Mátyo 2
2
Baláŋ-bá-títí bá fí á pɛsi ɛyə̌ dúlu lí nyíní álí paʼ ɛ́ bə̌ Yésuwə ɛdúbɛ́
1Bá yɛ́ Yésuwə á nkí m Bɛ́tlɛhɛ̂mə, á mbú ɛ Judéya, á púndá ɛyə̌ Hɛ́rɔdə a bílíní kə̂ŋ. Á mbís ɛ púndá duŋgu lí bâ ábə́ bá bílí baláŋ-bá-títí álí bí misam, bá fí á pɛsi ɛyə̌ dúlu lí nyíní álí paʼ á Jerúsálɛmə, nkí n nə̂n. 2Ngə bá pílíní á Jerúsálɛmə, bá kɔ́ndɛ́ nána, “Áfə́ mwǎn awə̌ bá yɛ́ní kə̂ŋ ɛ Baʼ bá Júda a díní? Sí míní títí á pɛsi ɛyə̌ dúlu lí nyíní ɛ́yə́ ɛ́ lúfú nána a yátání. Á ɛ́tútú ɛ́yî yɔ́ sí pílíní álí bə mɔ́ ɛdúbɛ́.” 3Ngə kə̂ŋ Hɛ́rɔdə a wúkíní yə̌ ɛ́yə́ bá byábíní, ɛ́ tákí mɔ́ á nlə́m jǐta. Ndúm ɛni ɛ takí pə́ baʼ básə́sə̌n á Jerúsálɛmə. 4Hɛ́rɔdə a bumí baprîsə bánə̂n na balɛ̂ bá mbéndá básə́sə̌n, ti a kɔndɛ́ bɔ́ nána, “Áfə́ Ani awə̌ Dyǔ lí Wɔ́kílíní ǎ yátání?” 5Bá púshú mɔ́ nána, “Á nkí m Bɛ́tlɛhɛ̂mə á mbú ɛ Judéya. Nlakuwa a mudî a Dyǔ a tilí nána,
6‘Nyə́ Baʼ bá Bɛ́tlɛhɛ̂mə á ndɔʼ ɛ Júda, nkí mû n dí nkí nfɔ́ á mikí mínîn mísə́sə̌n á ɛ́kumbu ɛ́ Júda ámə́ n dí nkí m mbímbí.
Á ɛ́tútú nána á wútitîn wú nyə mɔʼ nfɔ́ á fí awə̌ á dyɛ́lɛ́ baʼ bá myə bá ɛ́kumbu ɛ́ Ísrɛl.’”
7Ngə Hɛ́rɔdə a wúkíní nâ, a bəŋí mbum á kfun átin na baláŋ-bá-títí, ti a kɔndɛ́ bɔ́ púndá ɛyə̌ títí ɛni ɛ nyítíní. 8Ti a lúmí bɔ́ á Bɛ́tlɛhɛ̂mə nána, “Nyí kə̂, nyí sâʼ mwǎn ani bwâm, njí nyí míní mɔ́ nyí bwə̂ mi m bî, álí bwə nána mi pə́ n tiŋgání mɔ́ ɛ kə ɛ́ bə̌ ɛ́dúbɛ́.” 9Ngə bá wúkíní yə̌ ɛ́yə́ kə̂ŋ a byábíní, bá bútí pə́ ɛkə ɛ́ bɔ. Ti bá míní pə́ títí ɛni ɛyə̌ bâ m məní ɛ mín á pɛsi ɛyə̌ dúlu lí nyíní. Títí ɛni ɛ bílí bɔ́ ɛ kə á wúsú. Títí ɛni ɛ kǐ kə́ŋ kə́ŋ ɛ tyə́ á mǐn á fǔm ábə́ bá yɛ́ní mwǎn. 10Ngə bá míníní títí ɛni munyɛŋgɛ n túmbí bɔ́ átin. 11Bá kwílí á ndáʼ, bá míní mwǎn na nyǎ Meríyə́, bá shúmí mabɔ́ŋ áshí á mwǎn ani álí bə mɔ́ ɛdúbɛ́. Bá bə́kí jabeya álə́ bá pánání mwǎn. Jabeya lî lí bílí, gôl, yǔm-ɛ́lí-wɔ́ ɛ́yə́ ɛ́ wɔ́ŋí ɛshwinj ɛ́ mbâ ɛ́yə́ bá bəŋní fránkínsɛns, na míya.#2:11 Gôl: ɛki ɛ́yə́ bá súmní á ɛkfúna ngáʼ álí lúfú nána Yésuwə á bílí kə̂ŋ. Fránkínsɛns: ɛ́ bílí lifû álə́ bá bílíní ɛ bwəlan álí bə̌ Dyǔ jabeya. Míya: ɛ́ bílí lifû álə́ bá bílíní ɛ bwəlan álí tambú mimbimba. 12Ngə bá málíní álí bə mwǎn ani ɛdúbɛ́, bá túmbí á mbuka mpə́pə̂ álí tim á ɛ́kumbu ɛ́ bɔ, á ɛ́tútú nána Dyǔ lí bə́kí bɔ́ ndaki á nlú-mú-wúyɔ́ nána bá si tǐm mbí á Hɛ́rɔdə.
