रोमियो 11
11
सारे इस्राएल कोलां नकारया नेई जाना
1एसकरी आऊँ पूछना ऐं, के परमेसर ने अपने लोकें गी त्यागी दिता? कदें बी नेई! आऊँ बी ते इस्राएली आं; अब्राहम दे बैंश ते बिन्यामिन दे गोत्र बिचा ऐं। 2परमेसर ने अपने उनै लोकें गी नेई त्यागया, जिसी ओनें पैलो पैल जानया। के तोस नेई जांनदे, के पवित्र शास्त्र एलिय्याह दी कानी च के आखदा ऐ, के ओ इस्राएली लोकें दे वरोध च परमेसर अगें अर्ज करदा ऐ? 3ओनें आख्या “ए प्रभु, उनै तेरे पविखवक्तें गी मारी ओड़ा ऐ, ते तेरी बेदियें गी नष्ट करी ओडेया ऐ; ते आऊँ गै कल्ला बचे दा ऐं, ते ओ मेरी जान लेने दी तलाश च न।” 4लेकन परमेसर ने एलिय्याह कन्ने आखया, “मैं अपने लेई सत जार मनुक्खें गी रखा ऐ, जेड़े बाल देबतै दे अगें नेई झुके न।” 5ठीक इसै तरीके कन्ने एस बेलै बी, क्रपा कन्ने चुने दे केछ लोक बाकी न। 6जेकर ए चुनने दा कम क्रपा कन्ने ओया ऐ, तां पी कर्मे कन्ने नेई; नेई तां क्रपा पी क्रपा नेई रेई।
7एसकरी नतीजा के ओया? ए के इस्राएली जिसी तुपा करदे न, ओ उनेंगी नेई मिलया; लेकन चुने दें गी मिलया, ते बाकी लोकें दे देल कठोर कित्ते गै।
8जियां पवित्र शास्त्र च यशयाह पविख्वक्ता ने लिखया ऐ, “परमेसर ने उनेंगी अज्ज दे देन तकर पारी निंदर च सुआली ओड़या ऐ, ते ऐसीयां अखीयाँ दितीयां जेड़ीयां नेई दिखन ते ऐसे कन जेड़े नेई सुनन।”
9ते दाऊद राजा आखदा ऐ,
“उन्दा पोजन उन्दे लेई जाल ते फन्दा,
ते ठोकर ते सजा दा कारन ओई जा।
10उन्दी अखीयैं उपर न्हेरा छाई जा तां जे नेई दिखन,
ते तू मेशा उन्दी पेठ गी नुआईयै रख।”
इस्राएल दा नकारना खीरी नेई
11आखर; आऊँ पूछना ऐं के उनै एस लेई ठोकर खादी, के डिगी पौन? कदें बी नेई! लेकन उन्दे अविश्वास दे कारन दुई जातीयें गी उद्धार मिलया, के इस्राएली लोकें गी जलन उवै। 12एसकरी जेकर उन्दा डिगना दुनिया लेई तन्न ते उन्दे घटी दुई जातीयें लेई तन्न दौलत दा कारन ओया, तां उन्दी परपुरी थमां के केछ नेई ओग।
13आऊँ तुसें दुई जातीयें गी ए आ आखना ऐं। आलां के आऊँ दुई जातीयें आसतै प्रेरित ऐं, तां आऊँ अपनी सेवा दा कमंड करना ऐं, 14तां जे किसे तरीके आऊँ अपने इस्राएली लोकें च जलन पैदा कराईयै उन्दे बिचा कई एक दा उद्धार करां। 15किके जदू इस्राएल दे लोकें दा त्यागी दिता जाना दुनिया दे लोकें दे मलाप दा कारन ओया, तां के उन्दा मसीह यीशु गी कबूल कित्ता जाना मोड़दें चा जिंदा ओनें दे बराबर नेई ओग? 16जदू पेंट दा पैला पेड़ा पवित्र ओया, तां पूरा गुन्नें दा आटा बी पवित्र ऐ; ते जदू जड़ पवित्र बनी, तां डालियाँ बी ऐसीयां गै न।
