रोमी 14
14
छुतए ओपाँलाई सज़िम्द मायान्या
1चाव माचाव माछुतैधुज़्यावलाई सुम्च्यो, ओपाँलाई सज़िम्द्याद इ़सिन्या ताजैच्यो। 2ख्वाराए ज़्यान्या भरित यायुँ हुप्द ज़्युज़्यार। ख्वाराए फरी यायुँ जाँ ओमाहुबोए स्याकरी माकैर। 3नो प़ाइँ ज़्युज़्यावए माज़्युज़्यावलाई तासोवक। हिताव ज़ फरी माज़्युज़्यावए प़ाइँ ज़्युज़्यावलाई, ‘माज़्यान्या ज़्युक्यो’ है तादोवक। परमेस्वरए ऩेथोलाई ज़ उमींर जैद यानैव। 4अर्काए ओबाँदालाई फाल्न्या नँ सु? नोए ओदोज़्याव य़ेन चाव सैं माचाव लिद फाल्न्या ओसाहुए ची। है जैद ओय़ेन थ·रैद्यान्या ओर्गे परमेस्वरए ची। होए ज़ नोलाई चाव य़ेन दान्यात सघैज़्याव।
5ख्वाराए उपुर्काव छ्यामकिन तोबो छ्यामलाई घेप्पा जैज़्यार। ख्वाराए फरी प़ाइँ तोबो ज़ थ·रैज़्यार। जो मितावनी तादी ब सु सु युँल ज़ थ·रैव ताके। 6नो तोबो छ्यामलाई घेप्पा मानिज़्यावए मनी परमेस्वरए उजूँनी ज़ दोज़्याव। प़ाइँ ज़्युज़्यावए मनी परमेस्वरलाई धन्याबाद चरैःद ज़ ज़्युज़्याव। स्याकरी माकैज़्यावए परमेस्वरलाई चेतैद ज़ माकैव। होए ब परमेस्वरलाई धन्याबाद चरैःज़्याव।
7गे सु मनी गेजूँनी गेमाबाँचिए, सु मनी गेजूँनी गेमासिए। 8गेबाँचिदी ब परमेस्वरए उजूँनी ज़ गेबाँचिज़्या, गेसिदी ब परमेस्वरए उजूँनी ज़ गेसिज़्या। है जैद जुनी ब उमींर ज़ गेलिज़्या। 9ख्रीस सिउ मासिउराए गेप्रभु तान्याए जूँनी ज़ सिद सैंसिके। 10हिताव ताकिन ते जेसकाव जेभाइए जाँ छुत य़ेन ओदोक काराव माचाव जेङम्सिज़्याव? काराव स॰द नोलाई जेसज़िम्ज़्याव? गे प़ाइँ ज़ परमेस्वरए ओङ़ाक च्याँःसिद तछा गेफाल्सिरिज़्या लिन्या चेतैच्यो। 11धर्मसास्त्रल मनी अइ लिद सर्सिउ लिज़्या,
“प्रभुए है लिज़्या,
ङा साचो है ङालिज़्या,
मिँ भरी प़ाइँ ङाङ़ाक फुलुप्सिन्या लेर।
प़ाइँए परमेस्वरए उमिन सघ्योःन्या लेर।”#यसै ४५:२३
12है जैद गे भरी प़ाइँ सु सु गेय़ेन परमेस्वरलाई है दाव परिरिज़्या।
छुतए उयुँ केःद मायान्या
13है जैद जे तोबोए तोबोलाई ओय़ेन गल्ती थ·रैद ताएच्यो। बुरू छुतलाई उयुँ केःद्यान्या पाँ मादान्या थ·रैव ताके। 14गेप्रभु येसुलाई ङायुँ उहुबोए ङा है ङालिज़्या, माज़्यान्या काता ज़ माले। हैदी ब जोए उयुँल, ‘आव ते माज़्यान्या ज़’ लिद थ·रैज़्याव, नोलाई माज़्यान्या ज़ लिज़्या। 15है जैद नोलाई ज़्यावए जूँनी उयुँ केःद जेएकिन नोलाई मया जेमादोव मिताव ज़ ताके। है जैद ख्रीसए उजिउ झाःद ओयो मिँलाई जे ज़्यान्यानी परमेस्वरए ओपाँत ओजाँगर सैःद ताएच्यो। 16है जैद जे जो चाव जेथ·रैज़्या, हो छुतए माचाव है ल्यो तादैवक। 17परमेस्वरए ओराज्यालाव पाँ ज़्यान्या ओन्याए जूँनी माःक। नो पाँ ते आव ज़ — परमेस्वरए उयुँलाव मिताव य़ेन दान्या, खैद लिन्या, स़ोनो छैंव पुरूसनी युँ होलाँ दान्या। 18जोए नितावनी ख्रीसए ओसेवा दोज़्याव, हो परमेस्वरए उयुँलाव मिताव ब ताज़्या, मिँराए याजाँगर हुव ब ताज़्या।
19है जैद जे जेल खैद प़ाइँलाई सपारैन्यात उदिम दोचिके। 20परमेस्वरए ओय़ेनलाई ज़्यान्यानी ताबले·च्यो। ज़्यान्या भरी प़ाइँ चोखो उलिदी ब जोए ज़्याद ओद ओभाइलाई उयुँ केःद ओएकिन, नोलाई माज़्यान्या ज़ पाथ लिज़्या। 21नो जेभाइलाई जेबले·ज़्याव देखा बुरू स्याकरी माकैन्या, स़ोनो मद छोकोरा माओन्या पाथ लिज़्या।
22है जैद दान्या जेथ·रैव भरी परमेस्वरए ओङ़ाक जेयुँल पक्का ज़ थ·रैव ताके। जोए ओथ·रैव पाँत उथुपुल ओमालिकिन नोलाई पाथ लिज़्या। 23खाली जोए सङ्खा दाद उज़्युकिन ओलनी ज़ ओखत ल्यो थ॰रिज़्या। युँ माहुप्द दान्या भरी पाप ज़ लिज़्या।
Šiuo metu pasirinkta:
रोमी 14: NKham
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.