Mátyo 1
1
Basáŋ bá nyákə́ bá Yésu Krísto
1Ɛláŋgú ɛ́ basáŋ bá nyákə́ bá Yésu Krísto nânə́ ɛ́ bílíní. Yésuwə a fí á njaʼ ŋ kə̂ŋ Devídə, Devídə mɔ́ pə́ a fí á njaʼ ŋ Ábrahâmə.
2Ábrahâmə a bílí sáŋ mú Áysikə. Áysikə a bílí sáŋ mú Jekɔ́bə. Jekɔ́bə a bílí sáŋ mú Júda na bǎn-bá-nyǎ bá mɔ. 3Júda na mwalân m mɔ Táma bá yɛ́ Pɛrɛ́sə na Zɛ́ra, Pɛrɛ́sə a bílí sáŋ mú Hɛ́sɛrɔnə. Hɛ́sɛrɔnə a bílí sáŋ mú Rámə. 4Rámə a bílí sáŋ mú Amínádabə. Amínádabə a bílí sáŋ mú Náshɔnə. Náshɔnə a bílí sáŋ mú Sálmɔnə. 5Sálmɔnə na mwalân m mɔ Úriya bá yɛ́ Bówasə. Bówasə na mwalân m mɔ Rútə bá yɛ́ Óbɛdə. Óbɛdə a bílí sáŋ mú Jɛ́sɛ. 6Jɛ́sɛ a bílí sáŋ mú kə̂ŋ Devídə.
Kə̂ŋ Devídə na mwalân mú Úriya bá yɛ́ Sólómonə. 7Sólómonə a bílí sáŋ mú Rihóbówamə. Rihóbówamə a bílí sáŋ mú Abíja. Abíja a bílí sáŋ mú Ásafə. 8Ásafə a bílí sáŋ mú Jehósháfatə. Jehósháfatə a bílí sáŋ mú Jehóramə. Jehóramə a bílí sáŋ mú Úsiya. 9Úsiya a bílí sáŋ mú Jótamə. Jótamə a bílí sáŋ mú Áhasə. Áhasə a bílí sáŋ mú Hɛsɛkáya. 10Hɛsɛkáya a bílí sáŋ mú Manásɛ. Manásɛ a bílí sáŋ mú Ámɔnə. Ámɔnə a bílí sáŋ mú Josáya. 11Josáya a yɛ́ Jɛkóniya na bǎn-bá-nyǎ bá mɔ bá búmân. Ɛ́ bílí á púndá ɛyə̌ baʼ bá Ísrɛl bá wáníní njum na Baʼ bá Bábílɔnə, Baʼ bá Bábílɔnə bá tómbwání ti bá kánání bɔ́ á ɛ́kumbu ɛ́ bɔ ɛ́ Bábílɔnə.
12Á púndá ɛyə̌ mínán mísə́sə̌n mí mə́ní ɛ túm, kə́ŋ ta á púndá ɛyə̌ bá yɛ́ní Yésuwə, nâ basáŋ bá nyákə́ bá Yésuwə bá bílíní: Jɛkóniya a bílí sáŋ mú Shyáltyɛ́lə. Shyáltyɛ́lə a bílí sáŋ mú Zɛrúbabɛlə. 13Zɛrúbabɛlə a bílí sáŋ mú Ábyudə. Ábyudə a bílí sáŋ mú Elyákimə. Elyákimə a bílí sáŋ mú Ázɔ. 14Ázɔ a bílí sáŋ mú Zádɔkə. Zádɔkə a bílí sáŋ mú Ákimə. Ákimə a bílí sáŋ mú Ɛ́lyudə. 15Ɛ́lyudə a bílí sáŋ mú Ɛlíyɛ́sa. Ɛlíyɛ́sa a bílí sáŋ mú Mátanə. Mátanə a bílí sáŋ mú Jekɔ́bə. 16Jekɔ́bə a bílí sáŋ mú Josɛ́fə. Josɛ́fə a bílí njúm mú Meríyə́. Meríyə́ mɔ́ a yɛ́ Yésuwə awə̌ bá bəŋní Krísto.
