Mateyo 27

Jesu mbwaakatolwa kuli Pilato

(Maako 15:1; Luka 23:1-2; Joni 18:28-32)

1Ndibwakaca macuunsacuunsa, bamatanjilili ba bapailishi abamaloba ba baJuda bakapangana ayi bacaye Jesu. 2Mpeeke Jesu bakamwaanga akumutola mumaansa akwe Pilato, mweendeleshi wa kuLoma.

Lufu lwakwe Judasi

(Mili 1:18-19)

3Ono Judasi uyo wakaaba Jesu ndyaakabona ayi Jesu wapingulwa kucaikwa, wakalibona ayi wakabisha. Lyalo wakabooshesha bamatanjilili ba bapailishi abamaloba ba baJuda maali a silifa ali makumi otatwe ngobakalinga bamupa 4akubaambila ayi, “Ndakabisha kwaaba muntu utacite mulandu.” Balo bakamukumbula ayi, “Ono tucite buyani swebo? Ngamakani ako omwiine ayo!” 5Mpomunyaawo Judasi wakawaala maali alya panshi muŊanda yakwe Lesa, akuswa waya mukulyaangilila. 6Sombi bamatanjilili ba bapailishi bakabwesa maali alya akwaamba ayi, “Mulawo wesu ulakasha kwaabika motubika maali muno muŊanda yakwe Lesa ceebo ngamaali a bulowa.” 7Paceebo ceeco, bakapangana ayi maali alya boole muunda wa mubumbi, ayi banoofukilamo bantu beensu na wafwa. 8Nceceeco muunda uyu ncewiitilwa ayi, “Muunda wa Bulowa” abobulya.#Mili 1:18-19 9Lyalo cakacitika cancinencine cakaamba Jelemiya mulaluki mukulukulu ayi, “Bakabwesa maali a silifa makumi otatwe, mweelo ngobakasumininshanya kumuula bene Isilaeli, 10akuula muunda wa mubumbi bweenka mbuli mbwaakandwiita Mwaami Lesa.”#Seka 11:12-13

Pilato mbwaakeepusha Jesu

(Maako 15:2-5; Luka 23:3-5; Joni 18:33-38)

11Mpeeke Jesu bakamwiimika kunembo lya mweendeleshi wa kuLoma uyo wakamwiipusha ayi, “Sa ndiwe mwaami wa baJuda?” Jesu wakamukumbula ayi, “Mwacaamba nobeene.” 12Sombi ndibakamubekesha bamatanjilili ba bapailishi abamaloba ba baJuda taakwe kukumbulaawo. 13Mpomunyaawo Pilato wakeepusha Jesu ayi, “Sa toshinyumfwite shikani kufula nshebatookwaambila?” 14Sombi Jesu taakwe kukumbulaawo nabi liswi lyomwi, mpeeke mweendeleshi wakacelemanabo.

Jesu mbwaakapingulwa kucaikwa

(Maako 15:6-15; Luka 23:13-25; Joni 18:39—19:16)

15Paciindi cakusekelela bushiku bwa Pasika bwakwiibaluka kusotokela, mweendeleshi lyoonse wakalinga kwaangulula kaili womwi, uli woonse ngweenga bamusenga bantu. 16Paciindi ico kwakalinga kaili umwi wakalinga kucite mpuwo ibiibi, wiitwa ayi Balabasi. 17Ono bantu ndibakabungana, Pilato wakabeepusha ayi, “Ngani ngomusuni ayi mwaangulwite, Balabasi nabi Jesu wiitwa ayi Usalitwe wakwe Lesa?” 18Mukwiinga Pilato wakalinga kwishi ayi bakatola Jesu kuli nguwe ceebo bakamufwita munyono. 19Pilato ndyaakalinga kushiite pacuuna cakoombolosheshaawo, mukaakwe wakatumya maswi akwaamba ayi, “Mutaciti cintu nabi comwi pamuntu uyo utacite mulandu ceebo sunu mashiku ndapenshekwa abuumbi muciloto ceebo ca nguwe.” 20Sombi bamatanjilili ba bapailishi abamaloba ba baJuda, bakayungoola bantu ayi basenge Pilato ayi abaangulwite Balabasi, lakwe Jesu acaikwe. 21Mweendeleshi wakabeepusha alimwi ayi, “Nguli ngomusuni ayi mwaangulwite pabantu bobilo aba?” Balo bakakumbula ayi, “Balabasi!” 22Pilato wakabeepusha ayi, “Ino mucite buyani Jesu wiitwa ayi Usalitwe wakwe Lesa?” Boonse bakakumbula ayi, “Aapopwe pamucilingano!” 23Sombi Pilato wakabeepusha alimwi ayi, “Ino ncibiibinshi ncaacita?” Lyalo bakeendilishaawo koolobesha ayi, “Aapopwe pamucilingano!”

