Mateyo 18
18
Ngani munene pakati kesu?
(Maako 9:33-37; Luka 9:46-48)
1Paciindi ceenka ico bashikwiiya bakaya kuli Jesu mukumwiipusha ayi, “Ino ngani munene muBweene bwa kwiculu?”#Luka 22:24 2Mpeeke Jesu wakeeta mwanike akumwiimika pakati kabo. 3Lyalo wakabaambila ayi, “Ntoomulwiita calushinisho ayi na mubule kuba mbuli mwanike muniini wa mbuli wooyu, teshi mukenjile muBweene bwa kwiculu.#Maako 10:15; Luka 18:17 4Aboobo uyo woonse ulibombya mbuli mwanike muniini uyu, ngomunene muBweene bwa kwiculu. 5Uyo woonse utambula mwanike wa mbuli wooyu muliina lyangu, ulatambula ndime.
Shintu shitulengesha kubisha
(Maako 9:42-48; Luka 17:1-2)
6“Uyo woonse weenga walengesha womwi wa baaba banike baniini bashoma muli ndime ayi abishe, inga cabota kumwaangilila libwe linene lyakupelelaawo munshingo akumuwaala mulweenge lulaamfu. 7Mapensho kubantu ba mucishi ca panshi ceebo ca baabo balengesha babyabo kubisha! Shintu ishi shilyeelete kuboneka, sombi mapensho kubaabo bashilengesha.
8“Na lyaansa nabi mweendo wako wakulengesha ayi ubishe, utimbuleeko akuusowa. Mukwiinga ncibotu kwaamba ayi ukenjile mubuumi butamaani kootacite lyaansa nabi mweendo, kwiinda kwaamba ayi, ukawaalwe mumulilo utamaani amaansa obilo nabi myeendo yobilo.#Mate 5:30 9Na liinso lyako lyakulengesha ayi ubishe, liloboleemo ulisoowe. Mukwiinga ncibotu kwaamba ayi ukenjile mubuumi butamaani aliinso lyomwi, kwiinda kwaamba ayi ukawaalwe mumulilo utamaani ameenso obilo.#Mate 5:29
Cikoshanyo ca mbelele isowekete
(Luka 15:3-7)
10“Amucenjele ayi mutanyanshi nabi womwi wa baaba baana baniini. Ceebo ntoomulwiita ayi baanjelo baabo nkobali lyoonse kuli baTa bali kwiculu. [ 11Ceebo MwanaaMuntu wakesa mukupulusha basowekete.]#Luka 19:10
12“Ino mutooyeeya buyani? Na muntu kaacite mbelele mwaanda, ono yomwi yasoweka, sa inga taashiyi sheesho shili makumi osanwe aone alimwi ashosanwe ashone mutulundu, akuya mukuyandoola yeeyo yasoweka? 13Na weecana, ntoomulwiita calushinisho ayi ulakondwa abuumbi pambelele yomwi ilya, kwiinda sheesho shili makumi osanwe aone alimwi ashosanwe ashone shitakwe kusoweka. 14Mbweeke ubo Ishiwanu uli kwiculu taasuni kwaamba ayi, womwi wa baaba baana baniini asoweke.
Mbotweelete kucita na mukwabesu watubishisha
15“Na mukwanu wakubishisha, koya ukamulwiite cilubo cakwe. Na wakunyumfwila nkokwaamba ayi wamuboosha kumubili.#Luka 17:3 16Sombi na wabula kukunyumfwila, ambilaawo aumwi nabi bobilo uyaabo kwaamba ayi, ‘Makani aambwe pameenso a bakamboni bobilo nabi botatwe,’ kweelana ambokulembetwe mumaswi akwe Lesa.#Duto 19:15 17Ono na wakaka kubanyumfwila abalo, ulwiite bantu ba mucoonde. Ono na wakaka kunyumfwila abamucoonde boonse, amumucitebo anga ngumuntu wa kunsengwe nabi musonkeshi.
18“Ntoomulwiita calushinisho ayi cintu coonse nceenga mwaanga pacishi ca panshi, akwiculu koonse caangwa. Cili coonse nceenga mwaangulula pacishi ca panshi akwiculu cilaakwaangululwa.#Mate 16:19; Joni 20:23
19“Ntoomulwiita alimwi ayi na bobilo pakati kanu pacishi ca panshi basuminishanya pacintu ncebatoosenga, baTa bali kwiculu balaakubacitila. 20Mukwiinga apo pabungana bantu bobilo nabi botatwe muliina lyangu, anebo mpoondi pali mbabo.”
Cikoshanyo ca musebenshi utakwe kulekelela mubye
21Mpomunyaawo Pita wakesa mukwiipusha Jesu ayi, “Nkambo, mukwesu na wambishisha, inga ndamulekelela mankanda ongaye? Sa ngamankanda osanwe aobilo?” 22Jesu wakamukumbula ayi, “Tau, teshi mankanda osanwe aobilo, sombi mankanda makumi osanwe aobilo kufushikwa mankanda osanwe aobilo.#Luka 17:3-4#Mata 4:24
23“Ono Bweene bwa kwiculu bulikoshenye amwaami wakeeta basebenshi bakwe ayi bamubosheshe nkongole. 24Ndyaakatalikabo kubasesa, umwi uyo wakakweleta maali aanji bakamutola kumwaami. 25Ceebo taakalinga kucikonsha kuboosha nkongole, mwaami wakwe wakaamba ayi, musebenshi uyu ulyeelete kuulishikwa abakaakwe abana bakwe alimwi ashintu shoonse nshaacite kwaamba ayi nkongole iboole. 26Mpomunyaawo musebenshi uyo wakafukama kumwaami wakwe, akumusenga ayi, ‘Amunindileeko, ndaakumuboosesha nkongole yoonse.’ 27Lyalo mwaami wakwe wakamunyumfwila nkumbu, mpeeke wakamulekelela nkongole yoonse akumwaambila ayi anooya.
28“Sombi musebenshi uyo ndyaakaswa pansengwe, wakakumanya musebenshinyina ngwaakakweletesha maali aniinibo. Wakamucata, wamushina panshingo akumwaambila ayi, ‘Lipila maali ngowakakweleta!’ 29Ndyaakanyumfwa boobo, musebenshinyina wakafukama akumusenga ayi, ‘Nindileko, ndaakukubooshesha!’ 30Sombi lakwe wakakaka kumulekelela. Wakamwaangisha ayi kushikila akalipile nkongole.
31“Ono basebenshinyina bamwi ndibakabona cakacitika, bakakankamana akuba ansooni. Lyalo bakaya mukulwiita mwaami wabo makani aya. 32Mpomunyaawo mwaami wakwe wakeeta musebenshi uyo akumwaambila ayi, ‘Webo omusebenshi mubiibi! Nebo ndakakulekelela nkongole yoonse ilya ceebo wakansenga. 33Sa webo tewalinga kweelete kunyumfwila nkumbu musebenshinyoko bweenka mbondakakunyumfwila nebo?’ 34Mukucisa moyo mwaami uyo wakamutumya kubashilikaani kwaamba ayi bamwaange aane kushikila akabooshe nkongole yoonse ilya. 35Mboboobo, abalo baTa bali kwiculu mbweshi bakacite kumuntu womwi awomwi wa mulikoto lyanu, utalekeleli mukwabo amoyo woonse.”
Attualmente Selezionati:
Mateyo 18: BBBLI
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Lenje Bible with Deuterocanon © Bible Society of Zambia, 2003.
