Okhukalushila 32
32
1Reka amarwi, iwe likulu, emboole;
eshialo nashio shihulile amakhuwa komunwa kwanje.
2Ameechesio kanje kalaroonya shinga ifula;
amasungo kanje kalaama shinga eliime;
shinga ifula yomuchitsi khumuboka,
kata shinga olunyilila khumiani.
3Okhuba ndalarumbula eliira liOMWAMI.
Mwiyame shinga obukhongo olwa buli bwaNyasaye weefwe.
4Olwanda; ebikholebie bili habwene;
okhuba tsinjilatsie tsiosi netsiatoto;
niye Nyasaye wobwisiikwa, oubula obumayaanu;
nowatoto nowahabwene.
5Bamwonoonela;
shibali abaanabe ta, khulwa obulema bwabwe;
nolwibulo olurambatsanu olushiamu.
6Nilwo olwa mukalusilinjia OMWAMI,
inywe abandu abasilu ababula obuchesi?
Shialiye so owakhulonga?
Yakhukhola nakhutinyisia.
7Yitsulila tsindaalo tsiakhale;
yililisia khumiyika chietsinzibulo tsinyinji;
reeba so, akhumanyie;
kata abakofubo, bakhuboolele.
8Olwa Oyo Ouli Ikulu Muno yakabila amahanga obulaame bwabwe,
olwa yaahukhasia abaanu babandu,
yaraho tsinzakho tsietsimbia tsiabandu,
obunji bwabaana baIsiraeli shinga olwa bwali.
9Okhuba omukabo kwOMWAMI nikwo abandube;
Yakobo nobulaame obwa ikhaye yamukwila.
10Yamunyoola mushialo shieshitsiimi,
mushibala shieshihangalangwe, habundu ahakhaya hobuhooli,
yamufumbila tsimbeka tsiosi, namwechesia,
namulinda shinga indolelo yeimoni.
11Shinga inditsu eyiyakula eshitsu shiayo,
niyibembela ikulu wabaana bayo,
niyibambula tsimbaha tsiayo, niyibabukula,
niyibachinga khumbaha tsiayo,
12nolwa OMWAMI yenyene yamwimilila,
kata shiyalikhwo nomunyasaye omucheni yesi ta.
13Yamuchesia habundu hachinguukhu hosi heshialo,
naye nalia khubiamo biemikunda.
Yachila nakhomba obuushi mulwanda,
kata nende amafura mwichina lielikhwabuye;
14amabeele ketsikubuli ketsing'ombe, namabeele kamakondi,
namasinya kebimeeme namamiiku,
ebiayo biaBashani, netsimbusi,
neingano indayi yene;
wanywa idivai, niyo amabanga ketsinzabibu.
15Nebutswa Yeshuruni yakhomela, naratsa nebilenje;
okhomeele; okaliiye; wikuure muno.
Mana yalekha Nyasaye owamulonga,
naleka Olwanda Iwobuhoniabwe.
16Bamuhambia imbalikha nabanyasaye abacheni,
nibamusinyisia nebisinyo.
17Bamalila amadimoni emisango, abarali Nyasaye ta;
nabanyasaye aba baramanya ta;
abanyasaye abayia ababuushile ekulo aba abakuuka beenywe barariitsanga ta.
18Shiwitsulilanga Olwanda olwakhwibula ta;
wibiliile Nyasaye owalumwa okhukhwibula.
19OMWAMI yalola, nabafwola,
shichila abaanabe abasiani nabakhaana bamusinyisia muno.
20Nasunga mbu Ndalababisa tsimoni tsianje;
ndalalola obumaliilishi bwabwe shinga olwa bulaba;
okhuba bali olwibulo olukhayikhanu muno,
abaana ababula obwisiikwa.
21Bambambiye imbalikha khulwa eshieneshio eshirali Nyasaye ta;
basinyisiye nende ebiabutswa biabwe;
nasi ndalabahambia imbalikha khulwa abeenabo abarali oluyia ta;
ndalabasinyisia nende lihanga lisilu.
22Okhuba oburima bwanje buhambiye omulilo,
nakwo kwakhanga okhuula eMakombe hasi muno,
nikusamba eshialo halala namameeto kashio,
nikuhambia emise chietsingulu omulilo.
23Ndalababumbakhwo amabii;
ndalamalila ebisele bianje khubo.
24Balaba niboomile khulwa inzala,
nibaliibwa neikhupa, noluumbe olululu;
ndalabarumila ameeno ketsisolo,
nobufwisi bwebindu ebimoolanga mulufu.
25Ebulafu balafwilwa abandu babwe khulwa olukanga,
nomubisika bulabamwo oburii obukhongo,
obumalilana abasooliili nabakhaana,
nabaana abanuuna, halala nabasaatsa betsimbutsi.
