Génesis 3
3
Minti' xi tniman Adán ex Eva tyol Dios
1Atzunte lobaj mastok jawni twitz cywitz cycyakil txcup ate' tuj c'ul, akeju otok che bant tu'n Kman Dios. Xitzun tkanin lobaj te xu'j cyja':
—¿Maj o tzaj tma'n Dios cyeye tu'n mi'n t-xi cylo'ne twitz tcyakil tze' cyxol awal lu?. Chi lobaj.
2Xitzun ttzak'we'n xu'j te lobaj cyja':
—Ba'n t-xi klo'ne cywitz tze' cyxol awal lu, 3atzun ti'j twitz tze' tcub tuj tmij awal tzaj tma'n Dios cyja': Mi'n txi cylo'ne ex mi'n tz'oc cymaco'ne, tu'ntzun mi'n cycyime, chi Dios keye.
4Xitzun tma'n lobaj te xu'j cyja':
—Mlay che cyime. 5Porque ojtzki'n tu'n Dios, oc t-xi cylo'ne twitz tze' lu, cjaketel cynable, che oquele ic tza'n te Dios ex c'elel cynic'e ti'j ba'n ex ti'j mya ba'n, chi lobaj.
6Tej ttil xu'j ba'ntok tlo'njtz twitz tze', tbaniltok que'yin ex attok tajben tu'n toc tnabl, eltzun ti'n twitz tze' ex xi tlo'n; ax icx xi tk'o'n te tchmil. Ax icx te xi tlo'n. 7Jakettzun cynabl ex el cynic' cyi'j minti'tok cyxbalun tocsa'n. Bajtzun cyslapun ke t-xak higo te cylanter te txaybil cye.
8Xi tbi'n Adán tuc'ix t-xu'jil in bettok Kman Dios t-xol awal tej otok chewix k'ij te kale. Xitzun cyewan cyib twitz Kman Dios cyxol tkan awal. 9Octzun ten Kman Dios txcolte Adán, chi cyja':
—¿Jatum ta'ya?
10Xitzun ttzak'we'n Adán cyja':
—Ma nbiye in bettoka t-xol awal ex ma tzaj nxobile tu'nju minti' txaybil weye tocsa'n. Tu'ntzun jlu ma txi wewan wibe twitza, chi Adán.
11Xitzun tma'n Dios te cyja':
—¿Alcye ma k'mante teya tu'nju minti' txaybil teya tocsa'n? ¿Kape ma txi tlo'na twitz tze' o txi nma'ne teya tu'n mi'n txi tlo'na?.
12Xitzun ttzak'we'n Adán cyja':
—Aju xu'j tzaj tk'o'na te wuc'ile, atzunju saj k'onte twitz tze' weye, ex ma txi nlo'ne.
13Xitzun tma'n Kman Dios te xu'j cyja':
—¿Alcye ma tbinchaya?
Xitzun tma'n xu'j cyja':
—Aju lobaj ma sbunte weye, ex ma txi nlo'ne.
14Xitzun tma'n Kman Dios te lobaj cyja':
—Tu'nju ma tbinchaya jlu, o'cx teya cbel tcastiwoya cyxol cycyakil alumaj ex cyxol cycyakil txcup ate' tuj c'ul. Oc tbeta, cxe'l tjaku'n tc'u'ja twitz tx'otx', ex kuk cxel tlo'na cyuj cycyakil k'ij ctela twitz tx'otx'. 15Cbel nk'o'ne k'oj cyxole tuc'il xu'j, ex cyxol tiyjila tuc'il tiyjil xu'j. Aju tiyjil xu'j cbel pa'n twi'ya tu'n, atzun teya c'oquel ttx'a'na t-xe tkan, chi Dios.
16Xitzun tma'n te xu'j cyja':
—C'oquel nk'o'ne mas nim ta'w ti'ja oc cyul itz'j tala, ex tuc'il c'ixc'oj che ul itz'j tala. Nim oc tajbeya tchmila, atzun tchmila ccawil tibaja, chi Dios.
17Xitzun tma'n te Adán cyja':
—Tu'nju ma txi tnimana tyol t-xu'jila, ex ma txi tlo'na twitz tze' aju xi nma'ne teya: Mi'n txi tlo'na twitz, nchitzune, ja'lotzun cbel t-sentens tx'otx' tu'n tlaja; tuc'il sictle'n ccnetel twaya twitz tx'otx' cyuj cycyakil k'ij ctela twitz. 18Tzul tpok'sa'n tx'otx' ch'i'x c'ul ex txkantl c'ul cyxol tawala ex cxel tchyo'na itzaj at tuj cojbil. 19C'elel a' ti'j twi'ya tu'n tcnet twaya ocxi taj meltz'aja tuj tx'otx', porque ti'j tx'otx' cub bincha'na; tkukil tx'otx'a, ex ax tkukil tx'otx' c'oquela oc tcyima, chi Dios.
20Eva*fn* tbi t-xu'jil Adán oc tk'o'n tu'nju atzun c'oquel te cytxu' cycyakil xjal che ul itz'j. 21Cyi'j cytz'umal alumaj cub tbincha'n Kman Dios t-xbalun Adán tuc'ix te t-xu'jil, octzun tk'o'n cyi'j. 22Tma Kman Dios cyja':
—Lu ma tz'oc Adán ic tza'n jun ke. Ma tz'el tnic' ti'j ba'n ex ti'j mya ba'n. Ja'lotzun, mya yajcu txi tnukpi'n tk'ab ti'j ju tze' in tk'o'n chwinklal tu'n t-xi tlo'n twitz, ex jacu tz'ank'in te jumajx, chi Dios.
23Tu'ntzun jlu etz tlajo'n Kman Dios Adán tuj awal Edén tbi, tu'n tbaj tak'na'n tx'otx' jatum jatz k'i'n ttx'otx'il. 24Tejtzun tetz tlajo'n, e cub tk'o'n querubín ttxlaj awal tuj tjawitz k'ij, tuc'ix jun spad in c'anttok ex in yucchtok tuj tcyakil pac', tu'ntzun mi'n cyocx xjal ti'j ju tze' in tk'o'n chwinklal.
Mam del Norte © Sociedades Bíblicas Unidas 1993