1 Timoteo 5
5
Adrɨzà Kristiani nɨ ovʉjʉ ànɨ ɨ̀sɨlɨa vɨɨ
1Mɨ ɨtre ꞌba mbazà drìa kʉ, te mɨ ma mɨ ɨ̀rɨ bʉ léti ìnzìtaa nɨ yɨ̀, kɨ̀le mɨnɨ mɨ male ateè drìlia vɨɨ lé. Mɨ ꞌdʉ kàdrúà anzɨ mɨ awo adrí lé, 2mɨ ꞌdu zi mbazà vɨɨ ɨnɨ kɨ̀le mɨ awo ayó lé, díká mɨ ꞌdu zi nyɨ́rɨ́ vɨɨ ɨnɨ kɨ̀le mɨ awo ambʉ́ lé adrɨzà ònzɨ ko drʉ.
3Mɨ fè ìnzìtaa awuzi àzàkoma lèle vɨɨ ɨnɨ yɨ́. 4Te àwúzí tè ovʉʉ anzɨ be díká anzípí té ovʉʉ anzɨ be, lè anzɨ ndee ɨnɨ ꞌó eꞌyo àꞌɨ̀taa nɨ lèle vɨɨ ɨnɨ ꞌyowa àkú alɨa òkò díká léti ꞌdɨ̀vɨɨ yɨ̀ anzɨ ɨ̀rɨ awo vɨɨ ɨnɨ anzɨ anzípí ꞌyowa vɨɨ ɨbe àtapí ɨnɨ òfèe àꞌbipí ɨbe, àrɨ̀yɨ̀kʉ ꞌdɨ̀vɨɨ ɨ àyɨ̀kò fe Orɨ yɨ́ tʉ̀. 5Àwúzí ovʉle nɨ yɨ̀ ꞌbanɨ àzàa kole kʉ vɨɨ ɨ asíꞌbàzà fe Orɨ drìa díká ɨ Orɨ nɨ zi oꞌdú drɨ́á yɨ̀ iní ɨnɨ ìtú be àzàkoma àꞌíjʉ́. 6Te àwúzí nɨ òwɨ̀le àyɨ̀kò nyawú drìa vɨɨ ɨnɨ yɨ̀ vɨɨ ɨ̀rɨ ꞌba dràzà nɨ, káꞌdí tè ovʉʉ ɨdrɨ drʉ ra kpé. 7Mɨ ɨ̀ce àzítáá vɨɨ ɨnɨ Kristiani yɨ́ azílé ꞌba àloo ɨ̀rɨ ꞌyo ꞌba àꞌɨ̀ꞌba ra vɨɨ ɨnɨ eꞌyo ònzɨ ꞌoo kʉ benì. 8Te ꞌbarʉʉ asɨle wàꞌdɨ ɨ̀rɨ awo yɨ̀ kʉ, ɨ̀cetaa yɨ̀ ɨ̀rɨ awo àkúá vɨ́ɨvɨɨ ɨnɨ be drɨ́á vɨɨ, gà dènaa àꞌɨ̀taa sɨ̀ díká ndè pàbaa ònzɨ yɨ̀ ꞌbarʉʉ àꞌɨ̀taa ko vɨɨ ra.
9Lè ɨ sɨ́ àwúzí àloo rúá awuzi ɨ̀sɨlɨa dèengà ɨlɨa ca kàlíazɨa kʉ vɨ́nɨ kʉ. Òꞌbàjʉ naa drìa, lè ɨ̀rɨ ru onyɨ ndráánɨ́ paale àlʉ ka, 10díká vɨɨ dèe ꞌba ní ɨ̀rɨ awo ꞌotaa ònyɨ̀be kɨ̀le anzɨ tàmbazà lé, adrɨzà ꞌba drɨ́á àꞌíjʉ vɨɨ lé, kɨ̀le Kristiani Orɨ awo vɨɨ ɨnɨ àzàkojʉ trótrò kɨ̀le ɨnɨ Kristiani ndee ꞌyowa atɨꞌboo nɨ lé, ꞌba eꞌyo ɨ̀wa alɨa vɨɨ ɨnɨ àzàkojʉ vɨɨ lé díká nɨ òwɨ̀jʉ eꞌyo drɨ́á ònyɨ̀be vɨɨ ɨnɨ ꞌojʉ ɨ.
