Lukas 11
11
Yesus majar mengenai balaku doa
(Mat. 6:9-13; 7:7-11)
1Intu ije andau Yesus metuh balaku doa intu ije uka. Limbas balaku doa, ije biti murid-Ah balaku umba-Iye: “Tuhan, ajar ih ikei kilenampi balaku doa, sama kilau Yohanes pampandui majar kare murid'ah.”
2Balalu Yesus hamauh umba ewen, amun ikau balaku doa, yetuh auh'ah:
Bapa ikei, imulia ih aram-Mu je barasih.
Karajaam-Mu dumah.
3Nenga akan ikei panginan je sacukup ah.
4Tuntang ampun ih ikei akan kasalan ikei, sama kilau ikei kea mangampun uluh je sala dengan ikei. Tuntang ela nantalua ikei kana coba akan manguan kasalan.
5Limbas te Yesus hamauh umba ewen, amun ikau tulak akan huma kawalmu intu bentuk alem tuntang hamauh denga'ah: Oi kawal, hatangan ih aku telu kabawak roti. 6Awi ije biti kawal ku salenga dumah akan humangku bara perjalanan'ah, tapi aku jatun panginan akan inenga ku aka'ah 7Tapi kawal je intu huma te hamauh: Ela nganggu aku. Awi aku jadi mangunci baun tunggang akan hamalem tuh, tuntang kea ikei hanak uras batiruh. Awi te, aku dia tau misik tuntang manenga akam mu metuh tuh. 8Yesus hamauh umba ewen, bahwa iye dia akan manenga akam mu roti hanya awi ikau kawal'ah. Tapi iye akan misik tuntang manenga roti kakare je ikau laku'ah awi kacangkal mu tuntang kahanyi mu. 9Awi te Aku mansanan akam mu: tatap ih balaku, maka ikau akan inenga narai je ikau laku. Tatap ih manggau, maka ikau akan mandinu'ah. Tatap ih ngatok, maka baun tunggang akan imbuka kea. 10Awi satiap uluh je balaku umba Tuhan, iye akan manarima'ah. Setiap uluh je manggau bara Tuhan akan mandinu'ah bara-Iye tuntang Tuhan akan mambuka baun tunggang akan satiap uluh je manggatokah. 11Awi pasti jatun bapa intu antara ketun je akan manenga handipe amun anak ah balaku lauk! 12Tuntang kea amun anak ah balaku tanteluh inenga'ah kala! 13Awi te ikau je papa, katawam kilenampi ikau manenga kare hal je bahalap akan anak mu, apalagi Bapamu je intu sorga je bahalap tutu akan manenga Roh Barasih akan ewen je balaku'ah.
Yesus labih kuat bara roh je papa
(Mat. 12:22-30; Mrk. 3:22-27)
14Huang ije andau, Yesus mambuhau roh je papa je jadi manampa ije biti uluh manjadi bisu. Limbah roh je papa buhau bara uluh te, maka iye tau ndai bapander. Are uluh je tege intu hete uras heran. 15Tapi pire-pire uluh intu kakare uluh are te hamauh sama arep'ah: “Yesus mahapan kuasa roh je papa tuntang rajan roh je papa yete Beelzebul, akan mambuhau kare roh je papa bara kalunen!”
16Tege kia uluh je handak ma'uji tuntang balaku mujisat bara sorga akan mambukti bahwa kuasa'ah barasal bara Allah. 17Tapi Yesus jadi katawan narai je imikir awi ewen, balalu Yesus hamauh umba ewen, amun masyarakat ije lewu kalahi sama arep, maka ewen akan hancur. Kilau te kea, amun satiap anggota ije kaluarga kalahi sama arep, maka ewen akan mangarak keluarga ewen. 18Amun roh je papa te kea tau hapisah tuntang malawan arep'ah kabuat, kilenampi'ah kea kerajaan'ah tau batahan? Awi ikau hamauh bahwa Aku mambuhau roh je papa mahapan kuasa Beelzebul. 19Amun Aku manguanah hapan kuasa Beelzebul, kilen nampi kah cara kawan murid mu mampuhau roh je papa te? Ewen kabuat ih je akan mambukti'ah bahwa tuduhan mu te dia bujur. 20Tapi Aku mahapan kuasa Allah akan mapuhau roh je papa tuntang jituh ih mambuktiah bahwa karajaan Allah jadi tege intu helat mu
21Tuntang kea Yesus mansanan suntu: Metuh ije biti uluh je kuat siap dengan kare sanjata'ah tuntang manjaga huma'ah, mangat uras sesuatu je iye tempu'ah uras aman. 22Tapi amun uluh je labih kuat hindai akan manantang'ah tuntang mangalah'ah, iye akan manduan uras sanjata'ah je iandal'ah tuntang iye akan mambagi kare ramu je induanah akan uluh beken.
