूच्छया, “यहोवा नै के कह्या सै?” 18फेर बिलाम नै अपणी गहरी बात शरु करी, अर कहण लाग्या,
“हे बालाक, मन लगाकै सुण,
हे सिप्पोर के बेट्टे, मेरी बात पै कान लगा:
19परमेसवर माणस कोनी के झूठ बोल्लै,
अर ना वो आदमी सै के अपणी मर्जी बदलै।
के जो कुछ उसनै कह्या उस ताहीं न्ही करै?
के वो वचन देकै उसनै पूरा न्ही करै?
20देख, आशीर्वाद ए देण का हुकम मन्नै पाया सै:
वो आशीष दे चुक्या सै, अर मै उसनै न्ही पलट सकदा।
21उसनै याकूब म्ह अनर्थ न्ही पाया;
अर ना इस्राएल म्ह अन्याय देख्या सै।
उनका परमेसवर यहोवा उनकै गैल सै,
अर उन म्ह राजा की सी ललकार होवै सै।
22उननै मिस्र देश म्ह तै परमेसवर ए काड्डै लिये आण लागरया सै,
वो तो जंगळी सांड की तरियां ताकत राक्खै सै।
23पक्का कोए मंत्र याकूब पै न्ही चाल सकदा,
अर इस्राएल पै भावी कहणा कोए मतलब न्ही राखदा;
पर याकूब अर इस्राएल कै बारै म्ह इब यो कह्या जावैगा,
के परमेसवर नै के निराळा काम करया सै!
24सुण, वो टोळ शेरणी की ढाळ उठैगा,
अर शेर की ढाळ खड़या होवैगा;
वो जिब तक शिकार नै न्ही खा ले, अर मरे होया के लहू नै न्ही पी ले,
जिब ताहीं न्ही बोहड़ैगा।”
25फेर बालाक नै बिलाम तै कह्या, “उन ताहीं ना तो श्राप दिये, अर ना आशीष दिये।” 26बिलाम नै बालाक तै कह्या, “के मन्नै तेरे तै न्ही कह्या के जो कुछ यहोवा मेरै तै कहवैगा, वोए मन्नै करणा पड़ैगा?”
बिलाम की तीसरी भविष्यवाणी
27बालाक नै बिलाम तै कह्या चल, “चल मै तेरे ताहीं एक और जगहां पै ले चाल्लूँ सूं; उम्मीद सै के परमेसवर की मर्जी हो के तू ओड़ै तै उननै मेरै खात्तर श्राप दे।” 28फेर बालाक बिलाम नै पोर कै सिरे पै, जित्त तै यशीमोन देश दिखाई देवै सै, लेग्या। 29अर बिलाम नै बालाक तै कह्या, “आड़ै मेरै खात्तर सात वेदी बणवा, अर आड़ै सात बाछड़े अर सात मिंढे त्यार कर।” 30बिलाम कै कहण कै मुताबिक बालाक नै हर एक वेदी पै एक बाछड़ा अर एक मिंढा चढ़ाया।
Šiuo metu pasirinkta:
गिनती 23: BGC
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.