Matthew 28
28
Jisü Ye Xülethuvae
1Sabbath tsalà thiu, apine tsalà atüghiu lo tsütho ipeghi kelo, Mary Magdalene eno Mary lakhiu pama ye Jisü sükumo ju niye wu.
2Tilehi ayeghi küghütha kijè lakhi ighie, kughengu Ampeuʼw kungumi no kungugha lono iqighi no akumoki lo wu no atuqu tukulovetsü püzü tipau shou iqa ae. 3Pa jukoghe ye tsütsüpha toi, eno paw tiphimini ye murasü nguno miyetsüghoi pepu ake. 4Ikelo ghükhemiqo ye kungumi hu ju pesü shishe müsàve eno panongu ye thüghüive no akìthí kumlho shive.
5Ikelo kungumi hu no totimi pama vilo pi, “Müsà kevilo! Nokujo ye Jisü yeda pìthíve keu phu cheni ipi ino ithi anie. 6Pa no pipüa keu toi, pa ye hilehi kühae; pa ye xülethuvae. Ighino khilehi pa sükumo qhipüa keno julo. 7Mütazü wu püzü pa khopemiqo vilo ishi pilo: ‘Pa ye akìthí lono xülethuvae eno nongu züu no pa ye Galilee lo wuchea. Tilau no nongu no pa sasü kusholu nani.’ Ino hi nongu vilo piakeu kümsüchilelu lo.”
8Ikehu totimi pama no akimighi shi akumoki qhive no, akümsa eno alokivi küqha ghi, Jisü khopemiqo vilo pi niye posü wuve. 9Zülile no Jisü no pama sasü kusho no ishi pi, “Alo ani kema?” Ike pama no pa lau ighino pa pukhu mutuluve püzü pa müláe. 10Tisheno Jisü no pama vilo pi, “Müsà kevilo. Wulo eno ithiküzümiqo vilo Galilee lo wulo pilo; tilau no panongu no isasü kusholu nani.”
Ghükhemiqo no Asütsa Pìthi Keu
11Totimi pama no alà lo che kelo, ghükhemiqo khami no aphughi lo ilo no achinetomiqo vilo kiu shive keno kümtsü lhepe pivetsü. 12Ikelo achinetomi ngò kichimiqo kusholu no avehu kümqüve eno panongu no pisa kutomo pesü ghüshimiqo tsüve no 13panongu vilo pi, “Nongu ye ishi pilo, ‘Ningu no putho lo zü ake lono pa khopemiqo no ighi püzü pa kumo pükape wuvae.’ 14Kughou atsa hipau angh vilo pìthive keno, ningu no pa pütsakümtshaluve nani eno nongu ye aküpüna shipemo nanie.” 15Ikelo ghüshimiqo no pisa luve no panongu vilo kíshi pilopi mijetsü keno titoi pivetsü. Eno hipau ghili ye Jewmiqo dolo aqha kuchopu veküpha wove no ishi kutólo hipau tsà pekishe achephi.
Azakütsü Akijeu
16Ikehu akhopemi pano chighiqhaqhi ye Galilee lo Jisü no panongu vilo naghuto khilehi wulo pi keno tilehi wue. 17Kughou Jisü ithulu keno, panongu no pa müláe; ikemu khami ye ta pülümo ghi ae. 18Ike Jisü no panongu lau ighino pi, “Kungugha lo eno ayeghi lo kükagha kümtsü pesü itsüvae. 19Tighenguno shiye kümtsü lau wu püzü panongu pelo ikhopemi shilu pelo; Apù jeku, Anu jeku eno Aghungú Kimthe jeku no baptiz shitsülo, 20eno ino azah nongu tsüve keu kümtsü papelu penike panongu kütsü tsülo. Eno kuchou no ni ye pülhapuju eno tiqheli shekha kutólo nongu gholo anani.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
