Matie 19
19
A kul-taa wɛl-bɛrʋ yele
(Mark 10:1-12)
1A Yeezu na tɩ tɩr a ʋ wulu á ŋá baar'a, ʋ yi n a Galile ɛ́ cen a Zude tẽw lowr, a Zurdɛ̃ man gãwn. 2Zu-sɛbla na bɛ dɩ vuo a, tɩ tu ʋ na cen a be, ʋ tɩ sanɩ a bɛ bàalbɛ. 3Faarizɩ̃ɛ bɛ mɩnɛ kãw tɩ taw na ta a ʋ zie sowr'ʋ kɛ́ bɛ ɩ ʋ kaa: «Nɩr tɛr'ɩ sɔ́r na zawrɩ a ʋ pɔw bɛr yel-sãsaralɛ ƴãw bɩɩ?» 4A Yeezu sɔw: «Nyɩ bɛ kanɩ a Sɛb-sõw pʋɔ kɛ́: “A pɛr-tib daar a, a bome za Íre ír bɛ nɩ dɛb nɩ pɔw ɛ#19:4 Nyɛ̃ Yzt 1.27, 5.2.?” 5Nɩ k'ʋʋ tɩ yel'a: “Alɛ n'a so a dɛb na mɩ́ bɛr a ʋ sãà nɩ a ʋ mã, ɛ́ tɩ lãw nɩ a ʋ pɔw bɛ za ayi lɩɛbɩ nɩ-been#19:5 Nyɛ̃ Yzt 2.24..” 6A na ɩ lɛ a, bɛ bɛ cãà ɩ nɩbɛ ayi ɛ, bɛ ɩ n nɩ-been. Lɛ so, bom nɛ a Naaŋmɩn na lãw taa a, a nɩsaal, ʋ ta bʋ́r ɛ.» 7A Faarizɩ̃ɛ mɩnɛ tɩ lɛb'a sowr'ʋ: «Bʋ̃ʋ n'ʋ so a Moyiir yel kɛ́ nɩr wa zawrɛ a ʋ pɔw bɛrɛ a, ʋ maalɩ zawr-bɛrʋ sɛbɛ kʋ̀ ʋ?» 8A Yeezu tɩ sɔw bɛ na: «Nyɩ na bɛ wone ƴɛ̀rʋ a n'a so a Moyiir sàw kɛ́ nyɩ mɩ́ zawrɩ a nyɩ pɔwbɛ bɛr, alɛ bɛ ɩ lɛ a, a pɛr-tib daar a, a bɛ tɩ ɩ à ŋá ɩ. 9Ɩ̃ yere na kʋ̀rɛ nyɩ: nɩr wa zawrɩ a ʋ pɔw bɛr — lãw-taa kãw na bɛ tɛr sɔ́r a ƴãw bɛ wa n'a a — ɛ́ kul pɔw-yũo a, ʋ maal'ɩ pɔw-gaa yel-bier.»
10A ʋ po-tuurbɛ tɩ yel ʋ na: «A yele wa ŋmɛ̃ à ŋá a dɛb zie, ʋlɛ nɩ a ʋ pɔw cara pʋɔ a, a kul-taa maalʋ vɛb sa.» 11A Yeezu tɩ sɔw bɛ na: «Nɩbɛ za bɛ n'a na tʋ̃ɔ́ bãw a ƴɛ̀rʋ ŋa pɛr ɛ, a bɛlɩ dem tɛwr bɛ na kʋ̀ a, bɛlɛ nɛbɛ na tʋ̃ɔ́ bãw ʋ. 12Bʋ̃ʋ n'ʋ vɛ̃, nɩbɛ bɛ mɩnɛ mɩ́ dɔw na ɩ vaɩ, bɛ mɩnɛ a, nɩsaalbɛ nɛbɛ mɩ́ ɩ bɛ ɩ a vaɩ, ɛ́ bɛ mɩnɛ mɩ́ kaa ír ɩ a vaɩ a tẽ-vla Naalʋ ƴãw. Sob nɛ na na tʋ̃ɔ́ bãw a pɛr a, ʋ bãw!»
A Yeezu na kʋ̀ maalʋ bibiir a
(Mark 10:13-16, Luk 18:15-17)
13Nɩbɛ bɛ mɩnɛ kãw tɩ tɛr'ɩ bibiir wa n a Yeezu zie, k'ʋʋ wa ír nuru dɔwlɩ a bɛ zu ɛ́ puori ƴãw bɛ, ɛcɛ a ʋ po-tuurbɛ tɩ tanɛ bɛ na. 14Lɛ n'a a Yeezu tɩ yel: «Nyɩ bɛr a bibiir bɛ wa a ɩ̃ zie, ɛ́ ta diwr bɛ bɛrɛ ɩ, bʋ̃ʋ n'ʋ vɛ̃, a bɛlɩ dem na ŋmɛ̃ taa nɩ bɛ a, bɛlɛ so a tẽ-vla Naalʋ.» 15Ʋʋ na wa dɔwlɩ a nuru a bɛ zu baar'a, ʋ bɛr'ɩ a ʋlɩ zie nɛ ɛ́ tɔl cen.