11Te àmɨ òfɨ́ awuzi nyɨ́rɨ́á vɨɨ ɨnɨ rú ɨ̀ndɨ̀ kʉ, àrɨ̀yɨ̀kʉ àva rúá nɨ vɨɨ tè ngaa eꞌyo ɨnɨ nɨ ànɨ òwɨ̀jʉ Kristo yɨ́ vɨɨ nzee ꞌba, ɨnɨ ngaa lèe ònyɨ ru díká. 12Ànɨ ɨcó nga eꞌyo lizà ji ànɨ drìa ra àrɨ̀yɨ̀kʉ àŋó ꞌyowa oyosòzà òkò vɨɨ ꞌba. 13ꞌDànaa drìa, ɨ́ adrɨzà ɨ̀gɨ̀ nɨ vɨ́ɨvɨɨ ɨwɨ ɨ díká ɨ́ ací àkú bʉ yɨ̀. Ovʉʉ kírí ɨnɨ caa ɨ̀gɨ̀ drʉ aꞌdúle kʉ, te pàbaa ɨ́ àndronga ndro àloo ànɨ osʉ eꞌyo ꞌba alóo ꞌyowa vɨɨ ɨnɨ alɨa, eꞌyo tà sìle kʉ vɨɨ ɨnɨ nzejʉ. 14Ànɨ ma ɨmbataa fèe awuzi nyɨ́rɨ́á vɨɨ ɨnɨ yɨ́ ònyɨ rujʉ ra, anzɨ tijʉ, ꞌyowa àkú tàmbajʉ díká fèjʉ àrɨꞌboo nɨ eꞌyo ònzɨ nzejʉ ɨnɨ rúá kʉ benì. 15Adanɨa awuzi alóo ɨꞌdó ace sitani buti òbɨ ꞌba.
16Izí àloo Kristiani drʉ vɨ́ɨvɨɨ tè ovʉʉ awuzi be nɨ awo àkúá, lè ɨ̀rɨ ko ɨnɨ àzà ra díká lè ɨ̀rɨ kʉ ɨnɨ àsárà drʉ Kristiani drìa kʉ azílé Kristiani ɨnɨ kó awuzi alóo àzàkoma lèle tʉ̀ vɨɨ ɨnɨ àzà benì.
17Lè ꞌba ꞌwàrà Kristiani drìcele kílílí vɨɨ ɨnɨ yɨ́ ɨ fé ìnzìtaa angɨrɨ, tʉ̀tʉ̀a yɨ̀ ꞌba ꞌyowa àzí eꞌyo òlʉ̀zà nɨ àloo ꞌba ɨmbazà nɨ vɨɨ ɨ. 18Àrɨ̀yɨ̀kʉ Eꞌyo sɨ̀zà ꞌyo kɨ́nɨ̀, “Lè mɨ ombe tí nga ꞌàle vɨɨ tia cɨ kʉ ɨ̀rɨ nɨ àzí ngarɨa,” díká, “Lè agú àzí ngale vɨɨ awo ɨ òfé òya ra.” 19Mɨ àtì eꞌyo òmbɨ́lɨ́ osʉjʉ ꞌba ꞌwàrà rúá vɨɨ kʉ ráaka dèe lè sàdénì ɨnɨ ovʉ́ ìrì nòsɨ̀kʉ na vɨ̀pɨ ka. 20Lè ɨ fé panga ꞌba ɨ̀zatà ꞌole àsúú vɨɨ ɨnɨ yɨ́ òꞌbɨ drìlia azílé ꞌba alóo vɨɨ ɨnɨ yɨ́ òrì fèjʉ benì.
21Ma fè mɨ́ yɨ́ òkpo àzítáá ꞌdɨ̀vɨɨ ɨnɨ buti òbɨ̀jʉ Orɨ drìlia, Kristo Yesu drìlia àloo malaika òpèzà vɨɨ ɨnɨ drìlia afɨmánɨ́ kodrʉ àloo òpèndú kodrʉ.
22Lè mɨ rúá ɨ̀rɨ yà gí tìjʉ ꞌba àloo drìa àzí Opɨ awo vɨɨ ngajʉ sʉ̀à drʉ kʉ nòsɨ̀kʉ mɨ fɨ ɨ̀zatà ꞌba àloo awo vɨɨ alɨa kʉ. Mɨ mba mɨ tà kílílí ɨ̀zatà kodrʉ.
23Mɨ mbu lʉ́ yí nɨ kíríá aꞌdúle kʉ, te mɨ mbʉ pàbaa wínò were ɨ̀ndɨ̀ mɨ ale nɨ àdèjʉ, kɨ̀le mɨ nɨ rɨle àzo rule mbèlè mbele vɨɨ lé.
24Ɨ̀zatà ꞌba alóo ꞌyowa vɨɨ ɨ́ ànɨ ɨ̀ꞌda ndɨrɨ drʉ, díká ɨ́ mu ɨnɨ drìlia adro eꞌyo lizà drìlia, te ꞌba alóo ꞌyowa ɨ̀zatà ɨ́ mu ànɨ ɨ̀ꞌda ndò. 25Léti àlʉ ꞌdɨ̀vɨɨ yɨ̀, eꞌyo ꞌozà ònyɨ̀be vɨɨ ɨ́ ànɨ ɨ̀ꞌda ndɨrɨ drʉ díká eꞌyo ꞌozà onzɨ vɨɨ ɨcóó ànɨ òzi kʉ.
© Wycliffe Bible Translators, Inc., © SIL Uganda, All rights reserved