मोत्ती 16

स्वर्गो नछ़ैण मांगणअ

(मार्कुस 8:11-13; लूका 12:54-56)

1फरीसी अर सदुकी पंथे लोग आऐ ईशू सेटा लै अर तिन्‍नैं बोलअ, “ज़ै तूह असली दी परमेशरै आसा हाम्हां सेटा लै छ़ाडअ द तै रहैऊ सरगै हाम्हां का एक नछ़ैण ताकि हाम्हां भरोस्सअ होए।”

2ईशू दैनअ तिन्‍नां लै ज़बाब, “सान्हां बोला तम्हैं कि सरग रहणअ बिझअ, किल्हैकि सरग आसा लाल। 3दोत्ती बोला इहअ कि आझ़ एछणी ढिश-बागर, किल्हैकि सरग आसा लाल अर न्हैरअ। तम्हैं हेरा सरगे लछ़ण भाल़ी तेतो भेद खोज़ी, पर ज़ुंण एभै आसा हंदअ लागअ द सह किल्है निं तम्हां का शुझदअ? तेता करै किल्है निं तम्हां समझ़ एछदी कि परमेशर किज़ू करदअ आसा लागअ द? 4एऊ जुगे कदुष्ट अर विश्वास घाती मणछ लोल़ा नछ़ैण। पर जोना गूरे नछ़ैणां छ़ाडी निं तिन्‍नां होर किछ़ै भेटणअ आथी।” तेखअ लागअ ईशू तिन्‍नां छ़ाडी तिधा का हांढदअ।

फरीसी अर सदुकी पंथे लोगे शिक्षो सज़ेल़अ

(मार्कुस 8:14-21)

5च़ेल्‍लै बिस्सरुऐ गलील समुंदरा पार डेऊंदी रोटी संघा निंणै। 6ईशू बोलअ तिन्‍नां लै, “हेरे, फरीसी अर सदुकी मणछे सज़ेल़ै का रहै दूर।”

7तिंयां लागै आप्पू मांझ़ै सोठदै कि हाम्हैं रोटी ता आणी निं! तै आसा अह लागअ द हाम्हां लै एही गल्‍ला बोल्दअ। 8ईशू हेरी तिन्‍नें मन्‍नें गल्‍ल भुझ़ी अर तेऊ बोलअ तिन्‍नां लै इहअ, “मणछो, तम्हां भाल़ किहअ बैहम हआ पल़अ द! तम्हैं किल्है आसा इहअ सोठदै लागै दै कि तम्हां का निं रोटी आथी? 9तम्हैं कै अज़ी बी निं समझ़ै आथी? पांज़ा रोटी करै ज़ुंण पांज़ हज़ार मणछ रज़ैऊऐ तै, सह आद तम्हां आथी निं? तम्हैं पिछ़ू बच़ै दै रोटीए केतरै च़ठै च़कै तै? 10तिंयां च़ार हज़ार मणछा लै सात रोटी बी बिस्सरुऐ? तिधी तम्हैं बाकी बच़ी दी रोटीए केतरै च़ठै च़कै तै?” 11“तम्हैं किल्है निं समझ़ै कि मंऐं निं तम्हां लै रोटीए बारै कधि बोलअ आथी! फरीसी अर सदुकी मणछे सज़ेल़ै ज़ेही शिक्षा का रहै दूर।”

12तेखअ आई तिन्‍नां समझ़ कि ईशू निं रोटीए सज़ेल़ै का दूर रहणा लै बोलअ, पर तेऊ बोलअ फरीसी अर सदुकी पंथे लोगे शिक्षा का दूर रहणा लै।

पतरासो ईशू लै “मसीहा” बोल़णअ

(मार्कुस 8:27-30; लूका 9:18-21)

13ईशू आअ कैसरिया अर फलिप्पी नेल़ गराऊंऐं अर सह लागअ आपणैं च़ेल्‍लै का पुछ़दअ, “लोग मुंह मणछे पूता लै किज़ै बोला कि हुंह कुंण आसा?”

14तेखअ बोलअ तिन्‍नैं, “कोई बोला ताल्है जोहन्‍ना डुबकी दैणैं आल़अ, कई लोग बोला एलियाह। कई लोग बोला कि अह आसा परमेशरो गूर जेरमयाह या तिन्‍नां मांझ़ै कोई एक ज़ण्हअ।”

15तेखअ पुछ़अ तेऊ तिन्‍नां का, “तम्हैं किज़ै बोला मुल्है? हुंह कुंण आसा?”

