Yoswa 3
3
Isiraeli niyaambukha Yorodani
1Kho Yoswa yahuuna mumabwibwi narula eShitimu niyoola enaYorodani, ye nabaana baIsiraeli bosi; nibakonelayo nibarashiaambukha ta. 2Ne olunyuma lwetsindaalo tsitaru abasinjilili babira mukambi yosi, 3nibalachilisia abandu bari Olwa mulalola lisanduku lieindakano yOMWAMI Nyasaye weenywe, nabakuhani abaLawi nibalichinjile, kho murule aha muli mulilondekhwo, 4mbu mumanye injila eya mukhoyile okhulonda; okhuba mushili okhulonda khunjila yino. Ne obwiyango bubeho hakari weenywe ninalio, obuchelwa shinga amakhono ebikhumila bibili; muralisitakhwo ahambi ta. 5Naye Yoswa nasunjila abandu ari Mwiyahule abeene; okhuba mukamba OMWAMI alakhola akamangaliimwa hakari weenywe. 6Khandi Yoswa naboolela abakuhani ari Chinje lisanduku lieindakano, mwambushe imbeli wabandu. Nibachinga lisanduku lieindakano nibeemila imbeli wabandu.
7OMWAMI naboolela Yoswa mbu Inyanga yino enjaka okhukhukhongoyia mumoni tsiaIsiraeli yosi, bamanye mbu shinga olwa ndalinji nende Musa, nolwa ndalabeetsanga ninawe. 8Nawe olache abakuhani abachinga lisanduku lieindakano ori Olwa mulaba nimuulile khundulo wamatsi kaYorodani, mwemeho muYorodani. 9Kho Yoswa naboolela abaana baIsiraeli ari Mwitse muhulile amakhuwa kOMWAMI Nyasaye weenywe. 10Yoswa naboola mbu Khwikhuwa lino mulamanyilakhwo shinga Nyasaye oubeetsangaho mwoyo olwa ali hakari weenywe, khandi mbu shialakosa okhwilusia imbeli weenywe abaKanaani, nabaHiti, nabaHiwi, nabaPerizi, nabaGirigashi, nabaAmori, nabaYebusi ta. 11Lole, lisanduku lieindakano yOMWAMI weshialo shiosi pe liambukha imbeli weenywe muYorodani. 12Kho bukule abandu ekhumi nababili okhurula mutsimbia tsialsiraeli, omundu mulala wabuli luyia. 13Ne olwa ebilenje biabakuhani abachinga lisanduku liOMWAMI, niye OMWAMI weshialo shiosi pe, biloola mumatsi kaYorodani, kho amatsi kaYorodani kalakhalikha; nako amatsi akarulanga emukulu kalasinjila shieshituuli.
14Olwa abandu barula mumaheema kabwe okhwambukha Yorodani, abakuhani abachinga lisanduku lieindakano nibaranjiliile abandu; 15khandi olwa abachinga lisanduku bali niboolile khuYorodani, ebilenje biabakuhani abachinga lisanduku nibiiyiniishe mumatsi khundulo wakwo (okhuba Yorodani kuyembanga khulukuku mundaalo tsiosi tsielichesa); 16kho amatsi akali nikarulanga emukulu nikeema, nikeebunjikha shieshituuli, ehale, eAdamu, litaala elo elirondokhana naZaretsani; nako akakholomokha katsie munyanza yaAraba, niyo inyanza yomuunyu, kali nikakhalishiile elala; abandu nabo nibaambushila ahahengana naYeriko. 17Nabo abakuhani abachinga lisanduku lieindakano yOmwami basinjila nibaraliile khwiloba eliumu hakari muYorodani, Isiraeli bosi nibaambukha khwiloba eliumu, okhuula olwa lihanga liosi liali niliambuushe Yorodani pe.
Oluluyia Union Version © Bible Society of Kenya 1975