Zakali 13
13
Kɔɔɠɔ gani kɔɔ nuiti tukpɔɠaaleʋe vai
1Naama volo ná, ziɛungi laa ɠa lao Davide ná-pɛlɛyeɠei ʋɛ ta Zeluzalɛme nuiti bɛ, é ta-ɠotoiti ta ta-ɠɔzɔba vaiti gba.
2«Naama volo ná, nà kɔɔɠɔ ganigiti folo zooi ʋa, nu nɔpɛ ge la mɔ ti-laasei boga. Nà ma ɠala goo wo nuiti ɓalaa kula zooi ʋa, ta kɔzɔba ɠisiɛiti pɛ,» Ɠɔoɠɔ GALAGI, Fai-Pɛ-Maliɠii wooi ɠana. 3«Naazu, zɔi nɔpɛ é ɠɛɛzu GALA goo wosu, sɔlɔɔ kɛɛɠɛi, ta sɔlɔɔ deei ta ɠɛ ma: ‹È la mɔ yɛga vulua mazɔlɔɔ zɛɛ ɠala gooi ɠa è bosu Ɠɔoɠɔ GALAGI lɔɠɔi zu.› Sɔlɔɔ nuiti ɓɔɠɔgo ɠa naazu ti bɔɔzu, siɛgi zu é ɠɛɛzu GALA gooi wosu da. 4Naama volo ná, ma ɠala goo wo nuiti ti pɛ ti laa ɠa ve ga unfegi, siɛgi zu ti gala gooi wosu da, ti sɔlɔɔsu ta-ɠulakɛlɛmaiti su. Ti la mɔ kɛa pɛ, ti ʋa sua leɠa zeɠe wolai ta loo ɠɔba, ti ʋa ɗa nuiti yaava. 5Ti ɠilagilagi a ɗa ɠɛ ma: ‹Gè la ga GALA goo wo nu, nà ga tii ɠɛɛ nu nɔ, tii ɠɛ yooiti ta zèa kaite mà nu niinɛ ziɛ su.› 6Ni ta gaazaɠana, ti ɠɛ ma: ‹È palai niiti sɔlɔɔgɛ ɠale, ti è-ɠɔlɔgi ma?› Toɠa ti wooɠaaʋote, é ɠɛ ma: ‹Gè ti zɔlɔɔgɛ nɛ̀ɛɲɔɠɔiti ta-ʋɛlɛi wu.› »
Minazeɠegi niinɛ vai ʋolu
7«Boɠa zɔkpɔi wuzeɠe nà-baala makɛ nui laalɔɠɔma,
nɛ̀ɛɲɔɠɔi laalɔɠɔma!»
Ɠɔoɠɔ GALAGI, Fai-Pɛ-Maliɠii wooi ɠana.
«Baala makɛ nui loɠa,
baalagiti ti zuvaza,
nà ma goiti ɓalaa doɠa.
8Zooi zu nuɓusɛiti gaa ɠa ɠwɛsu saʋa,
seizu felegɔi ɠa za, ti undaaʋili,
kɛlɛ seizu ɠilagi ɠa yɛ vulua zooi zu,»
Ɠɔoɠɔ GALAGI wooi ɠana.
9«Nà seizu ɠilagi naa lɔ abui zu,
gè gaawuun kɔzɔi ɠula ba,
ʋelei nu a ɗa walii ɠaawuun da kɔzɔi ɠula ba,
nà nɔɠɔi ɠula ba,
ʋelei nu a ɗa zanugi ma ɠɔzɔi ɠula la ba.
Naazu ta fàli, gè ti wooɠaaʋote.
Nà ti loli ga: ‹Nà-nuɓusɛiti›.
Tiya ma, ta ɠɛ ma: ‹Ɠɔoɠɔ GALAGI ɠa é ga gá-ƓALAGI!› »
Šiuo metu pasirinkta:
Zakali 13: GDZ
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.