Vakatekivu 2
2
1A sa buli oti na lomalagi kei vuravura, kei na lewena kecega. 2#Lako 20.11#Ipe 4.4,10Ia e na kenai kavitu ni siga sa vakaotia na Kalou na nona cakacaka sa kitaka ko koya; a sa vakacegu ko koya e na kenai kavitu ni siga mai na nona cakacaka kecega sa kitaka ko koya. 3A sa vakalougatataka na kenai kavitu ni siga na Kalou ka vakatabuya; ni sa vakacegu kina mai na nona cakacaka kecega sa bulia na Kalou ka kitaka.
4Sa vakaoqo nai tukutuku kei lomalagi kei vuravura ni sa buli, e na siga sa bulia kina na vuravura kei lomalagi na Kalou ko Jiova, 5kei na kau kecega ni vanua ni se bera ni tu e vuravura, kei na co kecega ni vanua ni se bera ni tubu—ni sa sega ni vakatauca na uca ki vuravura na Kalou ko Jiova, ka sa sega na tamata me wereca na vanua; 6ia sa kuvu cake na kabukabu mai na qele, ka vakasuasuataka na dela ni vanua taucoko— 7#1Kori 15.45a sa qai bulia na tamata na Kalou ko Jiova mai na kuvu ni qele, ka ceguva ki na ucuna nai cegu ni bula, ka sa yaco kina na tamata me yalo bula. 8A sa tea e dua na were na Kalou ko Jiova, mai na tokalau mai Iteni, ka sa kauta kina na tamata ka bulia ko koya. 9#Vtaki 2.7; 22.2,14A sa vakatubura mai na qele na Kalou ko Jiova na kau kecega sa vinaka na kenai rairai ka yaga me kakana. Na kau ni bula talega sa tiko e loma ni were, kei na kau sa kilai kina na ka vinaka kei na ka ca.
10A sa drodro e dua na uciwai mai Iteni me vakasuasuataka na were; a sa wase mai kea, ka yaco me va na kenai davedave. 11A yaca ni kenai matai, ko Paisoni; ko ya sa volita na vanua taucoko ko Avila, sa kune kina na koula; 12a sa vinaka na koula ni vanua ko ya; sa kune talega kina na mataniciva, kei na vatu na yacana na onikisa. 13Ia na yaca ni kenai karua ni uciwai, ko Kioni; ko ya sa volita na vanua taucoko ko Eciopea. 14Ia na yaca ni kenai katolu ni uciwai, ko Taikirisi, ko ya sa lako vaka ki Asiria, vaka ki na tokalau. Ia nai kava ni uciwai na Uferetisi.
15A sa kauta na tamata na Kalou ko Jiova, ka vakatikora ki na were ko Iteni me wereca ka vakatawa. 16A sa vakarota na tamata na Kalou ko Jiova, ka kaya, “E tara mo kana mai na kau kecega sa tu e na were; 17ia mai na kau sa kilai kina na ka vinaka kei na ka ca, mo kakua ga ni kana kina, ni ko na mate vakaidina e na siga ko sa kana kina.”
18A sa qai kaya na Kalou ko Jiova, “Sa sega ni vinaka me tiko duadua na tamata; au na bulia e dua na dauveivuke e yaga vua.” 19Ia na Kalou ko Jiova sa bulia mai na qele na manumanu kecega ni vanua, kei na manumanu vuka kecega, ka sa kauti ira vei Atama me raica se cava na yaca ena vakatokai ira kina. Ia na yaca sa vakatoka kina na ka bula kecega ko Atama, ko ya ga na yacana. 20A sa vakayacana na manumanu kecega ko Atama, kei na manumanu vuka, kei na manumanu kecega ni vanua; ia sa sega ni kune vei Atama e dua na dauveivuke e yaga vua. 21Ia na Kalou ko Jiova sa vakayacora me biti Atama e dua na moce lutu, a sa moce kina ko koya; a sa kauta tani ko koya e dua na sui ni sarisarina, a sa cakava na lewena me veiuturi me kenai sosomi. 22Ia na sui ni sarisarina ka kauta tani na Kalou ko Jiova mai vua na tagane, sa bulia kina e dua na yalewa, a sa kauti koya vei Atama. 23A sa kaya ko Atama,
“Oqo dina na sui mai na suiqu,
kei na lewe mai na lewequ;
ena vakatokai ko koya me yalewa,
ni sa kau tani mai vua na tagane.”
24 #
Maciu 19.5; Mari 10.7,8; 1Kori 6.16; Efe 5.31 O koya oqo sa na biuta kina na tamana kei tinana na tagane, ka kabita na watina, a rau na lewe dua ga. 25A rau sa luvawale, na tagane kei na watina, a rau sa sega ni madua.
