मार्कुस 4
4
बेज़ै बऊंणैं आल़ेए कथ्या
(मोत्ती 13:1-9; लूका 8:4-8)
1तेखअ लागअ भिई ईशू गलील समुंदरे बाढै लोगा लै शिक्षा दैंदअ। तिधी हुऐ खास्सै मणछ कठा अर ईशू बेठअ पाणीं प्रैंदै एकी किश्ती दी, सारै लोग रहै समुंदरे बाढै शुक्की ज़ैगा खल़्हुई। 2ईशू लागअ तिन्नां का कथ्या खोज़ी कई गल्ला सखाऊंदअ, ईशू खोज़अ तिन्नां का इहअ,
3 “शूणां, एकी बारी निखल़अ एक कृषाण बेज़ै बऊंदअ। 4बेज़ै शोटदी बारी पल़अ धख बेज़अ बाते बाढै, सह च़ुंघअ च़ेल्लू-पखीरू।
5 “धख बेज़अ पल़अ शकरीली ज़िम्मीं दी, तिधी निं तेता खास्सअ माट्टअ भेटअ इहअ करै टिप्पअ सह जाऊअ। 6तिन्नां टिप्परूए ज़लैल़ै निं डुघै माट्टै दी आथी तै अर ज़ांऊं चटाक धुप्पअ लागअ, तिंयां टिप्परू दझ़ै संघा शुक्कै।
7 “धख बेज़अ पल़अ झ़ाकल़ै। ज़ांऊं कांडै बझ़ै, सह दाभूअ तेथ संघा तेथ निं नाज़ लागअ।
8 “पर धख बेज़अ पल़अ रज़दी-पज़दी ज़िम्मीं दी, तिन्नां दी लागी खास्सी फसल। कोई दी शौ गुणा, कोई दी शाठ गुणा अर कोई तिह गुणा पज़ैआ।”
9तेखअ बोलअ ईशू तिन्नां लै, “ज़ै तम्हैं एता समझ़णअ च़ाहा, तै दैऐ ऐहा गल्ला दी धैन कि मंऐं एभै तम्हां का किज़ै बोलअ।”
कथ्या खोज़णेंओ मकसद
(मोत्ती 13:10-17; लूका 8:9,10)
10तेखअ ज़ांऊं ईशू आपणैं बारा च़ेल्लै अर तिधी होरी कठा हुऐ दै लोगा संघै थिअ, च़ेल्लै आऐ ईशू सेटा, संघा पुछ़अ तिन्नैं कथ्या खोज़णें बारै।
11ईशू दैनअ तिन्नां लै ज़बाब, “तम्हैं सका परमेशरे राज़ो भेद समझ़ी। पर होर ज़ुंण परमेशरे राज़ो भेद नांईं समझ़दै, लागा कथ्या खोज़ी एते तैणीं समझ़ाऊंणअ, 12#ईशा. 6:9-10; जेर. 5:21 किल्हैकि
‘तिंयां निं मुंह भाल़ी शिखल़दै,
नां तिंयां मेरी गल्ला शूणीं समझ़दै।
ज़ै तिंयां समझ़दै, तै करनअ त तिन्नां प्राश्त संघा फिरनैं तै परमेशरा बाखा,
अर परमेशरा करनै तै तिन्नें पाप माफ।’”
बेज़ै बऊंणैं आल़ेए कथ्यो मतलब
(मोत्ती 13:18-23; लूका 8:11-15)
13तेखअ बोलअ ईशू आपणैं च़ेल्लै लै, “तम्हैं कै एता समझ़ै निं? तै तम्हां होर कथ्या किहअ करै समझ़णैं? 14बेज़ै बऊंणैं आल़अ कृषाण आसा परमेशरे बैणा खोज़णैं आल़ै ज़िहअ।
15 “ज़ुंण बेज़अ बाते बाढै पल़अ, अह आसा तिन्नां मणछे बारै ज़ुंण परमेशरो बैण ता शूणां पर राख्स करा तिन्नां का तेता तेभी दूर।
