Rómà ŋa 11
11
Ɔ̀ɖáyé kò kɔ ɔma-Ìsàràyɛ́lì ŋa
1Ǹ bòkó tɔ́ bere afɔ̀-kã̀ ró. Kíbí iŋɛ́ ŋa#á wà bɛ́ɛ̀#ɛ́ fee, ó wà dzɛ́ ní Ɔ̀ɖáyé kɔ ɔma-Ìsàràyɛ́lì† ŋa ńnɛ̀ɛ́ɛ̀? Láyé! Kò kɔ̀ ŋá. Ǹ fɔ̀ bɛ́ɛ̀, iŋɛ́ yèé tse#ɛ́, ɔma-ìlú-Ìsàràyɛ́lì bíbí ké ní èmi gbo, ǹ dzɛ́#ɛ́, tsí ǹ dzɛ́ ɔmalɔ́ma-Àbàràhámì†, tsí ǹ ti náro-Bɛ̃̀dzàmɛ́nì†. 2Ɔ̀ɖáyé kò kɔ̀ ŋá. Ó ti tsã̀ ŋá si tsúwádzú ní ká dzɛ́ tòŋu. È kè tédzú afɔ̀ yèé à kɔ si ńǸwé-Ɔ̀ɖáyé† ti nára-Èlíyà† agbáfɔ̀-Ɔ̀ɖáyé fɔ̀†#ɛ́ niì? À ní Èlíyà wà bá ɔma-Ìsàràyɛ́lì ŋa fɔ̀ fú Ɔ̀ɖáyé ní: 3“Ɔlɔ́dzɔ́, rí kíbí à kpa agbáfɔ̀-ɛ̀ɛ fɔ̀ ŋa nóòkú, tsí fɔ́ ìdzɛ̀bɔ-ɛ̀ɛ ŋa gbo gé! Èmi níìkã̀ntso gé ní bɔ̀ si báàyí#ɛ́. Tsí à wà wo ká kpa èmi gbo nóòkú.”#11:3 Ìwé 1 Ólú ŋa 19:10 (1 Rois 19:10) 4Ó ɖi, è gbɔ́ kíbí Ɔ̀ɖáyé dzɔ́ŋù fúu gbà#á nɔ̀! Ó ní: “Ɔnɔkɛ̃̀ɛ̃ ɛgbɛ̀rú ɛgbɛ̀rú ɔ̀nà méedze (7.000) ní bɔ̀ si, tsí dzɛ́ tèmi si#ɛ́. Àŋa òŋu, à kò kálɛ̀, tsí sɛ̃ Bàálì.”#11:4 Ìwé 1 Ólú ŋa 19:18 (1 Rois 19:18) 5Bɛ́ɛ̀ ké ní ó wà si ńǹwèrè yèé àa wà si báàyí gbo#ɛ́. Ɔ̀nyà ìmarũ-kã̀ tɔ́ bɔ̀ si náàŋírĩ-ɔma-Ìsàràyɛ́lì ŋa si ró, tsí Ɔ̀ɖáyé gbà ńǹtá-ore-ɔ̀fɛ́‐ɛ̀, tsí tsã̀ ŋá si. 6Kíbí ó dzɛ́ ní Ɔ̀ɖáyé gbà ńǹtá-ore-ɔ̀fɛ́‐ɛ̀, tsí tsã̀ ŋá#á, ó wà nyà ɖíre ní Ɔ̀ɖáyé kò tse àtsùgbé-iŋɛ́ yèé à tse ŋa#á tã́ná ó tsã̀ ŋá. Ó ɖi, ó má dzɛ́ bɛ́ɛ̀ ní ó dzɛ́#ɛ́, ni kò tsi afɔ̀-ore-ɔ̀fɛ́-Ɔ̀ɖáyé ró ńnɛ̀ɛ́.