17Áfánikə̌, ɛ́yî ɛ́ lúfú nána butya á púndá ɛ́ Ábrahâmə kə́ŋ ta á púndá ɛ́ kə̂ŋ Devídə sí láŋ nyɔnyi dyǔm na ɛ́nîn. Butya á kə̂ŋ Devídə kə́ŋ ta á púndá ɛyə̌ bá kánání Baʼ bá Ísrɛl á Bábílɔnə, á púndá ɛyə̌ bá wáníní njum, sí láŋ pə́ nyɔnyi dyǔm na ɛ́nîn. Sí láŋ nyɔnyi dyǔm na ɛ́nîn ɛ́pə́pə̂ butya á púndá ɛyə̌ bá kánání Baʼ bá Ísrɛl á Bábílɔnə á púndá ɛyə̌ bá wáníní njum kə́ŋ ta á púndá ɛyə̌ bá yɛ́ní Yésuwə.
Liyá lí Yésu Krísto
18Nânə́ liyá lí Yésuwə lí bílíní. Meríyə́ nyǎ mú Yésuwə a bílí wukɔn ábə́ wú sî m mə̌ ɛ́ bí múmân. A bílí ɛwándɛ́ ɛ́ Josɛ́fə. A lâ ɛ wə́ Josɛ́fə bá tímbí ɛ́ yəmb nána a dí bitî bíbɛ̂, á ngínya ɛ Mudî ámə́ n Sáŋí. 19Á ɛ́tútú nána Josɛ́fə a bílí mɔʼ a mbâ, a bíliyǎ ɛ́ sa álí wúkí Meríyə́ wusɔ́n. Áfánikə̌, a m mə̌ ɛ́ maʼ á nlə́m m mɔ nána mú mɛsí wúwə́ bû á kfun átin. 20Ndé ngə a bílíní ɛ kaní nsam mû, áŋgɛl ɛ Dyǔ ɛ pilí á mɔ́ á nlú-mú-wúyɔ́. Ti áŋgɛl ɛni ɛ pɔŋí mɔ́ nána, “Á Josɛ́fə, nja mú Devídə, ɛ si báŋ álí nǔŋ Meríyə́ ngə mwalân ŋ wə, á ɛ́tútú nána á ngínya ɛ Mudî ámə́ n Sáŋí yɔ̂ a kúbíní wutû. 21Meríyə́ á yɛ́ mǎ mumân, ɛ́ bə mɔ́ dǐn lí Yésuwə, á ɛ́tútú nána á shuŋgɛ́ baʼ bá mɔ á wúbî wú bɔ.” 22Misam mínán mísə́sə̌n mí bwə́lání álí lwínjí biyala ábə́ Dyǔ lí lúmání nlakuwa a mudî nána,
23“Wúkáni! Wukɔn ábə́ wú nan bíyá wə́ múmân wú kú wútû,
wú yɛ́ mǎ mumân,
bá bəŋákí mɔ́ Imánuwɛlə.”
Dǐn lî lí dí yándá nána, “Dyǔ lí dí na sə́.” 24Á púndá ɛyə̌ Josɛ́fə a wúmúní á wuyɔ́, a bwəlí ngə áŋgɛl ɛ pɔŋíní mɔ́ nána a bwə̂. A nuŋí Meríyə́ ngə mwalân m mɔ. 25Ndé kə́ŋ ta áfə́ Meríyə́ a yɛ́ní mwǎn m mɔ, bû Josɛ́fə bá sî n bwəlá máwə́. Ti Josɛ́fə a bəkí mwǎn ani dǐn lí Yésuwə.
Attualmente Selezionati:
Mátyo 1: bwt
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