A pɔlbil-nãà yele
(Mark 10:17-31, Luk 18:18-30)
16Nɩr kãw tɩ taw na ta a Yeezu zie sowr'ʋ: «Wul-wul-kara a, bʋ̃ʋ yel-vla n'ʋ a fɛr k'ɩ̃ɩ maalɩ tʋ̃ɔ́ páw a nyɔ-vʋʋrʋ na be kʋralɛ a?» 17A Yeezu tɩ sɔw ʋ na: «Bʋ̃ʋ n'ʋ so fʋ sowre mɛ̃ a yel-vla yele? A sob nɛ na vɩɛl a, ɩ n been yõ tẽtẽ. Fʋ̃ʋ wa bɔbr kɛ́ fʋ páw a nyɔ-vʋʋrʋ a, sàwr a Naaŋmɩn nɛ-ƴãwnɩ.» 18Ʋ lɛb sowr'ʋ: «Nɛ-ƴãwnɩ abobe?» A Yeezu sɔw: «Ta kʋ nɩr ɛ, ta maalɩ pɔw-gaa yel-bier ɛ, ta zu ɛ, ta dɩ dãsɩ-ziri ɛ, 19ƴãwnɛ fʋ sãà nɩ fʋ mã, ɛ́ nɔnɛ fʋ tɔ mɛ̃ a fʋ mɩŋa a#19:19 Nyɛ̃ Ety 20.12-16, Wl-ayi 5.16-20, Lev 19.18..» 20A pɔlbile yel ʋ: «Ɩ̃ sàw nɩ a nɛ-ƴãwnɩ á ŋá za. Bʋ̃ʋ n'ʋ cãà cɛ m?» 21A Yeezu yel ʋ: «Fʋ̃ʋ wa bɔbr kɛ́ fʋ vɩɛl fʋ za a, cen tɩ de a fʋ bʋ̃-tɛrɩ za kʋɔrɩ, de a libie kʋ̀ nan dem, ɛ́ fʋ na páw nɩ na-bome a tẽ-vla pʋɔ, al pùorí, wa, wa tuur mɛ̃.» 22Ɛcɛ a pɔlbile na wa wõ à à ŋá a, ʋ sãw nɩ niwn ʋ za lɩɛb cere nɩ, ʋ na tɩ tɛr a bɛ dɩ vuo a ƴãw.
23Lɛ n'a a Yeezu tɩ yel a ʋ po-tuurbɛ: «Yel-mɩŋa sɩza, ɩ̃ yere na kʋ̀rɛ nyɩ: nɩr na kpɛ naalʋ a, a ʋ tẽ-vla Naalʋ pʋɔ kpɛb na kpɛmɛ na. 24Ɩ̃ lɛb'a yere kʋ̀rɛ nyɩ, a nyɔ̃wmɛ na na yi mɩsɩn vʋɔrɩ́ a, a ɩ n mɔlɛ zuo tɛra sob na na kpɛ a Naaŋmɩn Naalʋ pʋɔ a.» 25A ʋ po-tuurbɛ na tɩ wõ a ƴɛ̀r-bie á ŋá a, bɛ nyɔw nɩ nʋɔr yere nɩ: «Alɛ wa ŋmɛ̃ à ŋá a, ãa n'ʋ pãa na tʋ̃ɔ́ nyɛ̃ a faafʋ a?» 26A Yeezu tɩ jɩ́r bɛ nɩ gbẽgbẽ ɛ́ yel: «A nɩsaalbɛ zie a, a kʋ̃ tʋ̃ɔ́ ɩ, ɛcɛ Naaŋmɩn zie a, bom za na tʋ̃ɔ́ na.» 27Lɛ n'a a Pɩɛr tɩ de a ƴɛ̀rʋ yel ʋ: «Nyɛ̃, tɩ bɛr'ɩ bom za ɛ́ wa tuur fʋ, ŋmɩŋmɩn n'a a na ŋmɛ̃ a tɩ zie?» 28A Yeezu tɩ yel bɛ na: «Yel-mɩŋa sɩza, ɩ̃ yere na kʋ̀rɛ nyɩ, a lɛn daar a yele nãà wa lɩɛbɛ paalɛ a, a lɛn daar a Nɩsaal Bie nãà wa zɩ̃ a ʋ yúor-vɩɛlʋ-danʋ naalʋ-dà-kɔw zu a, a nyɩɩm na tu m a, nyɩ mɩ̀ na zɩ̃ n naalʋ-dà-kɔwr pie nɩ ayi zu, kɛ́ nyɩ maal'ɩ a Ɩsɩrayɛl yie dɔwlʋ pie nɩ ayi a ƴɛ̀rʋ. 29Ɛ́ sob nɛ za nãà wa bɛr yie, yɛbr, yeepuuli, sãà, mã, bibiir bɩɩ póru a mãa ƴãw a, ʋ na páw nɩ à á ŋá gb'a a kʋba (100) dɔwlɩ, ɛ́ cãà páw a nyɔ-vʋʋrʋ na be kʋralɛ a ƴãw pʋɔ. 30Niw-dierbɛ yaga na lɩɛb'ɩ po-pàwrbɛ, ɛ́ po-pàwrbɛ yaga lɩɛbɩ niw-dierbɛ.»
La Bible en Dagara © Alliance Biblique du Burkina Faso, 2013.