7Òkpì-afɔ̀ yèé ǹ wà fɔ̀#ɛ́ fáà? Òŋu ní wà dzɛ́ ní fee, iŋɛ́ yèé ɔma-ìlú-Ìsàràyɛ́lì ŋa wà wò#ɛ́, à kò ríi. Ó ɖi, ɔ̀nyà ìmarũ-kã̀ yèé Ɔ̀ɖáyé tsã̀ náàŋírĩ-ŋa si#ɛ́, àŋa òŋu, à ríi. Ɛnɛ-àtíbɔ̀ ŋa#á, Ɔ̀ɖáyé tse tsí ɛ̀ɖɔ̃̀ kã̀ ŋá si gé ni. 8À ti kɔɔ́ si ńǸwé-Ɔ̀ɖáyé si ní:
“Títí wáa fú nɔ́mbɛ́ báàyí#ɛ́,
Ɔ̀ɖáyé tse tsí ifɛ̀ɛ́nɔ́ tã́ ɖí ŋa kpó.
Odzú wà fú ŋa. Ó ɖi, à kò wà rírã.
Etí gbo wà fú ŋa. Ó ɖi, à kò wà gbɔ̃́ɔ̃̀rã̀.”#11:8 Ìwé-Àkóro 29:3 (Deutéronome 29:3)
9Ɖàfíɖì† gbo ti wíìnyɛ̀-kã̀ si bɛ́ɛ̀ ní:
“Dzídzɛ-ɔɖɔ̃́ yèé ŋa à náa wà dzɛ#ɛ́ kó ɖi fɛ́tsa,
tsí ré kpa ŋá, tsí ɖi iwúrɛ́, tsí mú ŋa.
Dzídzɛ#ɛ́ kó ɖi òkúta-àkɔ̀sɛ̀ gbo, tsí mú ŋa tsubú,
tsí Ɔ̀ɖáyé kó fɛtí fú ŋa dzì ńǹɖì‐ɛ̀.
10Ɔ̀ɖáyé kó sirì bo odzú-ŋa, tsí ká máa nyáa rírã ró.
Kó tse tsí ìréré gbo kó bá ŋa, tsí tó ŋa si ńǹwèrè ɔ̀kã̀lɔ́ɔ̀kã̀.”#11:10 Ìwé-Orĩ ŋa 69:23-24 (Psaumes 69:23-24)
11N tɔ́ bere afɔ̀-kã̀ ró. Kíbí ɔma-Ìsàràyɛ́lì ŋa kɔ ɛsɛ̀#ɛ́ fee, à kɔ ɛsɛ̀, tsí tsubú, tsí ká máa ǹɖe ró niì? Láyé! Kò tsi bɛ́ɛ̀ ni. Ó ɖi, kíbí à dzàbi-Ɔ̀ɖáyé#ɛ́ ní tse tsí ɔ̀nà tsí, tsí Ɔ̀ɖáyé gba ɛnɛ yèé kò dzɛ́ ɔma-Ìsàràyɛ́lì ŋa#á là, àtsùgbée kó ɖi owú dzídzɛ fú ɔma-Ìsàràyɛ́lì ŋa ńǹkɛ̀ɛ́#ɛ́. 12Ɔma-Ìsàràyɛ́lì ŋa#á dzàbi-Ɔ̀ɖáyé, tsí ó fa kùsɛ̀ɛ̀ wá fú ayé gbaŋgba#á. À kí ńnɛ̀, tsí ó fa kùsɛ̀ɛ̀ wá fú ɛnɛ yèé kò dzɛ́ ɔma-Ìsàràyɛ́lì ŋa#á. Bí à ɖáàwɔ́ nyí sɛ̃̀ wá ńɖi-Ɔ̀ɖáyé ńǹkɛ̀ɛ́#ɛ́, nákó tu kùsɛ̀ɛ̀ kpíkpɔ̀ kpíkpɔ̀ fú ɔ̀nyà kpó lárè ró.
