Mateyo 28
28
Jesu mbwaakabuka kuswa kubafu
(Maako 16:1-10; Luka 24:1-12; Joni 20:1-10)
1Ndibwakeenda bushiku bwakookesha bwa Cibelu, ono macuunsacuunsa paSondo, Maliya wa kuMagadala aMaliya umwi bakaya mukubona kucuumbwe. 2Mpeeke kwakacitika citentanshi cinene ceebo munjelo wa Mwaami wakaseluka kuswa kwiculu wakunkulusha libwe lyakalinga kucuumbwe akwikalaawo. 3Wakalinga kuboneka anga nkubeka kwa mfula, ashalo shakufwala shakwe shakalinga kutubabo tuu. 4Beshikulindilila kucuumbwe bakaloonda abuumbi cakwaamba ayi bakafwa citu.
5Mpomunyaawo munjelo wakaambila banakashi balya ayi, “Mutaloondi! Ndishi kwaamba ayi mutoolangoola Jesu uyo ngobakapopa pamucilingano. 6Taamo muno, wabushikwa bweenka mbuli mbwaakaamba. Kamwisa mubone mpwaakalinga kulete. 7Ono amufwambaane, mukalwiite bashikwiiya bakwe ayi, ‘Wabushikwa kuswa kubafu alimwi bulya watanjila kuya kuGalili, uko nkweshi mukamubonene!’ Mutalubiiko makani ngondamulwiita.” 8Aboobo bakaswa cakufwambaana kucuumbwe. Bakaloonda, sombi alimwi kabasangalete. Bakacica kuya mukulwiita bashikwiiya bakwe.
9Cakuteengashila, Jesu wakabakumanya akwaamba ayi, “Mwaboneka.” Lyalo banakashi bakasena pafwaafwi, bamucata kushimpanta akumulambila. 10Mpeeke Jesu wakabaambila ayi, “Mutaloondi! Kamuya mukalwiite bamakwesu ayi baye kuGalili uko nkweshi tuye tukakumanine.”
Beshikulindilila mbobakaluula cakacitika
11Ono banakashi balya ndibakalinga kuya, bamwi bashilumamba bakalinga kulindilila kucuumbwe, bakaya mundabala inene mukulwiita bamatanjilili ba bapailishi shoonse shakacitika. 12Mpomunyaawo bapailishi banene abamaloba ba baJuda bakabungana pantu pomwi akupangana cakucita. Lyalo bakapa bashilumamba maali aanji 13akubalwiita ayi, “Mulyeelete kwaamba ayi, ‘Bashikwiiya bakwe besa mukwiipa mutuntu mashiku swebo katulete.’ 14Ono na mweendeleshi anyumfwe makani aya, swebo tutoomulwiita kabotu kwaamba ayi mutapekwi mulandu.” 15Aboobo bashilumamba balya bakabwesa maali alya akucita kweelana ambobakalwiitwa. Paceebo ceeco, makani aya alishibikitwe bweenka ubo kubaJuda abobulya.
Jesu mbwaakatuma bashikwiiya bakwe
(Maako 16:14-18; Luka 24:36-49; Joni 20:19-23; Mili 1:6-8)
16Mpomunyaawo bashikwiiya bakwe bali likumi awomwi bakaya kuGalili, kukalundu uko nkwaakabalwiita Jesu ayi bakaye.#Mate 26:32; Maako 14:28 17Ono ndibakamubona, bakamulambila. Sombi bamwi bakalinga kutonsha. 18Lyalo Jesu wakasena pafwaafwi akubaambila ayi, “Ndapeekwa nkusu shoonse kwiculu alimwi apacishi ca panshi. 19Paceebo ceeco, kamuya mukanokwiisha bantu bamishobo yoonse, mukababombeke muliina lya baTa, alya Mwaana alimwi alya Mushimu Usalashi.#Mili 1:8 20Mukabeeishe kukonkela akucita shintu shoonse nshendakamulwiita. Nebo nanooli amwebo lyoonse kushikila kumamanino a cishi.”
Attualmente Selezionati:
Mateyo 28: BBBLI
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Lenje Bible with Deuterocanon © Bible Society of Zambia, 2003.
