ESTA 7
7
Kigartoti Haman
1Ki pwa anyun laitoryat ak Haman koam igoorto kobooto Esta osotyotap laitoryat. 2Eng' peetuut ne po aeng' ne po igoortap divaik, koteebe kogeny `laitoryat Esta koleenji, “Nee soomeng'ung' ee Esta, osotyotap laitoryat? Teep si kegoonin. Ak nee ne isoome? Agoonin agot ngo kebebertap laitornatet.” 3Ki wol anyun Esta osotyotap laitoryat kole ngot ko kaanyooru chameet eng' taing'ung', ee laitoryat ak ngot kobaibai laitoryat ko ingegoono saboondanyu amu soomennyu. Ak kasoom ale ingosapcho piikyuk. 4Amu kigealdech, anee ak piikyuk si kobiit keng'emech, kebarech ak kelusye. Nda kiga kialdech keegu otwogik che murenik ak che kwonyik, ko kota asise, ago ko mata imuuchi puunyoot koyaakyi laitoryat pichu kota petos.
5Kiteebe anyun `laitoryat Aasuerus Esta osotyonnyi koleenji, “Ng'oo nooto? Ak komi ano ineendet ne kogany koyai ko uu ni eng' muguleldanyi?” 6Kole Esta, “Kanyaliilindonooto ak ko puunyoot, ko sogoranani Haman.” Ki aragen anyun Haman eng' taitap laitoryat ak osotyotap laitoryat.
7Ki ng'eet laitoryat eng' nereegek, ak kwo eng' igoorato po divaik, kwo mbareetap kootap laitoryat. Ki tonon Haman koleen kosoom Esta osotyotap laitoryat kesar saboondanyi; amu ki keer kole kagobegechi laitoryat koyachi ineendet yaityet. 8Kingo week anyun laitoryat eng' mbareetap kootap laitoryat, konyo ole kimi igoorto ne po divaik ko kiga kobutyi Haman ole kilyeldoe Esta. Kibol laitoryat kole, “Machei kosuup osotyondennyu eng' tainnyu eng' kootap laitoryat?” Ye kita kong'alaali laitoryat, ketuch togetap Haman. 9Yeityo komwa Harbona ne ki agenge eng' riibiik che ki mi taitap laitoryat kole keero, mitei keetit ne lumdaat eng' kootap Haman ne kigartate piik ne po tononennyi mitainik tiptem ak aeng'. Niito ne kiga kochopchi `Haman Mordekai ne ki mwa ne myee agobo laitoryat. Ak ki le laitoryat, “Ogartate ineendet ketoto.” 10Ki igartaat anyun `pichooto Haman eng' keetit ne kiga kochopchi `ineendet Mordekai. Kosiisyo anyun nereegegap laitoryat.
©Bible Society of Kenya, 2019