Ɔ̀ɖáyé wáa gba ɛnɛ yèé kò dzɛ́ ɔma-Ìsàràyɛ́lì ŋa#á gbo là
13Báàyí#ɛ́, ɛ̀ŋɛ yèé kò dzɛ́ ɔma-Ìsàràyɛ́lì† ŋa#á, è rɛ̃tígbè. Adzítsɛ́-Yèésù† ní ǹ dzɛ́#ɛ́, tsí ɛ̀ŋɛ ní Ɔ̀ɖáyé bɛ̀ mí ńtsɛ́ fú#ɛ́. Ńbɛ̀ɛ́, ayè wà tɛ́ mi tó bɛ́ɛ̀ fú itsɛ́ yèé Ɔ̀ɖáyé ɖá fú mi#ɛ́. 14Ǹ wà tsitsɛ́#ɛ́ làkóò, tsí ǹ módzú si ní nákó tse tsí ɛnɛ yèé ŋa àa dzɔ́ ti náàmbara ɔ̀kã̀ntso#ɛ́, ká dzowú, tsí Ɔ̀ɖáyé kó gba ɔ̀nyà kã̀ŋa là náàŋírĩ-ŋa. 15Ó ɖi fee, ńǹwèrè yèé Ɔ̀ɖáyé kɛ́ ŋa sɔ nákpálà-kã̀ si#ɛ́, ní ó tɔ́tse àŋírĩ-òŋu ɔ̀nyà ŋa náyé gbaŋgba#á. Tsí bí ó ɖáàwɔ́ sɛ̃̀ wáa gbà ŋá#á, nákó wà kíbí à náa dzínɛ ti náàŋírĩ-òkú ŋa wá náyé#ɛ́ bɛ́ ni. 16Ó ɖi, bí èkèlè-àtsɛ̃̀tsɛ̃̀-dzídzɛ-kã̀ dzɛ́ ti Ɔ̀ɖáyé#ɛ́, dzídzɛ#ɛ́ kpó, dzɛ́ tɛ̀ɛ̀ ké ni. Bí ogùgù-egi-kã̀ gbo dzɛ́ ti Ɔ̀ɖáyé#ɛ́, akpá‐ɛ̀ ŋa gbo dzɛ́ tɛ̀ɛ̀ ké ni.
17Ɔma-Ìsàràyɛ́lì ŋa#á, à wà kíbí egi-òlífì†-ilé bɛ́, tsí à rɛ́ akpá‐ɛ̀ kã̀ŋa ǹɖe. Ó ɖi, ìwɔ òŋu, ò wà kíbí akpá-egi-òlífì-kóko, tsí à rɛ́ɛ ǹɖe, tsí wáa ń tamá si ńǹɖì-akpá-òlífì-ilé yèé ŋa à rɛ́ ǹɖe#ɛ́. Báàyí#ɛ́, ìwɔ gbo, ò wà gba omi-egi-òlífì-ilé#ɛ́ ti ńɖi-ogùgù‐ɛ̀ ŋa. 18Kíbí ó dzɛ́ bɛ́ɛ̀#ɛ́, máa mú akpá-egi-òlífì-ilé yèé à rɛ́ ǹɖe ŋa#á, tsí wà ń kpe kí ŋa ńnɛ̀ɛ́. Kó yéɛ si ní fee, ìwɔ òŋu, ò dzɛ́ akpá-egi#ɛ́ gé ni. Kò tsi ìwɔ ní dzɛ́ ogùgù‐ɛ̀, tsí gbàá ɖóro si#ɛ́. Kà kàa bɛ́ɛ̀, ogùgù#ɛ́ ní gbàɛ́ ɖóro si#ɛ́.
