Okhukalushila 25
25
1Nishiba nishiliho eshifunaane hakari wabandu, niboola mushiina, abayaasii nibabakhalachila; kho balolosie obulunjishi bwomulunjishi, nibamukhalachila eshiina omubii. 2Ne omubii oyo naba nakwanile okhunywekhwa, omuyaasii amukonie hasi anywekhwe, omwene nalola, obunji bwebiboko nibubalwa obubiibwe shinga olwa buhela. 3Alache mbu akhupwe ebiboko amakhumi kane, narashisia yaho ta; nebutswa naba nashisia yaho, namumeetela ebiboko ebinji, omwana weenywe yakhakhuloleshela shinga oufwolelwa elala.
4Orabohanga ing'ombe omunwa olwa yihuulanga imele ta.
Akobukalusibwi bwomukhasi
5Omundu nende omusiani wabwe nibaba nibamenyanga halala, mana oundi khubo nafwa, ne naralikhwo nomwana omusiani ta, kho omukhasi womufu oyo aratsia okhuteeshela omundu omusuku owelwanyi ta. Omusiani wabwe omusaatsawe amukalusie, amuteeshie, namukholela akakhoyeele mulamunyene. 6Ne omwana wambeli owa aleebula alakulishilwa khuliira liomusiani ulia owafwa, eliiralie lileshe okhusiliisibwa muIsiraeli. 7Nebutswa omusaatsa oyo naba nareenya okhukalusia omukhasi womwana wabwe ta, kho mulamunyene oyo atikulushe atsie haluyia, ewabakofu, naboola mbu Mulamwa wanje alobile okhubuusilia omwana wabwe omurwe muIsiraeli; shiachama okhukholela akakhoyeele mulamunyene ta. 8Mana abakofu belitaalalie bamulanje, nibasungana ninaye; ne naba nasinjila naboola mbu Shinzenya okhumukalusia ta; 9kho omukhasi ousika omusiani wabwe yeetse ewa ali imbeli wabakofu, naboholola eshilaaro shiomusaatsa tsana shirule mushilenjeshie, namufuutsa amare mumoni; nakalusia nasunga mbu Nilwo olwa kalakholehha omusaatsa ouroombakha inzu yomwana wabwe ta. 10Mana inzuye yilangwe muIsiraeli mbu Inzu yoyo owabohololwa eshilaaro.
Amalako kandi nakandi
11Abasaatsa olwa baba nibakhupananga, omukhasi woundi khubo niyeetsa nateema okhureesia omusaatsawe mumukhono kwa oyo oumuupa, naleera omukhono namutiila ebitonye biamabiswi, 12kho omukhalache omukhono katu; imoniyo yileshe okhut ilwa eshisa.
13Orabakhwo namachina keiratili akaahukhaane mulolotiyo, likhongo nelituutu, ta. 14Orabakhwo nebichelo ebiahukhaane munzuyo, eshikhongo neshituutu, ta. 15Iratili eyili habwene, eyatoto, obe ninayo; eshichelo eshili habwene, eshiatoto, obe ninashio; tsindaalotsio mana tsibe tsinyinji mushialo eshia OMWAMI Nyasayewo yakhuheele. 16Okhuba bosi abakholanga akafwana kario, nibo bosi abakholanga akabula obulunjishi, bali eshisinyo khuMWAMI Nyasayewo.
Lilako eliokhusiliisia Amaleki
17Yitsulilanga aka Amaleki yakhukholela khunjila olwa mwali nimurula eMisiri; 18shinga elwa yakhwakaanila khunjila, nakhupa abobo abali inyuma, bosi abali abateshele munyumawo, olwa wali nochoonyile noluyile; kata shiyamuria Nyasaye ta. 19Niko akachila, olwa OMWAMI alaba nakhuhuluusiye khubasukubo bosi abakhubotokhana, mushialo tsana eshia OMWAMI Nyasayewo akhuheelesia shibe obulaame, shibe eshishio omwene, olasiliisia okhwitsulilwa khwaAmaleki hasi welikulu; oreebilila ta.
Oluluyia Union Version © Bible Society of Kenya 1975