व्यवस्थाविवरण 8
8
परमेश्वर ताहीं याद राखियो
1“जो-जो हुकम मै आज तन्नै सुणाऊँ सूं उन सारया पै चाल्लण की चौकसी करियो, ज्यांतै के थम जिन्दा रहो अर बढ़दे रहो, अर जिस देश कै बारै म्ह यहोवा नै थारै पूर्वजां तै कसम खाई सै उस म्ह जाकै उसकै हकदार हो जाओ। 2अर याद राखियो के तेरा परमेसवर यहोवा उन चाळीस साल्लां म्ह थमनै सारे जंगळ-बियाबान कै राह म्ह तै इस करकै ले आया सै, के वो थमनै नम्र बणावै, अर तेरी परीक्षा लेकै न्यू जाण ले के तेरै मन म्ह के-के सै, अर के तू उसके हुकमां का पालन करैगा के न्ही। 3उसनै तेरै ताहीं नम्र बणाया, अर भूक्खा भी होण दिया, फेर वो मन्ना, जिस ताहीं ना तू अर ना तेरे पूर्वज भी जाणै थे, वोए तेरै ताहीं खुवाया; इस करकै के वो तन्नै सिखावै के माणस सिर्फ रोट्टी तै ए न्ही जिन्दा रहन्दा, पर जो-जो वचन यहोवा कै मुँह तै लिकड़ै सैं उनतै ए वो जिन्दा रहवै सै। 4इन चाळीस साल्लां म्ह तेरे कपड़े पुराणे ना होए, अर तेरे तन तै भी न्ही गिरे, अर ना तेरे पैर फुल्लै। 5फेर अपणे मन म्ह न्यू तो विचार कर, के जिसा कोए अपणे बेट्टे नै ताड़ना देवै सै उस्से तरियां ए तेरा परमेसवर यहोवा तन्नै ताड़ना देवै सै। 6इस करकै अपणे परमेसवर यहोवा के हुकमां का पालन करदे होए उसकै रास्तयां पै चालियो, अर उसका भय मान्दे रहियो। 7क्यूँके तेरा परमेसवर यहोवा तन्नै एक उत्तम देश म्ह लिये जाण लागरया सै, जो पाणी की नदियाँ का, अर तराइयां अर पहाड़ां तै लिकड़े होए ढुगें-ढुगें चोवां का देश सै। 8फेर वो गेहूँ, जौ, अंगूर की बेल, अंजीरां, अर अनारां का देश सै; अर तेल आळी जैतून अर शहद का भी देश सै। 9उस देश म्ह अन्न की महँगाई न्ही होवैगी, अर ना उस म्ह तन्नै किसे चीज की कमी होवैगी; ओड़ै के पत्थर लोहे के सै, अर ओड़ै के पहाड़ां म्ह तै तू ताम्बा खोदकै लिकाड़ सकैगा। 10अर तू पेट भरकै खावैगा, अर उस बढ़िया देश कै कारण जो तेरा परमेसवर यहोवा तन्नै देवैगा उस ताहीं धन्य मान्नैगा।”
परमेश्वर के काम्मां नै ना भूलिए
11“इस करकै चौक्कस रहिये, कदे इसा ना हो के अपणे परमेसवर यहोवा नै भूलकै उसके जो-जो हुकम, नियम, अर विधि, मै आज तन्नै सुणाऊँ सूं उन ताहीं मानणा छोड़ दे; 12इसा ना हो के जिब तू खाकै छिक्क ज्या, अर आच्छे-आच्छे घर बणाकै उन म्ह रहण लाग्गै, 13अर तेरी गां-बळध अर भेड़-बकरियाँ की बढ़ोतरी हो, अर तेरा सोन्ना, चाँदी, अर तेरा सारे ढाळ का धन बध ज्या, 14फेर तेरै मन म्ह अहंकार पैदा ज्या, अर तू अपणे परमेसवर यहोवा नै भूल जावै, जो तन्नै गुलाम्मी कै घर यानिके मिस्र देश म्ह तै लिकाड़ ल्याया सै, 15अर उस बड़े अर भयानक जंगळ-बियाबान म्ह तै ले आया सै, जड़ै तेज जहर आळे साँप अर बिच्छु सैं, अर बिन पाणी के सूखे देश म्ह उसनै तेरै खात्तर चकमक की चट्टान तै पाणी लिकाड्या, 16अर तेरै ताहीं जंगळ-बियाबान म्ह मन्ना खुवाया, जिसनै थारे पूर्वज जाणै भी न्ही थे, इस करकै के वो तन्नै नम्र बणावै, अर तेरी परीक्षा करकै अन्त म्ह तेरा भलाए करै। 17अर कदे इसा ना हो के तू सोच्चण लाग्गै, के यो धन-दौलत मेरै ए ताकत अर मेरै ए भुजबल तै मन्नै पाई। 18पर तू अपणे परमेसवर यहोवा नै याद राखिये, क्यूँके वोए सै जो तन्नै धन-दौलत लेण की ताकत ज्यांतै देवै सै, के जो करार उसनै तेरे पूर्वजां तै कसम खाकै करया था उसनै पूरा करै, जिसा आज जाहिर सै। 19जै तू अपणे परमेसवर यहोवा नै भूलकै दुसरे देवत्यां कै पाच्छै हो लेगा, अर उनकी आराधना अर उननै दण्डवत करैगा, तो मै आज थमनै चिता दियुँ सूं के थम बेशक नाश हो जाओगे। 20जिन जात्तां ताहीं यहोवा थारै स्याम्ही तै नाश करण पै सै, उन्हे की ढाळ थम भी अपणे परमेसवर यहोवा के वचन नै ना मानण कै कारण नाश हो जाओगे।”
Šiuo metu pasirinkta:
व्यवस्थाविवरण 8: BGC
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.