19Bóyá nàa wà fɔ̀ ní: Ɔ̀ɖáyé rɛ́ akpá-egi-òlífì-ilé ŋa#á ǹɖe, àtsùgbée kó mú òŋu yèé dzɛ́ akpá-egi-òlífì-kóko#ɛ́, tsí ń tamá si ńǹɖì-ŋa ni. 20Bí ò fɔ̀ bɛ́ɛ̀, ò kò fɔ̀ sé. Ɔma-Ìsàràyɛ́lì yèé ŋa dzɛ́ akpá-egi-òlífì-ilé#ɛ́, Ɔ̀ɖáyé rɛ́ ŋa ǹɖe náàtsùgbée kíbí à kò nɛ́ àkaralé si ńǹtá-Yèésù Kírísítò#ɛ́. Ó ɖi ìwɔ òŋu, ò dzokó si rìgírìgí, àtsùgbé-àkaralé yèé ò nɛ́ si ńǹtá‐ɛ̀#ɛ́ ni. Kíbí ó dzɛ́ bɛ́ɛ̀#ɛ́, máa tse tsí ara-nɛ kíkɛ́ kó wɔ̀ ńǹsérè-ɛ̀ɛ. Kà kàa bɛ́ɛ̀, rí Ɔ̀ɖáyé sá. 21Ǹ fɔ̀ bɛ́ɛ̀, iŋɛ́ yèé tse#ɛ́, ɔma-Ìsàràyɛ́lì ŋa, àŋa yèé gìɖì dzɛ́ akpá-egi-òlífì-ilé#ɛ́, Ɔ̀ɖáyé kò rí ànyínɔ́ fú ŋa. Ìwɔ gbo tsɔ́ éwo-ara-ɛ̀ɛ, bí kò tsi bɛ́ɛ̀, Ɔ̀ɖáyé kàkó rí ànyínɔ́ fɛ́ɛ. 22Rí gé! Ɔ̀ɖáyé fee, abinɔ́ tútù ní ó dzɛ́#ɛ́. Ó ɖi, náa sì tseé si ńnɛ̀ fúnɛ gbo tó bɛ́ɛ̀. Ó tseé si ńnɛ̀ fú ɛnɛ yèé ŋa kɔ ɛsɛ̀, tsí tsubú#ɛ́, tsí ó dzɛ́ abinɔ́ tútù fú ìwɔ òŋu. Ó ɖi, ó wà ní o tse tsí kó dzɛ́ abinɔ́ tútù#ɛ́ si fɛ́ɛ làkóò làkóò gé. Bí kò tsi bɛ́ɛ̀, nákó rɛ́ ìwɔ gbo ǹɖe kíbí akpá-egi-òlífì-ilé#ɛ́ bɛ́ ni. 23Ó ɖi, bí ó dzɛ́ ní ɔma-Ìsàràyɛ́lì ŋa#á gbo wáa nyí, tsí mú àkaralé-ŋa si ńǹtá-Yèésù Kírísítò nɔ́dzɔ́-kã̀, Ɔ̀ɖáyé nɛ́kpá, tsí nákó nyáa sɛ̃̀ sɛ̃̀ ŋá si ńǹɖì-ŋà ŋa. 24Ìwɔ òŋu, ò dzɛ́ akpá yèé Ɔ̀ɖáyé rɛ́ ǹɖe nára-egi-kóko#ɛ́, tsí wáa ń tamá-egi-ilé#ɛ́ ni. Kò tsi bɛ́ɛ̀ ní náa sì lɔ#ɛ́. Ó ɖi, ɔma-Ìsàràyɛ́lì ŋa òŋu, àŋa gìɖì ní dzɛ́ akpá-egi-ilé#ɛ́. Ɔ̀ɖáyé kó kɛ́ àŋa gbo sɛ̃̀ wáa tamá si ńǹɖì-ŋà ŋa#á, kò tì le fúu gìɖì.
