Di Mulakata 12
12
Baki’ Abram dasuro’ lamba’ kole’a Alatala
1Jaji barik manjarum i Yahuwe dinen lo’a baki’ Abram, “Se’ lamba’ko, marantangko lo’a negerinu, lo’a banuana amanu, lo’a arasairunnu,” ingka kenang. “Mamalinko lo’a banua to’ kutunjukangen lo’u,” ingka kenang. 2“Daiko kanturunannu to’ kupabayu’. To’ kuparaa asannu, to’ kuberkatiko. Malaloi lo’u ona’ tauen mandua’anga jalu maamen. 3Ti’en tau mando’ang pamondokang jalu maamen lo’u, daia dinen kuberkati. Ti’en tau mangutukiin lo’u, daia dinen kukutuki bea. Ambata gulungan banua bokanen ona’ mandua’ang kausa jalu maamen malaloi lo’u,” ingka kenang bayana i Yahuwe lo’a baki’ Abram.
4Jaji barik baki’ Abram tarangkat bea malola’ani paba’ina i Yahuwe lo’a. Tamba bea baki’ Lot dinen. Jaji nanga dinen umura baki’ Abram mamin tuju pulo’ limang taun. 5Jaji gulungan ambata suro’anna, ambata kamaamanna, ambata katio’anna yang dadua’angen inang di Haran daawa kausana. Daawa bea bainyena nanna anak kamanakanna, lamba’ lo’a Kana’an sampai mondok inang rabarik.
6Jaji barik mamin mondok inang, baki’ Abrampi lalo lo’a banua Sikem di akat kayu More dinen. Nanga dinen negeri dinen dalalako’i kole’a tau Kana’an. 7Jaji inang barik i Yahuwe paitang kalena lo’a baki’ Abram laloang manjarum, “Negeri di’en kudunjukang lo’a anak kanturunannu ona’,” ingka kenang. Jaji mamin dinen barik baki’ Abrampi laloang mamola kosan panutung pamindara itiang manyemba lo’a i Yahuwe yang maminen paitang kalena lo’a.
8Jaji dari inang barik lamba’ bapi manuju lo’a gulungan ukit maro timur lo’a banua Betel. Mondok inang barik, dapakadeng kakalang palamba’a antarana banua Betel nanna banua Ai. Banua Betel dinen maro barat, banua Ai dinen maro timur. Jaji inang barik dapola bapi kosan pamindaraan itiang manyemba lo’a i Yahuwe. Laloang mangalong daia lo’a asanna i Yahuwe inang. 9Mamin dinen lamba’ bapi maro lo’a daerah Negeb.
10Jaji di negeri Kana’an dinen arapar tauen, dadua’ rapar. Jaji lamba’ barik ira, lalo lo’a negeri Mesir. To’ lalako’ inang di banua tauen, kole’a kuat jaji rapara di Kana’an. 11To’ mondoka ira lo’a Mesir, manjarum baki’ Abram lo’a bainyena, “Jaji taan talingannu, manjarumak lo’u,” ingka kenang. “Daiko di’en bainye maamko. Kutamu iak. 12Ona’ di’en ati’enko dakita kole’a urang Mesiren tentu daasanak lakinu. Dauno’ak ona’. Daiko dakatio’ko, dala bainyeko kole’a tauen,” ingka kenang. 13“Jaji andian jalu to’ kupita lo’u. Ati’enko ona’ dakatoani tau, asanak sairunnu. Kaka’ku’, iko kenang, mainto’ dinen dapatku’ tio’ kole’u, maamak kole’u,” ingka kenang jaruma baki’ Abram lo’a bainyena.
14Jaji mondok inang barik lo’a Mesir, dakita barik dinen piang Sarai kole’a urang Mesiren, maam jaji batora. 15Dakita bea kole’a ambata suro’anna Raja Mesir laloang daawa dongona dinen, dajarumang piang Sarai lo’a rajaan. Mamudi lo’a kole’a bainye maama. Jaji barik piang Sarai dinen daawa jaji ilalam saona raja dinen, to’ datiang bainyena. 16Maam bea dinen rajaan lo’a baki’ Abram kole’a kakadakana lo’a piang Sarai. Dameang dinen ambata gulungan dombaan, ambata gulungan sapiin, ambata kaledai untaan laki nanna bainyeen. Dameang bea ambata gulungan suro’an babaka babainyeen. Maam jaji rajaan lo’a baki’ Abram.
17Poangsi insa’-insa’ launna ira inang lalako’a, apadis barik rajaan. Apadis bea suang saona, nanna samuana sama lalako’en di saona rajaan. Dadua’ sampar kausana. I Yahuwe manyuro’ apadis lo’da’ kole’a daalana dinen bainyena baki’ Abram. 18Jaji barik raja dinen manyuro’ madap dinen lo’a baki’ Abram, “Mai daiko na’annu manjarum terus terang lo’ku’ manjarumang lo’a bainyenu. Sampai daiko dinen maamu. 19Bainyenu sampai iasan iko sairunnu. Manyuro’ poang lo’ku’ sala’. Kuala barik itiang bainyeku’,” ingka kenang. “Na, ala bainyenu. Mamalinkin!” ingka kenang rajaan lo’a baki’ Abram. 20Mamin dinen daparinta bapi ambata suro’anna. Rabarik baki’ Abram nanna bainyena nanna gulungan ambata kamaamanna dasuro’ minsaluan dari negerina. Daantat bua nanna maamen kole’a suro’anna rajaan.
Attualmente Selezionati:
Di Mulakata 12: EBE
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright New Tribes Mission 1997