17लेकन जेकर केछ डालियाँ त्रोडियां गेईयां, ते तोस दुई जाती ओईयै ओदे च जोड़े गै, तां जैतून दी जड़ दी खराक दे पागीदार ओई गै, 18तां डालियें उपर कमंड नेई करना; ते जेकर तू कमंड करै, तां जानी लियां, के तू जड़ गी नेई, लेकन जड़ तुगी सम्भालदी ऐ। 19पी तू आखगा, “डालियाँ एसकरी त्रोड़ीयां गेईयां, के आऊँ ओदे उपर लाया जां।” 20पला, ओ तां अवश्वास दे कारन त्रोड़ीयां गेईयां, लेकन तू विश्वास कन्ने बने दा रौना ऐं एस लेई कमंड नेई कर, लेकन डर मन्न, 21किके जदू परमेसर ने कुदरती डालियें गी नेई बक्शया, तां तुगी बी नेई बक्शग। 22एसकरी परमेसर दी दया ते सख्ती गी त्यांन दे कन्ने देख, जेड़े डिगी पे उन्दे कन्ने सख्ती, लेकन तेरे उपर दया, जेकर तू दया च बना रौगा, नेई तां, तुगी बी बड़ी ओड़ना ऐ। 23ते ओ बी जेकर अवश्वास नेई रौगन, तां छांटे जागे; किके परमेसर उनेंगी पी छांटी सकदा ऐ। 24किके जेकर तू ओस जैतून कन्ने, जेड़ा स्वाव च जंगली ऐ, कटया गीया ते स्वाव दे वरोध अच्छे जैतून च छांटया गीया, तां ए जेड़ीयां कुदरती डालियाँ न, अपने गै जैतून च कि नेई छांटया जागा।
25ए गैर यहूदी विश्वासी प्राओ, कूदें ऐसा नेई उवै, के तोस अपने आप गी बुद्धिमान समझी लियो; एसकरी आऊँ नेई चानां के तोस एस पेद थमां अनजांन रवो, के जदू तकर दुई जातीयां मसीह च औने तकर पूरे तरीके कन्ने दाखल नेई ओगन, अतुं तकर इस्राएल दा एक ऐसा गै कठोर रौग। 26ते एस तरीके कन्ने सारे इस्राएल दे लोक उद्धार पागन; जियां लिखे दा ऐ, “छुड़ाने आला सिय्योन बिचा औग, ते अपक्ति गी याकूब दी पीढ़ी चा दूर करग।” 27“ते उन्दे कन्ने मेरा इयै करार ओग, जदू के आऊँ उन्दे पापें गी माफ़ करी ओड़गा।” 28ओ शोभ समाचार दे लियाज कन्ने तां थुआड़े लेई परमेसर दे बैरी न, लेकन चुनी लिते जाने दी लियाज कन्ने बजुर्गें दे कारन प्यारे हे। 29किके परमेसर दे वरदान ते बुलावा कदें बी नेई बदलदे। 30किके जियां तुसें पैलैं परमेसर दा उक्म नेई मन्नया, लेकन ऊन यहूदीयें दे उक्म नेई मनने कन्ने थुआड़े उपर दया ओई; 31इयां गै उनै बी ऊँन उक्म नेई मन्नया, के थुआड़े उपर जेड़ी दया ओंदी ऐ एदे कन्ने उन्दे उपर बी दया उवै। 32किके परमेसर ने सारे गी उक्म नेई मनने दे कारन बन्नीयै रखया, तां जे ओ सारें उपर दया करै।
33आं! परमेसर दा तन्न ते बुद्धि ते ज्ञान किनां गै आखर ऐ! ओदे वचार किनें डूगे, ते ओदे रस्ते किन्नें समझने कोलां बार न!
34“प्रभु दे मन गी कोने जानया?
जां ओदा सलाकार कोन ओया?
35जां कोने पैलैं उसी कुसे केछ दिता ऐ जेसदा बदला उसी दिता जा?”
36किके परमेसर आली बखी दा, ते उसै थमां, ते उसै लेई सारा केछ ऐ। ओदी मैमा योग-योग ओंदी रवै। आमीन।
This work is licensed under Creative Commons Attribution-ShareAlike 4.0 License.
