FILIPI 4
4
Ngoa ra tei kataho cumpukaina
1B̄ara ndedena, cina ra angi meciku, ndedeku nggomid̄oho pab̄uapu mori kai poda-poda imbi d̄i Ruma. Nahu lingi adeku d̄i nggomid̄oho! Nggomid̄ohoku d̄i banggakai nahu ma kad̄ihi wea ade nahu.
2Ama ncawaku la Euodia ro ama ncawaku la Sintike! Nahu maraho poda-poda loakud̄u ama ncawad̄oho sab̄ua ade kai dou-dou ma sama imbi. 3D̄iru'u lenga nahu ma to'a, raho b̄a nahu rau loakud̄u nggomi bantumu dou siwe d̄uana ede. Siad̄oho nawa'ura karawi kapodana ade lab̄o nahu d̄imangoa ra kahaba Haba Mataho rad̄i Ruma Hatalla; sama b̄une Klemen, ro sara'a dou makalaina ma karawi sama-sama lab̄o nahu. Ngara-ngara siad̄oho wara ade Buku Dou ma Mori.
4Raho-raho to'impa nggomid̄oho kad̄ihi ncaumu ade, b̄ara nggomid̄oho wa'ura mori sab̄ua lab̄o Ruma. Sakali wali nahu ma nggahi: kad̄ihira ademu!
5Pab̄uapu sara'a dou loana eda ruku ra rawimu ma taho ade. B̄ara wati ntoi walina Ruma namaira. 6Aina darurakai mab̄oha au-au. D̄ei sara'a lampa rawi, do'apu ro rahopu d̄i Ruma Hatalla. Au rad̄iparalu b̄a nggomid̄oho, ngoa ncaupu ede d̄i Ruma Hatalla kai rentapu tarima kasi. 7Ndad̄i taho ra ntai rad̄i Ruma Hatalla, ma wati d̄i loa ka'ao b̄a manusia, d̄imasandaka ade ro kananumu ma wa'ura sab̄ua lab̄o Ruma Isa Al Masih.
8Cumpukaina, cina ra angi, kangginipu fiki ra kananumu kai lampa rawi mawara one, ma patu d̄i roi, eded̄u lampa rawi-lampa rawi ma ncihi, ma adi, asali, ntika, ro ma taho. 9Kalampapu au ratana'o b̄a nggomid̄oho ro ratarima b̄a nggomid̄oho rad̄i nahu; nataho d̄i nggahi ra eli atao rad̄i ruku ra rawi nahu. Ruma Hatalla fu'una b̄a taho ra ntai, d̄imad̄ende ra wa'a nggomid̄oho.
Renta tarima kasi
10D̄ei mori nahu ma sab̄ua lab̄o Ruma, nahu iuku wancuku taho ra ntikana, b̄ara wa'ura sandede ntoina, ake nggomid̄oho maloa walira kananu wea ru'u nahu. Aona nggahi nahu ede laina b̄a one nggomid̄oho wa'ura nefamu nahu; poda nggomid̄oho tio kab̄aemu nahu, pala nggomid̄oho wati rakamu ncai d̄i katadakaimu. 11Ngoa kai b̄a nahu ake laina b̄ara nahu dawaraku, b̄ara nahu wa'ura tana'oku ncihimpa kai au ramawara. 12Nahu wa'ura iuku mori kai dawara, ro mori kai maremba rau. Nahu wa'ura b̄adeku rahasiana d̄i ngge'e aokaiku ka'ada'ana ma b̄une b̄e wali; nataho ka'ada'ana mboto mawara ro ka'ada'ana ncoki mori, nataho ka'ada'ana ntau ra wara ro ka'ada'ana dawara. 13Kai kuasa rambei b̄a Al Masih d̄i nahu, nahu kantau tenggo ra wale d̄i ngge'e aokaiku samenana ka'ada'ana.
14Pala nggomid̄oho wa'ura bantumu nahu, d̄i ade susa ra ncokikai nahu; ro au rakarawi b̄a nggomid̄oho ede poda tahona. 15#2Kor. 11:9 Cina ra angiku dou Filipi! Ndai nggomid̄oho mab̄ade podaku b̄a one wakatu tu'u wi'i b̄a nahu Makedonia ntoina, aipu wakatu Haba Mataho ede ngoa ra kahaba b̄a nahu masarambakaina, nggomid̄oho mpoampa ela Ruma ma bantu nahu; nggomid̄oho mpoampa ma iu rugi ro laba sama-sama lab̄o nahu. 16#Kis. 17:1 Wakatu nahu d̄i Tesalonika ro mane'e d̄i bantu, wa'ura ncewi rad̄i sakali nggomid̄oho nggadumu bantukaimu nahu. 17Ede laina aona nahu ne'e mpoaku tarima au rambei b̄a nggomid̄oho. D̄ine'e b̄a nahu eded̄u nahu loaku eda hasi ma sala'i laba nggomid̄oho. 18#Kel. 29:18 Nahu wa'ura tarima sara'aku – ndad̄ina nancewi d̄i paralu b̄a nahu! Sara'a rambei b̄a nggomid̄oho ranggadumu d̄i ru'u nahu, wa'ura tarima b̄a nahu rad̄i la Epafroditus. Ake nahu kantau sara'a au raparalu b̄a nahu. Rambei-mbei b̄a nggomid̄oho ede eded̄u b̄une ngolo mengi rad̄i koroba rad̄onggo ra mbei d̄i Ruma Hatalla, ro d̄i tarima b̄a Ruma Hatalla kai sana ade. 19Ruma Hatalla ranemba b̄a nahu, ma rembakai b̄a ntau ra wara d̄ei Ruma Isa Al Masih, d̄imakab̄ini sara'a au rad̄i paralu b̄a nggomid̄oho. 20D̄ese ra ntasara Ruma Hatalla Ama ndaita santoi-ntoina! Amin.
Salam cumpukaina
21Karonggapu salam nahu d̄i sara'a ela Ruma Hatalla, makasab̄ua weki lab̄o Ruma Isa Al Masih. Ro tarima raupu salam rad̄i cina ra angi ma wara sama-sama lab̄o nahu ta ake. 22Sara'a ela Ruma Hatalla d̄i kota ake, mapenti poda siad̄oho ma rad̄i asi Kaisar, manggadu salam d̄i ru'u nggomid̄oho.
23Raho-raho to'impa Ruma Isa Al Masih mbeina bareka nggomid̄oho sara'ana.
Salam do'a nami, Paulus ro Timotius
@LAI 2001