23Awi te eweh bewei uluh je dia umba Aku bararti musuh Ku, tuntang eweh bewei je dia bagawi umba Aku bararti bagawi akan malawan Aku.
Haluli tinai roh je papa
(Mat. 12:43-45)
24Amun roh je papa jadi buhau bara ije uluh tuntang mananjung intu kare uka je benyem akan manggau uka'ah melai. Amun iye dia manyundauah, iye hamauh huang pikiranah, Aku akan haluli intu uka ku melai je sulakah. 25Katika iye haluli akan uluh je iye mangalihi sulakah, iye manampayah bahwa jatun tege ije uluh bewei je melai intu huang'ah. Uluh jite sama kilau ije huma je jadi imapas rasih tuntang bahalap. 26Balalu iye mimbit uju roh je papa jite tulak tuntang mimbit haluli uju roh je papa je beken bahkan labih papa bara roh je papa jite. Balalu uras roh je papa te tulak manyarung uluh te tuntang melai intu hete. Jadi kondisi akhir bara uluh jite kejau labih parah bara kondisi sulakah.
Yesus majar kilenampi manjadi bujur-bujur imberkat
27Katika Yesus mangajar hal jituh, ije biti bawi intu helat uluh are hamauh dengan nyaring: “Allah puna bujur mamberkati uluh bawi je jadi mamanak tuntang patusu Ikau!” 28Yesus hamauh: “Jite puna bujur, tapi akan kare uluh je mahining tuntang manumun auh bara Allah labih imberkat hindai!”
Uluh are balaku semacam tanda bara Yesus
(Mat. 12:38-42)
29Metuh uluh mangarumbung je mangaliling Yesus batambah are, Yesus mansanan akan ewen, ikau je belum metuh tuh papa, awi ikau balaku Aku manguan tanda akan mambuktiah bahwa Allah jadi manyuhu Aku. Tapi cuma ije ih akan ketun nanture yete kilau je tarjadi akan nabi Yunus zaman bihin. 30Narai je tarjadi umba nabi Yunus mambuktiah akan masyarakat kota Niniwe bahwa Allah jadi manyuhu'ah. Balalu kea narai je akan tarjadi intu hunjun-Aku, Anak Kalunen akan mambuktiah akam mu bahwa Allah jadi manyuhu Aku. 31Katika penghakiman, ratu negeri intu hila Selatan Israel akan mendeng umba dengan kare uluh je belum katika jituh, tuntang akan manuduh kare uluh je belum metuh andau jituh jadi manguan kasala'ah, awi iye dumah bara negeri je kejau akan mahining auh je pintar harati bara Raja Salomo. Aku mansanan akam mu bahwa ije uluh je labih hai bara Raja Salomo tege intu hetuh. Tapi ikau dia handak mahining'ah. 32Balalu kea katika penghakiman, kare uluh Niniwe kea akan mendeng umba dengan kare uluh je belum metuh tuh, tuntang ewen akan manuduh kare uluh je belum wayah tuh jadi manampa kasalan. Awi kare uluh Niniwe batobat katika Nabi Yunus Berkhotbah, tuntang Aku mansanan akam mu bahwa tege uluh je labih hai bara Nabi Yunus intu hetuh. Tapi ikau dia handak batobat.
Yesus majar mangenai kalawa tuntang kakaput
33Balalu Yesus hamauh, jatun tege uluh je mampelum sumbu balalu manyuhukan'ah atawa manutupah dengan bango. Sebalikah, iye ma'andakah intu hunjun uka'ah, mangat tiap uluh je tame intu huang huma tau mananture kalawa. 34Tuntang mata uluh yete sama kilau sumbu akan bitiah. Amun ije uluh tau mananture dengan balawa, uras bitiah kuntep dengan kalawa. Tapi amun uluh dia tau mananture kalawa, uras bitiah kuntep dengan kakaput. 35Awi jite, batawat-tawat ih, ela sampai kalawa intu huang arep mu manjadi kakaput. 36Jadi, amun uluh inguntep dengan kalawa intu satiap bagian bitiah tuntang jatun tege bagian je kaput, maka uluh jite akan kuntep dengan kalawa. Sama kilau ije sumbu mampalawa Ikau dengan kalawa je tarang.
