Matthew 2
2
Pukkek Ton Ukakklanta
1Jesus wentuppù màlà pata Bethlehem, Judea yawon po. Herod wechi kin pe yattai. Malalà tùpo kàyik yamùk pukkek ton uyàpùppù màlà, wei wepakkatok winàpai Jerusalem pona. Molopai tok uya kappon yamùk yekamappoppù. 2{“I'nai ken uchi mùkkàlà mule iwentusa'lùppù Jew yamùk kinù pe? Ichilùkàyi yentai ina wei wepakkatok winà molopai ina uyàssak sàlà yapulàse,” tukaik. 3Sàlà yetasak tùuya yau, Kin Herod, utaimelunpasak wechippù màlà, tamù'nawolon kon Jerusalem pon kon pokonpe. 4paatele yamùk yepulu ton molopai enupannan Law pàk kà'mappù ya màlà tamùkke molopai tok yekamappoppù ya, “I'nai là ken uchi mùkkàlà Christ wentutok woton?” tukaik. 5“Pata Bethlehem yau Judea po,” tukaik tok uya yeikuppù. “Sàlàichi màlà Katù Maimu yenpoikanài nùmenukappù. 6‘Àmàlà Bethlehem, pata Judea yau nai'nùk, yà'là kasa là Judah yawon kon eke ton ennàinan kùlottau tok ma'lan pen àmàlà. Masapùla ayapai itepulu usenpoika màlà uponalok kon Israel yamùk yanài woton,’ tawon,” teppù tok uya. {Micah 5.2}
7Màlàpàk Herod uya pukkek ton kà'mappù amak yai. Molopai tok winàpai yà'là yattai kulu là chilùkà usenpoikappù yekamappoppù ya. 8Màlàyau nen uchi tok yeunokoppù ya Bethlehem pona. “Itàtàk kon molopai wakù pe mule mùwatàik, molopai yeposak auya'nokon yau mekamatàik upàk, utàtoppe nàlà yapulàse,” teppù ya. 9Wa te kin uya yeta tùpo tok utàppù màlà. Molopai tok utà tùse chilùkà usenpoikappù tok ye'ma tau. Màlà lùppù chilùkà tok neneppù wei wepakkatok winà. Molopai iitàppù màlà tok wapiya mule wettok yau patassek yepoi tùweleuta ponalà. 10Tok utauchinpasak wechippù kulu màlà eke pe, chilùkà yensak tùuya'nokon yau! 11Tapùi tak tok wewomùppù màlà molopai mule yeneppù tok uya tùsan Mary pokonpe. Tese'mu kon yok tok wenappù molopai tok uya yapulàppù.Màlàyau tapluli kon yen yakkokappù tok uya. Molopai tùntùlù kon tùlùppù tok uya, kolù, appoi'nan tùpottàsen, frankincence, molopai appoi'nan kalapa itesek myrrh.
12Katù uya tok yelupappù we'neppà'nàtok yau, “Herod piyak kennappotàu,” tukaik. Màlàpàk tok wennappoppù tùulon asanta tawà.
Wepentok Egypt Pona
13Tok utà tùpo, Itepulu inchelùyi, usenpoikappù màlà we'neppà'nàtok yau Joseph piyak. Molopai ipàk “E'wuluukakà, mule molopai ichan tawonnan yakà, epetàk kon Egypt pona. Molopai molo mettàik itàtàk kon te uya ponalà. Herod uya mule iwa màlà iwàtoppe tùuya,” teppù ya. 14Màlàpàk Joseph we'wuluukappù, mule molopai ichan tawonnan yalàppù ya Egypt pona ewalupàttau. 15Molo tok wechippù màlà Herod welikù ponalà.
Sàlà wekkupùppù màlà Katù uya màlà kasa iwechi màlà teppù tùmaimu yenpoikannan yai kasa, “Umu kà'mappù uya Egypt yapai,” tawon. {Hosea 11.1}
Mule yamùk Wàtok
16Pukkek ton uya tennakasak ittusak tùuya yau, Herod we'naikasak kulu wechippù màlà. Ichelupappù màlà tamù'nawolon kon walawotichi mukuchi Bethlehem pon kon wàtoppe molopai ipyawon kon pata yamùk yawon kon, asa'lon ikilichimochiyi molopai elekkwà ton lùiwa. Sàlà kupùppù ya màlà tok uya yà'là yattai kulu là chilùkà usenpoikappù yekamasak yawàlà.
17Sàlà kasa Katù Maimu yenpoikanài Jeremiah uselupappù wekkupùppù màlà.
18“Ichetappù màlà pata Ramah po, tùuseka'nonkaik kalannà, usewankono'man. Rachel kalawù tùmunkà yamùk wenai, ikalawù màlà itewan ipittà là pen, masapùla tok welichak pàk,” tawon. {Jer. 31.15}
Joseph Wennapo Egypt poi
19Herod welichak tùpo, Itepulu inchelùyi usenpoikappù màlà Joseph piyak iwe'neppàtù yau Egypt po. 20“E'wuluukakà, mule yakà molopai ichan, ennappokà pata Israel pona. Masapùla mùkyamlo mule wànàiche iwessak kon welikùppù man,” teppù ya. 21Màlàpàk Joseph we'wuluukappù, mule molopai ichan tawonnan yalàppù ya molopai tok wennappoppù Israel pona.
22Archelaus wechi tùkàipùnù Herod patassek lùppù yau Judea kinù pe yetasak tùuya yau, Joseph usenalipappù màlà miyalà tùutà pàk. “Katù uya kùtài”.teppù iwe'nàppàttok yau, màlàpàk itàppù Galilee pon pata yak. 23Tùpata konekappù ya màlà Nazareth po. Sàlà kupùppù ya màlà Katù Maimu yenpoikannan uya, màlà kasa iwechi màlà teppù kasa. “Nazarene pe yesatù màlà,” tawon.
Patamuna New Testament Revised © United Bible Societies, 1973, 2019.