Mateyo 21
21
Jesu mbwaakenjila cabulemu muJelusalemu
(Maako 11:1-11; Luka 19:28-40; Joni 12:12-19)
1Ndibakashika pafwaafwi akuJelusalemu, bakashika kuBetefagi kuKalundu ka Olifi. Mpeeke Jesu wakatuma bashikwiiya bakwe bamwi bobilo 2akubaambila ayi, “Amuye mumushi ulya ngomutoobona. Mwashikabo, mulacana mbongolo kayaangitwe amwaana wa njiyo. Mushaangulule mushilete kuli ndime. 3Ono na umwi muntu amwiipushe pamakani aya, mumulwiite ayi, ‘Mwaami ulicite asho ncito.’ Lyalo utoomusuminisha.”
4Shoonse ishi shakacitika bweenka Lesa mbwaakaambila mulaluki mukulukulu ayi,
5“Ambila bantu bamundabala ya Siyoni ayi,
‘Amubone Mwaami wanu utoosa kuli ndimwe
cakulibombya, ee, ulitantite pambongolo,
ncakwiila pamwanaambongolo.’ ”#Seka 9:9
6Mpomunyaawo bashikwiiya bakaya akucita bweenka mbwaakabaambila Jesu. 7Bakatola mbongolo amwaana wa njiyo, bakayala shakufwala sha peculu pambongolo isho. Mpeeke Jesu wakatantaawo. 8Mpomunyaawo bantu baanji baanji bakayala shakufwala shabo sha peculu munshila. Abalo bamwi bakatema shikupu bashiyala munshila. 9Mpeeke bantu abo bakalinga panembo lyakwe Jesu abaabo bakalinga pesule bakatalika koolobesha ayi, “Aalumbaishikwe mwanaakwe Defedi! Ulicite coolwe uyo utoosa muliina lyakwe Lesa! Aalumbaishikwe Lesa kwiculu lya maculu!”#Kulu 118:25-26
10Ono Jesu ndyaakenjila muJelusalemu, bantu boonse bakakankamana. Lyalo bakeepusha ayi, “Anu ngani uyu?” 11Bantu baanji baanji balya bakakumbula ayi, “Uyu nguJesu mulaluki wa kuNasaleti mucishi ca Galili.”
Jesu mbwaakatanda beshimakwebo muŊanda yakwe Lesa
(Maako 11:15-19; Luka 19:45-48; Joni 2:13-22)
12Ono Jesu wakenjila muŊanda yakwe Lesa, akutandamo baabo boonse bakalinga kuulisha akuula. Wakapinoona matebulu a bantu bashikushinta maali ashuuna sha beshikuulisha mpolobe. 13Wakabalwiita ayi, “Cililembetwe ayi, ‘Ŋanda yangu ilaakwiitwa ayi ŋanda yakupaililaamo.’ Sombi mwebo mwayaalula yaba momwakuyubila beepi!”#Isa 56:7; Jele 7:11
14Mpomunyaawo boofu abalema myeendo, bakesa kuli Jesu muŋanda yakwe Lesa, mpeeke wakabashilika. 15Sombi bamatanjilili ba bapailishi abafundishi ba Milawo, ndibakabona shintu shikankamika ishi nshaakacita alimwi andibakanyumfwa banike bakalinga koolobesha muŊanda yakwe Lesa ayi, “Alumbaishikwe mwanaakwe Defedi!” bakakalala. 16Bakeepusha Jesu ayi, “Sa utoonyumfwa mbobatokwaamba banike aba?” Lakwe wakabakumbula ayi, “Ee, ndanyumfwa. Ono sa tamuna kubelengawo kale Malembo akwe Lesa akwaamba ayi, ‘Lesa wakabambila limwi ayi baana baniini alimwi abakateta bamulumbaishe.’ ”#Kulu 8:2 17Kuswawaawo Jesu wakabashiya akuswa mundabala iyo, waya kuBetani uko nkwaakaya mukoona.
Jesu mbwaakashingana cisamu ca mukuyu
(Maako 11:12-14, 20-24)
18Bushiku bwakaboolaawo macuunsacuunsa, Jesu ndyaakalinga kuboolela kuJelusalemu, wakanyumfwa nsala. 19Ono ndyaakabona cisamu ca mukuyu mweela nshila, wakayaako ayi mpashi inga wacanako nkuyu. Sombi wakacana taaku, kakuswitebo matewu. Mpomunyaawo wakaambila mukuyu uyo ayi, “Kuswa sunu utakacatiwo nkuyu lyobilo!” Lyalo cisamu cakeendililabo kuyuma. 20Ono bashikwiiya bakwe ndibakabona boobo, bakakankamana akwiipusha Jesu ayi, “Ino mukuyu uyu wafwambaana buyani kuyuma?” 21Jesu wakabakumbula ayi, “Ntoomulwiita calushinisho ayi na mulashoma cakutatonsha, inga mwacita bweenka mbuli mbondacita mukuyu uyu. Sombi teshi ceeci ceenka, mulakonsha nabi kwaambila kalundu aka ayi, ‘Swaawo apo mpoobete uye uliwaale mulweenge,’ cilaakucitika.#Mate 17:20; 1 Koli 13:2 22Na mulashoma, mulaakutambula cili coonse nceshi mukasenge kuli Lesa kwiinda mumipailo.”