Yesus maningak kare uluh Farisi tuntang kare Guru Hukum Musa
(Mat. 23:1-36; Mrk. 12:38-40; Luk. 20:45-47)
37Yesus maningak kare uluh Farisi tuntang kare guru Hukum Musa 38Uluh Farisi jite takijut katika mananture Yesus dia mamenyau lenge'ah sesuai dengan adat istiadat sahindai kuman. 39Balalu Tuhan Yesus hamauh denga: Ikau uluh Farisi puna batawat huang manumun adat istiadat je manampa ikau inampayah bujur intu matan uluh, tapi intu huang pikiranmu, ikau kuntep dengan bermacam-macam kapapan. 40Oi uluh je dia mangerti! Enkah Ikau mangatawan bahwa Tuhan je manampa bitim mu tuntang manampa atei pikiranmu? 41Jadi, jaga ih atei pikiranmu supaya tatap barasih dengan manenga narai je tege intu pikiranmu akan uluh susah.
42Oi kare uluh Farisi, ikau akan mangkeme kapehe hai, awi ikau gagal mamperlakukan uluh beken dengan adil tuntang gagal mangasihi Allah. Tapi ikau dengan batawat manenga sepersapuluhan bara kare rarampah tuntang kare bumbu dapurmu akan Allah. Yete labih bahalap amun Ikau manenga persapuluhan, tapi ela talingau akan memperlakukan uluh beken dengan adil tuntang mangasihi Allah.
43Puna papa ih akan ketun kare uluh Farisi, awi ketun handak munduk intu uka je terhormat intu kare huma ibadah tuntang ketun handak kare uluh bapander umba ketun dengan terhormat intu pasar. 44Oi kare uluh Farisi, ketun akan mangkeme kapehe je hai, awi ketun sama kilau kuburan je dia gitan. Uras uluh mananjung manangkalau'ah dia mangatawanah bahwa intu huang'ah tege uluh matei je manampa iye manjadi papa.
45Balalu tege ije biti uluh guru Hukum Musa hamauh umba Yesus: “Guru, katika Ikau mansanan hal-hal jite mengenai kare uluh Farisi te, ikau mahina ikei kea.”
46Yesus hamauh umba iye: Oi kare guru Hukum Musa, ikau akan mangkeme kapehe je hai awi ikau manenga are aturan akan kare uluh akan manumun'ah. Sama kilau ikau maandak kabehat intu hunjun bahun ewen je dia tau ewen mametun'ah. Tapi Ikau dia mangguwet ije jari bewei akan manguan ije taluh akan mandohop ewen. 47Oi kare guru Hukum Musa, ikau akan mandinu kapehe je hai awi ikau mamasang kare batu je bahalap akan mampahalap kuburan kare nabi je jadi impatei awi tatu hiangmu. 48Jadi, ikau masanan bahwa Ikau manumun narai je inguan awi tatu hiangmu. Amun dia, ikau dia akan mamasang kare batu nisan je bahalap akan mampahalap kuburan kare nabi je jadi impatei awi tatu hiangmu 49Awi jite ih, huang kabijak-Ah, Allah mansanan: “Aku akan manyuhu kare nabi tuntang rasul akam mu. Tapi sebagian bara ewen akam mu patei'ah tuntang sebagianah hindai akam mu ngapahe'ah. 50Awi jite, kare uluh intu zaman jituh akan batanggung jawab dengan pampatei uras nabi je jadi awi tatu hiangmu metuh sulak dunia. 51Tuntang Aku yakin bahwa Allah akan mahukum ketun dengan satiap pampatei je inguan awi tatu hiang ketun, nampara bara pampatei Habel je pangkasulakah sampai pampatei je terakhir'ah umba Zakharia, je impatei intu helat meja tuntang bangunan Huma Allah.
52Oi kare guru hukum Musa, ikau akan mandinu kapehe je hai awi ketun mahalang kare uluh sampai ewen dia mangatawan jalan je bujur mangguang Allah, ikau dia umba jalan jite tuntang ikau mangahana ewen je handak umba jalan te.”
53Katika Yesus jadi hamauh, kare uluh Farisi tuntang kare guru hukum Musa te uras basingi tutu tuntang ewen manenga are pertanyaan je bahali. 54Ewen handak manjebak Yesus akan mamander sesuatu je sala mangat ewen tau manuntut-Iye.
Attualmente Selezionati:
Lukas 11: AMGV
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Manuhing Bible by Beyond Translation is licensed under Creative Commons Attribution-ShareAlike 4.0 License.