26Ndakhasunjile mbu Ndalabasalaasia ehale;
ndalaakamia okhwitsulilwa khwabwe mubandu;
27nikarabeele mbu ndaria okhusinyisibwa nabasuku,
mbu abafukuli babwe bakhakorwa,
nibasunga mbu Omukhono kweefwe kuhulile;
shiali OMWAMI oukholile kano kosi ta.
28Okhuba bali lihanga elibula obuchesiyii;
kata obumanyilisii bubulaho mubo.
29Nibakhabeele abachesi, bakhamanyile kano neshisina shiene,
nibayililisia khubumaliilishi bwabwe.
30Omundu mulala yakhanyala arie okhulonda eshikhumila,
kata babili okhwilusia ebikhumila likhumi,
narali Olwanda lwabwe owabakusia,
OMWAMI nabahaana buhaana?
31Okhuba olwanda lwabwe shilufwanana nende Olwanda Iweefwe ta;
kata abasuku beefwe beene bachela bario.
32Khandi omutsabibu kwabwe kurula mumutsabibu kwaSodomu,
nomumikunda chiaGomora;
tsinzabibu tsiabwe netsinzabibu tsiobufila;
ebisakanya biatsio nebilulu;
33idivai yabwe nobufwisi bwetsinzokha,
nobusiba obululu bwameeni.
34Kano shikabiikhwa ewanje,
nikabohwa mumabiishilo kanje noho?
35Okhumala eshikwoli nokhwanje, nende okhurunga;
mushise olwa ebilenje biabwe bilarelela;
okhuba inyanga yamasila kabwe yili ahambi,
ne bienebio ebili okhubakwila bilaanguha.
36Okhuba OMWAMI alahula eshiina shiabandube,
nababeela abasumbabe eshisa,
olwa alola mbu obunyali bwabwe buhweele,
khandi mbu shiatong'aho omundu yesi, kata omubohe kata omulekhuule, ta.
37Kho alareeba mbu Abanyasaye babwe bali heena,
olwanda olwa bali nibeelushilangayo;
38abaliitsanga amasinya kemisango chiabwe,
nibanywa idivai yomusango kwabwe kwokhutsushilwa?
Babuushe bamuhabine;
bo bamuteetse!
39Lole shinga isie, isie omwene, nisie ye;
abulaho omunyasaye halala ninasi;
nisie owira, khandi nisie oulamusia;
ndafumira, khandi nisie ouhonia;
abulaho ounyala okhureesia omundu mumukhono kwanje.
40Okhuba enjinguulila likulu omukhono,
nimboola mbu Shinga olwa embeetsangaho mwoyo obushia nobushia,
41nimba niyiakala olukanga lwanje olung'inang'inu,
omukhono kwanje nikutiila obukhalachi,
ndalamala eshikwoli khubafukuli banje,
nimbarunga abangiya.
42Ndalanyweesia ebisele bianje amabanga nibimeesia,
olukanga lwanje nalwo lulalia inyama;
mbu amabanga kabeerwa nakababohe,
nemirwe chiabeemilisi babasuku.
43Inywe amahanga, mwikhoyele abandube;
okhuba alamala eshikwoli shiamabanga kabasumbabe,
narunga abafukulibe akabahela,
natisa eshialoshie nabandube.
44Kho Musa niyeetsa naboola amakhuwa kosi kolwimbo luno, abandu nibahulila, ye naYoswa waNuni. 45Mana olwa Musa yali namalilisiye okhuboolela Isiraeli yosi amakhuwa kano kosi 46yabasunjila ari Rekhwo omwoyo khumakhuwa kosi aka emurumbulila leelo; ne niko aka mulalachilisia aoaana beenywe, mbu beetsulilenje okhukhola amakhuwa kosi kamalako kano. 47Okhuba shinelikhuwa likhaya khwinywe ta; shichila nobulamu bweenywe, ne khulwa likhuwa lino tsindaalo tsieenywe tsilameetekha mushialo eshia mutsia okhwambukha Yorodani okhushibukula.
Musa yafuchiililwa okhuhengakhwo eshialo shiaKanaani
48Mana OMWAMI yasungana naMusa khunyanga yeneyo, naboola mbu 49Tikulukha otsie mushikulu shino shiaAbarimu, okhuula khushikulu shiaNebo eshili mushialo shiaMoabu, ahahengana naYeriko; olole eshialo shiaKanaani, eshia eheelesia abaana baIsiraeli shibe eshiabwe; 50mana ofwileyo mushikulu eshia olatikulukhayo, olonde khubandu beenywe; shinga Haruni omwana weeny ve olwa yafwila mushikulu shiaHori, nalonda khubandu babwe. 51Shichila mwakholela obukhobani hakari wabaana baIsiraeli, hamatsi kaMeriba eKadeshi mushitsiimi shiaZini; shichila shimwalolosia obutakatifu bwanje hakari wabaana baIsiraeli ta. 52Okhuba olalola eshialo nishili imbeliwo; nebutswa shiolatsiakhwoyo okhwinjila mushialo eshia eheelesia abaana baIsiraeli ta.
Oluluyia Union Version © Bible Society of Kenya 1975