Ɔ̀ɖáyé nákó gba ɔma-Ìsàràyɛ́lì ŋa là
25Ìnàbí-mi ŋa, ǹ wò ní n nya ètò yèé Ɔ̀ɖáyé tse ɖúkù si#ɛ́ ɖíre fú ŋɛ́, àtsùgbée e máa wà fɔ̀ ní ɔ̀nyà-kã̀ kò màá tó àŋa. Ètò#ɛ́ ní wà dzɛ́ ní ɔ̀nyà kã̀ŋa náàŋírĩ-ɔma-Ìsàràyɛ́lì† ŋa#á, ɛ̀ɖɔ̃̀ kã̀ ŋá si, tsí à kɔ̀ ní àŋa kàkó nɛ́ àkaralé si ńǹtá-Yèésù Kírísítò. À nákó wà bɛ́ɛ̀ si títí wáa fú ìwèrè-oɖé-kã̀. Ńǹwèrè nyɛ̀ŋɛ̀#ɛ́, ɔ̀nyà ìmarũ yèé Ɔ̀ɖáyé tsã̀ si náàŋírĩ-ɛnɛ yèé kò dzɛ́ ɔma-Ìsàràyɛ́lì ŋa#á, à nákó tó. 26Ńbɛ̀ɛ́, Ɔ̀ɖáyé nákó gba ìlú-Ìsàràyɛ́lì#ɛ́ kpó là. À ti kɔɔ́ si ńǸwé-Ɔ̀ɖáyé si ní:
“Ɛnɛ yèé bòkó wáa gbà ŋá dzɔ̀ɔ́#ɛ́,
ńǹlú-Yèrúsàlɛ́mì#11:26 Sìyɔ́nì ní à kɔ si ńbíbɛ́#ɛ́. Sìyɔ́nì#ɛ́ ní dzɛ́ òkè-kã̀ ńbí à ma ilé-Ɔ̀ɖáyé si ńYèrúsàlɛ́mì#ɛ́. ní nákó ti, tsí wá#á.
Nákó wáa nya ǹ tó fú ara-mi yèé wà fú
ɔmalɔ́ma-Yàkúbù† ŋa#á ǹɖe.
27Tsí nákó dzɛ́ ìmɔ̀lɛ̀ náàŋírĩ-èmi-ŋa méèdzì
ńǹwèrè yèé màa wɛ àbi-ŋà ŋa ǹɖe kpó#ɛ́.”#11:27 Ìwé-Yèsáyà 59:20-21 (Ésaïe 59:20-21)
28Ó ɖi, kíbí ɔma-Ìsàràyɛ́lì ŋa kɔ̀ ní àŋa kàkó gba ikɔ̀ ɖíɖɔ̃̀-Yèésù Kírísítò gbɔ́#ɛ́, à ɖi ɔ̀tɛ̀-Ɔ̀ɖáyé. Ó lɔ bɛ́ɛ̀, àtsùgbée ɛ̀ŋɛ yèé kò dzɛ́ ɔma-Ìsàràyɛ́lì ŋa#á, Ɔ̀ɖáyé kó gbà ŋɛ́ là ni. Ó ɖi, ti nára-kíbí Ɔ̀ɖáyé ti tsã̀ ŋá si òŋu#ɛ́, à dzɛ́ àrínódzú‐ɛ̀ ŋa si, àtsùgbé-àlé yèé ŋa ó ti ta si fú gbágbóǹgbàgbò-ŋà ŋa#á. 29Fee, bí Ɔ̀ɖáyé fɛ́ɛ ńŋɛ́-kã̀, ó fɛ́ɛ ni. Kà sɛ̃̀ gbàá ró. Bí ó kpèɛ́ ní ìwɔ kó dzɛ́ tòŋu gbo, ó kpèɛ́ ni. Kò nɛ́ ní bɛ́ ní ró. 30Dzɔ̀ɔ́ dzɔ̀ɔ́#ɛ́, ɛ̀ŋɛ yèé kò dzɛ́ ɔma-Ìsàràyɛ́lì