Mateyo 22
22
Cikoshanyo ca bwiinga
(Luka 14:15-24)
1Jesu alimwi wakaambila bantu mushikoshanyo ayi, 2“Bweene bwa kwiculu bulikoshenye amwaami umwi wakabambila mwanaakwe musankwa bwiinga. 3Wakatuma basebenshi bakwe ayi bakeete baabo boonse bakatambwa kubwiinga, sombi boonse bakakaka. 4Lyalo wakatuma basebenshi abamwi akubaambila ayi, ‘Muye mukaambile baabo boonse bakatambwa ayi ndabamba kale shakulya. Basune bangu aboombe beenite bacaikwa, aboobo shoonse shilibambitwe kale. Amwise kubwiinga.’ 5Sombi abo bakatambwa tabakwe kubikaako amaano. Umwi wakaya kumuunda wakwe, alakwe umwi wakaya mukuulisha shintu shakwe. 6Ono bamwi bakacaala, bakacata basebenshi bamwaami babapensha akubacaya. 7Mpomunyaawo mwaami wakakalala abuumbi. Mpeeke wakatuma bashilumamba bakwe kuya mukunyonyoola bacayi abo akutenta ndabala yabo inene. 8Lyalo wakaambila basebenshi bakwe ayi, ‘Shoonse shiyandika pabwiinga shabambwa kale. Sombi abo bakatambwa tebalinga kweelete kutambwa. 9Paceebo ceeco, kamuya mumampambanwa anshila mukatambe bantu bali boonse mbeshi mukacane.’ 10Mpomunyaawo basebenshi balya bakaya munshila mukutamba bantu bali boonse mbobakacana, babiibi abali kabotu boonse. Lyalo muŋanda ya bwiinga mwakesula bantu.
11“Ono mwaami ndyaakenjila muŋanda mulya mukubona beensu, wakacanamo musankwa umwi watakalinga kufwete cakufwala ca pabwiinga. 12Mpeeke mwaami wakamwiipusha ayi, ‘Ndaba, ino wenjila buyani muŋanda muno kootafwete cakufwala ca pabwiinga?’ Sombi musankwa uyo taaku ncaakakumbula, sobwe. 13Lyalo mwaami wakaambila basebenshi bakwe ayi, ‘Amumwaange kumaansa akumyeendo, mumuwaale pansengwe kumunshinshe. Uko nkweshi anoolila akulumanya meeno.’ ”#Mate 8:12; 25:30; Luka 13:28
14Lyalo cakweelaako Jesu wakaamba ayi, “Nabi beetwa mbaanji, sombi basalwa mbaniini.”
Mwiipusho wa pakupeleka musonko
(Maako 12:13-17; Luka 20:20-26)
15Ono baFalisi bakanyamuka kuya mukulifuyafuya ayi bacate Jesu kwiinda mukwaamba kwakwe. 16Lyalo bakatuma bashikwiiya babo abantu bamwi bakwe Elodi kuli Jesu mukumwiipusha ayi, “Bafundishi, tulishi kwaamba ayi mwebo mulashomeka alimwi muleeisha maswi akwe Lesa calushinisho, bweenka mbuli mbwaabete. Tamulisukami amiyeeyo ya muntu mukwiinga tamusalululi. 17Amutulwiite mbomuyeeya mwebo. Sa Milawo ilatusuminisha kupa musonko kuli Sisa, muleli munene wa kuLoma, nabi tau?” 18Sombi Jesu wakeshiba ayi batokwiipusha cakubeca. Lyalo wakabaambila ayi, “Mwebo nobantu nomwaamba nshemutaciti! Ino mutoonsunkilanshi? 19Amumboneshe lyaali lya musonko!” Abalo bakamuletela lyaali lya kuLoma. 20Mpeeke wakabeepusha ayi, “Ino mutwi aliina shiliiwo nsha baani?” 21Abalo bakamukumbula ayi, “Nshakwe Sisa, muleli munene wa kuLoma.” Alakwe Jesu wakabaambila ayi, “Anu amupe muleli munene wa kuLoma shintu isho shaakwe, alakwe Lesa mumupe shintu shaakwe.” 22Ndibakanyumfwa boobo, bakakankamana. Lyalo bakaswaawo bamushiya.