16शमौन पतरासै बोलअ, “तूह आसा ज़िऊंदै परमेशरो पूत मसीहा।”

17ईशू बोलअ तेऊ लै, “शमौन, जोने शोहरूआ, परमेशर आसा ताह करै खुश। अह गल्‍ल निं लोहू अर मास्सा करै हुई। पर मेरअ बाब ज़ुंण स्वर्गै आसा, तेऊ किई अह गल्‍ल ताह दी प्रगट। 18हुंबी बोला ताल्है इहअ कि तूह आसा पतरास#16:18 पतरास मतलब टोल्हा ज़िहअ, तूह हणीं तैहा टोलीए आथरी ज़ुंण मुंह बणाणीं। जम्पर बी निं तेता का ज़िती सकदी।

19 “मुंह दैणीं ताल्है स्वर्ग राज़े कुंज़ी, अर ज़ुंण बी तूह पृथूई दी तिन्‍नां मणछा लै रोक्‍के, सह रोक्‍कणअ स्वर्गै अर ज़ुंण बी तूह पृथूई दी ज़ाज़त दैए, तेता लै भेटणीं स्वर्गै ज़ाज़त।”

20तेखअ बोलअ ईशू आपणैं च़ेल्‍लै लै चतैनगी दैई, “इहअ निं कोही का खोज़ी कि हुंह आसा मसीहा।”

आपणीं मौते बारै ईशूओ पैहलै ई खोज़णअ

(मार्कुस 8:31-33; लूका 9:22)

21तेखअ लागअ होर बी ईशू आपणैं च़ेल्‍लै का खोज़दअ, “मुंह लागणअ एरुशलेम नगरी लै ज़रूर डेऊणअ कि सैणैं, बडै प्रोहत अर शास्त्री लोगे हाथै हुंह दुख ज़िरे अर तिन्‍नें हाथै मरूं अर हुंह चिऊथै धैल़ै हुंह भिई ज़िऊंदअ होए।” 22ऐहा गल्‍ला लै निंयं पतरासै सह ज़ुदअ ज़िहअ, संघा लागअ सह ईशू लै बोल्दअ, “हे प्रभू, परमेशर नां करे कि ताह संघै कधि इहअ होए।”

23ईशू बोलअ पतरासा बाखा फिरी, “हे राख्स, मुंह सेटा का हट दूर। ताह बाती आसा राख्स बोल्दअ। किल्हैकि तूह लाआ परमेशरे गल्‍ला छ़ाडी मणछे गल्‍ला दी मन्‍न।”

ईशू पिछ़ू हांढणेओ मतलब

(मार्कुस 8:34—9:1; लूका 9:23-27)

24तेखअ बोलअ ईशू आपणैं च़ेल्‍लै लै, “ज़ुंण बी मेरअ च़ेल्‍लअ हणअ च़ाहे, सह निं तिन्‍नां गल्‍ला करी सकदअ ज़ुंण तेऊओ दिल च़ाहा। तेऊ लागणअ अपराधी ज़िहअ दाह-दुख ज़िरी आपणअ क्रूस आपणीं कान्हा आप्पै च़कणअ।”

25 “किल्हैकि ज़ुंण बी ऐहा पृथूई दी आपणीं ज़िन्दगी बच़ाऊंणी च़ाहे, सह करा परमेशरा संघै सदा रहणैं आल़ी ज़िन्दगी बरैबाद, ज़ुंण मुंह दी विश्वास करनै पिछ़ू आपणैं प्राण दैए, तेऊ भेटणीं परमेशरा संघै सदा लै ज़िन्दगी। 26ज़ै मणछ सारै संसारा आपणैं बशै करी सोभी गल्‍ला दी सेठ बणें अर आपणैं प्राण शोटे, तेऊ लै कै फाईदअ हणअ? या मणछा लै आपणीं ज़ानीं का ज़ादै किम्मती किज़ै आसा?

27 “हुंह मणछो पूत एछणअ आपणैं स्वर्ग दूता संघै आपणैं बाबे प्रतप्पा अर तैहा घल़ी भेटणअ हरेकी तेऊए कामें साबै फल। 28हुंह खोज़ा तम्हां का सत्त कि तम्हैं ज़ुंण इधी आसा, तम्हां मांझ़ै आसा कई इहै बी, तिन्‍नां लै निं तेभै तैणीं मौत एछणी ज़ेभै तैणीं हुंह मणछो पूत आपणैं स्वर्ग दूता संघै फिरी निं एछी जाए।”

選択箇所:

मोत्ती 16: OSJ

ハイライト

コピー

比較