हिब्रु 5
5
1परमेस्वर एस्राएल सारभिको द्याङगेलाइ मध्येसो गोताङ प्राधान पुजारिगेलाइहेङ छाल्हि, कालाउ वा गोताङ प्राधान पुजारिगेलाइहेङ द्याङगेलाइको तर्फसो पाप कातिलिको भाअ्सिङ भेति कालाउ भोगगेलाइ चढाइलि नियुक्ति पाहि, कालाउकि परमेस्वर द्याङगेलाइको पाप काटि पापियाको। 2हाइपालिपानु प्रधान पुजारिगेलाइ बुङ स्वयम ताइमिङ गोताङ कमजोर द्याङगेलाइ भाइकाङ दोङ। ओदोङ भाअ्सिङ इम्बालाइ मोनोइ जेङतेङ मागितेङ गलत काम पाकालाइ कालाउ दामा बिराइतेङ हानिकालाइहेङ सम्झाइलि दोखे। 3ओदोङ भाअ्सिङ प्रधान पुजारि ताइको पापको भाअ्सिङ भोग चढाइलि गोइखे, कालाउ वा द्याङगेलाइको पापगेलाइको स्यामाको भाअ्सिङ भोग चढाइलि गोइखे।
4साम्मान निङलिको भाअ्सिङ हासु बुङ ताइमिङ प्राधान पुजारि जेङलि मादोखे। भरु परमेस्वर लाङतिको प्राधान पुजारि हारुनहेङ नियुक्ति पाहि, एन्साङ दोङ परमेस्वर नियुक्ति पाका द्याङ खिनिङ प्राधान पुजारि जेङलि दोखे। 5एन्साङ पातेङ ख्रिस्ट साम्मान निङलि ताइमिङ प्राधान पुजारि माजेङहि, भरु परमेस्वर दोङ वासेहेङ इङको साम्मान पिहि, कालाउ दोअ्हि,
नानि का घोसाना पाङका कि, नाअ् काङको चान हिना। कालाउ नानिको दिनासोङ का नाङको आबा जेङका हिघा।
6भेनेङ थामेता परमेस्वर वासेहेङ आरोङ दोअ्हि,
मल्किसेदेक#5:6 मल्किसेदेक मल्किसेदेक आब्राहामको सोमोइता एमि पुजारि कालाउ साम्रात हिघाहि। उत्पत्ति 14:17-24 प्राधान पुजारि जेङका कोनिङ,
नाअ् जेलाउलाउको भाअ्सिङ पुजारि हिना।
7जेलाउ येसु ख्रिस्ट सुमिङता हिलाउ वा ताइको सारिरिक जिबनता ताइमिहेङ सिकालाइसो बान्चिपालि दोका परमेस्वर दोफा खार्काताङ मिति ह्यापातेङ बिन्ति कालाउ प्रार्थाना पाहि, कालाउ वाको मोनोइ कालाउ भक्तिको कारनहोइ दोङ परमेस्वर वाको प्रार्थाना हिङहि। 8परमेस्वरकोङ चान जेङतेङ बुङ ताइमि भोगिका दुख-कस्टसो वा परमेस्वरको आग्या किलि धिरहि। 9-10परमेस्वर येसुहेङ मल्किसेदेक प्राधान पुजारिको लाहारिपा साम्मान पिहि। कालाउ जेलाउ येसु पुराङ सिद्द जेङहि वाको आग्या किका झाराङको भाअ्सिङ वा आनान्तको मुक्तिको मुलि जेङहि।
युल्लिसो बान्चिका चेताउनि
11केलाइ याको बारेता नेलाइहेङ दोअ्लि गोइका काथा हेन्जा हि, कालाउ ओदोङ काथागेलाइको बारेता बाख्या पालि हेन्जा मुसकिल हि। हाइपालिपानु नेलाइ परमेस्वरको बचन धिरलि आल्थिका हिसुना। 12एला थेकापा ते नेलाइ आरुगेलाइहेङ धिरपालि दोका जेङलि गोइधास्वाना, कालाउ नेलाइ एला थेकापा बुङ परमेस्वरको बचनको बारेता आधारभुत काथा थाहा मान्थुनाङ आरु हासु बुङ धिरपालि गोइखे। जाराउका चाका-आम्का आमेने खान्तेङ आझाइ भरु नेलाइहेङ जामाल भाइपा दुधे गोइखे। 13दुधे खिनिङ आम्तेङ बान्चिका द्याङ चाहि, धार्मिक जिबन जियाइका सिक्स्याता, निपुन मान्थुखे, हाइपालिपानु उङको जामाल दोङ हिखे। 14कालाउ जाराउका चाका-आम्का चाहि खाङधुरिता बल्लियाका द्याङको भाअ्सिङ दोङ हि, वाते रेम्का-मारेम्का काथा लाअ्पालि दोका तालिम निङलि दोका हिखे।
Dhimal New Testament, by The Love Fellowship is licensed under Creative Commons Attribution-ShareAlike 4.0 License.