Bá bfúlání Yésuwə, bá kánání mɔ́ á ɛ́kumbu ɛ́ Íjiptə
13Á púndá ɛyə̌ baʼ ábə́ bá láŋ títí bá mə́ní ɛ kə̌, áŋgɛl ɛ Dyǔ ɛ pɔŋí Josɛ́fə á nlú-mú-wúyɔ́ nána, “Wumú, ɛ nûŋ mwǎn na nyǎ nyí bfúl, nyí kə̂ á Íjiptə, nyí dyɛ̂ á wə́ kə́ŋ ta á púndá ɛyə̌ m pɔŋní nyə́ nána nyí fálu á wə́, á ɛ́tútú nána Hɛ́rɔdə á lúm bâ álí paʼ mwǎn ɛ sa álí búlú mɔ́.” 14Josɛ́fə a wumú wudû bû, a nuŋí mwǎn na nyǎ bá búkú álí kə á Íjiptə. 15Bá dyɛ́ áwə́ kə́ŋ ta á púndá ɛyə̌ Hɛ́rɔdə a wúlíní. Múnán m bwə́lání álí lwínjí biyala ábə́ Dyǔ lí lúmání nlakuwa a mudî nána, “N lúmí ndúm á mwǎn m myə nána, a nyít á ɛ́kumbu ɛ́ Íjiptə.”
Bá búlú mikə́ŋgə́ á Bɛ́tlɛhɛ̂mə
16Ngə Hɛ́rɔdə a yə́mbíní nána baláŋ-bá-títí bá səŋí mɔ́, a kfwí jǐta. A lúmí sója ɛ́ mɔ á Bɛ́tlɛhɛ̂mə na á pɛ́si ɛ mbú ɛni ɛsə́sə̌n nána bá búlu bǎn bá bumân básə́sə̌n ábə́ bá bílí mimbvú míbɛ̂ li kə áshí. Hɛ́rɔdə a bwəlí nâ álí bwə nána a tɛ́ŋgɛn púndá ɛyə̌ baláŋ-bá-títí bá kɔ́sɛ́ní ɛ pɔŋ nána bá kɔ́sɛ́ ɛ́ mín títí ɛ́yə́ ɛ́ lúfú liyá lí Yésuwə. 17Ɛ́yî ɛ́ bwə́lání nâ, álí lwínjí biyala ábə́ Dyǔ lí lúmání nlakuwa a mudî Jɛrimáya nána,
18“Baʼ bá wúkí ɛsakí na liji lí ngínya álə́ lí bílí ɛ fí á Ráma, ngə Rashɛ́lə a bílíní ɛ jǐ bǎn bá mɔ.
Baʼ bá bílí mɔ́ ɛ pyətí nlə́m ndé a púshuwǎ álí makú líji á ɛ́tútú nána bǎn bá mɔ bâ m mə̌ ɛ́ wá.”
Josɛ́fə, Meríyə́ na Yésuwə bá fálú á Íjiptə bá kí á Názárɛtə
19Hɛ́rɔdə a wúlíní, áŋgɛl ɛ Dyǔ ɛ pilí á Josɛ́fə á nlú-mú-wúyɔ́ á púndá ɛyə̌ bá bílíní wə̂ á Íjiptə. 20Ti áŋgɛl ɛ pɔŋí mɔ́ nána, “Wumú, nǔŋ mwǎn na nyǎ, nyí tîm mbǐ á ɛ́kumbu ɛ́ Ísrɛl, á ɛ́tútú nána Hɛ́rɔdə na baʼ ábə́ bá bílí ɛ́ sa álí búlú mwǎn bá mə́ ɛ wá.” 21Ngə Josɛ́fə a wúkíní nâ, a latí byə̌m, a nuŋí mwǎn na nyǎ, ti bá tímbí mbí á ɛ́kumbu ɛ́ Ísrɛl. 22Ndé ngə Josɛ́fə a wúkíní nána Ákɛ́lɔsə a mə̌ ɛ shuman á wudya wú sáŋ m mɔ Hɛ́rɔdə ngə kə̂ŋ á mbú ɛ Judéya, bɔŋ wú kúbí mɔ́ álí kə á wə́. Áŋgɛl ɛ Dyǔ ɛ pɔŋí mɔ́ misam mípə́pə̂ á nlú-mú-wúyɔ́. Ɛ́yî ɛ́ bwə́lí mɔ́ a kǐ á pɛsi ɛ mbú ɛ Gálilî. 23Yɔ̂ a kǐní á nkí ámə́ bá bəŋní Názárɛtə. Ɛ́yî ɛ́ bwə́lání nâ álí lwínjí biyala ábə́ Dyǔ lí lúmání balakuwa bá mudî tɛ́ŋgɛnɛ Yésuwə nána, “Bá bəŋ mɔ́ mɔ a Názárɛtə.”
Attualmente Selezionati:
Mátyo 2: bwt
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