24Ono Pilato ndyaakabona ayi taaku nceshi cicitike, alimwi ayi inga paakuba shimfulunganya, wakabwesa maanshi akusamba kumaansa pameenso a bantu boonse akwaamba ayi, “Nebo nshicite mulandu palufu lwa muntu uyu! Ngumulandu wanu nobeene!”#Duto 21:6-9 25Mpeeke bantu boonse bakakumbula ayi, “Mulandu wa lufu lwakwe aube pali ndiswe abana besu.” 26Lyalo Pilato wakabaangulwita Balabasi, mpeeke wakaamba ayi Jesu akwiipwe misako. Kuswawaawo, wakamwaaba kubashilumamba ayi apopwe pamucilingano.

Bashilumamba mbobakaseka akuweluluka Jesu

(Maako 15:16-20; Joni 19:2-3)

27Mpomunyaawo bashilumamba bakenjisha Jesu muŋanda ya mweendeleshi, akubunganya bashilumambanyinaabo bamwi boonse, besa bashinguluka Jesu. 28Mpeeke bakamufuula akumufwalika cisani cifubelafubela. 29Bakapanga mushini wa myuumfwa babika pamutwi wakwe akumufumbatisha litete mulyaansa lyalulyo. Lyalo bakafukama kunembo lyakwe akumwaansha anga nkumulemeka ayi, “Waboneka omwaami wa baJuda!” 30Lyalo bakamushipila mate akumunyaya litete akumuumishako pamutwi. 31Ndibakamana kumuseka akumuweluluka boobo, bakamufuula cisani ncibakalinga bamufwalika, akumufwalika shakufwala shakwe. Lyalo Jesu bakamutola kuya mukumupopa pamucilingano.

Jesu mbobakamupopa pamucilingano

(Maako 15:21-32; Luka 23:26-43; Joni 19:17-27)

32Ndibakaswa bakakumanya musankwa wiitwa ayi Simoni wa kuSailini. Mpomunyaawo bashilumamba bakamukakatisha kunyamuna mucilingano wakwe Jesu. 33Lyalo bakashika kumusena wiitwa ayi Gologota, nkokwaamba ayi musena wa cifuwa ca mutwi. 34Uko Jesu bakamupa waini usenkene andulwe ayi anwe, sombi ndyaakanyumfwaamo, wakakaka.#Kulu 69:21 35Ndibakamana kumupopa pamucilingano, bakabaana shisani shakwe kwiinda mukuuma cisolo.#Kulu 22:18 36Kuswawaawo bakekala panshi kabamulindilila. 37Peculu lya mutwi wakwe pamucilingano pakalinga kulembetwe maswi akalinga kutondesha mulandu ngobakamucaila ayi, “Uyu nguJesu, mwaami wa baJuda.” 38Lyalo bakamupopa pakati pamicilingano ya beepi bobilo, umwi kulyaansa lyalulyo aumwi kucipiko.

39Mpeeke bantu bakalinga kwiindilaako, bakalinga kupukumunabo mitwi akunoocobola Jesu#Kulu 22:7; 109:25 40kabaamba ayi, “Webo ndiwe wakalinga kwaamba ayi ulaakumwayulula Ŋanda yakwe Lesa akwiiyaka alimwi munshiku shotatwe. Ono na uli Mwanaakwe Lesa lipulushe tubone, useluke pamucilingano!”#Mate 26:61; Joni 2:19 41Abalo bamatanjilili ba bapailishi, bafundishi ba Milawo alimwi abamaloba ba baJuda bakamuseka, kabaambooshanya beene ayi, 42“Wakalinga kupulusha bamwi, sombi waalilwa kulipulusha mwiine. Sa te ngomwaami wa Isilaeli? Aaseluke ono pamucilingano kwaamba ayi tushome muli nguwe. 43Ulashoma muli Lesa akwaamba ayi, ‘Ndi Mwanaakwe Lesa.’ Ono Lesa aamupulushe na ulimusuni!”#Kulu 22:8 44Lyalo beepi mbwaakapopwaabo pantu pomwi, abalo bakalinga kumutukana.