16 “तिहअ ई शकरीली ज़िम्मीं दी पल़अ द बेज़अ आसा तिन्नां मणछे बारै ज़ुंण परमेशरो बैण शूणां अर नढैऊऐ मना तिंयां तेता खुशी-खुशी। 17पर आप्पू पाक्कअ विश्वास नांईं हणें बज़्हा रहा तिंयां थोल़ै ई धैल़ै लै। बैण मनणे बज़्हा ज़ांऊं तिन्नां लै मसीबता एछा, तिंयां छ़ाडा तेभै परमेशरा दी विश्वास करनअ।
18 “ज़ुंण बेज़अ झ़ाकल़ै पल़अ सह आसा तिन्नां मणछे बारै ज़ुंण बैण ता शूणां, 19पर संसारै फिकर, धन-माया, मांण करनै ज़ेही संसारे गल्ला दी लाआ तिंयां आपणअ सारअ धैन मन्न। परमेशरे बैणा पाआ तिंयां बिस्सरी। तिंयां निं तिहअ करदै ज़िहअ परमेशर च़ाहा कि तिंयां करे।
20 “ज़ुंण बेज़अ रज़दी-पज़दी ज़िम्मीं दी पल़अ अह आसा तिन्नां मणछे बारै ज़ुंणी परमेशरो बैण शूणअ, मनअ अर विश्वास किअ। तिन्नैं किअ तिहअ ई ज़िहअ परमेशर च़ाहा कि तिंयां करे। तिंयां आसा एही बधिया फसला ज़िहै ज़ेथ तिह गुणा, शाठ गुणा कोई दी शौ गुणा फसल हुई।”
दीऐ
(लूका 8:16-18)
21ईशू बोलअ तिन्नां लै, “इहअ निं कोह आथी ज़ुंण दीअ ज़ाल़ी दरोठू भितरी डाहा कि पलगा हेठै डाहा पाई, तेता डाहा दीअदानी दी उछ़टै ताकि सारै घअरै प्रैश्शअ होए। 22किल्हैकि ढोपी डाही दी च़ीज़ शुझणीं सोभी का अर एही निं किछ़ै गुप्त च़ीज़ आथी ज़ुंण सोभी नदरी निं एछे।
23 “ज़ै तम्हैं एता समझ़णअ च़ाहा, तै दैऐ ऐहा गल्ला दी धैन कि मंऐं एभै तम्हां का किज़ै बोलअ।”
24तेखअ बोलअ ईशू तिन्नां लै, “ज़ुंण हुंह तम्हां लै बोला तेता शूणां धैन लाई, ज़ेतरअ धैन दैई तम्हैं शुणें, तम्हां भेटणीं तेतरी खास्सी समझ़।
25 “ज़ुंण मेरी शिक्षा शूणां, तिन्नां लै दैणीं होर बी खास्सी समझ़। पर ज़ुंण मेरी शिक्षा नांईं शूणां, तिन्नां का निंणअ सह बी पोर्ही ज़ुंण तिन्नां का धख समझ़ होए बी।”
टिप्पणै आल़ै बेज़े कथ्या
26ईशू बोलअ तिन्नां लै भिई इहअ, “परमेशरो राज़ आसा इहअ, ज़िहअ कृषाण ज़िम्मीं दी बेज़अ बऊआ। 27तेखअ रहा सह धैल़ आपणैं कामां लागी सह निं तेऊ बऊऐ दै बेज़ै बारै फिकर करदअ। बेज़ै का लागा टिप्परू अर बझ़ा तेतो निं तेऊ का थोघै हंदअ।
28 “अह ज़िम्मीं पज़ेरा नाज़ आप्पै। पैहलै लागा टिप्परू, तेखअ लागा सील, अर एता बाद हआ सीला दी दाणअ तैर। 29पर ज़ेभै फसल लऊंणा लै जाआ हई, तेभै छ़ाडा सह तेता दाची करै लऊंदै, किल्हैकि तेऊए फसला लऊंणेओ बगत गअ हई।”
शाऊईए बेज़े कथ्या
(मोत्ती 13:31,32,34; लूका 13:18,19)
30तेखअ बोलअ ईशू तिन्नां लै, “हुंह परमेशरो राज़ किज़ू ज़िहअ खोज़ूं कि किहअ आसा? एता कहा कथ्या खोज़ी करै समझ़ाऊं?
