Mateyo 19
19
Makani a kulekana
(Maako 10:1-12)
1Ono Jesu ndyaakamana kwaamba makani aya, wakaswaako kuGalili akuya mucishi ca Judeya kwitala lya Mulonga wa Joodani. 2Mpeeke bantu baanji baanji bakamukonkela. Lyalo wakabashilika kweenka uko.
3Mpomunyaawo baFalisi bamwi bakesa kuli Jesu mukumusunka ayi, “Sa cilasuminishikwa muMilawo muntu kuleka mukaakwe paceebo cili coonse?” 4Jesu wakakumbula ayi, “Sa tamuna kubelengaawo ayi kumatalikilo Lesa wakabalenga musankwa amwanakashi?#Mata 1:27; 5:2 5alimwi ayi, ‘Paceebo ceeco, musankwa ulaakushiya baishi abanyina akupankana amukaakwe. Lyalo bantu bobilo aba balaakuba mubili womwi.’#Mata 2:24 6Nkokwaamba ayi tababete bobilo ono, sombi baba mubili womwi. Aboobo bantu abo Lesa mbwaakabika pantu pomwi, muntu ateeleshi kubapansaanya.”
7Mpeeke baFalisi bakamwiipusha ayi, “Ino nceebonshi Mose ncaakaambila ayi musankwa ulyeelete kulembela mukaakwe nkalata yakumuleka, lyalo akumutanda?”#Duto 24:1-4; Mate 5:31 8Jesu wakabakumbula ayi, “Mose wakamusuminisha kuleka bamakaanu ceebo muli beshicimpamya, sombi teshi mbocakalinga ubo kumatalikilo. 9Ono ntoomulwiita ayi, muntu uli woonse uleka mukaakwe utakwe kucita bulale, akweeba umbi, wacita bulale.”#Mata 5:32; 1 Koli 7:10-11
10Lyalo bashikwiiya bakwe bakamwaambila ayi, “Anu na mbocibete ubo mucikwati, nkokwaamba ayi ncibotubo akuteeba.” 11Sombi Jesu wakabakumbula ayi, “Maswi aya taakumite kubantu boonse, sombi baabo bakapekwa kuswa kuli Lesa. 12Mukwiinga nkobali bantu batakoonshi kweeba mukwiinga mbobakashalwa. Nkobali abamwi batakoonshi kweeba ceebo bakacitwa boobo abantu. Nkobali bamwi alimwi abo bakakaka kweeba kwaamba ayi basebensele kabotu Lesa. Uyo weenga wacikonsha kukonkela kwiisha uku, akonkele.”
Jesu mbwaakapa coolwe baana baniini
(Maako 10:13-16; Luka 18:15-17)
13Bamwi bantu bakaleta baana baniini kuli Jesu kwaamba ayi abacaate amaansa akubapailila. Sombi bashikwiiya bakakalalila bantu abo. 14Mpomunyaawo Jesu wakabaambila ayi, “Amuleke baana baniini bese kuli ndime. Mutanoobakasha ceebo Bweene bwa kwiculu mbwa baabo bali mbuli baaba.” 15Lyalo wakabacata amaansa, mpeeke wakaswaawo.
Musankwa mubile
(Maako 10:17-31; Luka 18:18-30)
16Mpeeke umwi musankwa wakesa kuli Jesu akwiipusha ayi, “NoBafundishi, anu ncintunshi cibotu nceenjelete kucita kwaamba ayi nkabe abuumi butamaani?” 17Jesu wakakumbula ayi, “Ceebonshi utoonjiipusha paceeco cili kabotu? Kulibo Womwi uli kabotu. Na ulisuni kuba abuumi butamaani, kokonkela Milawo.” 18Lakwe wakeepusha ayi, “Njimilawonshi?” Jesu wakamukumbula ayi, “Utacaayi, utaciti bulale, uteepi, utapi bukamboni bwakubeca,#Kulo 20:13; Duto 5:17; Kulo 20:14; Duto 5:18; Kulo 20:15; Duto 5:19; Kulo 20:16; Duto 5:20 19lemeka baiso abanyoko, alimwi usune mubyo bweenka mboolisuni omwiine.”#Kulo 20:12; Duto 5:16; Bene Lefi 19:18 20Musankwa uyo wakakumbula ayi, “Milawo yoonse iyi ndaikonkela. Ino cimwi cacalaako nciinshi?”
21Jesu wakamwaambila ayi, “Na ulisuni kuba muntu ululeme, koya ukoolishe shintu shoonse nshoocite. Maali ngweshi ucaneemo ukaabile bakandu, lyalo ulaakuba abuboni kwiculu. Na umanishe kucita boobo, ndyeshi use unkonkele.” 22Musankwa uyo ndyaakanyumfwa boobo, wakaswaawo kaaungumene ceebo wakalinga mubile abuumbi. 23Lyalo Jesu wakaambila bashikwiiya bakwe ayi, “Ntoomulwiita calushinisho ayi, nciyumu abuumbi muntu mubile kwinjila muBweene bwa kwiculu. 24Ntoobooshaawo alimwi ayi, ncuubu ngamela kupula muliinso lya nyeleti kwiinda muntu mubile kwinjila muBweene bwakwe Lesa.”
25Bashikwiiya bakwe ndibakanyumfwa makani aya, bakakankamana abuumbi, mpeeke bakeepusha ayi, “Nkokwaamba ayi ngani eshi akapulushikwe?” 26Jesu wakabalanga akubaambila ayi, “Kubantu ici inga tacicitikiiwo, sombi kuli Lesa inga cacitika mukwiinga shoonse shintu shilakonsheka kuli nguwe.”
27Lyalo Pita wakakumbula ayi, “Amubone, swebo twakashiya shoonse akumukonkela. Ino swebo tulaakupekwanshi?” 28Jesu wakabaambila ayi, “Ntoomulwiita calushinisho ayi shintu shoonse ndyeshi shikalengwe cipya, MwanaaMuntu ndyeshi akekale pacuuna cakwe ca bulemu, amwebo nomukonkela ndime, mulaakwikala pashuuna shili likumi ashobilo. Mulaakoombolosha mishobo ili likumi ayobilo ya muIsilaeli.#Mate 25:31; Luka 22:30 29Uyo woonse wakashiya maanda, banandumi shakwe, banankashi shakwe, baishi, banyina, baana nabi myuunda ceebo ca liina lyangu, ulaakutambula shiinji abuumbi kwiinda sheesho nshaakashiya alimwi ulaakuba abuumi butamaani. 30Sombi baanji abo bataanshi balaakuba bacaalishi, abalo bacaalishi balakuba bataanshi.
Attualmente Selezionati:
Mateyo 19: BBBLI
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Lenje Bible with Deuterocanon © Bible Society of Zambia, 2003.
