हिब्रु 1
1
1प्राचिन सोमोइसोङ केलाइको पुर्खागेलाइ दोफा परमेस्वर ताइको बक्तागेलाइ पाहासो हेन्जाङखे भेनेङ-भेनेङ तरिकाहोइ परमेस्वर नुइ धुइहि। 2कालाउ इदोइ आखिरि दिनागेलाइता वा ताइको चान पाहासो केलाइ दोफा नुइ धुइका हि। वा ताइको चान पाहासो दोङ या गोताङ सुमिङ बानाइहि, कालाउ वा ताइको चानहेङ इदोइ गोताङ काथाको उत्तराधिकारि बानाइहि। 3वा दोङ परमेस्वरको महिमाको रुप कालाउ वा दोङ परमेस्वरकोङ स्वभाबको जातिङकोङ प्रति रुप हि, कालाउ गोताङ सुमिङहेङ ताइको सरबुङसाइका बचनहोइ सामाराइखे। कालाउ वा दोङ द्याङगेलाइहेङ ओबालाइको पापगेलाइसो स्यामा पापाका काम पालि दोतेङ वा स्वर्गता परमेस्वरको महिमाको दाम्पाहा खुर भारि झाउका साम्मानको थामेता योम्हि।
परमेस्वरको चानको माहानता
4ओदोङ भाअ्सिङ परमेस्वर चानहेङ स्वर्गदुतगेलाइ खान्तेङ बुङ झाउका उत्तम मिङ पिहि, एसापा इदोइ पाहासो केलाइ थाहा निङलि द्वाङ कि, चान स्वर्गदुतगेलाइ खान्तेङ माहान हि। 5परमेस्वर हेलाउ बुङ स्वर्गदुतगेलाइहेङ मादोअ्हि कि “नाअ् काङको चान हिना, नानि का नासेहेङ काङको चान भाइपा तिङपाका हिघा” कालाउ आरोङ परमेस्वर हेलाउ बुङ स्वर्गदुतगेलाइहेङ मादोअ्हि कि, “का वाको आबा जेनाङका, कालाउ वा काङको चान जेनावा।” 6कालाउ ताइको लाङ चानहेङ या सुमिङता दिङगिल्का खान्तेङ लाम्फा परमेस्वर आरोङ दोअ्खे,
“काङको गोताङ स्वर्गदुतगेलाइ वासेहेङ दोङ पुजियाको।”
7स्वर्गदुतको बारेता परमेस्वर एसा दोअ्खे,
“का स्वर्गदुतगेलाइहेङ भेरमा भाइपा कालाउ ताइको बान्धाइतिगेलाइहेङ दाल्दालाइका मे भाइपा बानाइलि द्वाङका।”
8कालाउ ताइको चानको बारेता परमेस्वर एसा दोअ्हि,
हे परमेस्वर, नाअ् राजा हिना जाइ जेलाउलाउको भाअ्सिङ सासन पाना,
कालाउ नाअ् ताइको राइजिता धार्मिकता सोङ सासन पाना।
9ठिक काथा नाअ् मन्दा ताखेना कालाउ मारेम्का काथाहेङ नाअ् सिकाखेना,
“ओदोङ भाअ्सिङ का नेलाइको परमेस्वर नेलाइहेङ नेलाइ सानाइतिगेलाइ मध्येसो इस्तु
साम्मान कालाउ आनान्द पिका हिघा कालाउ नेलाइहेङ साल्का हिघा।”
10धर्मसास्तरता एसापा लेखेका हि,
हे प्रभु, लाम्फोरति नाअ् प्रिथिबि सिरजाइन्हा, कालाउ आकासता हिका गोताङ आमेने नाअ् दोङ बानाइना।
11इङकोगेलाइते गोताङ नासातेङ हानाङ,
कालाउ नाअ् चाहि जेलाउलाउको भाअ्सिङ जियाइतेङ ह्याना।
कालाउ इम्बालाइ धाबा भाइपाङ पुर्ना जेनावा।
12गुका धाबा भाइपाङ नाअ् इम्बालाइहेङ लुमाना,
कालाउ धाबा कोनिङ इङको भाङगाइन्हावा। कालाउ नाअ् हेलाउ बुङ माफेरिखेना।
कालाउ नाङको जिबनको आन्ता हेलाउ बुङ माजेनाङ।
13परमेस्वर आरोङ हेलाउ बुङ हिदोइ बुङ ताइको स्वर्गदुतगेलाइहेङ एसा मादोअ्हि,
नाअ् काङको दाम्पाहा साम्मानको थामेता योम,
जेलाउ थेकापा का नाङको सतुरुगेलाइहेङ पुरा रुपता
नाङको आधिनता माचुमापा धाउ।
14कालाउ स्वर्गदुतगेलाइको उदेस्य हाइ कुनु? इम्बालाइ परमेस्वरको सेवा पाका खिनिङ हि। परमेस्वर इम्बालाइहेङ मुक्ति निङलि हानिका द्याङगेलाइहेङ साघाइलि दिङगिल पिहि।
Dhimal New Testament, by The Love Fellowship is licensed under Creative Commons Attribution-ShareAlike 4.0 License.