ESTA 6
6
Kogoochin `laitoryat Mordekai teegisto
1Ma imuuch laitoryat konuuch kemounooto, ak ki ng'at keip bukuitap siruutik che po ateptap peetuusyek ak ki kisooman eng' taitap laitoryat. 2#Est 2.21-22 Ki kinyoor ko siraat keele ki mwaita Mordekai Bigtana ak Teres, icheeget che ki riibiik aeng' che po laitoryat che riibei kurgeet, ak ko kiga cheeng' kobar Laitoryat Aasuerus. 3Kiteep anyun laitoryat kole, “Nee teegisto ak etunateet ne kigeyachi Mordekai agobo kioto?” Kole otwogigap laitoryat che kiboisyechin ineendet, “Ma mi kiy age tugul ne kigeyachi ineendet.” 4Koteep laitoryat kole, “Ng'oo ne mi serem?” Kiga konyo Haman seremutap saang' ne po kootap laitoryat koleen konyo kong'alaalji laitoryat si kigartaat Mordekai eng' keetit ne kiga kochopchi ineendet. 5Ki wolji `otwogik laitoryat koleenji, “Tononi Haman eng' serem.” Ak ki le laitoryat, “Ingonyo ko.” 6Kingo nyo ko Haman, koteebe laitoryat ineendet koleenji, “Ki itoi nee chiito ne chamei miising' laitoryat kotoroor?” Komwa anyun Haman eng' muguleldanyi kole, “Ng'oo age ne tos chamei laitoryat kotoroor kosiiro?” 7Koleenji `Haman laitoryat, “Chiito ne kacham miising' laitoryat kotoroor, 8ko ingeipchi ngoroik che po laitornatet che cham kolaachi laitoryat, ak keget paraisiit ne laanyei laitoryat ne ki kinde metinnyi naaryeet ne po laitornatet. 9Yeityo kigoochi ngoroichooto ak paraisiit chiito agenge eng' pounik che taagunotiin miising' che po laitoryat, si kolaakyi chiichooto chamei miising' laitoryat kotoroor, ak kogoochi kolaany paraisiit kobun ooreetap nganaseet ak komwaita eng' tainnyi kole, ‘Kiyachin ko uu nooto chiito ne chamei laitoryat kotoroor.’ ” 10Komwachi anyun `laitoryat Haman koleenji, “Chaakte, ip ngoroik ak ikweri paraisiit ko uu ye kaimwa, ak iyachi ko uu nooto Mordekai ne riipsei eng' ormariichetap laitoryat. Mat kebagaakta kiy eng' chooto tugul kaimwa.” 11Ki ip anyun Haman ngoroik ak kokweri paraisiit ak kwo kolaakyi Mordekai, ak kogoochi kolaany paraisiit kobun ooreetap nganaseet ak komwaita eng' tainnyi koleen, “Kiyachin ko uu ni chiito ne kacham laitoryat kotoroor.” 12Ye kingo pata, konyo kogeny Mordekai ormariichetap laitoryat. Ago kichaakta Haman kwo koonnyi eng' arageneet kotugot metinnyi. 13Ki mwachi `Haman Seres osotyonnyi ak choronokyik tugul kiit age tugul ne kagoityi ineendet. Komwachi anyun `piikyik che ng'oomen ak osotyonnyi Seres Haman koleenji, “Ngot ko po Mordekai ooreetap Yahudik, ineendet ne kaitau ibutyi tainnyi, ko meterteri ineendet, ago ibutyini tainnyi ne matiny!”
Kebarei Haman
14Ye kita kong'alaali ak ineendet, kobwa riibiigap laitoryat ak komut Haman kochaaktae kwo igoorto ne oo ne kiga kochop Esta.
©Bible Society of Kenya, 2019