2 कोरिन्थि 6
6
1परमेस्वरहेङ साघाइका द्याङ हिनाङ केलाइ नेलाइहेङ सेउपानाखे, कि वाको आनुग्रह व्यर्थ जेङलि मापि। 2हाइपालिपानु धर्मसास्तरंता परमेस्वर दोअ्खे,
“ग्रहन योग्य सोमोइता का नाङको दोअ्का हिङघा, कालाउ मुक्तिको दिनाता का नासेहेङ साघाइघा।”
हिङ ठिक सोमोइ एला दोङ हि, मुक्तिको दिना एला दोङ हि।
पावलको दुख
3परमेस्वरहेङ साघाइका द्याङ जेङतेङ केलाइको सेवाता हासु बुङ दुसिका मानिनाको दोअ्तेङ केलाइ हासुको बुङ दामाता बाधाको कारन माजेनाङ। 4भरु इदोङ गोताङ काथागेलाइ केलाइ परमेस्वरको सत्ये सेवकगेलाइ हि दोअ्तेङ तिङपानाखे: सहनसिलता, कस्टता, आप्थारोता, आपत-बिपतता, 5दानाइ निङचाकाता, झ्यालखानाता, हुलदुङगाता, मेहेनतता, मिधुलापाङ माजिम्सिङ हिलाउ, म्हितुपाङ हिलाउ, 6सुद्दता, ग्यानता, धैर्यता, दायाकाता, पबित्तरो आत्माता, सत्ये प्रेम, 7इदोइ भनाइ सहि हि: सत्येको बचनता कालाउ परमेस्वरको सरबुङता। केलाइ धार्मिकताको कात्तिगेलाइ दाम्पाहा खुरहोइ झाअ्मिरिलिको भाअ्सिङ कालाउ केपाहा खुरहोइ बान्चिलिको भाअ्सिङ प्रयोग पानाखे। 8द्याङगेलाइ केलाइको बाखिन पालाउ माकुनु इम्बालाइ केलाइहेङ सिकालाउ, द्याङगेलाइ बो गेलाइहेङ केलाइ मारेम्का हिनाहि दोअ्लाउ, माकुनु रेम्का हिनाहि दोअ्नु, केलाइ इमान्दार हिनाहि, कालाउ इम्बालाइ दोअ्खे कि केलाइ धातुवा हिनाहि। 9हासु बुङ केलाइहेङ नाल्खा दोअ्तेङ मानिलाउ बुङ आधिमि केलाइहेङ मानाल्का द्याङ दोअ्तेङ मानिखे, सिकाङ भाइका जेङलाउ बुङ बान्चिका हिनाहि, कालाउ साजाइ निङतेङ हिलाउ बुङ सेअ्न्हाका मान्थुन्हाहि। 10केलाइ हेन्जा दुख हिलाउ बुङ दिनाङ लेङचाका हिनाहि, कालाउ केलाइ गरिब हिलाउ बुङ हेन्जाङहेङ आत्मिक धनि बानाइयाङ, हाइ दोङ मान्थुका भाइपा हिलाउ बुङ गोताङ आनेमाने हि।
11ओइ कोरिन्थि सहरता हिका खान्धुराइगेलाइ, केलाइ नेलाइहेङ धाइ-धाइ पाङ दोअ्का हिनाहि, केलाइको ह्रदयता नेलाइको भाअ्सिङ थामे हि। 12केलाइ नेलाइको भाअ्सिङ ताइको प्रेम आतुइसा पाका मान्थुन्हाहि, भुरु नेलाइको केलाइको भाअ्सिङ ताइको प्रेम आतुइसा जेङका हि। 13एला याको बद्लिता का ताइकोङ जामाललाइ कोनिङ नेलाइहेङ दोअ्खा, कि नेलाइ बुङ ताइको पुरा हृदयहोइ प्रेम पासु।
खान्धुराइ कालाउ खाङधुरि मापाकालाइ
14खाङधुरि मापाकालाइ दोफा माझ्वाइनासु, हाइपालिपानु धर्मि कालाउ आधर्मिको माझाता हाइ दोङ सोरोकार मान्थुखे, एन्साङ दोङ कितिकितिका कालाउ फाइसालामकाको हाइ दोङ सोरोकार मान्थुखे। 15ख्रिस्टको कालाउ साइतानको हिदोइ बुङ सोरोकार मान्थुखे, माकुनु एन्साङ दोङ खाङधुरि पाका कालाउ मापाका दोफा हाइ दोङ बानाबोर माजेङखे। 16मुर्तिगेलाइहेङ परमेस्वरको मुन्दिरको हिदोइ बुङ थामे मान्थु, कालाउ केलाइ सिन्हुका परमेस्वरको मुन्दिरगेलाइ दोङ हिनाहि जेसाङ परमेस्वर धर्मसास्तरता दोअ्का हि,
“का उङको द्याङगेलाइकोता बासा ह्याङका,
कालाउ इम्बालाइको माझाता हिगिल्लाङका,
कालाउ का इम्बालाइको परमेस्वर जेनाङका,
कालाउ इम्बालाइ काङको द्याङगेलाइ जेनावा।”
17“ओदोङ भाअ्सिङ परमप्रभु धर्मसास्तर पाहासो दोअ्खे,
उङको खाङधुरि मापाकालाइको माझासो ओल्लेतेङ लोसु,
कालाउ इम्बालाइसो नेलाइ खेङन्हासु, आसुद्द काथासो दुरे हिसु,
कालाउ का नेलाइहेङ ग्रहन पाङका।
18का नेलाइको आबा जेनाङका,
कालाउ नेलाइ काङको चान-चामिन्दि जेङस्वाना,
सरबुङसाइका परमप्रभु दोअ्खे।”
Dhimal New Testament, by The Love Fellowship is licensed under Creative Commons Attribution-ShareAlike 4.0 License.