Di Mulakata 11
11
Anak mantuariin mamola sao balangke ibo
1Jaji nanga dinen sarilao’pi jarum tauen, sabangon kausa jarumda’. 2Jaji barik dinen mamalin insang mamalin maro timur mainsitda’, dadua’ang barik tana’ rataan. Inang barik lalako’a. Asanna kosan dinen, Babilonia.
3Jaji lalako’a inang rabarik, manyari ramu to’ mamola sao. Jaji barik sijaruman ira, “Ramuna dinen, ipola iki’ batu bata. Tana’ lilinen itutung maam-maam mainto’ bakarasa,” ingka kenang. Rabarik intarana batu bataan dinen danu nanna aspalen mainto’ maama silakatana. 4Jaji manjarum bapi, “Se’ mamola banuaki’, mamola’ki’ sao yang balangkeen tompoka yang tatutuken lo’a suanen, mainto’ maama dongoka’,” ingka kenang. “Ada’ki’ tambor-amboren inyaunga galung suanen di’en,” ingka kenang sijarumanda’.
5Jaji nanga dinen datamuna tujuanda’ kole’a i Yahuwe, tador barik lo’a anak mantuariin to’ mamele banuaan nanna sao balangkeen inait yang dapolaan dinen. 6Jaji jarumi kalena, “Belejo anak mantuariin karajada’. Kole’a lalo sarilao’da’, jarumda’ seraan. Ti’ mamin awan dinen basada’, ai lagi’ ona’. Ai poang to’ dakarajaan pande kausa adari,” ingka kenang. 7Jaji manjarum, “Se’ tadorki’. Ikaru iki’ jarumda’ mainto’ na’anna sitamu sijarumanna, sama awa jarum diri’a,” ingka kenang i Yahuwe sama diri’a.
8Jaji tadora dinen, inang dambor-amboranga anak mantuariin sasara duniaan kole’a i Yahuwe. Tadang barik tauen mamola banua dinen. Na’an adari. 9Ialalo barik banua dinen dameang asan Babel.#11:9 Ratina jarum babel ilalam jarum Ibraniin, akabo. Kole’a inang di banua dinen dakaruna jarum tauen di duniaan manyuro’ tambor-ambora maira tatak banuaan inyaunga galung suanen.
Tutulanna baki’ Sem
10Jaji tutulanna baki’ Sem kenang. Duang taunen maminna danum raa’en, baki’ Sem mandua’ang anak babakaan, i Arpaksad asanna. Baki’ Sem mamin 100 taun umura nanga dinen. 11Maminna daparanakang baki’ Arpaksad dinen, baki’ Sem lagi’pi batamba umura 500 taun. Dari paranakanga baki’ Arpaksad dinen batamba bea babaka babainye anaka bayu’a sampai mondok lo’a matena.
12Baki’ Arpaksad dinen di umura 35 taun laloang mandua’ang anak babakaan, i Selah asanna. 13Maminna daparanakang baki’ Selah, baki’ Arpaksad dinen lagi’pi batamba umura 403 taun. Dari paranakanga baki’ Selah dinen batamba bea babaka babainye anaka bayu’a sampai mondok lo’a matena.
14Baki’ Selah dinen di umura 30 taun mandua’ang anak babakaan barik, i Eber asanna. 15Maminna daparanakang baki’ Eber, baki’ Selah masi batamba umura 403 taun. Dari paranakanga baki’ Eber dinen batamba bea babaka babainye anaka bayu’a sampai mondok lo’a matena.
16Jaji baki’ Eber dinen di umura 34 taun mandua’ang anak babakaan barik, i Peleg asanna. 17Maminna daparanakang baki’ Peleg dinen, baki’ Eber lagi’pi batamba umura 430 taun. Dari paranakanga baki’ Peleg dinen, batamba bea babaka babainye anaka bayu’a sampai mondok lo’a matena.
18Baki’ Peleg dinen di umura 30 taun mandua’ang anak babakaan barik, i Rehu asanna. 19Maminna daparanakang baki’ Rehu, baki’ Peleg lagi’pi batamba umura 209 taun. Dari paranakanga baki’ Rehu dinen batamba bea babaka babainye anaka bayu’a sampai mondok lo’a matena.
20Baki’ Rehu dinen di umura 32 taun mandua’ang anak babakaan, i Serug asanna. 21Maminna daparanakang baki’ Serug dinen, baki’ Rehu lagi’pi batamba umura 207 taun. Dari paranakanga baki’ Serug dinen batamba bea babaka babainye anaka bayu’a sampai mondok lo’a matena.
22Baki’ Serug dinen di umura 30 taun mandua’ang anak babakaan, i Nahor asanna. 23Maminna daparanakang baki’ Nahor, baki’ Serug lagi’pi batamba umura 200 taun. Dari paranakanga baki’ Nahor dinen batamba bea babaka babainye anaka bayu’a sampai mondok lo’a matena.
24Baki’ Nahor dinen di umura 29 taun mandua’ang anak babakaan, i Terah asanna. 25Maminna daparanakang baki’ Terah, baki’ Nahor lagi’pi batamba umura 119 taun. Dari paranakanga baki’ Terah dinen batamba bea babaka babainye anaka bayu’a sampai mondok lo’a matena.
26Baki’ Terah dinen di umura 70 taun mandua’ang anak babakaan talu. Ialalo asanna i Abram, i Nahor, i Haran.
27Jaji tutulan kanturunanna baki’ Terah kenang. Talu anaka, baki’ Abram, baki’ Nahor, baki’ Haran. Jaji baki’ Haran dinen mandua’ang anak babakaan, i Lot asanna. 28Jaji, mate barik baki’ Haran dinen inang di banua asala di tio’api amana. Banuana dinen Ur asanna di bagian Babilonia.
29Jaji baki’ Abram nanna baki’ Nahor arainye duana. Bainyena baki’ Abram, i Sarai asanna. Bainyena baki’ Nahor dinen, arainye lo’a anaka arina. I Milka asanna, anaka baki’ Haran. Dua anaka baki’ Haran dinen babainyeen. Yang sera bapi i Yiska asanna. 30Jaji piang Sarai dinen tau tamanang. Kosan anaka.
31Jaji barik baki’ Terah dinen tarangkat marantang banua Ur yang di Babilonia dinen. Yang daawaan dinen baki’ Abram, dawa bea inantuna dinen nanna baki’ Lot ampuna dinen. Jaji barik lamba’ ira manuju lo’a Kana’an. Mondok lo’a banua Haran, jaji barik lalako’pi inang.
32Jaji barik umura baki’ Terah dinen dua ratus lima taun. Laloang mate baki’ Terah barik inang di banua Haran.
Attualmente Selezionati:
Di Mulakata 11: EBE
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright New Tribes Mission 1997