Lufu lwakwe Jesu

(Maako 15:33-41; Luka 23:44-49; Joni 19:28-30)

45Lisuba ndilyakashika pakati ka mutwi, kwakaba munshinshe mucishi coonse kushikila 3 koloko malumwi. 46Paciindi ca 3 koloko peenka, Jesu wakoolobesha aliswi lya peculu ayi, “Eloi, Eloi, lama sabakatani?” Nkokwaamba ayi, “NobaLesa bangu, nobaLesa bangu, ino nciinshi ncemwandekeleshesha?”#Kulu 22:1 47Ono bamwi abo bakalingaawo, ndibakanyumfwa maswi aya, bakaamba ayi, “Amunyumfwe utokwiita Elija.” 48Umwi mulikoto lyabo wakacica, akubwesa mweepu wausumpa muwaini ulula usashite, wakabwesa kasako akubikako mweepu kwaamba ayi ape Jesu anwe.#Kulu 69:21 49Sombi bamwi bakaamba ayi, “Atulindile, tubone na Elija utoosa mukumupulusha!” 50Jesu alimwi wakoolobesha aliswi lya peculu, watula moyo.

51Paciindi ceenka ico, cisani cakalinga kushitilisha muŊanda yakwe Lesa, cakakwaamuka pakati, kuswa peculu apanshi. Cishi cakatenkaana amabwe akapasuka.#Kulo 26:31-33 52Shuumbwe shakacalooka, mpeeke bantu baanji bakafwa kabashoma muli Lesa, bakabushikwa kuswa kubafu. 53Bakaswa mushuumbwe. Ono Jesu ndyaakabuka kuswa kubafu, balo bakaya muNdabala inene Isalalite umo mobakabonekela kubantu baanji.

54Ono munene wa bashilumamba mwaanda, abashilumamba abo mbwaakalingaabo kabalindilila Jesu, ndibakabona citentanshi ashimwi shintu shoonse shakacitika, bakaloonda abuumbi, akwaamba ayi, “Ncakwiila, uyu muntu wakalinga Mwanaakwe Lesa!”

55Pakalinga abanakashi baanji bakalinga kweebela palaale. Banakashi aba mbobakalinga kwisa cikonkela Jesu kuswa kuGalili akumucafwa. 56Mulikoto lyabo mwakalinga Maliya wa kuMagadala, Maliya banyina Jemusi aJosefu alimwi abamuka Sebedi.#Luka 8:2-3

Jesu mbwaakabikwa

(Maako 15:42-47; Luka 23:50-56; Joni 19:38-42)

57Ndilyakookama lisuba, muntu umwi mubile wa kuAlimateya wiitwa ayi Josefu wakashika. Alakwe wakalinga shikwiiya wakwe Jesu. 58Muntu uyu wakaya kuli Pilato mukusenga mutuntu wakwe Jesu. Mpeeke Pilato wakasuminisha ayi bamupe mutuntu uyo. 59Mpomunyaawo Josefu wakabwesa mutuntu uyo akuupombela acisani cituba 60akuubika mucuumbwe cakwe cipya ico ncaakakaba mulibwe. Kuswawaawo, wakakunkulushilawo libwe linene pamulyango wa cuumbwe, kaaya. 61Maliya wa kuMagadala aMaliya umwi bakalingaako nkomunya uko, kabashiite, kabalangene acuumbwe.

Mbobakabika beshikulindilila kucuumbwe cakwe Jesu

62Ndibwakaca, pabushiku bwakookesha bwa Cibelu, bamatanjilili ba bapailishi abaFalisi bakabungana kuli Pilato 63akumwaambila ayi, “Nkambo, tuliingashite mbwaakaamba mubeshi uyo kaacili muumi ayi, ‘Ndaakubushikwa alimwi pabushiku bwatatu.’#Mate 16:21; 17:23; 20:19; Maako 8:31; 10:33-34; Luka 9:22; 18:31-33 64Anu amwaambile bamwi baye bakalindilile kucuumbwe kushikila peende nshiku shotatwe. Mukwiinga bashikwiiya bakwe inga besa mukwiipa mutuntu akulwiita bantu ayi, ‘Wabushikwa kuswa kubafu.’ Lyalo bubeshi bwabili bulaakubica kwiinda butaanshi.” 65Ndyaakanyumfwa boobo, Pilato wakabaambila ayi, “Amutoleeko beshikulindilila. Kamuya mukabambeko cankusu kweelana ambweenga mwakonsha.” 66Mpeeke bakanyamuka akuya mukushinkashinka mweela libwe akushiyako beshikulindilila.

Attualmente Selezionati:

Mateyo 27: BBBLI

Evidenzia

Confronta

Copia