KOLOSE 3
3
1 #
Mzm. 110:1
Nggomid̄oho wa'ura kamori mbali sama-sama lab̄o Al Masih. B̄ara ndedena nggomid̄oho pab̄uapu usahamu d̄i rakakaimu lampa rawi ma d̄i saroga, tab̄e Al Masih maparenta sama-sama lab̄o Ruma Hatalla. 2Kananupu d̄i lampa rawi ma ta ede, aina d̄i lampa rawi ma d̄i dunia. 3B̄ara nggomid̄oho wa'ura made, ro morimu macili weki lab̄o Al Masih d̄i ade Ruma Hatalla. 4Fu'u morimu ma sapodakaina eded̄u Al Masih ro natadasi Sia peade nggomid̄oho rau d̄imawontu sama-sama lab̄o Sia ade na'e ra ntorukai-Na.
Mori ma ntoi ro mori ma b̄ou
5B̄ara ndedena, kamadepu ne'e dunia ma hako ncau wekimu, b̄une masampu ra nggele, lampa rawi mawati patuna, hawa nawasu, ne'e ma dab̄ae, ro na'e ade (b̄ara na'e ade eded̄u samampa lab̄o nemba berhala.) 6Lampa rawi b̄une edeku ma kamaina mbani b̄a Ruma Hatalla d̄i dou-dou ma wati to'akaina. 7Ntoina ndai nggomid̄oho rau mab̄atu ne'e-ne'e ede, aipu wakatu nggomid̄oho kuasakai b̄a ne'e dunia.
8Pala ake pab̄uapu nggomid̄oho pakimu lampa rawi ma iha rad̄i wekimu: ai walina mbani, atao mbani kapodamu ade atao kaco'o ademu d̄i dou makalai. Ai to'ina kalosa b̄a asamu nggahi ra eli i'a ra b̄a'amu atao nggahi ra eli ma sampu. 9#Ef. 4:22 Aina cowamu d̄i sab̄ua lab̄o sab̄ua dou, b̄ara mori ma ntoi ro samenana tabe'ana wa'ura hori b̄a nggomid̄oho. 10#Kej. 1:26, Ef. 4:24 Nggomid̄oho ake wa'ura mbei mori ma b̄ou. Nggomid̄oho eded̄u manusia b̄ou, ma wunga d̄i kab̄ou ncau-ncau b̄a Marakandaimu, eded̄u Ruma Hatalla, b̄atu pahu ndai-Na. Aona eded̄u loakud̄u nggomid̄oho patamu Ruma Hatalla kai sampuruna. 11Cumpukaina b̄ara ede mborara samenana malai-lai ade weki dou Yahudi ro malaina Yahudi, dou rasuna ro ma watira suna, watid̄u wara wali laina dou lai rasa ro dou mawatipu maju, ada ro dou mardeka, b̄ara Al Masih eded̄u sara'a-ra'ana ro Sia kasab̄uana weki lab̄o siad̄oho sara'ana!
12 #
Ef. 4:2
Nggomid̄oho eded̄u ela Ruma Hatalla. Ruma Hatalla nameci ra ca'uku nggomid̄oho ro kad̄alena nggomid̄oho d̄imandad̄i ntau ndai-Na rakalaina. B̄ara ndedena nggomid̄oho pab̄uaku katadamu kasi ade, taho ade, awa weki, ntika nggahi ra eli, ro taha ade d̄i susa ra ncoki 13#Ef. 4:32 Nggomid̄oho pab̄uapu saba d̄i sab̄ua lab̄o sab̄ua dou, ro cua kangampu angi nggara warasi ma wi'i ade d̄imakalaina. Ruma kai sana adena kangampu weana nggomid̄oho, ndad̄i nggomid̄oho pab̄uapu ngawamu kangampu angi sab̄ua lab̄o sab̄ua dou. 14Ro ma penti poda, eded̄u: Nggomid̄oho pab̄uapu meci kali cempepu angimu b̄ara meci ra ca'u angi edeku makasab̄uana cina ra angi sara'ana d̄i ndad̄ikaina sampuruna. 15Pab̄uapu nggahimu macumpu kai rakatantu b̄a dame rambei b̄a Al Masih d̄ei ademu. B̄ara Ruma Hatalla ouna nggomid̄oho d̄imandad̄i anggota sab̄ua sarumbu, loakud̄u nggomid̄oho morimu d̄ei dame rad̄i Al Masih ede. Pab̄uapu nggomid̄oho tarima kasimu. 16#Ef. 5:19-20 Pab̄uapu ngoa ra tei b̄a Al Masih ma b̄inikai b̄a bareka lu'una d̄ei ademu. Pab̄uapu nggomid̄oho tei kali cempemu angi lab̄o cua mbei ngoa ra tei kataho kai saloa timba ra lembamu. Rawapu zabur ro roi ra wadi ro rawa-rawa maraso; rawapu d̄i ru'u Ruma Hatalla kai iumu syuku d̄ei ademu. 17Samenana au rakarawi b̄a nggomid̄oho atao ranggahimu, pab̄uapu ede karawimu ro nggahimu kai ngara Ruma Isa. Syukupu d̄i Ruma Hatalla Ama ndaita au rakarawi b̄a Ruma Isa ru'umu.
Hubunga-hubunga weki ndai ade mori ma b̄ou
18 #
Ef. 5:22, 1Ptr. 3:1 Cina ra angi ma ndad̄i wei! To'apu d̄i rahimu, b̄ara ndedeku sapodakaina ruku ra rawimu kai ela Al Masih.
19 #
Ef. 5:25, 1Ptr. 3:7 Cina ra angi ma ndad̄i rahi! Meci ra ca'upu weimu. Aina tokumu d̄i siad̄oho.
20 #
Ef. 6:1
Ana-ana! Eded̄u d̄i pab̄ua karawi b̄a nggomid̄oho kai ela Al Masih kai d̄imato'a ncau d̄i ama ra ina, b̄ara edeku d̄i makasana wea ade Ruma Hatalla.
21 #
Ef. 6:4
Cina ra angi ma ndad̄i ama! Aina kapilimu ade anad̄ohomu ndad̄ina siad̄oho kompo kananuna.
22 #
Ef. 6:5-8
Cina ra angi ma ndad̄i ada! D̄ei samenana lampa rawi nggomid̄oho pab̄uapu to'akaimu d̄i dou mandad̄i rumamu ma d̄i dunia ake. Aina to'amu d̄i siad̄oho cuma wakatu jaga b̄a siad̄oho mpoa, b̄ara nggomid̄oho ne'emu d̄i roi. To'akaipu d̄i siad̄oho kai ade ma nira, b̄ara nggomid̄oho horomamu Ruma. 23Karawi au-au rambei d̄i nggomid̄oho, pab̄uapu nggomid̄oho karawimu kai kapoda ade, b̄une-b̄uneta Ruma rakarawi wea b̄a nggomid̄oho, ro laina manusia mpoa. 24Kawarapu b̄a one nggomid̄oho d̄imatarima ufa rad̄i Ruma. Au rasadia b̄a Ruma d̄i ru'u ela-Na, edeku ma d̄i mbeina d̄i nggomid̄oho. B̄ara ruma ma sapodakaina d̄i karawi wea masapodakaina mawunga karawi wea b̄a nggomid̄oho eded̄u ndai Al Masih. 25#Ul. 10:17, Ef. 6:9 Ro cou-cou wali ma ncara karawi, d̄imatangguna ncara ede; b̄ara Ruma wati ntandana dou.
@LAI 2001