GALATIA 1
1
1-3Cina ra angi ela Ruma d̄i dana ra rasa Galatia, Nahu, Paulus, ro sara'a cina ra angita ela Al Masih ma wara sama lab̄o nahu, mapamao raho-raho to'impa Ruma Hatalla Ama ndaita ro Ruma Isa Al Masih mbeina bareka ro taho ra ntai d̄i nggomid̄oho.
Nahu ndad̄iku rasu laina kai ncai manusia atao b̄ara ra hanta b̄a manusia, malaisi b̄a Ruma Isa Al Masih ro Ruma Hatalla Ama ndaita ma wa'ura kamori mbali Sia rad̄i madena. 4To'a d̄i rakane'e b̄a Ruma Hatalla Ama ndaita. Al Masih d̄onggona weki-Na ndad̄i koroba ru'u dosa-dosa ndaita, loakud̄u ndai d̄ikasalama rad̄i jamana ma dab̄ae ake. 5D̄ese ra ntasa Ruma Hatalla santoi-ntoina! Amin.
Sab̄uampa menana Haba Mataho
6Nahu mbora akaku mab̄oha nggomid̄oho! Nggomid̄oho ou b̄a Ruma Hatalla b̄ara anugera Al Masih, pala ake nggomid̄oho ndede rocina sakontumu Ruma Hatalla ro b̄atumu ”haba taho” ma kalai ntewi kaisi Haba Mataho ma ramai ta Ruma Hatalla. 7Sapodakaina wati wara ”haba mataho ma kalaina”. Cuma wara dou-dou ma ngoa ra kahaba d̄i nggomid̄oho ”haba mataho” mab̄oha Al Masih rarungka-rungka b̄a siad̄oho ndad̄ina kakacoku nggomid̄oho. 8Dou ma ngoa ra kahaba ”haba mataho” ma kalai ari mai b̄a Haba Mataho rawa'u ngoa b̄a nami, co'opu sia d̄ihukum b̄a Ruma Hatalla – konena dou ede ndai nami atao mala'eka rad̄i saroga! 9Wa'ura nggahi ulu b̄a nami, ake nahu manggahi sakali wali: Dou ma ngoa ra kahaba d̄i nggomid̄oho ”haba mataho” ma kalai ari mai b̄a Haba Mataho rawa'u tarima ao b̄a nggomid̄oho rad̄i nami, dou ede pab̄uaku d̄ihukum b̄a Ruma Hatalla!
10Sab̄ua kai ede tadana nahu b̄une-b̄uneta ne'e d̄imangaku b̄a manusia? Wati! Nahu ne'eku mangakumpa b̄a Ruma Hatalla. Sab̄ua nahu wunga usahaku weha ade manusia loakud̄u sanakai b̄a dou? Nggara nahu mbuipusi ndede, nahu laina ada Al Masih.
Rab̄unena la Paulus ndad̄ikaina rasu
11Cina ra angi pab̄ua d̄i b̄ademu b̄a one Haba Mataho ra ngoa ra kahaba b̄a nahu ede wati ramaina ta manusia. 12Nahu wati ratarimaku haba ede d̄i manusia ro wati kone sab̄ua dou maratei d̄i nahu. Ndai Ruma Isa Al Masih ma ranggahina isi Haba Mataho ede d̄i nahu.
13 #
Kis. 8:3, 22:4-5, 26:9-11 Tantu nggomid̄oho wa'ura ringamu mab̄oha mori ra woko nahu ntoina kai sab̄ua dou ma agama Yahudi. Nggomid̄oho mab̄adeku b̄une b̄eku dab̄aena nahu karawiku d̄i ela Ruma Hatalla ro b̄uneku tokuna nahu usahaku d̄imaka'elina. 14#Kis. 22:3 D̄ei lampa rawi kalampaku agama Yahudi, nahu nancewiku d̄i ade weki dou Yahudi mamboto ma sama pangka lab̄o nahu. Nahu wancuku kapoda ade d̄ei lampa rawi-lampa rawi mab̄oha rawi ranginakai d̄i wa'i ra waro nami.
15 #
Kis. 9:3-6, 22:6-10, 26:13-18 Pala b̄ara taho ade Ruma Hatalla, Sia kad̄alena nahu sawatipu nahu ranggana ro ouna nahu d̄imakarawi wea Sia. 16Ruma Hatalla katadana Ana-Na d̄i nahu loakud̄u Haba Mataho mab̄oha Ana-Na loa ngoa ra kahaba b̄a nahu d̄i dou-dou laina Yahudi. Aipu wakatu ede nahu wati laoku kone d̄i sab̄ua dou d̄i rahokaiku d̄imangoa ra tei kataho nahu. 17Nahu wati lao rauku d̄i dou-dou d̄i Yerusalem marawa'u ulu ndad̄i rasu ntewi kaisi nahu. Pala nahu laoku d̄i dana Arab, edempara rata'ede laombali wali aka Damsyik. 18#Kis. 9:26-30 Tolu mba'a sawa'u b̄a ede, nahu laoku d̄i Yerusalem d̄i patakai angi lab̄o la Petrus. Nahu ngge'e lab̄o sia sampuru lima naimpa ntoina. 19Nahu wati eda angiku lab̄o rasu-rasu ma kalai, selasi la Yakub, ari Ruma.
20Au ratunti b̄a nahu ake ncihi. Ruma Hatalla nab̄adeku b̄a one nahu wati cowaku!
21Sawa'u b̄a ede nahu laoku aka dana ra rasa Siria ro Kilikia. 22Sampe wakatu ede ela-ela Al Masih d̄i Yudea mbuipu wati patana nahu kai ncao ntando. 23Siad̄oho raringanampa nggahi dou, ”Dou ma ntoina ma rakancoki nami, ake nangoa ra kahabaku imbi ma ntoina d̄i ne'ena kambora.” 24Ndad̄i siad̄oho roi ra wadina Ruma Hatalla b̄ara nahu.
@LAI 2001