31 “शूणां, परमेशरो राज़ आसा शाऊईए दाणैं ज़िहअ। शाऊईओ दाणअ आसा पृथूईए सोभी बेज़ै का होछ़अ बेज़अ। 32एही ता आसा सह पृथूईए सोभी बेज़ै का होछ़अ, पर ज़ेभै तेऊ बऊआ, सह हआ सोभी शाग-पाचा का बडअ। ज़ांऊं तेते शाण्हीं बडी हआ, सरगे डैऊणै आल़ै च़ेल्लू-पखीरू बी सका तेते छ़ैल्ली दी कोल्ह बणाईं बसेरअ करी।”
33ईशू खोज़ी तिन्नां का एही ई कई कथ्या अर तिन्नें समझ़े साबै खोज़ा त तिन्नां का बैण। 34एही गल्ला समझ़ाऊंणा लै करा त सह लोगा मांझ़ै कथ्या खोज़ी गल्ला, पर कांगनरांगै डेऊई खोज़ा त ईशू आपणैं च़ेल्लै का तिन्नां सारी गल्लो सारअ भेद।
ढिश-बागर शांत करनअ
(मोत्ती 8:23-27; लूका 8:22-25)
35तेऊ ई धैल़ै ज़ांऊं सान्ह च़ाल्ली ती पल़ी, ईशू बोलअ आपणैं च़ेल्लै लै, “च़ाल्ला हाम्हां डेऊणअ गलील समुंदरा पारा लै।”
36ईशू त किश्ती का ई लागअ द लोगा संघै गल्ला करदअ अर च़ेल्लै डेऊऐ ईशू संघा निंईं लोगा छ़ाडी तिधा का पारा बाखा लै। होर बी डेऊऐ कई पिछ़ू तिन्नें आपणीं किश्ती दी बेठी दरैऊआ पार बाखा लै।
37तेखअ हुअ इहअ कि तेथ आअ बेघै बडअ ढिश-बागर, अर छ़ाल्ली लागी एतरी कि किश्ती लागी पाणीं करै भरदी।
38पर आप्पू त ईशू किश्तीए पिछ़ली कुछी शरैहण लाई दी सुत्तअ द। च़ेल्लै झ़ैऊअ ईशू संघा बोलअ, “हे गूरू, ताह हैल़अ-फिकर निं आथी कि हाम्हैं सोभै च़ाल्लै पाणीं जैंदरी डुबी खतम हई?”
39ईशू उझ़ुअ खल़अ संघा नैरी ढिश-बागर एक झांश काढी। समुंदरे छ़ाल्ली नैरी इहअ बोली, “शांत हआ, इधी खल़्हिया।” ढिश-बागर रुकअ तेभी अर समुंदर हुअ शांत, तैबै जाई करै हुई शांती। 40तैबै बोलअ ईशू तिन्नां लै, “तम्हैं किल्है डरा? तम्हां कै अज़ी बी विश्वास निं हुअ?”#4:40 भज. 107:29
41तिन्नां सोभी फिरअ खास्सअ हैल़अ अर तिंयां लागै आप्पू मांझ़ै इहअ बोल्दै, “अह कुंण आसा, एऊए हर गल्ला मना ढिश-बागर अर समुंदरे छ़ाल्ली बी?”
This work is licensed under Creative Commons Attribution-ShareAlike 4.0 License.
