Lukas 15
15
Suntu mengenai domba je nihau
(Mat. 18:12-14)
1Biasa'ah kawan panagih pajak, tuntang kawan uluh je badosa dumah mangguang Yesus mahining auh-Ah. 2Tapi uluh Farisi tuntang kawan guru Hukum Musa mangarunum, auh'ah: “Iye bakawal umba uluh je badosa tuntang kuman umba ewen.” 3Balalu Yesus mansanan suntu jituh akan ewen yetuh auh-Ah: 4“Eweh ih je tege intu helat ketun je mampelum saratus kungan domba, balalu nihau ije kungan te, tuntang tienpuluhtien tisa te ngalihi helu intu pulau pasir awi iye manggau je nihau te sampai sundau. 5Tuntang amun jadi iye sundau'ah, balalu iye metu'ah dengan hanjak. 6Balalu iye mimbit mangguang huma, iye masanan'ah akan karen kawal'ah, karen tetangga'ah sambil hamauh, Ayu itah barami-rami, awi domba ayungku je nihau te jadi aku manyundau'ah. 7Awi te Aku mansanan akam mu, kilau jite kea kahanjak intu sorga amun tege je biti uluh badosa batobat, labih hanjak bara tienpuluhtien uluh je bujur tapi dia batobat.”
Kahanjak manyundau logam je nihau
8Sama kea kilau uluh bawi je mingkes sapuluh duit logam tuntang nihau ije, balalu iye manggau'ah tapi amun dia mampelum sumbu'ah tuntang mamapas huma'ah balalu kea manggau ah dengan tutu-tutu sampai iye manyundau'ah. 9Limbas iye jadi manyundau'ah, balalu iye masanan akan karen kawal'ah, karen tetangga'ah sambil hamauh, Ayu itah barami-rami, awi ije duit logam ku te jadi aku sundau'ah. 10Yesus hamauh: “Kilau jite kea kahanjak kawan utusan Tuhan bara Allah intu sorga awi ije biti uluh je badosa jadi batobat.”
Yesus mangesah mengenai ije biti bapa manarima anak'ah je badosa
11Balalu Yesus mangesah ije kesah beken. Iye hamauh, Tege ije biti uluh je mingkes due biti anak hatue. 12Tuntang bapander ndai je tambusu te umba bapa'ah: Bapa, imbagi ndai karen panatau itah te je akan bagian akangku. Balalu bapa'ah mambagi karen panatau te akan karen anak'ah. 13Limbas pire-pire andau anak je tambusu te manjual lepah bagian ayu'ah balalu tulak namuei kejau intu daerah je beken. Jadi sampai kanih, intu daerah hete iye mampalepah duit'ah tuntang belum je mayi-mayi. 14Jadi uras lepah ndai duit'ah, lembut ndai intu daerah te wayah kala'u balalu iye manjadi belum pehe. 15Balalu iye tulak manggau uka bagawi tuntang iye bagawi umba uluh je tatau intu lewu te. Uluh je uka bagawi te manyuhu iye akan tana manjaga karen bawui'ah. 16Awi jatun uluh je manenga panginan aka'ah, awi kanai bala'u purak panginan bawui te akan panginan'ah. 17Balalu lembut ndai kanyasal'ah umba arepah, iye bapander umba arepah kabuat, puna are uluh je bagawi umba bapa ku are panginan'ah, tapi aku bagawi intu hetuh tau matei bala'u. 18Awi te aku buli ih mangguang bapa ku tuntang bapander umba iye: “Bapa, aku tuh jadi badosa umba Tuhan tuntang sala umba Bapa. 19Aku tuh dia patut ndai inyewut anak bapa. Awi te, tarima ih aku tuh akan uluh upahan bapa. 20Balalu iye mendeng tuntang tulak mangguang bapa'ah. Tapi metuh iye masih kejau bara huma, bapa'ah jadi nanture pandumah'ah tuntang ateiah inguntep dengan kamasi umba iye. Balalu Bapa'ah te tangkeru mangguang iye bapa kea mamaluk'ah tuntang mayium'ah. 21Anak jite bapander umba iye: Bapa, aku tuh jadi badosa umba Tuhan tuntang umba bapa, tuntang kea aku tuh dia patut inyewut anak bapa.” 22Tapi bapa'ah manyuhu kawan pambantuah, capatih! Imbit akan hetuh baju je tangka halap ah kepan baju te intu iye. Tuntang ajuk tisin intu tunjuk'ah tuntang kea masang sapatu intu pai'ah. 23Tuntang kea duan anak sapi je baseput te, patei ih tuntang itah pesta barami. Awi anak ku jadi haluli! 24Aku kira iye jadi matei. Tapi metuh tuh iye jadi haluli umba aku tuntang iye masih belum! Ku kira iye layang, tapi metuh tuh iye jadi buli intu huma: “Balalu ewen nampara barami-rami.” 25Metuh jite, anak je tambakas'ah metuh bagawi intu tana. Tapi metuh iye buli handak sampai akan huma, iye mahining auh suara suling tuntang lagu-lagu manari. 26Balalu, iye mantehau ije pambantu tuntang misek umba iye: “pesta narai je inguan ewen te? 27Balalu pembantu te manjawab, awi andim mu jadi dumah intu huma. Tuntang bapam mu manyuhu mampatei anak sapi je baseput akan pesta, awi iye tau dumah dengan barigas. 28Balalu lembut ndai kasingin anak te tuntang iye kea dia maku tame intu huma. Balalu, bapa'ah balua tuntang balaku iye tame. 29Tapi anak'ah manjawab dengan basingi, hining! Salama jituh aku jadi bagawi sama kilau buruh akam mu. Aku dia puji malanggar ije bewei inyuhummu. Tapi, bapa dia puji mampatei ije kungan anak kambing mangat aku tau barami umba karen kawal ku. 30Tapi anak mu te je jadi mampalepah panatau bapa umba kawan bawi lahung te, balalu bapa mampatei anak sapi je baseput aka'ah? 31Balalu Bapa te bapander umba iye, Anak ku, puna tutu ikau je halajur umba aku. Awi te, narai je aku tempu jite uras ikau tempu kea. 32Puna sapatut'ah itah te barami tuntang hanjak awi andim mu je jadi nihau layau tau haluli kea, Aku kira iye jadi matei. Tapi metuh tuh iye jadi haluli umba aku tuntang iye masih belum! Ku kira iye layang, tapi metuh tuh iye jadi buli intu huma!”
Attualmente Selezionati:
Lukas 15: AMGV
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Manuhing Bible by Beyond Translation is licensed under Creative Commons Attribution-ShareAlike 4.0 License.
