Okhukalushila 30
30
Akabakhoyeele, mbu bakalusibwe habwene nibaheebwa ikhabi
1Ne amakhuwa kano kosi olwa kalaba nikakhwitsiile, akeikhabi nakeshilaka munwa aka ereele imbeliwo; khandi olwa olakeetsulila mumahanga kosi omwa OMWAMI Nyasayewo alaba nakhwilusiliye; 2nomukalushila OMWAMI Nyasayewo, nohulila amakhuwake mukosi aka ekhulaka inyanga yino, iwe nabaanabo, nomwoyokwo kwosi neshiimoshio shiosi; 3habwenaho OMWAMI Nyasayewo alakalukhasia obubohwibwo, nakhubeela eshisa, nakhukhung'aasia khandi okhurula mumbia tsiosi tsiabandu omwa OMWAMI Nyasayewo alaba nakhusalaasiliyemwo. 4Nikaba mbu abaarwabo bandi baba nibali khushihesi shielikulu, kata okhurula yaho OMWAMI Nyasayewo alakhukhung'aasia, khandi okhurula yaho alakhwenda; 5mana OMWAMI Nyasayewo alakhwinjisia mushialo eshia abakuukabo balia, nawe olashilia; alakhukholela amalayi, nakhwinjiyia okhushila abakuukabo. 6OMWAMI Nyasayewo alakhusheba omwoyo, nemioyo chiahaanabo, okhuheela OMWAMI Nyasayewo nomwoyokwo kwosi neshiimoshio shiosi, mbu obeetsenje mwoyo. 7Khandi OMWAMI Nyasayewo alara ebilaka munwa bino biosi khubasukubo nende khubakhukiyanga, abali nibakhusandinjia. 8Nawe olakalukha nohulila omwoyo KwOMWAMI, nokhola akamalakoke kosi aka ekhulaka leelo. 9OMWAMI Nyasayewo alakhumeetela amameeto mumilimo chiosi chiomukhonokwo, nomubiamo biomubilikwo, nemubiamo biemirukochio, nomubiamo bielilobalio, okaase; okhuba OMWAMI alakhwikhoyela khandi mukhukaasakhwo, shinga olwa yeekhoyela abakuukabo, 10noba nolahulilanga omwoyo kwOMWAMI Nyasayewo, nolinda amalakoke naka alachilisia kosi akahandiikwa mushitabu shino shiamalako, khandi noba noshiukhanila OMWAMI Nyasayewo nomwoyokwo kwosi neshiimoshio shiosi.
11Okhuba lilako lino elia ekhulzka leelo shilili litinyu elikhukhaya, kata shilili ehale ta. 12Shilili mwikulu, elichila noreeba mbu Niwina oulakhutikulushila atsie mwikulu akhuleerele, akhuhulilisie, mbu khulikhole? Ta. 13Kata shilili injelekha weinyanza, elichila noreeba mbu Niwina oulakhwambushila inyanza akhuleerele, akhuhulilisie, mbu khulikhole? Ta. 14Nebutswa likhuwa lili ahambi muno ninawe, mumunwakwo Ichandi mumwoyokwo, mbu olikhole.
15Lola, inyanga yino ereele imbeliwo obulamu nobulayi, khandi okhufwa nobubii. 16Noba nolahulilanga amalako kOMWAMI Nyasayewo aka ekhulaka inyanga yino, nomuheela OMWAMI Nyasayewo, nokhuchenda khunjilatsie, nokhulinda amalakoke naka alachilisia nobukhalachibwe, kho olabeetsanga mwoyo niwinjiha, khandi OMWAMI Nyasayewo alakhuheelesia ikhabi mushialo eshia winjilamwo okhushibukula. 17Nebutswa omwoyokwo nikuba nikushiukhana okhurulaho, nawe noloba okhuhulila, ne nokhweswa okhwinamila abanyasaye bandi nokhubakhalabanila; 18kho emurumbulila leelo luno mbu mulatiba butiba; tsindaalo tsieenywe shitsilameetekha mushialo eshia wambukha Yorodani niwinjilamwo okhushibukula ta. 19Enanga likulu nende eshialo okhukhuyinga nobuloli inyanga yino, mbu ndareele imbeliwo obulamu nokhufwa, ikhabi neshilaka munwa; kho lobola obulamu, obe mwoyo, iwe nolwibulolwo, 20noheela OMWAMI Nyasayewo nohulila omwoyokwe, nomuhandakhwo; okhuba niko akali khwiwe obulamu nobuyindifu; mbu omenyenje mushialo eshia OMWAMI eetsubila abakuukabo, Aburahamu naIsaka naYakobo, okhubaheelesia.
Oluluyia Union Version © Bible Society of Kenya 1975