रोमियो 7
7
1ए प्राओ, तोस जानदे ओ (आंऊँ कनून दे जानने आलें गी आखन ऐं) के जदू तकर मनुक्ख जिन्दा रौंदा ऐ, तदुं तकर ओदे उपर कनून दा राज रौंदा ऐ? 2ब्याह कित्ती दी जनानी कनून आले लेखा अपने करेआले दे जिन्दे जी ओदे कन्ने बंधी ऐ, लेकन जेकर करेआला मरी जा, तां ओ करेआले दे कनून चा छुडकी गेई। 3एसकरी जेकर करेआले दे जिन्दे जी ओ कुसे दुए मनुक्ख दी ओई जा, तां उसी दुआल आखया जाग, लेकन जेकर करेआला मरी जा, तां ओ ओस कनून कोलां छुडकी गेई, इत्थैं तकर के जेकर कुसे दुए मनुखे दी ओई जा तां बी उसी दुआल नेई आखया जाग। 4इयां गै ए मेरे प्राओ, तोस बी मसीह दी जेंद थमां कनून दे लेई मरे दे बनी गै, के ओस दुए दे ओई जाओ, मसीह जेड़ा मरें दे बिचा जिन्दा ओया; ताके अस परमेसर आसतै फल आंनचै। 5किके जदू अस शरीरक हे, तां पापें दी इच्छ्यां जेड़ीयां कनून थमां हियां, मौत दा फल पैदा करने लेई साड़े जेंद दे अंगें च कम करदी ही। 6लेकन जिसदे बेच अस बझे दे हे ओसदे लेई मरी गै, ऊन कनून कोलां ऐसे छुटकी गै, के लेख दी पुराने तरीके क्न्ने नेई, बरना आत्मा दे नमें तरीके क्न्ने सेवा करदे न।
कनून च पाप दा फायदा
7तां अस के आखचै? के कनून पाप ऐ? कदें बी नेई! मतलब बिना कनून दे आंऊँ पाप गी नेई पछानदा; कनून जेकर नेई बोलदा, के लालच नेई करो तां आंऊँ लालच गी नेई जानदा के लालच करना गलत ऐ। 8लेकन पाप ने मौका पाईयै उक्म थमां मेरे च सारे चाली दा लालच पैदा कित्ता, किके बिना कनून दे पाप मोड़दा ऐ। 9आंऊँ तां कनून बिना पैलैं जिन्दा हा, लेकन जदू मैं उक्म गी जानया, तां पाप जिन्दा ओई गीया, ते आंऊँ परमेसर कोलां लग्ग ओई गीया। 10ते ऊऐ उक्म जेड़ा जीनें आसतै हा, मेरे आसतै मौत दा कारन बनी गीया। 11किके पाप ने मौका पाईऐ उक्म थमां मिगी तोखा दित्ता, ते उसै थमां मिगी आत्मा च मारी बी ओड़या।
12एस आसतै कनून पवित्र ऐ, ते उक्म पवित्र, तरमी, ते ठीक ऐ।
पाप कोलां बचाने आसतै कनून धुरा
13ते के जेड़ा कनून मूसा ने दित्ता खरा हा, मेरे लेई मौत बनी गीया? कदें बी नेई! लेकन पाप ओस ठीक चीज थमां मेरे लेई मौत गी पैदा करने आला ओया के ओदा पाप ओना परकट ऊऐ, ते उक्म थमां पाप बड़ा गै पाप कराने आला बनया।
14किके अस जाननयां न के कनून तां आत्मिक ऐ, लेकन आंऊँ जिंदु च ते पाप दे अथ्थ गलाम आं। 15ते जे आंऊँ करना ऐं ओसगी नेई जानदा; किके जे आंऊँ चांना ऐं ओ नेई करदा, लेकन जेदे कन्ने मिगी नफरत ओंदी ऐ ऊऐ करना ऐं। 16जेकर आंऊँ जे नेई चांदा ऊऐ करना ऐं, तां आंऊँ मन्नी लेना ऐं के कनून ठीक ऐ। 17तां ऐसी आलात च ओसदा करने आला आंऊँ नेई, मतलब पाप ऐ जेड़ा मेरे च बसदा ऐ। 18किके आंऊँ जाननां ऐं, के मेरे च मतलब मेरी जेंद च कोई ठीक चीज वास नेई करदी। इच्छया तां मेरे च ऐ के आंऊँ पले कम करां, लेकन पले कम मेरे थमां बनी नेई सकदे। 19किके जेस ठीक कम करने दी इच्छया आंऊँ करना, ओ तां आंऊँ नेई करदा, लेकन जेस बुरे कम दी इच्छया नेई करदा, उवै कम करना ऐं। 20लेकन अगर आंऊँ उवै करना ऐं जेसदी इच्छया नेई करदा, तां ओसदा करने आला आंऊँ नेई रिया, लेकन पाप जेड़ा मेरे च बसे दा ऐ।
21एस चाली आंऊँ ए कनून पानां ऐं के जेलै पला करने दी इच्छया करना ऐं, तां आंऊँ ओ करना जेड़ा ठीक नेई ऐ। 22किके आंऊँ पूरे दिले कन्ने परमेसर दे कनून च बड़ा खोश रौना ऐं। 23लेकन मिगी अपनी जिंदु दे अंगें च दुए चाली दा कनून लबदा ऐ, जेड़ा मेरी बुद्धि दे कनून कन्ने लड़दा ऐ ते मिगी पाप दे कनून च बन्नीयै रखदा ते मेरी जेंद दे अंगें च कम करदा ऐ। 24आंऊँ किन्ना पैड़ा मनुक्ख आं! मिगी एस जेंद कोलां कोन छुड़ाग जेड़ी मौत लेई ओंदी? 25साड़े प्रभु यीशु मसीह थमां परमेसर दा शुकर ऐ। एसकरी आंऊँ अप्पुं बुद्धि कन्ने तां परमेसर दे कनून दा, लेकन जेंद च पाप दे कनून दी सेवा करना ऐं।
This work is licensed under Creative Commons Attribution-ShareAlike 4.0 License.