Mwiipusho wa pakubuka kuswa kubafu
(Maako 12:18-27; Luka 20:27-40)
23Pabushiku bweenka ubo baSaduki bamwi bakesa kuli Jesu. Bantu aba mbobaamba ayi bantu bakafwa teshi bakabukeewo. Mpeeke bakamwiipusha ayi,#Mili 23:8 24“Bafundishi, Mose wakaamba ayi, ‘Na muntu wafwa kaatana kushalilamo mwaana mumukaakwe, mukwabo ulyeelete kweeba mukalubinje kwaamba ayi ashalileko baana mukwabo uyo wakafwa.’#Duto 25:5 25Ono kumisheesu kwakalinga basankwa bamukowa bosanwe abobilo. Munene bantu wakeeba, sombi wakafwa kaatana kushalilamo mwaana akushiya mukaakwe kumukwabo. 26Sombi wabili awatatu boonse cakaba ngumushobo womwi kushikila akubamukowa boonse bali bosanwe abobilo. 27Kumamanino, alakwe mwanakashi wakafwa. 28Ono pabushiku bwakubuka kuswa kubafu, mwanakashi uyo ulaakuba muka ni? Mukwiinga boonse bamukowa bali bosanwe abobilo bakalinga kumweebete.”
29Sombi Jesu wakabakumbula ayi, “Mulilubite ceebo tamwishi Malembo akwe Lesa nabi nkusu shakwe. 30Mukwiinga bantu baakubuka kuswa kubafu, teshi bakanokweebana, sombi balaakuba bweenka mbuli baanjelo ba kwiculu. 31Ono apalo pamakani akubuka kuswa kubafu, sa tamuna kubelengawo kale nshaakamwaambila Lesa ndyaakaamba ayi, 32‘Nebo ndime Lesa wakwe Abulaamu, Lesa wakwe Isaki alimwi aLesa wakwe Jakobo.’ Nkokwaamba ayi teshi Lesa wa bafu, sombi nguLesa wa boomi.”#Kulo 3:6 33Mpeeke bantu baanji baanji abo bakalingaawo ndibakanyumfwa kwiisha kwakwe, bakakankamana abuumbi.
Mulawo unene wiinda pamilawo yoonse
(Maako 12:28-34; Luka 10:25-28)
34Ono baFalisi ndibakanyumfwa ayi Jesu wakoma baSaduki, abalo bakabungana pantu pomwi. 35Mpeeke umwi mufundishi wa Milawo mulikoto lyabo, wakeepusha Jesu cakumusunka ayi, 36“Bafundishi, ino ngumulawonshi unene pamilawo yoonse yakwe Lesa?” 37Jesu wakamukumbula ayi, “ ‘Suna Mwaami Lesa wako amoyo wako woonse, abuumi bwako boonse, amiyeeyo yako yoonse.’#Duto 6:5 38Uyu ngomulawo unene alimwi ngomulawo utaanshi. 39Mulawo wabili ngooyu, awalo ulikoshenyebo autaanshi ayi, ‘Suna mubyo bweenka mboolisuni omwiine.’#Bene Lefi 19:18 40Pamilawo yobilo iyi mpopali Milawo yoonse yakwe Mose alimwi akwiisha kwa balaluki.”#Luka 10:25-28
Mwiipusho wa pamakani a Usalitwe wakwe Lesa
(Maako 12:35-37; Luka 20:41-44)
41Ono baFalisi ndibakalinga kubungene, Jesu wakabeepusha ayi, 42“Ino mwebo mulayeeya buyani paUsalitwe wakwe Lesa? Ino ngwamulunyungu lwakwe ni?” Balo bakamukumbula ayi, “Ngwamulunyungu lwakwe Defedi.” 43Jesu wakabeepusha alimwi ayi, “Ceebonshi mwiine ndyaakatanjililwa aMushimu Usalashi wakabanda Usalitwe wakwe Lesa ayi, ‘Mwaami’? Defedi wakaamba ayi,
44‘Mwaami Lesa wakaambila Mwaami wangu ayi,
Kala kulyaansa lyangu lyalulyo,
kushikila nkaalule balwani bako
kwaamba ayi babe mpopakulyata myeendo yako.’#Kulu 110:1
45Ono na Defedi mwiine wakamwiita ayi, ‘Mwaami’, ino Usalitwe wakwe Lesa inga washalwa buyani mulunyungu lwakwe alimwi?” 46Sombi taaku muntu nabi womwi wakakumbula nabi liswi lyomwi. Lyalo kuswa pabushiku ubo, taaku muntu wakalinga kwiipusha Jesu nabibo mwiipusho womwi wakumusunka.
Attualmente Selezionati:
Mateyo 22: BBBLI
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Lenje Bible with Deuterocanon © Bible Society of Zambia, 2003.