ŋa#á, è kè rɛ̃tígbè-Ɔ̀ɖáyé. Ó ɖi báàyí#ɛ́, Ɔ̀ɖáyé rí ànyínɔ́ fú ŋɛ́, iŋɛ́ yèé tse#ɛ́, ɔma-Ìsàràyɛ́lì ŋa kò gbɔ̃́ɔ̃̀rã̀ fúu. 31Bɛ́ɛ̀ ké ní ó lɔ fú ɔma-Ìsàràyɛ́lì ŋa gbo#ɛ́. Báàyí#ɛ́, àŋa gbo, à kò gbɔ̃́ɔ̃̀rã̀ fú Ɔ̀ɖáyé, tsí ó tse tsí Ɔ̀ɖáyé rí ànyínɔ́ fú ɛ̀ŋɛ òŋu. Ó ɖi, ó lɔ bɛ́ɛ̀ fú àŋa gbo, àtsùgbée Ɔ̀ɖáyé kó rí ànyínɔ́ fú ŋa bɛ́ɛ̀ ké ni. 32Ó ɖi, Ɔ̀ɖáyé tse tsí ɔ̀nyà ŋa kpó wà kíbí abèŋà ŋa si bɛ́, iŋɛ́ yèé tse#ɛ́, à kɔ̀ ní àŋa kàkó rɛ̃tígbè‐ɛ̀. Ó sì lɔ bɛ́ɛ̀, àtsùgbée kó rí ànyínɔ́ fú ŋa kpó ni.
Ká nyɛ Ɔ̀ɖáyé
33Ɛ̃ɛ̃! Ɔ̀ɖáyé lákṹ ìɖéǹɖè. Ifɛ̀ɛ́nɔ́‐ɛ̀ gbo, iŋɛ́ mímà-ɛ̀ gbo, à kpɔ̀ tó bɛ́ɛ̀. Iŋɛ́ yèé náa ɖé fúu, tsí náa tse#ɛ́, nɛ̀ɛ́ tútú nákó nyáa gbɔ́ òkpì‐ɛ̀? Ètò‐ɛ̀ yèé náa tse ŋa#á, ɔ̀nyà-kã̀ kpókpó kà màá. 34À ti kɔɔ́ si ńǸwé-Ɔ̀ɖáyé si ní:
“Nɛ̀ɛ́ wà, tsí kó nyáa ma ìsérè-Ɔlɔ́dzɔ́?
Nɛ̀ɛ́ nákó nyáa fɔ̀ ní òŋu tó bɛ́ɛ̀ títí kó nyáa fúu ńfɛ̀ɛ́nɔ́?
Ɔlá‐ɛ̀ kò wà.”#11:34 Ìwé-Yèsáyà 40:13 (Ésaïe 40:13)
35“Nàmí nɛ̀ɛ́ tsɛ̃̀tsɛ̃̀ fú Ɔ̀ɖáyé ńŋɛ́-kã̀ wòrí, tsí kó ɖi ɛŋɛ̀,
tsí Ɔ̀ɖáyé kó wáa sãã́ si ńǹɖì‐ɛ̀ fúu ni?”#11:35 Ìwé-Yɔ́bù 41:3 (Job 41:3)
36Iŋɛ́ yèé tse#ɛ́, òŋu ní ɖá iŋɛ́ ɔ̀kã̀lɔ́ɔ̀kã̀ kpó#ɛ́. Òŋu ké ní gba iŋɛ́ ɔ̀kã̀lɔ́ɔ̀kã̀ gbo kpó ɖóro si#ɛ́. Tsí iŋɛ́ ŋa#á gbo kpó#ɛ́, òŋu ké ní à wà si fú#ɛ́. Ká wà nyɛ̀ɛ́ títí lɔ náàrìtã́. Ɛ̀tsɛ!
Šiuo metu pasirinkta:
Rómà ŋa 11: ngl
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© (Active), Wycliffe Bible Translators, Inc. All rights reserved.