Jesu mbobakamwiipusha pankusu shakwe
(Maako 11:27-33; Luka 20:1-8)
23Mpomunyaawo Jesu wakenjila muŊanda yakwe Lesa, ono ndyaakalinga kwiisha, bamatanjilili ba bapailishi abamaloba ba baJuda bakaya mukumwiipusha ayi, “Ino ninkusunshi nshoocite shakucita shintu ishi? Wakakupa nkusu shakucita bobulya ngani?” 24Alakwe Jesu wakabakumbula ayi, “Anebo ntoomwiipushawo mwiipusho womwi. Na munkumbule, anebo ndyeshi mulwiite wooyo wakampa nkusu shilengesha kwaamba ayi noocita shintu ishi. 25Ino ngani wakapa Joni nkusu shakwaamba ayi anoobombeka? Sa nguLesa na mbantu?” Mpeeke bakatalika kupikishanya beene abeene ayi, “Na twaambe ayi, ‘NguLesa,’ lakwe utokwaamba ayi, ‘Tamukwe kushomenanshi maswi ngaakalinga kwaamba?’ 26Sombi alimwi inga tatwaambi ayi, ‘Mbantu,’ ceebo bantu boonse balishi kwaamba ayi Joni Mubombeki wakalinga mulaluki.” 27Paceebo ceeco bakamukumbula ayi, “Cito na mbaani.” Lyalo Jesu wakabaambila ayi, “Anebo anu teshi mulwiite wooyo wakampa nkusu shakucita shintu ishi.”
Cikoshanyo ca baana basankwa bobilo
28Mpomunyaawo Jesu wakabalwiita cikoshanyo ayi, “Ino mutooyeeya buyani? Kwakalinga musankwa wakalinga kucite baana bobilo. Wakaya kumunene bantu akumwaambila ayi, ‘Mwanaangu, koya ukasebense mumuunda waminyansa sunu.’ 29Lakwe wakakumbula ayi, ‘Ndakaaka.’ Sombi pesule, wakaya kumuunda mukusebensa. 30Lyalo baishi bakaya kumwaana wabili akumwaambila maswi eenka ngobakaamba kumutaanshi. Lakwe wakakumbula ayi, ‘Ntooya nkasebense Ta,’ sombi taakwe kuya. 31Ino ngani pabaana bobilo aba wakacita bwakalinga kuyanda baishi?” Balo bakakumbula ayi, “Mutaanshi.” Mpeeke Jesu wakabaambila ayi, “Ntoomulwiita calushinisho ayi basonkeshi abafuule batootaanguna kwinjila muBweene bwakwe Lesa mwebo kamutana. 32Mukwiinga Joni Mubombeki wakesa mukumutondesha nshila ya bululami, ono mwebo tamukwe kumushoma. Basonkenshi abafuule bakamushoma, sombi mwebo nabi ndimwakabona boobo, tamukwe kusanduka kuswa kushibiibi shanu akumushoma.”#Luka 3:12; 7:29-30
Cikoshanyo ca balimi bakabweleka muunda wa minyansa
(Maako 12:1-12; Luka 20:9-19)
33Jesu wakabaambila ayi, “Amunyumfwe cikoshanyo acimwi. Kwakalinga muntu wakalima muunda wa minyansa, akuyakilako lushito mweela muunda. Wakakaba cilindi cakutyaninamo minyansa alimwi akuyaka katungu kalaamfu kakulindililamo muunda. Lyalo wakoobwelekesha balimi bamwi, akuya lweendo kucishi cimwi.#Isa 5:1-2 34Ono ciindi cakutebula shisepo ndicakashika, muntu uyo wakatuma basebenshi bakwe kubalimi ayi bakamupeewo shisepo sha mumuunda wakwe. 35Sombi balimi balya bakacata basebenshi bakwe akuumawo womwi, umwi bakamucaya alakwe umwi bakamuwaala mabwe. 36Kuswawaawo wakatuma abamwi basebenshi baanji kwiinda bataanshi, sombi abalo bakabacita bweenka ubo. 37Kumamanino, wakatumaako mwanaakwe musankwa, akwaamba ayi, ‘Mwanaangu lakwe balaakumupa bulemu.’ 38Sombi balimi balya ndibakabona mwaana uyo, bakatalika kulwiitana ayi, ‘Uyu ngweshi akapyane buboni boonse. Atumucaye, kwaamba ayi buboni boonse bukabe bwesu.’ 39Mpomunyaawo bakamucata, bamuwaala pansengwe lya muunda wa minyansa akumucaya.
40“Ono mwine muunda wa minyansa pakwisa, ulaakubacita buyani balimi abo?” 41Balo bakamukumbula ayi, “Ncakwiila ulaakucaya babiibi abo, akubweleka muunda kubamwi abo beshibakanoomupako shisepo paciindi ceelete.”
42Lyalo Jesu wakabeepusha ayi, “Sa tamukwe kubelengawo kale Malembo akwe Lesa akwaamba ayi,
‘Libwe bayaki ndibakakaka
lyakaba ndyelibwe lya mulikonko lya ŋanda,
libwe lisuniki abuumbi.
Mwaami Lesa ngowacita ceeci,
alimwi ncintu cikankamika abuumbi mumeenso esu?’#Kulu 118:22-23
43“Paceebo ceeco ntoomulwiita ayi mulaakunyaikwa Bweene bwakwe Lesa. Bulaakupekwa kumushobo umwi weshi ukacate shisepo sheelete. [ 44Uyo uwita palibwe ilyo, ulaakutyokooka, alimwi uyo ngweenga lyalokela, ulaakusansooka.”]
45Ono bamatanjilili ba bapailishi abaFalisi ndibakanyumfwa shikoshanyo ishi nshaakaamba, bakeshiba ayi wakalinga kwaamba mbabo. 46Aboobo, bakalinga kusuni kwaamba ayi bamucaate. Sombi bakaloonda bantu baanji abo bakalingaawo ceebo bakalinga kushoma ayi Jesu ngumulaluki.
Attualmente Selezionati:
Mateyo 21: BBBLI
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Lenje Bible with Deuterocanon © Bible Society of Zambia, 2003.
